លក្ខណសម្បត្តិ៦យ៉ាងនៃដៃគូអនាគត

ចូរនឹកស្រមៃ ហើយអធិស្ឋាន ព្រមទាំងស្វែងរកការប្រឹក្សាពីអ្នកដទៃអំពីលក្ខណសម្បត្តិដែលលោកអ្នកគួរស្វែងរកពីបុគ្គលដែលលោកអ្នកចង់រៀបការជាមួយ ហើយចូរព្យាយាមកុំទទួលយកនូវអ្វីដែលទាបជាងក្ដីរំពឹងនោះឡើយ។ ចូរកុំស្វែងរកស្វាមី ឬក៏ភរិយាដោយពឹងលើរូបសម្រស់ខាងក្រៅឡើយ! «ស្ត្រីមានរូបស្រស់ល្អ ដែលឥតមានគំនិតមារយាទ នោះប្រៀបដូចជាក្រវិលមាសដែលពាក់នៅច្រមុះជ្រូក» (សុភាសិត ១១:២២)។

១៧ ឧសភា ២០១៧អានរយៈពេល ១១ នាទី

មើល២៤៩៨៨ដង១មតិ

ភ

រិយារបស់ខ្ញុំទើបតែត្រឡប់មកពីកន្លែងកាត់សក់ ហើយគាត់បានប្រាប់ខ្ញុំពីរឿងស្ត្រីនៅលីវម្នាក់ដែលជាអ្នកកាត់សក់ឲ្យគាត់។ ស្ត្រីវ័យក្មេងម្នាក់នេះបានចែកចាយអំពីការអាក់អន់ចិត្តរបស់គាត់ចំពោះគេហទំព័រស្វែងរកដៃគូ (dating website) ព្រោះគេហទំព័រនោះគ្រាន់តែផ្ដោតលើរូបសម្រស់ខាងក្រៅ។ អូសទៅខាងនេះបើអ្នកគិតថា គាត់ស្អាត ឬក៏អូសទៅខាងនោះបើអ្នកគិតថា គាត់មិនស្អាត។

គាត់បានលើកឡើងអំពីការសោកស្ដាយរបស់គាត់ថា ក្រោយពីមានទំនាក់ទំនងជាមួយនរណាម្នាក់រួចហើយ គឺគេគ្រាន់តែចង់រួមដំណេកមួយរយៈពេលខ្លីប៉ុណ្ណោះ មិនមែនជាទំនាក់ទំនងដែលនៅគង់វង្ស ឬក៏ជាទំនាក់ទំនងដែលមានការប្ដូរផ្ដាច់នឹងគ្នានោះទេ។

ខ្ញុំសោកស្ដាយជំនួសអស់អ្នកដែលស្វែងរកទំនាក់ទំនងដ៏ស្និទ្ធស្នាលដោយរបៀបនោះ។ ប្រសិនបើអ្នកនៅលីវ ហើយប្រាថ្នាចង់រៀបការ នោះលោកអ្នកនឹងឃើញថា ការទទួលយកដោយអស់ពីចិត្តនូវអ្វីៗដែលព្រះគម្ពីរបានបង្រៀនអំពីរបៀបចែចង់ គឺជាវិធីដ៏ល្អបំផុត។ ពោលគឺល្អជាងវិធីដែលលោកីយ៍នេះណែនាំឲ្យយើងធ្វើតាម ហើយក៏ជាវិធីដែលគ្មានខ្លឹមសារដែរ។

ជាពិសេសកណ្ឌគម្ពីរ សុភាសិត ជំពូក៣១ បានបង្រៀនយើងយ៉ាងច្បាស់ពីអ្វីដែលយើងគួរចង់បានជាដៃគូអនាគតរបស់យើង។ ការពណ៌នានេះបានរៀបរាប់ពីពេលវេលាដ៏ស្មោះត្រង់នៅក្នុងជីវិតរបស់ស្ត្រី ដែលមានលក្ខណសម្បត្តិល្អប្រពៃ ប៉ុន្តែយើងក៏គួរស្វែងយល់ពីលក្ខណសម្បត្តិទាំងអស់នេះនៅក្នុងគន្លងជីវិតរបស់បុរស ដែលស្ត្រីគួរស្វែងរកដែរ។

១.

តើបុគ្គលនេះរក្សាពាក្យសម្ដីរបស់គាត់ដែរឬទេ?

