ព្រះជាម្ចាស់នៅឆ្ងាយ

១៣ មីនា ២០១៨អានរយៈពេល ១៣ នាទី

មើល៨៧៦ដង

កា

រមានអារម្មណ៍ថា ព្រះជាម្ចាស់នៅឆ្ងាយពីយើង គឺជាអារម្មណ៍មួយដែលគ្រីស្ទបរិស័ទជាច្រើនធ្លាប់មាន។ ពេលខ្លះយើងមានអារម្មណ៍ថា ទ្រង់នៅឆ្ងាយពីយើងណាស់។ ការនេះធ្វើឲ្យយើងគិតថា ទ្រង់ហាក់បីដូចជាកំពុងពួនពីយើងអញ្ចឹង ឬក៏ថា ទ្រង់មិនបានសម្ដែងព្រះវត្តមានដ៏រស់រវើករបស់ទ្រង់ឲ្យយើងឃើញសោះ។ លោកអ្នកមានការបាក់ទឹកចិត្ត ហួតហែង ហើយអស់សង្ឃឹម ព្រោះលោកអ្នកមិនប្រាកដថា តើទ្រង់នៅក្បែរលោកអ្នក នៅព្រះសណ្ដាប់ ឬក៏នៅបន្តយកចិត្តទុកដាក់នឹងលោកអ្នកទៀតឬក៏អត់។ ដោយគិតដូច្នេះ លោកអ្នកហាក់បីដូចជាអស់កម្លាំង មិនមានចិត្ដចង់អធិស្ឋាន ព្រោះក្ដីអធិស្ឋានរបស់លោកអ្នកហាក់បីដូចជាគ្មានន័យអីសោះ គ្មានខ្លឹមសារ ហើយលើសពីនោះ លោកអ្នកក៏មានអារម្មណ៍ដែរថា ក្ដីអធិស្ឋានរបស់លោកអ្នកត្រឡប់មកលោកអ្នកវិញដោយការខកចិត្ដ ពេញដោយភាពបរាជ័យ។

ឱ! ព្រះអម្ចាស់អើយ! តើទ្រង់គង់នៅឯណា? ហេតុអ្វីបានជាទ្រង់លាក់អង្គទ្រង់ពីទួលបង្គំ? ទូលបង្គំជាកូនរបស់ព្រះអង្គ។ ឱ!ព្រះវរបិតាអើយ! ហេតុអ្វីបានជាទូលបង្គំមានអារម្មណ៍ថា ព្រះអង្គមើលរំលងនឹងការយំសោករបស់ទូលបង្គំអញ្ចឹង? តើដល់កាលណាទៀត? ឱព្រះអម្ចាស់អើយ! តើទ្រង់នឹងបំភ្លេចទូលបង្គំជារៀងរហូតមែនឬ? តើទូលបង្គំនឹងបន្តស្វែងរកទ្រង់ដល់ពេលណាទៀត? ទូលបង្គំមិនឮអ្វីសោះពីទ្រង់! ទូលបង្គំកំពុងតែស្លាប់ហើយ ឱព្រះអម្ចាស់អើយ! សូមកុំអែអង់ទៀតឡើយ ឱព្រះដ៏ជាព្រះនៃទូលបង្គំអើយ!

ប្រសិនបើការអធិស្ឋានខាងលើនេះស្រដៀងគ្នានឹងការយំស្រែកក្នុងចិត្តរបស់លោកអ្នក ចូរមានចិត្តកក់ក្ដៅចុះ ដ្បិតបទពិសោធន៍នេះមិនថ្មី ឬក៏ខុសប្លែកពីអ្នកដទៃឡើយ ព្រោះការទាំងនេះ វាមិនបានកើតឡើងចំពោះតែលោកអ្នកម្នាក់ឯងប៉ុណ្ណោះនោះទេ។ លោកអ្នកកំពុងតែស្ថិតនៅក្នុងកាលៈទេសៈដូចដែលគ្រីស្ទបរិស័ទជាច្រើនទៀតបានឆ្លងកាត់ពីមុនរួចស្រេចមកហើយ ហើយអ្នកទាំងនោះក៏កំពុងដើរនៅក្នុងជីវិតនេះរួមជាមួយលោកអ្នកដែរ។ នេះជាចំណុចដែលអាចនឹងជួយផ្ដល់ការលើកទឹកចិត្តខ្លះៗដល់យើង។

