in ,

ការសុគតសម្រាប់អ្នកមិនបានជ្រើសតាំង

សុខា​បាន​សួរ​ថា «តើ​ការ​សុគត​របស់​ព្រះ​យេស៊ូវ​នៅ​លើ​ឈើ​ឆ្កាង​សម្រេច​បាន​អ្វី​ខ្លះ​សម្រាប់​អ្នក​ដែល​ព្រះ​អង្គ​មិន​បាន​ជ្រើស​តាំង? តើ​សម្រេច​បាន​អ្វី​មួយ​ដែរ​ឬ​ទេ?»

វា​ពិត​ជា​រឿង​ដ៏​គួរ​ឲ្យ​ភ្ញាក់​ផ្អើល​មែន​ដែល​សំណួរ​នេះ​តែង​តែ​លេច​ឡើង​ម្ដង​ហើយ​ម្ដង​ទៀត​ជា​ពិសេស​ថ្មីៗ​នេះ​មាន​គេ​ធ្លាប់​សួរ​យើង​ខ្ញុំ​ថា «តើ​ព្រះ​យេស៊ូវ​បាន​ទិញ​ព្រះ​គុណ​សាធារណៈ (ឬ​ក៏​ព្រះ​គុណ​សម្រាប់​មនុស្ស​ទាំង​អស់) មែន​ឬ?»។ ដូច្នេះ យើង​ខ្ញុំ​ចង់​យក​ឱកាស​នេះ ដើម្បី​នឹង​ឆ្លើយ​សំណួរ​នេះ។

យើង​ខ្ញុំ​នឹង​លើក​ឡើង​អំពី​ការ​ឆ្លុះ​បញ្ចាំង​ត្រួសៗ​តែ​ប៉ុណ្ណោះ។ បើ​និយាយ​ឲ្យ​ស្មោះ​ទៅ យើង​ខ្ញុំ​មិន​ដឹង​ថា​គួរ​ឆ្លើយ​ដោយ​របៀប​ណា​ទេ។ ប៉ុន្តែ ទោះ​ជា​យ៉ាង​ណា​ក៏​ដោយ​ក៏​យើង​ខ្ញុំ​គិត​ថា ក្នុង​ការ​ដែល​យើង​ខ្ញុំ​គ្រាន់​តែ​ប្រាប់​អំពី​មូល​ហេតុ​ទៅ​កាន់​លោក​អ្នក នោះ​ទំនង​ជា​លោក​អ្នក​នឹង​មិន​អាច​យល់​បាន​យ៉ាង​ជ្រាលជ្រៅ​ដែរ។

ក្នុង​អត្ថន័យ​មួយ ខណៈ​ពេល​ដែល​យើង​ប្រព្រឹត្ត​អំពើ​បាប នោះ​យើង​គួរ​ទទួល​បាន​ការ​ដាក់​ទារុណកម្ម​ដ៏​នៅ​អស់​កល្ប​ជានិច្ច។ យើង​មិន​សម​នឹង​ទទួល​បាន​ការ​ដក​ដង្ហើម​ម្ដង​ទៀត​ឡើយ។ មិន​គួរ​មាន​ការ​លើក​លែង​ទោស​ទេ។ យើង​ក៏​មិន​សម​នឹង​ទទួល​បាន​ពេលវេលា​ទៀត​ដែរ។ ដូច្នេះ យ៉ាង​ច្បាស់ ក្នុង​អត្ថន័យ​មួយ​ចំនួន ពេលវេលា​ដែល​ព្រះ​អង្គ​នៅ​ប្រទាន​ដល់​យើង​គឺ​ដោយ​សារ​ព្រះ​គុណ។ ហើយ​ព្រះ​គុណ​សម្រាប់​មនុស្ស​មាន​បាប​ទាមទារ​ឲ្យ​មាន​ការ​បង់​ថ្លៃ ឬ​ក៏​ការ​ទិញ​យក ឬ​ក៏​ការ​ធានា​ពី​ព្រះ​ដ៏​បរិសុទ្ធ​ផ្ទាល់។ គឺ​ព្រះ​គ្រីស្ទ​ហើយ​ដែល​ជា​អង្គ​ដែល​ប្រទាន​ការ​នេះ។

