ឈាមក្នុងសាច់

ក្នុងព្រះគ្រីស្ទ យើងមានសេរីភាពទាក់ទងនឹងជម្រើសនេះ។

១៣ កញ្ញា ២០១៩អានរយៈពេល ៧ នាទី

មើល១១១៣ដង

ក្នុ

ងកណ្ឌគម្ពីរលោកុប្បត្ដិជំពូក៩លោក ណូអេ បានទទួលសេចក្ដីតាំងសញ្ញាមួយពីព្រះអម្ចាស់។ ផ្នែកមួយនៃសេចក្ដីតាំងសញ្ញានោះគឺ ព្រះអង្គបានដកចេញនូវលក្ខខណ្ឌនៃការហាមមិនឲ្យហូបសាច់ចោល ដែលការនេះបានអនុញ្ញាតឲ្យលោក ណូអេ និងគ្រួសាររបស់គាត់មានសិទ្ធិសម្លាប់សត្វសម្រាប់ធ្វើជាម្ហូបអាហារបាន។ ទោះជាយ៉ាងណាក្ដីក៏ការអនុញ្ញាតនេះនៅតែមានការហាមប្រាមមួយនេះដែរ គឺថា «តែសាច់ណាដែលនៅមានជីវិត គឺជាឈាម នោះកុំឲ្យបរិភោគឡើយ» (លោកុប្បត្ដិ ៩:៤)។

មានបុព្វហេតុមួយដែលព្រះជាម្ចាស់ហាមមិនឲ្យបរិភោគឈាមរបស់សត្វក្នុងព្រះគម្ពីរសញ្ញាចាស់គឺដោយព្រោះព្រះអង្គសព្វព្រះហឫទ័យបង្រៀនយើងឲ្យចេះគោរពតម្លៃជីវិត។ យើងឃើញថា ក្នុងព្រះគម្ពីរ ឈាមគឺជារបស់តំណាងឲ្យជីវិត (លេវីវិន័យ ១៧:១១)។ កណ្ឌគម្ពីរ លោកុប្បត្ដិ ៤:១០ គឺជាខគម្ពីរដំបូងគេបង្អស់ដែលបានលើកឡើងអំពីពាក្យថា «ឈាម» ដែលនាអំឡុងពេលនោះព្រះជាម្ចាស់កំពុងសួរលោក កាអ៊ីន ដែលជាឃាតករថា «ឯងបានធ្វើអ្វីដូច្នេះ ពីព្រោះឮសូរសម្រែកនៃឈាមរបស់ប្អូនឯងពីដីឡើងទៅដល់អញ?»។ ការខ្ចាយឈាមគឺជាតំណាងឲ្យការបាត់បង់ជីវិត។ ក្នុងព្រះគម្ពីរសញ្ញាថ្មីឃ្លាថា «ព្រះលោហិតដ៏វិសេសរបស់ព្រះគ្រីស្ទ» ឬក៏ «ព្រះលោហិតទ្រង់» គឺជាការលើកឡើងដ៏សាមញ្ញតំណាងឲ្យ «ការសុគតរបស់ព្រះគ្រីស្ទ» (អេភេសូរ ២:១៣; ១ពេត្រុស ១:១៩)។

តាមរយៈក្រឹត្យវិន័យរបស់លោក ម៉ូសេ យើងឃើញថា មានម្ហូបអាហារមួយចំនួនដែលព្រះជាម្ចាស់រាប់ថាមិនស្អាតសម្រាប់ការបរិភោគ ដែលរួមមានទាំងសាច់ដែលនៅមានឈាមក្នុងវានៅឡើយ (ចោទិយកថា ១២:១៦)។ ក្រុមជំនុំដំបូងបានលើកទឹកចិត្តសាសន៍ដទៃតាមរយៈការមិនអនុញ្ញាតឲ្យពួកគេបរិភោគសាច់ដែលនៅមានឈាម ដើម្បីកុំឲ្យសាសន៍យូដាដែលជាបងប្អូនរួមជំនឿអាក់អន់ចិត្ត ហើយក៏បានហាមពួកគាត់កុំឲ្យទៅជិតពួកសាសន៍ដទៃដែលគោរពព្រះក្លែងក្លាយដែរ (កិច្ចការ ១៥:២០)។