ប៉ុន្តែ ចំណុចនេះមិនអាចថ្នាក់ថ្នមបីបាច់បេះដូងគ្រាំគ្រាយើងដែលងាយនឹងបែកបាក់នោះឡើយ ព្រោះការមានអារម្មណ៍ថាព្រះជាម្ចាស់កំពុងនៅឆ្ងាយ គឺជាបទពិសោធន៍ដ៏គួរឲ្យភ័យខ្លាចមែន។ ការយល់ដឹងថា មានអ្នកដទៃទៀតធ្លាប់បានឆ្លងកាត់នូវអារម្មណ៍នេះ គឺគ្រាន់តែអាចជួយដកការថប់បារម្ភរបស់យើងតែបន្តិចបន្តួចប៉ុណ្ណោះ។ យើងត្រូវការព្រះបន្ទូលរបស់ព្រះជាម្ចាស់ ដើម្បីនិយាយមកកាន់យើង ទាក់ទងទៅនឹងចំណុចដ៏ពិតនេះ ជាប្រយោជន៍ឲ្យយើងចេះស៊ូទ្រាំ និងចេះរង់ចាំទ្រង់ ដោយមានសេចក្ដីសង្ឃឹម នៅពេលដែលយើងមានអារម្មណ៍ថា ទ្រង់នៅសែនឆ្ងាយនោះ។

ចូរពឹងលើសេចក្ដីពិត មិនមែនលើអារម្មណ៍

សម្រែកយំសោករបស់ស្ដេច ដាវីឌ ក្នុងកណ្ឌគម្ពីរទំនុកតម្កើងជំពូក២២មិនសូវខុសគ្នាពីយើងប៉ុន្មាននោះទេ៖

«ឱ! ព្រះនៃទូលបង្គំព្រះនៃទូលបង្គំអើយ! ហេតុអ្វីបានជាព្រះអង្គបោះបង់ចោលទូលបង្គំ? ហេតុអ្វីបានជាព្រះអង្គគង់ឆ្ងាយមិនជួយទូលបង្គំ ឬស្ដាប់ពាក្យស្រែកថ្នូររបស់ទូលបង្គំដូច្នេះ? ឱ! ព្រះនៃទូលបង្គំអើយ! ទូលបង្គំស្រែកអំពាវនាវនៅពេលថ្ងៃ តែព្រះអង្គមិនឆ្លើយតបទេ ក៏ស្រែកនៅពេលយប់ដែរ តែមិនបានស្រាកស្រាន្តឡើយ។» (ទំនុកតម្កើង ២២:១-២ គកស)។

ស្ដេច ដាវីឌ មានព្រះហឫទ័យថា ព្រះជាម្ចាស់បានបោះបង់ទ្រង់ចោល ខណៈពេលដែលទ្រង់កំពុងស្វែងរក ដោយឥតស្រាកស្រាន្ត ចំពោះការសម្រាកនៅក្នុងព្រះជាម្ចាស់ ប៉ុន្តែទ្រង់មិនបានរកឃើញការសម្រាកនោះឡើយ។ អ្វីដែលស្ដេច ដាវីឌ លើកឡើងជាបន្ទាប់ គឺជាចំណុចផ្លាស់ប្រែដែលបង្វែរទ្រង់ចេញពីភាពទុក្ខសោករបស់ទ្រង់៖

«ប៉ុន្តែ ឱព្រះដែលថ្កើងឡើងនៅលើពាក្យសរសើររបស់អ៊‌ីស្រាអែល ព្រះអង្គបរិសុទ្ធ។ បុព្វបុរសរបស់យើងខ្ញុំបានទុកចិត្តដល់ព្រះអង្គ ពួកលោកបានទុកចិត្ត ហើយព្រះអង្គបានរំដោះពួកលោក។» (ទំនុកតម្កើង ២២:៣-៤ គកស)

