គេហទំព័រ Bible Gateway បានសង្កេតឃើញថា កណ្ឌគម្ពីរ ភីលីព ៤:១៣ គឺជាខគម្ពីរមួយដែលពេញនិយមយ៉ាងខ្លាំង ព្រោះមានមនុស្សជាច្រើនបានអានខគម្ពីរនេះ បើប្រៀបធៀបទៅនឹងខគម្ពីរផ្សេងៗទៀតនៅក្នុងព្រះគម្ពីរទាំងមូល។
«ខ្ញុំអាចនឹងធ្វើគ្រប់ទាំងអស់បានដោយសារព្រះគ្រីស្ទដែលទ្រង់ចម្រើនកម្លាំងដល់ខ្ញុំ» (ភីលីព ៤:១៣)។
ប៉ុន្តែខ្ញុំគិតថា មានមនុស្សច្រើនចូលចិត្តខគម្ពីរនេះយ៉ាងខ្លាំង ទំនងមកពីពួកគាត់មិនទាន់បានយល់ពីអត្ថន័យដើមនៅឡើយ ហេតុដូច្នេះហើយបានជាពួកគាត់អនុវត្តខគម្ពីរនោះខុស។ ខគម្ពីរនេះមានសេចក្ដីពិតដ៏ល្អៗជាច្រើន ប៉ុន្តែយើងក៏ត្រូវមើលពីគុណសម្បត្តិមួយចំនួនពីខគម្ពីរនេះដែរ៖
គុណសម្បត្តិ៧យ៉ាងដែលយើងគួរគិតពិចារណា
១. ដំបូង ខគម្ពីរនេះមិនបានបង្រៀនថា ព្រះជាម្ចាស់នឹងជួយយើងក្នុងការប្រព្រឹត្តិអំពើបាបឡើយ។ ព្រះជាម្ចាស់មិនមែនជាដើមហេតុនៃអំពើបាបទេ។ បាបកើតចេញពីខាងសាច់ឈាមរបស់យើង។ នៅក្នុងឃ្លាដែលថា «គ្រប់ទាំងអស់» មិនបានរាប់បញ្ចូលទាំងអ្វីៗដែលព្រះជាម្ចាស់ស្អប់ ឬក៏អ្វីដែលប្រឆាំងនឹងលក្ខណសម្បត្តិរបស់ទ្រង់ឡើយ។
២. ខគម្ពីរនេះមិនមែនមានន័យថា ខ្ញុំអាចធ្វើអ្វីៗដែលលើសពីច្បាប់ធម្មជាតិនោះទេ។ ឧទាហរណ៍ ការលោតរំលងសមុទ្រអាត្លង់ទិច ឬក៏បក់ដៃហើរដូចសត្វចាប ហើយអាចហោះទៅកាន់ឋានព្រះច័ន្ទទេ។ ខគម្ពីរនេះមិនបានបង្រៀនថា ខ្ញុំអាចធ្វើការអស្ចារ្យបាននោះទេ។ តាមពិត នៅក្នុងឃ្លាដែលថា «គ្រប់ទាំងអស់» រាប់បញ្ចូលតែអ្វីៗដែលសាមញ្ញៗនៅក្នុងជីវិតរបស់យើង ដែលព្រះជាម្ចាស់បានត្រាស់ហៅយើងឲ្យមកធ្វើតែប៉ុណ្ណោះ។
៣. ខគម្ពីរនេះមានន័យថា ខ្ញុំអាចធ្វើគ្រប់អ្វីៗទាំងអស់ដែលព្រះជាម្ចាស់បានគ្រោងទុកឲ្យខ្ញុំធ្វើ។ ខ្ញុំអាចនឹងធ្វើនូវអ្វីៗដែលព្រះជាម្ចាស់បានត្រាស់ហៅឲ្យខ្ញុំធ្វើ។ ចំពោះឃ្លាដែលថា «គ្រប់ទាំងអស់» គឺយើងត្រូវតែយល់ថា គ្រប់អ្វីៗទាំងអស់ គឺសំដៅទៅលើអ្វីៗដែលព្រះបន្ទូលរបស់ព្រះអង្គបានផ្ដល់អត្ថន័យឲ្យ។