មូលហេតុមួយផ្សេងទៀតដែលយើងអាចដឹងបានដោយគ្មានមន្ទិលសង្ស័យទាក់ទងនឹងការដែលព្រះជាម្ចាស់ហាមមិនឲ្យបរិភោគសាច់ដែលនៅមានជាប់ឈាមគឺដោយព្រោះវាទាក់ទងនឹងយញ្ញបូជា។ មានតែឈាមទេដែលយកទៅប្រើប្រាស់សម្រាប់ធ្វើជាយញ្ញបូជាធួននឹងបាប (២របាក្សត្រ ២៩:២៤; ហេព្រើរ ៩:២២) ហេតុដូច្នេះហើយបានជាគេចាត់ទុកឈាមថាជារបស់ដ៏មានតម្លៃ។ ព្រះជាម្ចាស់សព្វព្រះហឫទ័យថា យើងត្រូវតែចាត់ទុកឈាមនៃយញ្ញបូជាថាមានតម្លៃដ៏វិសេស។ ព្រះជាម្ចាស់មិនបានអនុញ្ញាតឲ្យរាស្ត្រទ្រង់យកឈាមធ្វើជាម្ហូបអាហារបែបជាសាមញ្ញ គឺដោយព្រោះទ្រង់សព្វព្រះហឫទ័យបង្រៀនពួកគាត់ឲ្យចេះឲ្យតម្លៃទៅលើយញ្ញបូជា។

ការចេះមានសន្តានចិត្តល្អទៅលើសត្វក៏ទំនងជាមូលហេតុមួយទៀតដែលព្រះជាម្ចាស់បានបង្គាប់មិនឲ្យលោក ណូអេ បរិភោគសាច់ដែលនៅមានឈាមក្នុងវាដែរ។ ព្រះជាម្ចាស់មិនសព្វព្រះហឫទ័យឲ្យមនុស្សប្រព្រឹត្តដូចជាពពួកសត្វដែលស៊ីសាច់ឆៅជាអាហារ បន្ទាប់ពីពួកវាទើបតែសម្លាប់សត្វបានភ្លាមៗ បន្ទាប់មកក៏ស៊ីសាច់ឆៅទាំងនោះយកតែម្ដងនោះទេ។ ផ្ទុយពីនោះ ពួកគាត់ត្រូវតែបង្ហូរឈាមចេញពីសត្វនោះចោលសិន ដើម្បីឲ្យប្រាកដថាសត្វនោះពិតជាបានងាប់បាត់ហើយមែន មុនពេលដែលពួកគាត់បរិភោគសាច់វា។

លើសពីនោះទៅទៀត មានមនុស្សមួយចំនួនក៏បានលើកឡើងថា មូលហេតុដែលព្រះជាម្ចាស់បានហាមមិនឲ្យបរិភោគសាច់ដែលជាប់មានឈាមក្នុងវាក៏ទំនងជាទាក់ទងនឹងសុខភាពដែរ។ ការដែលបរិភោគសាច់នៅមានឈាមគឺបញ្ជាក់ថា សាច់នោះមិនទាន់ត្រូវបានចម្អិនឲ្យឆ្អិននៅឡើយទេ ហើយការបរិភោគសាច់មិនទាន់ឆ្អិនអាចនឹងនាំឲ្យមានជំងឺ ឬក៏ការឈឺថ្កាត់ផងដែរ។ ឥឡូវនេះ យើងស្គាល់អំពីគ្រោះថ្នាក់នេះហើយ ដូចដែលក្រសួងសុខាភិបាលនៅសហរដ្ឋអាមេរិក (USDA) បានស្រាវជ្រាវឃើញក្នុងបញ្ជីរាយមុខម្ហូបដូចតទៅ៖ «ការបរិភោគម្ហូបអាហារមិនឆ្អិន ឬក៏សាច់ ត្រី គ្រឿងសមុទ្រ អំបូរខ្យង ឬក៏ស៊ុតដែលមិនទាន់ឆ្អិនអាចនឹងនាំឲ្យលោកអ្នកមានជំងឺពុលអាហារយ៉ាងធ្ងន់ធ្ងរបាន»។ នៅសម័យបុរាណ គ្រោះថ្នាក់នេះមានសភាពធ្ងន់ធ្ងរជាងសម័យបច្ចុប្បន្នទៅទៀត ព្រោះថាស្តង់ដារនៃម្ហូបអាហារពីសម័យបុរាណគឺមានកម្រិតគុណភាពទាបជាងពេលបច្ចុប្បន្ននេះទៅទៀត។