ដូច្នេះ យើង​ខ្ញុំ​មាន​ទំនោរ​ក្នុង​ការ​និយាយ​ថា «ប្រាកដ​ណាស់! ចំណុច​ពិត​ដែល​ថា អ្នក​ដែល​មិន​ទទួល​បាន​ការ​ជ្រើស​តាំង អ្នក​មិន​ជឿ​នៅ​ពាសពេញ​ផែនដី​នេះ​កំពុង​តែ​នៅ​បន្ត​ទទួល​ខ្យល់​ដង្ហើម​ជីវិត ហើយ​នៅ​មាន​ឱកាស​ក្នុង​ការ​ជឿ​គឺ​ជា​អំណោយ​មក​ពី​ព្រះ។ ដូច​ដែល​ថា ការ​ដែល​នៅ​មាន​ឱកាស​ទទួល​យក​ដំណឹង​ល្អ​ក៏​ជា​អំណោយ​ទាន​ដែរ។ ហើយ​គឺ​ឈើ​ឆ្កាង​ហើយ​ដែល​ផ្គត់ផ្គង់​ឱកាស​នេះ។»

នេះ​គឺ​ជា​ចំណុច​ដែល​យើង​គួរ​ចង​ចាំ៖ កណ្ឌ​គម្ពីរ រ៉ូម ២:៤-៥ បាន​ចែង​ថា «តើ​អ្នក​មិន​ដឹង​ថា សេចក្តី​សប្បុរស​របស់​ព្រះ នាំ​អ្នក​ឲ្យ​ប្រែ​ចិត្ត​ទេ​ឬ? ប៉ុន្តែ ដោយ​អ្នក​មាន​ចិត្ត​រឹង​រូស ហើយ​មិន​ព្រម​ប្រែ​ចិត្ត នោះ​អ្នក​កំពុង​តែ​ប្រមូល​សេចក្តី​ក្រោធ ទុក​សម្រាប់​ខ្លួន​នៅ​ថ្ងៃ​នៃ​សេចក្តី​ក្រោធ​វិញ ជា​ថ្ងៃ​ដែល​ព្រះ​នឹង​សម្ដែង​ការ​ជំនុំ​ជម្រះ​ដ៏​សុចរិត»។

ដូច្នេះ ប្រសិន​បើ​អ្នក​ដែល​មិន​ទទួល​បាន​ការ​ជ្រើស​តាំង​បដិសេធ—ហើយ​ពួក​គាត់​ក៏​ពិត​ជា​បដិសេធ​មែន​ដែរ—គឺ​ពួក​គាត់​កំពុង​តែ​បដិសេធ​ព្រះ​គុណ​មួយ​នេះ ហើយ​ព្រះ​គុណ​នោះ​ផ្ទាល់​ក៏​បាន​ក្លាយ​ជា​ការ​ថ្កោល​ទោស​បន្ថែម​លើ​ពួក​គាត់។ ការ​នេះ​ក៏​ធ្វើ​ឲ្យ​យើង​ខ្ញុំ​ងឿង​ឆ្ងល់​ផង​ដែរ​ថា «តើ​ក្នុង​អត្ថន័យ​មួយ​ណា​ដែល​ថា​វា​ជា​ព្រះ​គុណ?» ក្នុង​អត្ថន័យ​មួយ​វា​គឺ​ជា​ព្រះ​គុណ។ វា​គឺ​ជា​ការ​ផ្ដល់​ជូន​ដ៏​ពិត ហើយ​ក៏​ជា​ឱកាស​ដ៏​ពិត​ផង​ដែរ។ ប៉ុន្តែ ប្រសិន​បើ​លោក​អ្នក​បដិសេធ​ព្រះ​គុណ​នេះ នោះ​វា​នឹង​វាយ​បក​មក​រក​លោក​អ្នក​វិញ ហើយ​ក៏​នឹង​កាន់​តែ​បង្កើន​បរិមាណ​នៃ​ការ​ថ្កោល​ទោស​លើស​ដើម​ជា​មិន​ខាន។

វា​ប្រៀប​ដូច​ជា​ការ​បង្ហាញ​សេចក្ដី​សប្បុរស​ទៅ​កាន់​បុគ្គល​ណា​ម្នាក់​ដែល​គាត់​បដិសេធ​សេចក្ដី​សប្បុរស​នោះ នោះ​វា​នឹង​កាន់​តែ​បង្ហាញ​ថា​គាត់​អាក្រក់​ប៉ុណ្ណា​ហើយ។ ហើយ​ការ​ដែល​វា​បង្ហាញ​ថា គាត់​អាក្រក់​ខ្លាំង​ប៉ុណ្ណា​ក៏​នឹង​កាន់​តែ​នាំ​មក​នូវ​ការ​ថ្កោល​ទោស​ខ្លាំង​លើស​ដើម​ទៀត​លើ​គាត់​ផង​ដែរ។

