in ,

តើខ្ញុំដឹងថា ខ្ញុំបានទទួលសេចក្ដីសង្គ្រោះបានដោយរបៀបណា?

How Do I Know I’m Saved?

កិច្ចការ ១៦:៣១ «ចូរ​ជឿ​ដល់​ព្រះ​អម្ចាស់​យេស៊ូវ​គ្រីស្ទ​ទៅ នោះ​នឹង​បាន​សង្គ្រោះ​ហើយ»។

យ៉ូហាន ៣:១៦ «ដ្បិត​ព្រះ​ទ្រង់​ស្រឡាញ់​មនុស្ស​លោក ដល់​ម្ល៉េះ​បាន​ជា​ទ្រង់​ប្រទាន​ព្រះ​រាជ​បុត្រា​ទ្រង់​តែ១ ដើម្បី​ឲ្យ​អ្នក​ណា​ដែល​ជឿ​ដល់​ព្រះ​រាជ​បុត្រា​នោះ មិន​ត្រូវ​វិនាស​ឡើយ គឺ​ឲ្យ​មាន​ជីវិត​អស់កល្ប​ជានិច្ច​វិញ»។

រ៉ូម ៣:២៨ «ដ្បិត​យើង​ខ្ញុំ​អាង​ថា មនុស្ស​បាន​រាប់​ជា​សុចរិត ដោយ​សារ​ជំនឿ គឺ​មិន​មែន​ដោយ​ការ​ប្រព្រឹត្ត​តាម​ក្រឹត្យវិន័យ​ទេ»។

ហេតុ​ផល​ដែល​សាវ័ក យ៉ូហាន បាន​កត់ត្រា​នៅ​កណ្ឌ​គម្ពីរ​យ៉ូហាន​គឺ «ដើម្បី​ឲ្យ​អ្នក​រាល់​គ្នា​បាន​ជឿ​ថា ព្រះយេស៊ូវ​ជា​ព្រះ​គ្រីស្ទ គឺ​ជា​ព្រះរាជ​បុត្រា​នៃ​ព្រះ​ដ៏​ពិត ហើយ​ឲ្យ​អ្នក​រាល់​គ្នា​បាន​ជីវិត ដោយ​សារ​ព្រះ​នាម​ទ្រង់ ដោយ​មាន​ជំនឿ» (យ៉ូហាន ២០:៣១)។ សរុប​សេចក្តី​មក យើង​អាច​សន្និដ្ឋាន​បាន​យ៉ាង​ច្បាស់​ថា រាល់​ឯក​សារ​ទាំង​អស់ នៅក្នុង​ព្រះ​គម្ពីរ​សញ្ញាថ្មី​គឺ៖ យើង​បាន​សង្គ្រោះ ដោយ​សារ​ជំនឿ​ជឿ​លើ​អង្គ​ព្រះ​យេស៊ូវ​គ្រីស្ទ។ ចូរ​ផ្ចង់ចិត្ត​របស់​យើង​ដោយ​យកចិត្ត​ទុក​ដាក់​ទៅ​លើ​ព្រះ​គ្រីស្ទ​ក្នុង​កណ្ឌ​គម្ពីរ​ដំណឹង​ល្អ​ដែល​មាន​ដូច​ខាង​ក្រោម​៖យ៉ូហាន ម៉ាថាយ ម៉ាកុស លូកា ហើយ​នៅក្នុង​ព្រះ​គម្ពីរ​ទាំង​មូល។ ចូរ​សម្លឹង​មើល​ដោយ​ផ្ដោត​អារម្មណ៍​របស់​លោកអ្នក​ទៅ​កាន់​ព្រះ​គ្រីស្ទ ហើយ​ទទួល​ការ​ថ្លែង​ប្រាប់​ថា​«ព្រះ​យេស៊ូវ​គ្រីស្ទ​គឺ​ជា​អម្ចាស់» ហើយ​បន្ទាប់មក​ទៀត ចូរ​និយាយ​អំពី​អារម្មណ៍​របស់​លោកអ្នក​ទៅ​កាន់​ព្រះ​ថា៖ «ខ្ញុំ​ទទួល​ទ្រង់ ខ្ញុំ​ស្រឡាញ់​ទ្រង់ ទ្រង់​គឺជា​ព្រះ​ពិត​របស់​ខ្ញុំ​, ទ្រង់​គឺ​ជា​ព្រះអម្ចាស់​របស់​ខ្ញុំ ហើយ​ទ្រង់​ពិត​ជា​ទ្រព្យ​សម្បត្តិ​របស់ខ្ញុំ»។ ចូរ​អធិស្ឋាន​លន់តួ​បែប​យ៉ាង​នោះ​ចុះ​។ ចូរ​និយាយ​ឲ្យ​ខ្លួន​ឯង​បាន​ឮ​នូវ​អ្វី​ដែល​លោកអ្នក​កំពុង​និយាយ​ចុះ។ ចូរ​ប្រាប់​កិច្ចការ​ទាំង​អស់​នោះ​ទៅ​កាន់​អ្នក​ដទៃ​ផង។ ចូរ​និយាយប្រាប់​ការ​នេះ​ទៅ​កាន់​ប្តី​ប្រពន្ធ​របស់​លោកអ្នក ចូរ​និយាយ​ការ​នេះ​ទៅកាន់​កូនៗ​របស់​លោក​អ្នក ហើយ​ចូរ​និយាយប្រាប់​ការ​នេះ​ទៅ​កាន់​មិត្ត​ភក្តិ​របស់​លោក​អ្នក​ថា «ព្រះ​យេស៊ូវ​គឺជា​ព្រះ​របស់​ខ្ញុំ»។

