មួយថ្ងៃខ្ញុំមានពេលមួយម៉ោង តើខ្ញុំគួរអានព្រះគម្ពីរប៉ុន្មាននាទី?

សូមបិទព្រះគម្ពីររបស់លោកអ្នក ហើយចេញទៅពិចារណាមើលសត្វស្លាបនៅលើអាកាស។ កុំគ្រាន់តែអានព្រះគម្ពីរ សូមអានពិភពលោករបស់ព្រះ និងព្រះបន្ទូលរបស់ព្រះ...

១០ វិច្ឆិកា ២០២៤អានរយៈពេល ១០ នាទី

មើល១១៩ដង

មួយថ្ងៃខ្ញុំមានពេលមួយម៉ោង តើខ្ញុំគួរអានព្រះគម្ពីរប៉ុន្មាននាទី?

យើងបន្តទទួលបានសំណួរមកពីអ្នកស្តាប់ ដែលប្រឈមនឹងផែនការណ៍អានព្រះគម្ពីរប្រចាំឆ្នាំ។ សំណួរនេះបានមកពីលោក រុង។ «ជំរាបសួរលោកគ្រូ។ តាមរយៈរដូវកាលផ្សេងៗនៃជីវិតរបស់ខ្ញុំ ខ្ញុំបានទទួលការប៉ះពាល់ជាច្រើនតាមរយៈព្រះគម្ពីរ និងតាមរយៈសៀវភៅផ្សេងៗ ជាពិសេសគឺសៀវភៅរបស់លោកគ្រូ។ សម្រាប់ឆ្នាំខាងមុខនេះ តើខ្ញុំអាចរក្សាតុល្យភាពនៃការអានព្រះគម្ពីរជាមួយនឹងសៀវភៅផ្សេងៗទៀតបានដោយរបៀបណា? ជាពិសេស បើខ្ញុំមានពេលតែមួយម៉ោងក្នុងមួយថ្ងៃ ដើម្បីអាន។ ដូច្នេះ តាមយោបល់របស់លោកគ្រូ តើខ្ញុំគួរបែងចែកពេលវេលាយ៉ាងណារវាងការអានព្រះគម្ពីរ និងការអានសៀវភៅផ្សេងៗ?»

តើគួរអានសៀវភៅណា?

នោះជារបៀបមួយយ៉ាងល្អជាក់លាក់ក្នុងការសួរ។ លោកអ្នកមានពេលមួយម៉ោង លោកអ្នកមានព្រះគម្ពីរ ហើយនិងសៀវភៅផ្សេងៗទៀត—សូមប្រាប់ថា តើខ្ញុំត្រូវធ្វើអ្វី។ អស្ចារ្យណាស់! នេះក៏ជាគំនិតដែលប្រថុយណាស់ដែរ។ វាគឺពិតជាប្រថុយណាស់ក្នុងការប្រាប់នរណាម្នាក់អំពីរបៀបបែងចែកពេលវេលារបស់ពួកគាត់រវាងព្រះគម្ពីរ—គឺជាព្រះបន្ទូលរបស់ព្រះ—និងសៀវភៅផ្សេងៗទៀត។ ខ្ញុំនឹងផ្តល់ជាឱវាទជាក់លាក់នៅបន្តិចទៀត។ ប៉ុន្តែ ដំបូងខ្ញុំមានគំនិតមួយចំនួនសិន។

នៅពេលដែលខ្ញុំអានសំណួរនេះ ខ្ញុំមិនដឹងច្បាស់ថា តើគាត់មានសៀវភៅអ្វីខ្លះទេ ដែលគាត់មាននៅក្នុងគំនិតរបស់គាត់។ តើគាត់សួរអំពីការអានព្រះគម្ពីរ ធៀបនឹងការអានសៀវភៅ «វឌ្ឍនភាពនៃធម្មយាត្រា» ឬ «ការស្គាល់ព្រះ» របស់លោកគ្រូ ផាកើ ឬវិទ្យាស្ថានរបស់លោកគ្រូ ខិលវិន? ឬមួយគាត់សួរអំពីការអានព្រះគម្ពីរ ធៀបនឹងការអានទស្សនាវដ្តីកីឡា ឬភូមិសាស្ត្រជាតិ ឬរឿងប្រលោមលោក ឬមួយសេចក្តីណែនាំ អំពីរបៀបក្លាយជាជាងជួសជុលគ្រឿងម៉ាស៊ីន ឬមួយលំហាត់សាលា? តើគាត់កំពុងសួរអំពីអ្វី?