«ប្ដីនាងនឹងទុកចិត្តចំពោះនាង ហើយមិនត្រូវខ្វះខាតអ្វីឡើយ» (សុភាសិត ៣១:១១)។ ប្ដីរបស់នាងគ្មានការព្រួយបារម្ភពីភាពស្មោះត្រង់របស់នាងចំពោះគាត់ឡើយ។ គាត់មិនដែលព្រួយបារម្ភថា ប្រពន្ធរបស់គាត់ប្រើលុយកាក់ខ្ជះខ្ជាយ ឬកិបកេងលួចលាក់នោះឡើយ។

នៅពេលដែលលោកអ្នកចាប់ផ្ដើមស្គាល់បុគ្គលណាម្នាក់ ដែលមានសក្ដានុពលក្នុងការធ្វើជាប្ដី ឬប្រពន្ធ នោះចូរពិចារណាថា តើអ្នកអាចទុកចិត្តគាត់បានដែរឬទេ? ឬក៏ថា តើគាត់ជាមនុស្សស្មោះត្រង់អត់? តើគាត់មានប្រវត្តិជាមនុស្សរក្សាពាក្យសម្ដីដែរឬទេ? ឬគាត់ជាមនុស្សបាតដៃខ្នងដៃ និយាយក្រឡេចក្រឡុចដែរឬទេ?

២.

តើបុគ្គលនេះជួយលោកអ្នកឲ្យរឹងមាំជាងមុនដែរឬទេ?

«នាងនឹងធ្វើឲ្យប្ដីបានសេចក្ដីល្អ មិនមែនអាក្រក់ឡើយ រហូតដល់អស់១ជីវិតនាង» (សុភាសិត ៣១:១២)។ «កាលណាប្ដីនាងទៅអង្គុយត្រង់ទ្វារក្រុង ក្នុងចំណោមនៃពួកចាស់ទុំក្នុងស្រុក នោះគេក៏ស្គាល់រាប់អានគាត់ដែរ» (សុភាសិត ៣១:២៣)។ វាគួរឲ្យចម្លែកណាស់ដែលខនេះនៅចំកណ្តាលសាច់រឿងនៃអត្ថបទខដែលរៀបរាប់អំពីលក្ខណសម្បត្តិរបស់ស្ត្រីដែលកោតខ្លាចព្រះជាម្ចាស់។ ប៉ុន្តែ ទោះជាយ៉ាងណាក៏ដោយ ក៏ខនេះបង្ហាញពីការប្ដូរផ្ដាច់របស់ប្រពន្ធចំពោះប្ដីរបស់ខ្លួនដែរ។ កិច្ចការដែលនាងធ្វើនៅផ្ទះ គឺជាប្រយោជន៍ដល់កេរ្តិ៍ឈ្មោះ និងជ័យជម្នះរបស់ប្ដីនាង។ ប្ដីនាងពិតជាមានពរមែន ព្រោះគាត់បានរៀបការជាមួយនាង។

ចូរស្វែងរក ហើយរៀបការជាមួយបុគ្គលដែលនឹងលើកទឹកចិត្តលោកអ្នក ហើយជួយបំពេញបន្ថែមជីវិតគ្នាទៅវិញទៅមក។ ប្ដីប្រពន្ធមួយគូគួរតែមានលក្ខណសម្បត្តិខ្លាំងជាងការដែលគាត់នៅតែម្នាក់ឯង ព្រោះគាត់បានរៀបការជាមួយនឹងគ្នា។

៣.

តើបុគ្គលនេះខំប្រឹងធ្វើការដែរឬទេ?

«នាងខិតខំរកអំបោះ និងសូត្រមកត្បាញរវៃយ៉ាងស្វាហាប់។ នាងនាំអាហារមកពីឆ្ងាយ ដូចនាវាដឹកទំនិញ។ នាងក្រោកពីព្រលឹម រៀបចំបាយទឹកឲ្យអស់អ្នកដែលរស់នៅក្នុងផ្ទះ ហើយចាត់ចែងការងារឲ្យស្រីបម្រើធ្វើ។ នាងរិះគិតពិចារណា ហើយទៅទិញចំការមួយ រួចនាងយកប្រាក់ដែលខ្លួនរកបាន ទៅទិញទំពាំងបាយជូរមកដាំ» (សុភាសិត ៣១:១៣-១៦ គខប)។

ចូររកបុគ្គលដែលចេះដាក់វិន័យលើខ្លួនឯង ហើយឧស្សាហ៍ ជាបុគ្គលដែលមានគោលបំណង ហើយព្យាយាមបំពេញគោលបំណងនោះ ជាបុគ្គលដែលផ្ដើមកិច្ចការណាមួយ ហើយក៏បានធ្វើវារហូតដល់ចប់។

៤.