៤. ខគម្ពីរនេះមិនមែនមានន័យថា ខ្ញុំអាចបោះបង់ទំនួលខុសត្រូវរបស់ខ្ញុំចោលដោយគ្រាន់តែពឹងលើព្រះគុណ ដែលរួមមានដូចជា ព្រះបន្ទូល និងពិធីលៀងព្រះអម្ចាស់នោះឡើយ។ល។ យើងអាចនិយាយម៉្យាងទៀតបានថា ប្រសិនបើខ្ញុំគ្រាន់តែអង្គុយដោយមិនធ្វើអ្វីសោះ នោះមានន័យថា ខ្ញុំនឹងមិនអាចស្គាល់កម្លាំងនេះបានឡើយ។ ដើម្បីឲ្យមានបទពិសោធន៍ទាក់ទងនឹងអំណាចអធម្មជាតិនេះបាន គឺខ្ញុំត្រូវតែសង្វាតដោយយកចិត្តទុកដាក់ក្នុងការស្វែងយល់ពីព្រះគុណព្រះជាម្ចាស់។
៥. ខគម្ពីរនេះមិនមែនមានន័យថា ខ្ញុំលែងមានទំនួលខុសត្រូវក្នុងការលន់តួបាបរបស់ខ្ញុំ ក៏ដូចជាការការប្រែចិត្តនោះឡើយ។ ប្រសិនបើលោកអ្នកមានអំពើបាបនៅក្នុងជីវិតរស់នៅរបស់លោកអ្នក ដែលលោកអ្នកមិនទាន់បានលន់តួ ឬក៏មិនទាន់បានផ្លាស់ប្រែចិត្តនៅឡើយ នោះលោកអ្នកនឹងបាត់បង់អំណរនៅក្នុងជីវិតរបស់លោកអ្នកជាមិនខាន។ ការប្រព្រឹត្តិអំពើបាប និងសេចក្ដីអំណរ មិនអាចនៅក្នុងដួងចិត្តតែមួយបាននោះទេ។ ជាការពិតណាស់ នៅក្នុងជីវិតរស់នៅលើផែនដីនេះ យើងមិនអាចមានភាពល្អឥតខ្ចោះបានឡើយ ហើយជារឿយៗ យើងក៏ប្រព្រឹត្តិអំពើបាបនៅក្នុងជីវិតរបស់យើងផងដែរ ប៉ុន្តែប្រសិនបើមានអំពើបាបដែលខ្ញុំបានប្រព្រឹត្តិម្ដងហើយម្ដងទៀត នោះមានន័យថា ខ្ញុំនឹងមិនអាចមានសេចក្ដីអំណរបានឡើយ ទោះបីជាកាលៈទេសៈរបស់ខ្ញុំល្អប៉ុណ្ណាក៏ដោយ។
៦. ខគម្ពីរនេះមានន័យថា ខណៈពេលដែលខ្ញុំរស់នៅក្នុងជីវិតជាគ្រីស្ទបរិស័ទ គឺខ្ញុំត្រូវតែទទួលស្គាល់ថា អំណាចព្រះចេស្ដារបស់ព្រះជាម្ចាស់ ធំជាងទុក្ខលំបាកដែលខ្ញុំនឹងជួបប្រទះទៅទៀត ដ្បិតគ្មានទុក្ខលំបាកណាធំជាងអំណាចរបស់ព្រះជាម្ចាស់បានឡើយ ក៏គ្មានការរារាំងណាធំជាងអំណាចរបស់ព្រះជាម្ចាស់ផងដែរ។ គ្មានការល្បងលណាធំជាងអំណាចរបស់ព្រះជាម្ចាស់ទេ ហើយក៏គ្មានការទាស់ប្រឆាំងណាធំជាងអំណាចរបស់ទ្រង់ដែរ។ គ្មានការបៀតបៀនណាធំជាងអំណាចរបស់ទ្រង់ឡើយ។ ប្រសិនបើយើងដាក់ជំនឿរបស់យើងលើព្រះអង្គ ហើយទុកចិត្តលើទ្រង់ ព្រមទាំងធ្វើតាមបង្គាប់របស់ទ្រង់ នោះយើងនឹងមានអំណរ មានការស្កប់ចិត្ត ក៏ដូចជាមានទំនុកចិត្តផងដែរ។
៧. ព្រះជាម្ចាស់សម្រេចការនេះនៅក្នុងជីវិតរបស់គ្រីស្ទបរិស័ទ ដោយចាប់ផ្ដើមពីចំណុចដ៏សំខាន់បំផុតនៃជីវិតរបស់យើង ពោលគឺព្រះជាម្ចាស់មិនគ្រាន់តែធ្វើការនេះនៅសំបកក្រៅនៃជីវិតរបស់យើងទេ។ ព្រះអង្គចាប់ផ្ដើមសម្រេចការនេះដោយចាប់ពីចំណុចដ៏សំខាន់បំផុតនៃជីវិតរបស់យើងតែម្ដង។ នៅទីនោះហើយជាកន្លែងដែលព្រះជាម្ចាស់ប្រទានកម្លាំងរបស់ព្រះអម្ចាស់យេស៊ូវគ្រីស្ទមកដល់យើង ដើម្បីឲ្យយើងអាចនឹងធ្វើអ្វីដែលទ្រង់បានត្រាស់ហៅយើងឲ្យធ្វើបាន។ ទ្រង់ធ្វើការនេះនៅគ្រប់ជ្រុងជ្រោយនៃជីវិតរបស់យើង រួមទាំងចិត្តគំនិត អ្វីៗដែលលោកអ្នកស្រឡាញ់ និងឆន្ទៈរបស់លោកអ្នកផងដែរ។
តើខគម្ពីរនេះមានអត្ថន័យយ៉ាងដូចម្ដេច?
គន្លឹះនៃការយល់អំពីខគម្ពីរនេះគឺ៖ យើងត្រូវយល់ពីបរិបទ! កណ្ឌគម្ពីរ ភីលីព ៤:១៣ គឺជាចំណុចសម្ងាត់របស់សាវ័ក ប៉ុល អំពីភាពស្កប់ចិត្ត ដូចដែលបានអះអាងនៅក្នុងខគម្ពីរមុនៗនោះ៖ «ខ្ញុំនិយាយដូច្នេះ មិនមែនដោយខ្ញុំខ្វះខាតទេ ដ្បិតខ្ញុំបានរៀនឲ្យមានសេចក្ដីសន្ដោសក្នុងសណ្ឋានគ្រប់យ៉ាង ខ្ញុំធ្លាប់ទ្រាំឲ្យមានសេចក្ដីចង្អៀតចង្អល់ ហើយក៏ធ្លាប់មានសេចក្ដីរីករាយដែរ ខ្ញុំធ្លាប់ទាំងឆ្អែត ទាំងឃ្លាន ទាំងមាន ទាំងខ្វះ ក្នុងសារពើទាំងអស់ហើយ» (ភីលីព ៤:១១-១២)។
ព្រះជាម្ចាស់មានព្រះរាជបុត្រាតែមួយគត់ ដែលគ្មានអំពើបាប ប៉ុន្តែទ្រង់មិនមែនគ្មានកូនដែលមិនមានទុក្ខព្រួយឡើយ។