ព្រះ​គម្ពីរ​បាន​លើក​ឡើង​ថា គ្មាន​នរណា​ម្នាក់​អាច​និយាយ​ថា «ព្រះ​យេស៊ូវ​គឺ​ជា​ព្រះអម្ចាស់» ដោយ​មិន​មាន​ព្រះ​វិញ្ញាណ​បរិសុទ្ធ​បាន​នោះ​ឡើយ។ តើ​នេះ​មិន​មែន​ជា​រឿង​ដ៏​អស្ចារ្យ​ទេ​ឬ​អី? គ្មាន​នរណា​អាច​និយាយ​ថា «ព្រះ​យេស៊ូវ​គឺ​ជា​ព្រះ​អម្ចាស់» ដោយ​ខ្លួន​ឯង​បាន​ទេ។ ដូច្នេះ បើ​សិន​លោកអ្នក​និយាយ​ការ​នេះ ហើយ​វា​ពិត​ជា​មាន​អត្ថន័យ​ដូច​ដែល​លោក​អ្នក​បាន​លើក​ឡើង​មែន នោះ​ពិត​ជា​មាន​ន័យ​ថា ព្រះ​ជាម្ចាស់​កំពុង​ធ្វើ​ការ​នៅ​ក្នុង​ជីវិត​របស់​លោក​អ្នក​យ៉ាង​ជាក់​ច្បាស់​ហើយ ពោលគឺ​លោកអ្នក​មាន​ព្រះ​វិញ្ញាណ​បរិសុទ្ធ​មក​គង់​នៅ​ជាមួយ។

ដូច្នេះ តើ​អ្វី​ទៅ​ជា​ជំនឿ និង​ការ​ជឿ​ដូច​នេះ? ក្នុង​កណ្ឌគម្ពីរ យ៉ូហាន ១:១២ មាន​ចែង​ថា «ប៉ុន្តែ អស់​អ្នក​ណា​ដែល​ទទួល​ទ្រង់ គឺ​អស់​អ្នក​ដែល​ជឿ​ដល់​ព្រះ​នាម​ទ្រង់ នោះ​ទ្រង់​បាន​ប្រទាន​អំណាច ឲ្យ​បាន​ត្រឡប់​ជា​កូន​ព្រះ»។ ការ​ទទួល​យក និង​ការ​ទទួល​ជឿ​គឺ​ជា​ការ​បក​ស្រាយ​ប្រទាក់​គ្នា​ទៅ​វិញ​ទៅ​មក ហើយ​រីឯ​ការ​ទទួល​យក​មាន​ន័យ​ថា ពេល​ដែល​ទ្រង់​យាង​មក​គង់​នៅ​ក្នុង​ចិត្ត​របស់​លោកអ្នក​ទុក​ជា​ព្រះ​សង្គ្រោះ ជា​ព្រះ​អម្ចាស់ និង​ជា​ទ្រព្យសម្បត្តិ ហើយ​ជា​អង្គ​ប្រឹក្សា​យោបល់ នោះ​លោកអ្នក​នឹង​មិន​បដិសេធ​ទ្រង់​ឡើយ។ លោកអ្នក​ទទួល​យក​នូវ​រាល់​អ្វីៗ​ទាំង​អស់​ដែល​ព្រះ​ជាម្ចាស់​បាន​សម្រេច​នៅ​ក្នុង​ព្រះ​គ្រីស្ទ។ ការ​ទទួល​យក​គឺ​ជា​ការ​ស្វាគមន៍ និង​ការ​ចុះ​ចូល​ចំពោះ​ទ្រង់។ ព្រះ​យេស៊ូវ​បាន​មាន​បន្ទូល​ថា «ខ្ញុំ​ជា​នំប៉័ង​ជីវិត អ្នក​ណា​ដែល​មក​ឯ​ខ្ញុំ នោះ​នឹង​មិន​ឃ្លាន​ទៀត​ឡើយ ហើយ​អ្នក​ណា​ដែល​ជឿ​ដល់​ខ្ញុំ ក៏​មិន​ត្រូវ​ស្រេក​ដែរ» (យ៉ូហាន ៦:៣៥)។ ហេតុ​នេះ​ហើយ​បាន​ជា​ការ​ជឿ​គឺ​ជា​ការ​ស្វែង​រក​ទ្រង់ ដើម្បី​បំពេញ​ការ​ស្រេកឃ្លាន។ ឬ​ក៏​ជា​ការ​ព្រម​ទទួល​យក​ការ​ចាក់​បង្ហូរ​នូវ​ព្រះ​គុណ​ដែល​ហូរ​ចេញពី​អ្វី​ដែល​ទ្រង់​បាន​ធ្វើ​នៅ​លើ​ឈើ​ឆ្កាង ហើយ​ព្រម​ទទួល​ស្គាល់​ការ​នោះ​ថា ទ្រង់​អាច​បំពេញ​រាល់​ការ​ស្រេក​ឃ្លាន​ទាំង​អស់​បាន។