ជាជាងនៅបន្តមានអារម្មណ៍ថា ព្រះជាម្ចាស់បានបដិសេធទ្រង់ ជាប់ក្នុងភាពឯកា ក៏ដូចជាស្ថិតក្នុងប្រទល់នៃក្ដីអស់សង្ឃឹមស្ដេច ដាវីឌ បានបង្វែរសេចក្ដីផ្ដោតចិត្ដរបស់ទ្រង់ទៅលើសេចក្ដីពិតដ៏ប្រសើរពីរយ៉ាង៖ ទី១ គឺការសោយរាជ្យរបស់ព្រះជាម្ចាស់ មានពេញទៅដោយភាពបរិសុទ្ធ ហើយទី២ គឺថា ព្រះអង្គតែងតែមានភាពស្មោះត្រង់ ក្នុងការរំដោះរាស្ត្ររបស់ទ្រង់។

ចំណុចទី១៖ ពេលដែលលោកអ្នកមានអារម្មណ៍ថា គ្មានព្រះវត្តមានរបស់ព្រះជាម្ចាស់គង់នៅក្បែរ ចូរពឹងផ្អែកលើលក្ខណសម្បត្តិរបស់ទ្រង់។ ការសោយរាជ្យរបស់ព្រះអង្គគឺជាការរំឭកដល់យើងថា ទ្រង់មានព្រះវត្តមាននៅគ្រប់ទីកន្លែង។ ទោះបើយើងមិនមានអារម្មណ៍ថា ព្រះអង្គកំពុងគង់នៅជិតយើងក៏ដោយ ក៏យើងត្រូវចាំថា ទ្រង់កំពុងគង់នៅជិតយើងដែរ។ ប៉ុន្តែ ពេលនោះយើងក៏នៅដឹងដែរថា យើងមិនស័ក្ដិសមនឹងនៅជិតទ្រង់ឡើយ ដោយសារព្រះអង្គទ្រង់គឺជាព្រះដែលពោរពេញទៅដោយភាពបរិសុទ្ធ។

ប៉ុន្តែ ព្រះរបស់យើងដែលជាព្រះកំពុងសោយរាជ្យ ហើយក៏ជាព្រះដ៏បរិសុទ្ធ ព្រះអង្គបានប្រទានអំណោយទានដ៏ឥតគិតថ្លៃដោយទ្រង់បានអនុញ្ញាតឲ្យយើងអាចចូលទៅក្នុងព្រះវត្តមានទ្រង់ តាមរយៈព្រះលោហិតរបស់ព្រះគ្រីស្ទ។ ព្រះអង្គកំពុងប្រទានដល់យើងនូវអ្វីដែលយើងមិនស័ក្ដិសមនឹងទទួលយក ពោលគឺការដែលយើងអាចចូលទៅកាន់បល្ល័ង្កនៃព្រះគុណទាំងមានទំនុកចិត្តនោះ។ ពេលដែលយើងមានអារម្មណ៍ថា ព្រះជាម្ចាស់បានបោះបង់យើងចោល យើងត្រូវតែរំពឹងលើអ្វីដែលយើងដឹងថា ជាសេចក្ដីពិត៖ ការសោយរាជ្យរបស់ព្រះជាម្ចាស់គឺមានពេញទៅដោយភាពបរិសុទ្ធ ហើយព្រះអង្គក៏បានអនុញ្ញាតឲ្យយើងអាចចូលទៅគាល់ទ្រង់ដោយមិនមានដែនកំណត់ផងដែរ។

ចំណុចទី២៖ ពេលដែលយើងមានអារម្មណ៍ថា យើងគ្មានព្រះចេស្ដារបស់ព្រះជាម្ចាស់ក្នុងជីវិត ចូររំពឹងលើសេចក្ដីស្មោះត្រង់របស់ទ្រង់ទាក់ទងទៅនឹងការដែលព្រះអង្គបានធ្វើការរំដោះយើង។ ស្ដេច ដាវីឌ បានរំឭកអង្គទ្រង់ពីរឿងអតីតកាល អំពីការដែលព្រះជាម្ចាស់បានរំដោះបុព្វបុរសរបស់ទ្រង់ ពេលដែលពួកគាត់ទុកចិត្តលើព្រះជាម្ចាស់។ ព្រះជាម្ចាស់តែងតែរំដោះពួកគាត់។ ព្រះអង្គបានរំដោះពួកគាត់ពេលដែលពួកគាត់ស្រែករកព្រះជាម្ចាស់ ហើយព្រះអង្គក៏បានសង្គ្រោះពួកគាត់ចេញពីព្រះក្លែងក្លាយ និងខ្មាំងសត្រូវរបស់ពួកគាត់ពេលដែលពួកគាត់ទុកចិត្តលើព្រះអង្គផង។