ប៉ុន្តែ តាមរយៈព្រះគ្រីស្ទ ក្រឹត្យវិន័យទាំងនេះគឺលែងចាំបាច់ទៀតហើយ ហើយព្រះគម្ពីរសញ្ញាថ្មីក៏មិនបានលើកឡើងយ៉ាងចំៗបែបជាការណែនាំទៅកាន់ក្រុមជំនុំទាក់ទងនឹងម្ហូបអាហារដែរ (រ៉ូម ១៤:១៤; ១ធីម៉ូថេ ៤:៣)។ កណ្ឌគម្ពីរ រ៉ូម ១៤:១-៤ បានបង្រៀនថា «ចូរទទួលអ្នកណា ដែលខ្សោយខាងឯជំនឿដែរ មិនមែនឲ្យបានជជែកគ្នាពីសេចក្ដីប្រកាន់ផ្សេងៗឡើយ ដ្បិតម្នាក់ជឿថា បរិភោគបានគ្រប់មុខទាំងអស់ ម្នាក់ទៀត ដែលខ្សោយ បរិភោគតែបន្លែទេ កុំឲ្យអ្នកដែលបរិភោគមើលងាយដល់អ្នកដែលមិនបរិភោគឡើយ ក៏កុំឲ្យអ្នកដែលមិនបរិភោគ និន្ទាចំពោះអ្នកដែលបរិភោគដែរ ដ្បិតព្រះទ្រង់ទទួលអ្នកនោះដូចគ្នា តើអ្នកជាអ្វីដែលនិន្ទាបាវបម្រើរបស់គេ អ្នកនោះឈរឬដួលក្ដី នោះស្រេចនឹងចៅហ្វាយទេតើ ហើយគេនឹងបានឈរមែន ដ្បិតព្រះទ្រង់អាចនឹងតាំងឲ្យឈរបាន»។ ព្រះបន្ទូលអនុញ្ញាតឲ្យគ្រីស្ទបរិស័ទមានសេរីភាពផ្ទាល់ខ្លួន ទាក់ទងនឹងការបរិភោគសាច់ និងរបៀបចម្អិនវា។

ជាការសង្ខេបមកវិញ៖ ព្រះជាម្ចាស់បានហាមប្រាមមិនឲ្យបរិភោគសាច់ដែលមានឈាមជាប់ក្នុងវាទេ ដែលការនេះបានលើកឡើងក្នុងសេចក្ដីតាំងសញ្ញាជាមួយនឹងលោក ណូអេ និងក្នុងក្រឹត្យវិន័យរបស់លោក ម៉ូសេ។
មូលហេតុដែលនៅពីក្រោយការហាមប្រាមនេះ គឺទាក់ទងទាំងខាងឯព្រលឹងវិញ្ញាណនិងសាច់ឈាម។