ព្រះ​ជាម្ចាស់​នៃ​ពិភព​លោក​ទាំង​មូល​នេះ​បាន​ធ្វើ​ឲ្យ​ចិត្ត​គំនិត​របស់​អ្នក​មិន​ជឿ​ខ្វាក់ ក្នុង​ការ​រាំង​ស្ទះ​ពួកគេ​កុំ​ឲ្យ​មើល​ឃើញ​ពន្លឺ​នៃ​ដំណឹង​ល្អ​នៃ​សិរីល្អ​របស់​ព្រះគ្រីស្ទ។ ដូច្នេះហើយ អ្វី​ដែល​យើង​បាន​មើលឃើញ​​ពេល​ដែល​ព្រះអង្គ​បើក​ភ្នែក​ឲ្យ​យើង​បាន​ឃើញ​ថា ព្រះគ្រីស្ទ​គឺ​ពោរ​ពេញ​ទៅ​ដោយ​សិរីល្អ។ ព្រះ​គ្រីស្ទ​គឺ​ជា​រូបអង្គ​នៃ​ព្រះ។ ព្រះ​គ្រីស្ទ​គឺ​ជា​មនុស្ស​ដ៏​ពិសេស​អស្ចារ្យ​ដែល​ផែនដី​នេះ​មិន​ធ្លាប់​មាន​ពី​មុន​មក​ឡើយ ហើយ​ជា​ព្រះ​សង្គ្រោះ​ដ៏​អស្ចារ្យ ជា​ព្រះ​អម្ចាស់​ដ៏​ឧត្ដុង្គឧត្ដម ជា​គ្រូ​បង្រៀន​ដ៏​ឆ្នើម ជា​ទី​ប្រឹក្សា​ដ៏​ល្អ​ប្រសើរ​ណាស់ ជា​មិត្ត​សម្លាញ់​ដ៏​ស្និទ្ធស្នាល​បំផុត។ ទាំង​អស់​នេះ​ហើយ គឺ​ជា​អ្វី​ដែល​ជំនឿ​ទទួល​បាន​ចេញ​ពី​ព្រះ​គ្រីស្ទ​ក្នុង​ការដែល​ទទួល​ជឿ។