ចម្លើយ​ដែល​យើង​ខ្ញុំ​គិត​គឺ​ថា ប្រាកដ​ណាស់! យើង​ខ្ញុំ​គិត​ថា ព្រះ​គុណ​ដ៏​ពិត ព្រះ​គុណ​សាធារណៈ​ដ៏​ពិត ការ​ផ្ដល់​ជូន​នូវ​សេចក្ដី​សង្គ្រោះ​ដ៏​ពិត—ឥឡូវ​នេះ ចំណុច​ដែល​ថា​លោក​អ្នក​កំពុង​តែ​អាន​អត្ថបទ​មួយ​នេះ—គឺ​ជា​ព្រះ​គុណ។ ហើយ​ប្រសិន​បើ​លោក​អ្នក​មិន​មែន​ជា​គ្រីស្ទ​បរិស័ទ នោះ​ព្រះ​អង្គ​កំពុង​តែ​ផ្ដល់​ជូន​ព្រះ​គុណ​ដល់​លោក​អ្នក​នៅ​ពេល​វេលា​នេះ​តែ​ម្ដង តាម​រយៈ​ការ​ដាស់​តឿន​របស់​យើង​ខ្ញុំ​ថា ប្រសិន​បើ​លោក​អ្នក​បដិសេធ នោះ​ការ​ថ្កោល​ទោស​ក៏​នឹង​កាន់​តែ​លើស​ដើម​ហើយ។

ហើយ​នេះ​ឯង​គឺ​ជា​អំណោយ​ទាន​ចំពោះ​លោក​អ្នក​ឥឡូវ​នេះ​ដែល​ព្រះ​ជាម្ចាស់​ទំនង​ជា​នឹង​សព្វ​ព្រះ​ហឫទ័យ​ប្រើ​ប្រាស់​នៅ​ពេល​ក្រោយ ដើម្បី​ឲ្យ​លោក​អ្នក​ទទួល​ស្គាល់​ថា «ទេ! ខ្ញុំ​មិន​ចង់​ឲ្យ​ការ​ថ្កោល​ទោស​លើ​ជីវិត​របស់​យើង​ខ្ញុំ​គុណ​ជា​ទ្វេ​លើស​ដើម​ទៀត​នោះ​ទេ។ ខ្ញុំ​ចង់​ឆ្លើយ​តប​នឹង​ព្រះ​គុណ​នេះ​នៅ​ពេល​នេះ​តែ​ម្ដង»។

នេះ​ឯង​គឺ​ជា​អ្វី​ដែល​យើង​ខ្ញុំ​គិត​ថា​គួរ​ជា​ការ​ឆ្លើយ​តប​ចំពោះ​អត្ថបទ​មួយ​នេះ៖ សូម​ទទួល​យក​ព្រះ​គុណ​ចុះ។ ដោយ​សារ​លោក​អ្នក​កំពុង​តែ​មាន​ជីវិត​ឥឡូវ​នេះ នោះ​លោក​អ្នក​ក៏​នៅ​មាន​ឱកាស​ក្នុង​ការ​ទទួល​ជឿ ហើយ​ទទួល​បាន​សេចក្ដី​សង្គ្រោះ​ដែរ។

និពន្ធដោយ៖ លោកគ្រូ John Piper
បកប្រែដោយលោកគ្រូ៖ ឈាង បូរ៉ា
កែសម្រួលដោយ៖ លោក ទេព រ៉ូ, លោក ខែម បូឡុង, លោក ប៊ុន ធីម៉ូថេ និងលោក ឯក សត្យា
ដកស្រង់ខ្លះៗ និងកែសម្រួលចេញពី www.desiringgod.org ដោយមានការអនុញ្ញាត។

តើអ្នកចូលចិត្តអត្ថបទនេះទេ?

មតិយោបល់

ឆ្លើយ​តប

អាសយដ្ឋាន​អ៊ីមែល​របស់​អ្នក​នឹង​មិន​ត្រូវ​ផ្សាយ​ទេ។ វាល​ដែល​ត្រូវ​ការ​ត្រូវ​បាន​គូស *

Loading…

0

ជឿ​ដល់​លោក​ម៉ូសេ​ពិត

ផ្លូវដែលបេះដូងលោកអ្នកទៅ