វាជាការងាយស្រួលណាស់ចំពោះខ្ញុំក្នុងការបារម្ភថា ពេលនេះហើយដែលជាពេលដែលព្រះជាម្ចាស់ទំនងនឹងលែងមានសេចក្ដីស្មោះត្រង់ ទំនងនឹងភ្លេចខ្ញុំ ក៏ដូចជាទំនងនឹងមិនជួយខ្ញុំទៀតទេមើលទៅ។ ពេលដែលយើងមានអារម្មណ៍បែបនេះ យើងត្រូវតែជឿជាក់លើព្រះបន្ទូលរបស់ទ្រង់ ហើយឱបក្រសោបរឿងផ្សេងៗដែលមានចែងទុកអំពីភាពស្មោះត្រង់របស់ទ្រង់នោះដែរ។ យើងអាចយកសេចក្ដីសន្យារបស់ទ្រង់មកអធិស្ឋាន ដោយដឹងថា ព្រះអង្គព្រះសណ្ដាប់ការយំសោករបស់យើង។ យើងក៏អាចនឹកចាំ និងសញ្ជឹងគិតពីសេចក្ដីស្មោះត្រង់របស់ទ្រង់ដែលមានចំពោះយើងនាអតីតកាលដែរ។ ឈើឆ្កាងគឺជាអំណះអំណាងរបស់យើងទាក់ទងទៅនឹងសេចក្ដីសន្យារបស់ទ្រង់ ចំពោះការរំដោះយើង ពេលយើងមើលមិនឃើញ ក៏ដូចជាមិនមានអារម្មណ៍ថា ព្រះចេស្ដារបស់ទ្រង់កំពុងតែធ្វើការនៅក្នុងជីវិតយើងនេះ។

ចូរអនុញ្ញាតឲ្យសេចក្ដីពិតបំផ្លាស់បំប្រែអារម្មណ៍របស់លោកអ្នក

ស្ដេច ដាវីឌ បន្តលើកអំពីទុក្ខសោកសង្រេងរបស់ទ្រង់ក្នុងខគម្ពីរបន្តបន្ទាប់ ដោយចងចាំអំពីភាពបរិសុទ្ធ និងភាពស្មោះត្រង់របស់ព្រះជាម្ចាស់ ស្របពេលនោះទ្រង់ក៏ទាំងបើកចំហអំពីអារម្មណ៍ពិតៗរបស់ព្រះអង្គផង «កម្លាំងទូលបង្គំស្ងួត ដូចអំបែងឆ្នាំង អណ្ដាតទូលបង្គំជាប់នៅក្រអូមមាត់ ព្រះអង្គដាក់ទូលបង្គំចុះទៅក្នុងធូលីនៃសេចក្ដីស្លាប់» (ទំនុកតម្កើង ២២:១៥ គកស)។ ការដែលយើងដឹងអំពីសេចក្ដីពិត និងដំណឹងល្អរបស់ព្រះជាម្ចាស់មិនមែនមានន័យថា យើងមិនអាចបញ្ចេញអារម្មណ៍ដ៏ពិតរបស់យើងនោះទេ។ យើងនៅអាចបន្តប្រាប់ព្រះអង្គពីការត្អូញត្អែររបស់យើងដល់ព្រះអង្គ។ ព្រះវរបិតារបស់យើងមិនទៅណាទេ ហើយទ្រង់ក៏ជ្រាបគ្រប់អ្វីៗទាំងអស់ក្នុងចិត្តរបស់យើងផងដែរ ពោលគឺទ្រង់ជ្រាបបានយ៉ាងច្បាស់លាស់ជាងយើងទៅទៀត។