តើបុគ្គលនេះចិត្តល្អ ហើយចេះចៅរ៉ៅដែរឬទេ?

«នាងឈោងដៃដល់មនុស្សកំសត់ទុគ៌ត អើ នាងហុចដៃទៅជួយមនុស្សក្រលំបាកផង» (សុភាសិត ៣១:២០)។
ស្ត្រីបែបនេះមិនគ្រាន់តែបំពេញតម្រូវការរបស់គ្រួសារនាងឡើយ តែនាងថែមទាំងបំពេញតម្រូវការរបស់អ្នកនៅជុំវិញនាងទៀតផង។ នាងជាស្ត្រីដែលមានចិត្តល្អ ហើយចេះចៅរ៉ៅ និងចេះជួយអ្នកដទៃ។ តើលោកអ្នកមានចំណាប់អារម្មណ៍ទៅលើបុគ្គលដែលមានលក្ខណសម្បត្តិបែបនេះដែរឬទេ?

៥.

តើបុគ្គលនេះមានប្រាជ្ញា ហើយមានចិត្តចង់ជួយអ្នកដទៃដែរឬទេ?

«នាងពោលដោយប្រាជ្ញា ហើយនៅអណ្ដាតនាងមានសេចក្ដីសប្បុរស» (សុភាសិត ៣១:២៦)។ នាងរកវិធីជួយអ្នកដទៃ៖ ដោយបំពេញតម្រូវការរបស់ពួកគេតាមដែលនាងអាចធ្វើទៅបាន ទាំងខាងអារម្មណ៍ និងខាងវិញ្ញាណ។ នាងជាស្ត្រីម្នាក់ដែលមានប្រាជ្ញា ហើយអ្នកដទៃនឹងស្វែងរកប្រាជ្ញារបស់នាង ពេលនោះ ប្រសិនបើពួកគេស្តាប់តាមនាង នោះពួកគេនឹងទទួលបានប្រយោជន៍ជាច្រើន។
លោកអ្នកគួរតែចង់រៀបការជាមួយបុគ្គលបែបនោះ ជាបុគ្គលដែលមិនគិតតែពីប្រយោជន៍ខ្លួនឯង មិនថាអ្វីដែលគាត់ធ្វើ និងអ្វីដែលគាត់យកមកកំសាន្តចិត្តខ្លួនឯង ប៉ុន្តែជាបុគ្គលដែលចូលចិត្តជួយ ហើយក៏ជាបុគ្គលមានប្រាជ្ញាអាចជួយអ្នកដទៃបានពិតប្រាកដ។

៦.

តើបុគ្គលនេះពិតជាបានទុកចិត្តលើព្រះយេស៊ូវមែនឬ?

នាងមិនចុះចូលជាមួយភាពថប់បារម្ភទេ ព្រោះនាងជឿទុកចិត្តលើព្រះអម្ចាស់របស់នាង។ «...ក៏នឹកសើចពីហេតុណាដែលកើតបាននៅខាងមុខ» (សុភាសិត ៣១:២៥)។ ស្ត្រីម្នាក់នេះកោតខ្លាចព្រះជាម្ចាស់ ហើយតាមរយៈការកោតខ្លាចដ៏ត្រឹមត្រូវនេះ នាំឲ្យនាងមានប្រាជ្ញា សេចក្ដីសប្បុរស និងការខិតខំធ្វើការ។ ស្ត្រីគ្រប់លក្ខណ៍ គឺជាស្ត្រីដែលកោតខ្លាចព្រះជាម្ចាស់នឹងទុកចិត្តលើទ្រង់ ព្រមទាំងផែនការដែលទ្រង់បានគ្រោងទុកសម្រាប់នាង។ ហេតុដូច្នេះហើយបានជាគាត់មិនបារម្ភ ឬក៏ខ្លាចពីអ្វីៗដែលនឹងកើតឡើងយ៉ាងលម្អិតនៅពេលអនាគត។