ទំនង​បុគ្គល​ដែល​បាន​សួរ​សំណួរ​ទាំងនេះ​ធ្លាប់​បាន​គិត​រួចមក​ហើយ​អំពី​ខគម្ពីរ​ដែល​បាន​លើក​ឡើង​ទាក់​ទង​នឹង​ការ​ល្បងល​ជំនឿ​នៅ​ក្នុង​ជីវិត​របស់​យើង​។ ហើយ​យើង​ក៏​អាច​និយាយ​អំពី​ការ​ទាំង​នោះ​បាន​ផង​ដែរ (ប្រហែល​នៅ​ក្នុង​ពេល​វេលា​មួយ​ជាក់លាក់ ឬ​នៅ​ពេល​ក្រោយៗ​ទៀត) ប៉ុន្តែ​ខ្ញុំ​នឹង​គ្រាន់តែ​លើក​ឡើង​ថា​កណ្ឌគម្ពីរ​យ៉ូហាន​ទី១​គឺ​ត្រូវ​បាន​សរសេរ​បង្ហាញ​ប្រាប់​ដោយ​ផ្ដល់​ឲ្យ​ជា​ច្រើន​នូវ​ការ​ល្បងល។ យើង​អាច​សរុប​សេចក្តី​ដូច​ត​ទៅ៖ តើ​ជីវិត​លោកអ្នក​បាន​ឆ្លុះ​បញ្ចាំង​ពី​តម្លៃ​លើ​ព្រះ​គ្រីស្ទ ដែល​លោកអ្នក​ពិត​ជា​បាន​ទទួល​យក​ជា​ព្រះ​សង្គ្រោះ​ដែរ​ឬ​ទេ? ផលផ្លែ​និង​ទង្វើ​មិនមែន​ជា​អ្វី​ដែល​នាំ​ឲ្យ​ព្រះ​ជាម្ចាស់​រាប់​លោកអ្នក​ជា​សុចរិត​នោះ​ឡើយ។ ដើម​ឈើ​នៃ​ជំនឿ​គឺ​ជា​ដើមឈើ​ដ៏​ល្អ។ ផលផ្លែ​គឺ​ជា​អំណះអំណាង​ដែល​បញ្ជាក់​ថា​ដើមឈើ​នោះ​ពិត​ជា​ល្អ​ពិត​មែន។ ពេល​ដែល​យើង​និយាយ​វែកញែក​នឹង​បកស្រាយ​អំពី​ចំណុច​ល្អ​នៅ​ត្រង់​កន្លែង​នេះ យើង​មិន​សំដៅ​លើ​ភាព​ល្អ​ឥត​ខ្ចោះ​នោះ​ឡើយ។ យើងខ្ញុំ​គិត​ថា មាន​មនុស្ស​ជា​ច្រើន​ប្រាកដ​ជា​មាន​ការ​ស្ទាក់ស្ទើរ​តប់ប្រមល់​ជាមួយ​ខ្លួនឯង​ត្រង់​ថា តើ​ខ្ញុំ​ពិតជា​បាន​សង្គ្រោះ​មែន​ឬ​អត់ ? ដោយ​ព្រោះ​ពួកគាត់​មិន​មាន​ភាព​ច្បាស់លាស់​ទាក់ទង​ទៅ​នឹង​ការ​យល់​ដឹង​អំពី​ការ​រីក​ចម្រើន​លូតលាស់​របស់​គ្រីស្ទបរិស័ទ រួម​ទាំង​របៀប​ដែល​អំពើ​បាប​កំពុង​តែ​ដំណើរ​ការ។ ដូច្នេះ យើងខ្ញុំ​សូម​បញ្ចប់​នៅ​តែ​ត្រឹម​នេះ៖ «តែ​បើ​យើង​រាល់​គ្នា​ដើរ​ក្នុង​ពន្លឺ​វិញ ដូច​ជា​ទ្រង់​ក៏​គង់​ក្នុង​ពន្លឺ​ដែរ នោះ​យើង​មាន​សេចក្ដី​ប្រកប​នឹង​គ្នា​ទៅ​វិញ​ទៅ​មក ហើយ​ព្រះ​លោ​ហិត​នៃ​ព្រះ​យេស៊ូវ​គ្រីស្ទ ជា​ព្រះ​រាជ​បុត្រា​នៃ​ទ្រង់ ក៏​សម្អាត​យើង​រាល់​គ្នា ពី​គ្រប់​អំពើ​បាប​ទាំង​អស់» (១យ៉ូហាន ១:៧)។ ការ​ដើរ​ក្នុង​ពន្លឺ​គឺ​ជា​ការ​ដ៏​ចាំបាច់​ណាស់! ព្រះ​លោហិត​របស់​ព្រះ​យេស៊ូវ​សម្អាត​យើង​ចេញ​ពី​អំពើបាប​ទាំង​អស់ ប្រសិន​បើ​យើង​ដើរ​ក្នុង​ពន្លឺ។ តើ​នេះ​មាន​ន័យ​យ៉ាង​ដូចម្តេច៖ ការ​ដើរ​ក្នុង​ពន្លឺ​គឺ​ជា​ការ​ដ៏​ល្អ​ឥត​ខ្ចោះ​មែន​ឬ? មិន​មែន​ទេ! ដោយ​ព្រោះ​ថា​នឹង​គ្មាន​អំពើបាប​ណា ដើម្បី​ឲ្យ​សម្អាត​ទៀត​ឡើយ។ ដូច្នេះ ការ​ដើរ​ក្នុង​ពន្លឺ​មាន​ន័យ​មួយ​ផ្សេង​ទៀត។