ប៉ុន្តែ មានចំណុចដ៏គួរឲ្យកត់សម្គាល់មួយដែលបានកើតឡើងក្នុងអារម្មណ៍របស់ស្ដេច ដាវីឌ ខណៈពេលដែលទ្រង់កំពុងយំសោកទៅកាន់ព្រះជាម្ចាស់។ ចំណុចនោះគឺ៖ សេចក្ដីពិតបានបំផ្លាស់បំប្រែអារម្មណ៍របស់គាត់។ ព្រះអង្គបានចាកចេញពីការយំសោកសៅក្នុងអារម្មណ៍ដែលគិតថា គ្មានវត្តមានព្រះជាម្ចាស់ ទៅកាន់ ការប្រកាសអំពីព្រះវត្តមាននៃព្រះ ហើយចេញពីមន្ទិលសង្ស័យ និងសេចក្ដីអស់សង្ឃឹម ទៅកាន់ចិត្ដដែល មានភាពជឿជាក់ច្បាស់ និងការច្រៀងសរសើរវិញ៖

«ទូលបង្គំនឹងប្រកាសអំពីព្រះនាមព្រះអង្គដល់ពួកបងប្អូន ទូលបង្គំនឹងសរសើរតម្កើងព្រះអង្គនៅកណ្ដាលក្រុមជំនុំ។ អ្នករាល់គ្នាដែលកោតខ្លាចដល់ព្រះយេហូវ៉ាអើយ ចូរសរសើរតម្កើងព្រះអង្គ! អ្នកទាំងអស់គ្នាដែលជាពូជពង្សយ៉ាកុបអើយ ចូរលើកតម្កើងព្រះអង្គអ្នកទាំងអស់គ្នាដែលជាពូជពង្សអ៊‌ីស្រាអែលអើយ ចូរស្ញប់ស្ញែងនៅចំពោះព្រះអង្គចុះ! ដ្បិតព្រះអង្គមិនបានមើលងាយ ឬស្អប់ខ្ពើមមនុស្សទុគ៌តមានទុក្ខវេទនាឡើយ ក៏មិនបានលាក់ព្រះភ័ក្ត្រនឹងគេដែរ កាលអ្នកនោះបានអំពាវនាវរកព្រះអង្គ ព្រះអង្គទ្រង់ព្រះសណ្ដាប់» (ទំនុកតម្កើង ២២:២២-២៤ គកស)។

ខណៈពេលដែលយើងចងចាំសេចក្ដីពិតរបស់ព្រះជាម្ចាស់ នោះព្រះអង្គក៏នឹងបំផ្លាស់បំប្រែអារម្មណ៍របស់យើងផងដែរ។ ការសោយរាជ្យដ៏បរិសុទ្ធ និងការរំដោះដ៏ស្មោះត្រង់របស់ព្រះអង្គ គឺធំឧត្តមជាងអារម្មណ៍ដែលប្រែប្រួលឥតឈប់ឈររបស់យើង ក៏ដូចជាកាលៈទេសៈរបស់យើងដែលមើលទៅហាក់បីដូចជាកាន់តែលំបាកលំបិនទៅៗ។ ដូច្នេះហើយបានជាយើងត្រូវតែព្យាយាមរំឭកខ្លួនឯងអំពីសេចក្ដីពិតទាំងនេះនៅពេលដែលយើងមានអារម្មណ៍ថា ព្រះជាម្ចាស់គង់នៅឆ្ងាយពីយើង ហើយយើងក៏ត្រូវប្ដេជ្ញាចិត្តជ្រើសរើសសរសើរទ្រង់ ទោះបើយើងមិនមានអារម្មណ៍បែបនោះក៏ដោយ។