សំណួរដ៏សំខាន់បំផុត ទាក់ទងនឹងចំណុចស្នូលនៃលក្ខណសម្បត្តិរបស់ដៃគូបណ្តូលចិត្តដែលយើងគួរតែសួរគឺ៖ តើបុគ្គលនេះពិតជាបានទុកចិត្តលើព្រះយេស៊ូវគ្រីស្ទមែនឬទេ? តើបុគ្គលនោះជាអ្នកជឿលើព្រះយេស៊ូវដែរឬទេ? ចូរកុំមើលរំលងចំណុចនេះឲ្យសោះ! ចូរ «កុំឲ្យទឹមនឹមស្រៀក» ជាមួយបុគ្គលដែលមិនរួមចំណែកជាមួយអត្តសញ្ញាណដ៏សំខាន់បំផុតនៅក្នុងជីវិតរបស់លោកអ្នកឡើយ (២កូរិនថូស ៦:១៤)។ ដាច់ខាត! លោកអ្នកត្រូវតែយកព្រះគ្រីស្ទជាមូលដ្ឋានគ្រឹះនៃទំនាក់ទំនងរបស់លោកអ្នក ដោយអ្នកទាំងពីរត្រូវសម្លឹងមើលទៅឯទ្រង់ ទុកចិត្តលើទ្រង់ ហើយក៏ត្រូវរីករាយជាមួយគ្នាចំពោះអ្វីៗដែលនឹងកើតឡើងនៅពេលអនាគតផងដែរ។

កុំទទួលយកនូវអ្វីដែលទាបជាងក្ដីរំពឹង

ចូរនឹកស្រមៃ ហើយអធិស្ឋាន ព្រមទាំងស្វែងរកការប្រឹក្សាពីអ្នកដទៃពីលក្ខណសម្បត្តិដែលលោកអ្នកគួរស្វែងរកពីបុគ្គលដែលលោកអ្នកចង់រៀបការជាមួយ ហើយចូរព្យាយាមកុំទទួលយកនូវអ្វីដែលទាបជាងក្ដីរំពឹងនោះឡើយ។ ចូរកុំស្វែងរកស្វាមី ឬក៏ភរិយាដោយពឹងផ្នែកលើរូបសម្រស់ខាងក្រៅ! «ស្ត្រីមានរូបស្រស់ល្អ ដែលឥតមានគំនិតមារយាទ នោះប្រៀបដូចជាក្រវិលមាសដែលពាក់នៅច្រមុះជ្រូក» (សុភាសិត ១១:២២)។

វិធីសាស្ត្រចែចង់របស់លោកីយ៍នេះ គឺជាគន្លងដ៏ល្ងីល្ងើ ហើយពោរពេញដោយការឈឺចាប់។ ចូរស្វែងរកបុគ្គលដែលមានការពិចារណាដោយពឹងលើព្រះបន្ទូល ព្រោះនោះជាលក្ខណសម្បត្តិដែលពិបាករកណាស់ តែជាលក្ខណសម្បត្តិដែលប្រកបដោយអត្ថប្រយោជន៍។ នៅពេលដែលលោកអ្នកសម្រាកនៅក្នុងផែនការរបស់ព្រះជាម្ចាស់ និងនៅក្នុងពេលវេលារបស់ទ្រង់ នោះចូរអធិស្ឋានសូមឲ្យព្រះជាម្ចាស់ប្រទានស្វាមី ឬក៏ភរិយាម្នាក់ដែលលោកអ្នកអាចទុកចិត្តបាន ជាអ្នកដែលចេះជួយ ហើយខំប្រឹងធ្វើការ ក៏មានចិត្តសប្បុរស មានប្រាជ្ញា និងទុកចិត្តលើព្រះយេស៊ូវ។

មួយចំណុចទៀត៖ ចូរកុំស្វែងរកតែម្នាក់ឯងឡើយ! សូមកុំសន្មតថា គំនិតរបស់លោកអ្នកតែម្នាក់ឯង ចំពោះការស្វែងរកស្វាមី ឬភរិយាមានភាពគ្រប់គ្រាន់នោះឡើយ។ ឥឡូវនេះ ប្រសិនបើលោកអ្នកកំពុងចែចង់នរណាម្នាក់ ចូរណែនាំឲ្យមិត្តភក្ដិរបស់លោកអ្នកទាំងអស់បានស្គាល់ ជាពិសេសគ្រួសារនៃក្រុមជំនុំរបស់លោកអ្នក។ ចូរស្វែងរកការប្រឹក្សាដ៏ស្មោះត្រង់ពីពួកគាត់ ហើយចាំមើលថា តើពួកគាត់ប៉ុន្មាននាក់នឹងប្រាប់លោកអ្នកថាទំនាក់ទំនងនេះមិនសមគ្នា។ នោះហើយជាការបង្ហាញពីការបន្ទាបខ្លួននៅក្នុងទំនាក់ទំនងនៃការចែចង់គ្នា គឺការសុំប្រឹក្សាយោបល់ពីអ្នកដទៃដោយមិនត្រូវរាប់ខ្លួនឯងថាពូកែ ឬចេះច្រើនជាងគេ។