សូម​បន្ត​អាន​បន្ថែម​ទៀត «បើ​សិន​ជា​យើង​និយាយ​ថា យើង​គ្មាន​បាប​សោះ នោះ​ឈ្មោះ​ថា​យើង​បញ្ឆោត​ដល់​ខ្លួន ហើយ​សេចក្តី​ពិត​មិន​ស្ថិត​នៅ​ក្នុង​យើង​ទេ»។ ម្យ៉ាង​វិញ​ទៀត យើង​មិន​បាន​ដើរ​ក្នុង​ពន្លឺ។ ការ​ដើរ​ក្នុង​ពន្លឺ​នឹង​មិន​មាន​ការ​បោក​បញ្ឆោត​ឡើយ។ ការ​ដើរ​ក្នុង​ពន្លឺ​នឹង​នាំ​លោកអ្នក​ឲ្យ​មើល​ឃើញ។ តើ​លោក​អ្នក​ឃើញ​អ្វី? បើ​លោក​អ្នក​ឃើញ​នូវ​អំពើ​បាប​ដែល​លោកអ្នក​ទើប​តែ​បាន​ប្រព្រឹត្ត ហើយ​ចុះ​តើ​លោកអ្នក​គួរ​នឹង​ធ្វើ​យ៉ាង​ដូច​ម្តេច​ជាមួយ​នឹង​អំពើបាប​ទាំង​នោះ? នៅ​ក្នុង​ខ៩​បាន​លើក​ឡើង​ថា «​បើ​យើង​លន់តួ​បាប​វិញ នោះ​ទ្រង់​មាន​ព្រះ​ហឫទ័យ​ស្មោះ​ត្រង់ ហើយ​សុចរិត ប្រយោជន៍​នឹង​អត់​ទោស​បាប​ឲ្យ​យើង នោះ​ទ្រង់​នឹង​សម្អាត​យើង ពី​គ្រប់​អំពើ​ទុច្ចរិត​ទាំង​អស់​ផង»។

ដូច្នេះ មាន​មនុស្ស​មួយ​ចំនួន​គិត​ថា ការ​ដើរ​ក្នុង​ពន្លឺ​ទំនង​ជា​មាន​ន័យ​ថា ខ្ញុំ​មិន​អាច​ដើរ​ក្នុង​ពន្លឺ​បាន​ទេ។ ខ្ញុំ​មិន​អាច​ឈប់​ប្រព្រឹត្ត​អំពើ​បាប​បាន​ទេ។ វា​មិន​ដូច្នោះ​ទេ! នោះ​មិន​មែន​ជា​អត្ថន័យ​នៃ​ការ​ដើរ​ក្នុង​ពន្លឺ។ ការ​ដើរ​ក្នុង​ពន្លឺ​មាន​ន័យ​ថា លោក​អ្នក​យល់​ដឹង​អំពី​ដំណឹង​ល្អ​យ៉ាង​ពិត​ប្រាកដ ហើយ​យល់​ពី​ភាព​បរិសុទ្ធ​របស់​ព្រះ​ជាម្ចាស់​យ៉ាង​ច្បាស់ យល់​ពី​ការ​អាក្រក់​នៃ​អំពើបាប​យ៉ាង​ច្បាស់ ហើយ​ពេល​ដែល​លោកអ្នក​ភ្លាត់​ស្នៀត​ក្នុង​ការ​ធ្លាក់​ក្នុង​សេចក្តី​ល្បួង​នៃ​អំពើ​បាប នោះ​លោកអ្នក​នឹង​ប្រតិកម្ម​ភ្លាមៗ​ដោយ​និយាយ​ថា «ខ្ញុំ​ស្អប់​ការ​នេះ​ណាស់ ឲ្យ​ខ្ញុំ​សុំទោស​ព្រះ​វរបិតា សូម​ទ្រង់​អត់ទោស​បាប​ឲ្យ​កូន​ផង»។ លោកអ្នក​នឹង​លន់តួ​អំពើបាប​នោះ ហើយ​លោកអ្នក​នឹង​ទទួល​បាន​ការ​លើក​លែង​ទោស ហើយ​បន្ត​រស់នៅ​សម្រាប់​ព្រះ​អម្ចាស់ ដែល​ទ្រង់​ជា​ទ្រព្យសម្បត្តិ​ដ៏​ធំ​មហិមា​ទាក់ទង​នឹង​ព្រះ​គុណ​ដែល​ទ្រង់​បាន​ផ្តល់​មក​ដល់​លោកអ្នក។