នៅក្នុងជីវិតរបស់លោកអ្នក ចូរនឹកស្រមៃទៅមើលថា តើលោកអ្នកអាចសរសេរដូចអ្វីដែលសាវ័ក ប៉ុល បានសរសេរដែរឬទេ? ហើយថា តើលោកអ្នកមានសេចក្ដីពិតនោះបន្តិចបន្តូចនៅក្នុងជីវិតរបស់លោកអ្នកដែរឬទេ? ខ្ញុំមានភាពស្កប់ស្កល់ក្នុងជីវិតរបស់ខ្ញុំ មិនថាកាលៈទេសៈរបស់ខ្ញុំមានសណ្ឋានបែបណាក៏ដោយ។ ខ្ញុំអាចរស់នៅបាន ទោះបើខ្ញុំមានតិច ឬច្រើនក្ដី ។ ខ្ញុំមានភាពស្កប់ស្កល់ ទោះបើខ្ញុំបានហូបចុកឆ្អែត ឬក៏នៅស្រេកឃ្លាន ទោះបើខ្ញុំមានទ្រព្យសម្បត្តិស្ដុកស្ដម្ភ ឬក៏ស្ថិតក្នុងដំណាក់កាលដ៏ក្រីក្រតោកយ៉ាកលំបាកប៉ុណ្ណាក៏ដោយ។ ក៏ខ្ញុំនៅអាចនឹងធ្វើអ្វីៗគ្រប់យ៉ាងបានតាមរយៈព្រះអម្ចាស់ខ្ញុំដែលជាអង្គដែលប្រទានកម្លាំងដល់ខ្ញុំ។ ចូរនឹកស្រមៃអំពីការដែលលោកអ្នកអាចរស់នៅបែបនេះបាន។ តាមពិតទៅ យើងអាចរស់នៅបែបនេះបាន។ យើងមានគ្រប់អ្វីៗទាំងអស់ដែលយើងត្រូវការនៅក្នុងព្រះគ្រីស្ទរួចទៅហើយ។ លោកគ្រូ ម៉ូតយ័រ (Motyer) បានសង្ខេបខគម្ពីរនោះដូចតទៅ៖
«គ្មានកាលៈទេសៈណាធំជាងព្រះរបស់សាវ័ក ប៉ុល ទេ។ ដូច្នេះហើយបានជាគ្មានកាលៈទេសៈណាដែលអាចនឹងយកឈ្នះលើសាវ័ក ប៉ុល បានដែរ» (The Message of Philippians, ទំព័រ ២១៩)។
ព្រះជាម្ចាស់របស់សាវ័ក ប៉ុល ក៏ជាព្រះរបស់យើងទាំងអស់គ្នាដែរ។ ហេតុដូច្នេះហើយ នៅពេលដែលយើងមិនមានភាពស្កប់ស្កល់ដូចដែលសាវ័ក ប៉ុល មាន ក៏ដូចជាគាត់បានពន្យល់ដល់យើង នោះមិនមែនមានន័យថា យើងមិនមានអ្វីដែលយើងត្រូវការ ដើម្បីធ្វើឲ្យយើងមានអំណរនោះទេ ប៉ុន្តែគឺមកពីយើងបានដាក់ទំនុកចិត្តលើកន្លែងខុសប៉ុណ្ណោះ ពោលគឺយើងបានផ្ដោតទៅលើកាលៈទេសៈរបស់យើង ជាជាងទៅលើព្រះអង្គសង្គ្រោះរបស់យើង។