ក្នុងព្រះគ្រីស្ទ យើងមានសេរីភាពទាក់ទងនឹងជម្រើសនេះ។ តែទោះជាយ៉ាងណាក្ដី ដូចដែលទាក់ទងនឹងរាល់សេរីភាពនានាក្នុងគ្រីស្ទសាសនា ក៏យើងត្រូវតែប្រើប្រាស់ការគ្រប់គ្រងលើខ្លួនឯង ដើម្បីចៀសវាងពីការធ្វើឲ្យអ្នកដទៃឈើចាប់ (រ៉ូម ១៣:១៣-២២)។ លើសពីអ្វីៗទាំងអស់ ការដែលយើងបរិភោគអ្វីក៏ដោយ ក៏យើងគួរធ្វើឡើង ដើម្បីថ្វាយសិរីល្អដល់ព្រះជាម្ចាស់ដែរ (១កូរិនថូស ១០:៣១)៕

និពន្ធដោយ៖ ក្រុម Got Questions
បកប្រែដោយ៖ លោក ឈាង បូរ៉ា
និងកែសម្រួលដោយ៖ លោក ទេព រ៉ូ , លោក ខែម បូឡុង និងកញ្ញា លី វួងឡេង
ដកស្រង់ខ្លះៗចេញពី www.gotquestions.org ដោយមានការអនុញ្ញាត។

តើអ្នកគិតយ៉ាងណា?

២ពិន្ទុ

តើលោកអ្នកយល់យ៉ាងណាដែរ?

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

១៥២៨៨

ក្តៅៗពេញនិយម

កំណត់ហេតុបណ្ដាញ៦ មករា ២០២៦

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

វាគ្មានអ្វីគួរឲ្យភ្ញាក់ផ្អើលនោះទេ យើងបានទទួលសំណួរជាច្រើនពីបេសកជននៅតាមតំបន់នានា…

អានបន្ថែម

តើ៧០អាទិត្យ ក្នុងកណ្ឌគម្ពីរដានីយ៉ែលជាអ្វី? (ដានីយ៉ែល ៩)

៣១០៥

កំណត់ហេតុបណ្ដាញ២៥ វិច្ឆិកា ២០២៥

តើ៧០អាទិត្យ ក្នុងកណ្ឌគម្ពីរដានីយ៉ែលជាអ្វី? (ដានីយ៉ែល ៩)

អត្ថន័យសំខាន់នៃការកាត់ស្រាយកណ្ឌគម្ពីរ ដានីយ៉ែល ៩:២៦-២៧ គឺជាការសង្កេតរបស់សាវ័កម៉ាថាយ ត្រង់ដែលព្រះយេស៊ូវកំពុងមានបន្ទូលអំពីការបំផ្លិចបំផ្លាញដែលត្រូវនឹងមកក្រុងយេរូសាឡឹម និងព្រះវិហារបរិសុទ្ធ (ម៉ាថាយ ២៤:១៥)។

អានបន្ថែម

សំណួរដែលបណ្តាលចិត្ត៖ វិធីសាស្ត្រថ្មី ក្នុងការពិភាក្សានៅក្នុងក្រុមតូច

១១២៤

កំណត់ហេតុបណ្ដាញ១៨ វិច្ឆិកា ២០២៥

សំណួរដែលបណ្តាលចិត្ត៖ វិធីសាស្ត្រថ្មី ក្នុងការពិភាក្សានៅក្នុងក្រុមតូច

ព្រះយេស៊ូវ ពួកសាវ័ក និងពួកសិស្សរបស់ទ្រង់ ពួកគេទាំងអស់បានសួរបណ្តាជននូវសំណួរជាក់លាក់។ ឥឡូវនេះ ប្រហែលជាពួកយើងគួរពិចារណាប្រើសំណួរដូចគ្នាទាំងនេះ សម្រាប់ក្រុមតូចរបស់យើងទាំងអស់។

អានបន្ថែម

អត្ថបទបន្ថែមពី កំណត់ហេតុបណ្ដាញ

ហេតុអ្វីបានជាព្រះយេស៊ូវទទួលបុណ្យជ្រមុជទឹក?