ចូរឲ្យប្រាជ្ញានៃព្រះបន្ទូលណែនាំការសម្រេចចិត្តរបស់លោកអ្នកពីការទាក់ទងគ្នា មិនមែនគ្រាន់តែការសម្ដែងខាងក្រៅឡើយ។

«រូបឆោមឆាយជាសេចក្ដីបញ្ឆោត ហើយមុខស្រស់ល្អក៏ឥតប្រយោជន៍ដែរ តែស្ត្រីណាដែលកោតខ្លាចដល់ព្រះយេហូវ៉ា នោះនឹងមានគេសរសើរវិញ។» (សុភាសិត ៣១:៣០)

ចំណាំ៖ យើងបានទទួលការអនុញ្ញាតឲ្យកែសម្រួលលើឯកសារដើមរបស់អ្នកនិពន្ធ។

និពន្ធដោយ៖ លោកគ្រូ Ben Reaoch

បកប្រែដោយ និងកែសម្រួលដោយ៖ លោក ឈាង បូរ៉ា, លោក ជួប ប៊ុនហាក់ និងលោក អ៊ុន ជ័យរិទ្ធ

ដកស្រង់ខ្លះៗចេញពី www.desiringgod.org ដោយមានការអនុញ្ញាត។

តើអ្នកគិតយ៉ាងណា?

៣៥ពិន្ទុ

តើលោកអ្នកយល់យ៉ាងណាដែរ?

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

១៦៣៤៩

ក្តៅៗពេញនិយម

កំណត់ហេតុបណ្ដាញ៦ មករា ២០២៦

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

វាគ្មានអ្វីគួរឲ្យភ្ញាក់ផ្អើលនោះទេ យើងបានទទួលសំណួរជាច្រើនពីបេសកជននៅតាមតំបន់នានា…

អានបន្ថែម

សំណួរដែលបណ្តាលចិត្ត៖ វិធីសាស្ត្រថ្មី ក្នុងការពិភាក្សានៅក្នុងក្រុមតូច

១១៣៤

កំណត់ហេតុបណ្ដាញ១៨ វិច្ឆិកា ២០២៥

សំណួរដែលបណ្តាលចិត្ត៖ វិធីសាស្ត្រថ្មី ក្នុងការពិភាក្សានៅក្នុងក្រុមតូច

ព្រះយេស៊ូវ ពួកសាវ័ក និងពួកសិស្សរបស់ទ្រង់ ពួកគេទាំងអស់បានសួរបណ្តាជននូវសំណួរជាក់លាក់។ ឥឡូវនេះ ប្រហែលជាពួកយើងគួរពិចារណាប្រើសំណួរដូចគ្នាទាំងនេះ សម្រាប់ក្រុមតូចរបស់យើងទាំងអស់។

អានបន្ថែម

តើស្ត្រីនឹងបានសង្គ្រោះក្នុងកាលដែលបង្កើតកូន មានន័យយ៉ាងដូចម្ដេច? (១ធីម៉ូថេ ២)

១១១៥

កំណត់ហេតុបណ្ដាញ១១ វិច្ឆិកា ២០២៥

តើស្ត្រីនឹងបានសង្គ្រោះក្នុងកាលដែលបង្កើតកូន មានន័យយ៉ាងដូចម្ដេច? (១ធីម៉ូថេ ២)

ស្ត្រីណាដែលទទួលយកតួនាទីដែលព្រះជាម្ចាស់បានតែងតាំងក្នុងខណៈដែលពួកនាងកំពុងបន្ត «សេចក្ដីជំនឿ សេចក្ដីស្រឡាញ់ នឹងសេចក្ដីបរិសុទ្ធ ទាំងមានគំនិតមារយាទ» ក្នុងគុណធម៌គ្រីស្ទបរិស័ទ នោះនាងនឹងរកឃើញថា ខ្លួននឹងបានសង្គ្រោះនៅថ្ងៃចុងក្រោយ។

អានបន្ថែម