តើលោកអ្នកត្រូវរស់នៅដោយមិនពឹងលើកាលៈទេសៈរបស់លោកអ្នកដែរឬទេ? ឬក៏ថា តើលោកអ្នកកំពុងតែធ្លាក់ចុះដោយមានអារម្មណ៍ខ្ទេចខ្ទាំឬ? ឥឡូវនេះ នៅក្នុងកាលៈទេសៈនៃជីវិតរស់នៅរបស់លោកអ្នក តើលោកអ្នកត្រូវការមានបទពិសោធន៍អំពីសេចក្ដីអំណរដែរឬទេ? តើលោកអ្នកត្រូវដឹងថា លោកអ្នកត្រូវនិយាយយ៉ាងដូចម្ដេចម៉េចដែរឬទេ «ខ្ញុំអាចធ្វើអ្វីៗទាំងអស់តាមរយៈព្រះគ្រីស្ទដែលប្រទានកម្លាំងដល់ខ្ញុំ»? ប្រសិនបើចម្លើយ គឺលោកអ្នកត្រូវការ នោះចូរចាំថា គ្រប់សេចក្ដីអំណរទាំងអស់សម្រាប់ព្រលឹងវិញ្ញាណរបស់លោកអ្នក និងគ្រប់អំណាចទាំងអស់សម្រាប់ជីវិតរបស់លោកអ្នក មានតែនៅក្នុងព្រះអម្ចាស់យេស៊ូវគ្រីស្ទប៉ុណ្ណោះ។ ដូច្នេះ លោកអ្នកត្រូវតែបង្កើនភាពស្និទ្ធស្នាលឲ្យខ្លាំងជាមួយព្រះគ្រីស្ទតាមដែលលោកអ្នកអាចធ្វើបាន។
ប្រសិនបើលោកអ្នកជ្រើសរើសសម្លឹងមើលទៅឯទ្រង់ ជឿទុកចិត្តលើទ្រង់ រស់នៅថ្វាយទ្រង់ ស្រឡាញ់ទ្រង់ ដើរតាមទ្រង់ និងស្ដាប់បង្គាប់ទ្រង់ នេះមានន័យថា សេចក្ដីអំណរនោះនឹងកាន់តែកើនឡើងៗ ហើយបំពេញព្រលឹងវិញ្ញាណរបស់លោកអ្នកជាមិនខាន។ ខ្ញុំត្រូវតែធ្វើបែបនេះ ហើយលោកអ្នកក៏ត្រូវតែធ្វើបែបនេះដែរ។ តាមពិតទៅ យើងទាំងអស់គ្នាសុទ្ធតែត្រូវធ្វើបែបនេះ។ ឥឡូវនេះ លោកអ្នកទំនងជាកំពុងស្ថិតក្នុងកាលៈទេសៈដ៏ពិបាកៗ ឬក៏ទំនងជានឹងជួបកាលៈទេសៈដ៏លំបាកៗនៅខាងមុខនេះក៏ថាបាន ឬក៏លោកអ្នកទំនងទើបនឹងឆ្លងផុតពីកាលៈទេសៈដ៏លំបាកៗ តែក៏នឹងទំនងជាត្រឡប់ចូលទៅក្នុងកាលៈទេសៈដ៏លំបាកៗនោះវិញម្ដងទៀតក៏មិនដឹង។ ព្រះជាម្ចាស់មានព្រះរាជបុត្រាតែមួយគត់ដែលគ្មានអំពើបាប ប៉ុន្តែទ្រង់មិនមែនគ្មានកូនដែលមិនមានទុក្ខព្រួយនោះឡើយ។ លោកអ្នកនឹងប្រឈមមុខនឹងការស្រេកឃ្លាន។ លោកអ្នកទំនងជានឹងស្គាល់ពីភាពឆ្អែតឆ្អន់។ ប៉ុន្តែ នេះជាចំណុចសម្ងាត់របស់សាវ័ក ប៉ុល ដែលគាត់បានប្រាប់យើងទាំងអស់គ្នាថា៖ លោកអ្នកមានគ្រប់អ្វីៗដែលលោកអ្នកត្រូវការនៅក្នុងព្រះគ្រីស្ទរួចទៅហើយ ហើយលោកអ្នកក៏អាចនឹងធ្វើគ្រប់ទាំងអស់បានតាមរយៈព្រះគ្រីស្ទផងដែរ ព្រោះទ្រង់ជាអង្គដែលប្រទានកម្លាំងដល់លោកអ្នក។
មតិយោបល់
Loading…