ចូរមានការតស៊ូដោយក្ដីសង្ឃឹមតាមរយៈការរត់ទៅរកព្រះបន្ទូលរបស់ព្រះអង្គ។ ក្នុងពេលវេលាដ៏ល្អឥតខ្ចោះរបស់ទ្រង់ ចូរយើងអនុញ្ញាតឲ្យសេចក្ដីពិតរបស់ព្រះអង្គបំផ្លាស់បំប្រែអារម្មណ៍របស់យើង ដើម្បីឲ្យយើងអាចនឹងច្រៀងជាមួយនឹងស្ដេច ដាវីឌ ថា៖ «ពេលមនុស្សសុចរិតស្រែករកជំនួយ ព្រះយេហូវ៉ាព្រះសណ្ដាប់ ហើយព្រះអង្គក៏រំដោះគេឲ្យរួចពីគ្រប់ទុក្ខលំបាករបស់គេ» (ទំនុកតម្កើង ៣៤:១៧ គកស)។

និពន្ធដោយ៖ លោកស្រី Kristen Wetherell
បកប្រែដោយ និងកែសម្រួលដោយ៖ លោក ឈាង បូរ៉ា, លោក ទេព រ៉ូ និងលោក ថាច់ ទិត្យសូរិយា
អ្នកវាយឯកសារចុះ៖ លោក ទេព រ៉ូ
ដកស្រង់ខ្លះៗចេញពី www.thegospelcoalition.org ដោយមានការអនុញ្ញាត។

តើអ្នកគិតយ៉ាងណា?

២ពិន្ទុ

តើលោកអ្នកយល់យ៉ាងណាដែរ?

១៤១

កំណត់ហេតុបណ្ដាញ២៧ សីហា ២០២៥

ប្រកាសអំពីព្រះយេស៊ូវនៅលើកាប៉ាល់ទីតានិច

បើសិនជាអ្នកកំពុងតែស្ថិតនៅក្នុងគ្រោះមហន្តរាយ តើអ្នកមានចិត្តចង់ផ្សាយដំណឹងល្អ ដល់មនុស្សនៅជុំវិញអ្នកទេ?

អានបន្ថែម

ហេតុផល៤យ៉ាង ដែលលោកអ្នកគួរអធិប្បាយតាមរយៈកណ្ឌគម្ពីរ អេសាយ

១១៣៨

កំណត់ហេតុបណ្ដាញ១២ ឧសភា ២០២៥

ហេតុផល៤យ៉ាង ដែលលោកអ្នកគួរអធិប្បាយតាមរយៈកណ្ឌគម្ពីរ អេសាយ

អធិប្បាយកណ្ឌគម្ពីរអេសាយ ដើម្បីឲ្យឃើញអំពីសិរីល្អនៃសេចក្តីសង្គ្រោះរបស់ព្រះជាម្ចាស់ដែលមានព្រះជន្មរស់ ដែលមានការឆ្លុះបញ្ចាំងលើព្រះភក្ត្ររបស់ព្រះយេស៊ូវគ្រីស្ទ។

អានបន្ថែម

១៨៩

កំណត់ហេតុបណ្ដាញ៥ ឧសភា ២០២៥

តើលោកអ្នកចាំបាច់ត្រូវតែជឿលើអ្វី ដើម្បីឲ្យអាចទទួលបានសេចក្តីសង្គ្រោះ?

អ្នកបើកបរយន្តហោះបានប្រកាសថា មានហ្វូងចាបមួយហ្វូងបានហើរចូលស្លាបយន្តហោះម្ខាង ហើយយន្តហោះក៏កំពុងតែចាកចុះក្នុងល្បឿនដ៏លឿន…

អានបន្ថែម

អត្ថបទបន្ថែមពី កំណត់ហេតុបណ្ដាញ

១០

កំណត់ហេតុបណ្ដាញ១៥ កញ្ញា ២០២៦

តើអ្វីទៅជាការថ្វាយបង្គំរូបព្រះ?

អានបន្ថែម

៥០

កំណត់ហេតុបណ្ដាញ៨ កញ្ញា ២០២៦

ការតយុទ្ធនឹងសេចក្តីច្រណែនឈ្នានីស

ប្អូនស្រី ដាលីស បានសរសេរមកយើង ដើម្បីសួរថា«លោកគ្រូ តើនាង ខ្ញុំត្រូវដោះស្រាយយ៉ាងណាចំពោះការច្រណែនឈ្នានីស និងការប្រច័ណ្ឌ ដែលកំពុងលេបត្របាក់នាងខ្ញុំទៅហើយនោះ…

អានបន្ថែម