៦១៨៥

ក្តៅៗពេញនិយម

កំណត់ហេតុបណ្ដាញ១៣ កុម្ភៈ ២០២៦

ហេតុអ្វីបានជាព្រះយេស៊ូវទទួលបុណ្យជ្រមុជទឹក?

Why was Jesus baptized?

អានបន្ថែម

តើគ្រូគង្វាល និងពួកចាស់ទុំមានភាពខុសគ្នាឬ?(១ធីម៉ូថេ ៣)

៨២៤៥

ក្តៅៗ

កំណត់ហេតុបណ្ដាញ៣០ ធ្នូ ២០២៥

តើគ្រូគង្វាល និងពួកចាស់ទុំមានភាពខុសគ្នាឬ?(១ធីម៉ូថេ ៣)

សាវ័ក ប៉ុល និងអ្នកនិពន្ធព្រះគម្ពីរសញ្ញាថ្មីផ្សេងទៀតបានប្រើប្រាស់ពាក្យថា «អ្នកត្រួតត្រា» ជំនួសគ្នាទៅវិញទៅមកជាមួយនឹងពាក្យ «ពួកចាស់ទុំ»។ ឧទាហរណ៍៖ សូមពិចារណានៅក្នុងកណ្ឌគម្ពីរ ទីតុស ១:៥-៧។

អានបន្ថែម

តើការជំនុំជម្រះដោយផ្អែកលើការប្រព្រឹត្តិមានន័យយ៉ាងដូចម្ដេច? (វិវរណៈ ២០ និង ២១)

៨២២០

ក្តៅៗពេញនិយម

កំណត់ហេតុបណ្ដាញ២៣ ធ្នូ ២០២៥

តើការជំនុំជម្រះដោយផ្អែកលើការប្រព្រឹត្តិមានន័យយ៉ាងដូចម្ដេច? (វិវរណៈ ២០ និង ២១)

ឯអ្នកណាដែលឈ្នះ នោះនឹងបានគ្រងសេចក្ដីទាំងនេះទុកជាមរដក អញនឹងធ្វើជាព្រះដល់អ្នកនោះ ហើយអ្នកនោះនឹងធ្វើជាកូន

អានបន្ថែម

តើអ្នកដែលមិនបានសង្គ្រោះ នឹងទទួលរងទុក្ខពីការជំនុំជម្រះដ៏អស់កល្បជានិច្ចឬទេ? (២ថែស្សាឡូនីច ១)

២៥២

ក្តៅៗ

កំណត់ហេតុបណ្ដាញ១៦ ធ្នូ ២០២៥

តើអ្នកដែលមិនបានសង្គ្រោះ នឹងទទួលរងទុក្ខពីការជំនុំជម្រះដ៏អស់កល្បជានិច្ចឬទេ? (២ថែស្សាឡូនីច ១)

កណ្ឌគម្ពីរ ២ថែស្សាឡូនីច ១:៨ បានលើកឡើងអំពី «ការសងសឹក» របស់ព្រះជាម្ចាស់។ ពាក្យជាភាសាក្រិក «អេកឌីខេស៊ីស» (ekdikēsis) បង្ហាញអំពីសេចក្ដីយុត្តិធម៌ ឬការផ្ដន្ទាទោស ដោយសំដៅទៅលើសេចក្ដីយុត្តិធម៌នៃការប្រោសលោះរបស់ព្រះជាម្ចាស់ ជំនួសឲ្យអ្នករើសតាំងរបស់ទ្រង់ (លូកា ១៨:៧-៨) ឬសំដៅទៅលើការផ្ដន្ទាទោសដ៏សុចរិតរបស់ទ្រង់ទៅលើអ្នកដែលទាស់ប្រឆាំងនឹងទ្រង់ (លូកា ២១:២២; រ៉ូម ១២:១៩)។

អានបន្ថែម