សរុប​សេចក្តី​មក ខ្ញុំ​ចង់​លើកឡើង​ថា ការ​ធានា​សេចក្ដី​សង្គ្រោះ​គឺ​ជា​អំណោយទាន​ពី​ព្រះ​វិញ្ញាណ​បរិសុទ្ធ «អ្នក​រាល់​គ្នា​មិន​បាន​ទទួល​និស្ស័យ​ជា​បាវ​បម្រើ ឲ្យ​ត្រូវ​ភ័យ​ខ្លាច​ទៀត​ឡើយ គឺ​បាន​ទទួល​និស្ស័យ​ជា​កូន​ចិញ្ចឹម​វិញ ដោយ​ហេតុ​នោះ​បាន​ជា​យើង​ស្រែក​ឡើង​ថា ឱ! អ័ប្បា ព្រះ​វរបិតា​អើយ! ហើយ​ព្រះ​វិញ្ញាណ​ទ្រង់​ក៏​ធ្វើ​បន្ទាល់​នឹង​វិញ្ញាណ​យើង​ថា យើង​ជា​កូន​របស់​ព្រះ» (រ៉ូម ៨:១៥)។ ពេល​ដែល​លោក​អ្នក​ស្រែក​ឡើង​ថា «ឱ! អ័ប្បា ព្រះ​វរបិតា ព្រះយេស៊ូវ ព្រះអម្ចាស់​អើយ!» នោះ​គឺ​ជា​ការ​ដែល​ព្រះ​វិញ្ញាណ​បរិសុទ្ធ​បាន​អះអាង​ជា​មួយ​នឹង​វិញ្ញាណ​របស់​លោក​ថា​ជា​បុត្រាបុត្រី​របស់​ព្រះ​ជាម្ចាស់​ហើយ។ ដូច្នេះ ចូរ​ទូល​សូម​នូវ​អំណោយ​ទាន​នោះ​ចុះ។​ចូរ​ទូល​សូម​ឲ្យ​ទ្រង់​ផ្តល់​នូវ​អំណោយ​ទាន​នៃ​ការ​ធ្វើ​បន្ទាល់​ដោយ​ផ្ទាល់​របស់​ទ្រង់​ដែល​ថា លោក​អ្នក​ជា​កូន​របស់​ព្រះ​អង្គ។

អ្នកជឿ​ស្គាល់​អំពើបាប​របស់​ខ្លួន​ច្បាស់​ណាស់។ តើ​ពួក​គាត់​អាច​ដឹង​ថា ខ្លួន​ពិត​ជា​បាន​ទទួល​សេចក្ដី​សង្គ្រោះ​ដោយ​របៀប​ណា? លោក​គ្រូ​កំពុង​តែ​លើក​ទឹក​ចិត្ត​ដ៏​អស់​អ្នក​ដែល​តយុទ្ធ​លើ​ការ​ធានា​នេះ។

និពន្ធដោយ៖ លោកគ្រូ John Piper
បកប្រែដោយ៖ ​លោក ទេព រ៉ូ និង​លោក ឈាង បូរ៉ា
កែសម្រួលដោយ៖ លោកស្រី ឡូញ ស្រីរដ្ឋ និង ក្រុមការងារ ផ្លូវពិត
ដកស្រង់ខ្លះៗចេញពី www.desiringgod.org ដោយមានការអនុញ្ញាត។ Plovpit.com

តើអ្នកចូលចិត្តអត្ថបទនេះទេ?

មតិយោបល់

ឆ្លើយ​តប

អាសយដ្ឋាន​អ៊ីមែល​របស់​អ្នក​នឹង​មិន​ត្រូវ​ផ្សាយ​ទេ។ វាល​ដែល​ត្រូវ​ការ​ត្រូវ​បាន​គូស *

Loading…

0

ទ្រង់​ជា​ព្រះគ្រីស្ទ ជា​ព្រះរាជបុត្រា​នៃ​ព្រះ

​យក​ព្រះ​គម្ពីរ​ធ្វើ​ជា​គោល