ពិចារណាពីសត្វស្រមោច

សូមឲ្យខ្ញុំនិយាយអំពីការអានព្រះគម្ពីរ ធៀបនឹងការស្វែងរកចំណេះដឹងទូទៅ ដែលនៅខាងក្រៅព្រះគម្ពីរ។ ពីព្រោះខ្ញុំអាចស្រមៃអំពីមនុស្សម្នាក់និយាយថា «ពិតណាស់! ប្រសិនបើព្រះគម្ពីរគឺពិតជាព្រះបន្ទូលរបស់ព្រះអាទិករដែលបង្កើតចក្រវាលនេះមែន ចុះហេតុអ្វីលោកអ្នកមិនចំណាយពេលតែជាមួយព្រះគម្ពីរ ពេញមួយថ្ងៃ ហើយស្តាប់ព្រះ? ដ្បិតទ្រង់គឺជាព្រះ»។

ចម្លើយទៅកាន់សំណួរនេះគឺថា ព្រះគម្ពីរមិនបានប្រាប់យើងឲ្យធ្វើបែបនេះនោះទេ៖ «ទៅមើលស្រមោចចុះ [ឱមនុស្សខ្ជិលច្រអូសអើយ] ចូរពិចារណាផ្លូវទាំងប៉ុន្មានរបស់វា ហើយមានប្រាជ្ញាឡើង» (សុភាសិត ៦:៦)។ នៅក្នុងរបៀបមួយទៀតគឺ បិទព្រះគម្ពីររបស់ខ្លួន ហើយចេញទៅមើលអ្វីដែលនៅជុំវិញ ហើយរៀនអ្វីម្យ៉ាងពីលោកីយ៍នេះ។ «ចូររំពឹងគិតតែពីផ្កាឈូកនៅក្នុងបឹង» (ម៉ាថាយ ៦:២៨)។ សូមបិទព្រះគម្ពីររបស់លោកអ្នក ហើយចេញទៅពិចារណាមើលផ្កាឈូកចុះ។ «ចូរពិចារណាពីសត្វស្លាបនៅលើអាកាស» (ម៉ាថាយ ៦:២៦)។ សូមបិទព្រះគម្ពីររបស់លោកអ្នក ហើយចេញទៅពិចារណាមើលសត្វស្លាបនៅលើអាកាស។ កុំគ្រាន់តែអានព្រះគម្ពីរ សូមអានពិភពលោករបស់ព្រះ និងព្រះបន្ទូលរបស់ព្រះ។

ពិតណាស់ ព្រះគម្ពីរក៏បានប្រាប់ឲ្យយើងធ្វើការជាមួយនឹងដៃរបស់យើង ដើម្បីផ្គត់ផ្គង់ការរស់នៅប្រចាំថ្ងៃ (១ថែស្សាឡូនីច ៤:១០-១២)។ ប៉ុន្តែ លោកអ្នកត្រូវរៀនធ្វើការជាអ្នកដេរតង់ដូចជាសាវ័ក ប៉ុល ឬធ្វើជាវេជ្ជបណ្ឌិតដូចជាលោក លូកា ឬធ្វើជាជាងឈើដូចជាឪពុករបស់ព្រះយេស៊ូវ ឬធ្វើជាអ្នកនេសាទត្រីអាជីពដូចជាសាវ័ក ពេត្រុស ដោយមិនចាំបាច់មកពីការអានព្រះគម្ពីរបានដែរ។ ព្រះគម្ពីរមិនបានប្រាប់អំពីអំបោះមួយណាដែលធ្វើឲ្យតង់នៅជាប់គ្នានៅពេលដែលស្បែកត្រូវទឹកសើមនោះឡើយ។ មិនមានប្រាប់បែបនោះទេ។ ព្រះជាម្ចាស់មិនបានរចនាព្រះគម្ពីរបែបនេះនោះទេ។ ព្រះគម្ពីរបានប្រាប់ឲ្យចេញទៅសង្កេតមើលពិភពលោក ឲ្យលោកអ្នកមានប្រាជ្ញា សិក្សាពីធម្មជាតិ ហើយរកដំណោះស្រាយ។

ដូច្នេះ នៅត្រង់នេះគឺចង់បញ្ជាក់ថា ព្រះគម្ពីរផ្ទាល់បានណែនាំយើងឲ្យរៀនអំពីពិភពលោក រៀនអំពីមនុស្ស រៀនអំពីការងារ រៀនអំពីសង្គម និងទំនាក់ទំនងដែលព្រះទ្រង់បានបង្កើតមក។ ព្រះគម្ពីរបានហៅយើងឲ្យរៀនដោយការសម្លឹងមើលរបស់ទាំងអស់នោះ។ យើងនឹងមិនឈប់ឃើញស្នាព្រះហស្តរបស់ព្រះ ដោយព្រោះតែយើងមិនអានព្រះគម្ពីរនោះឡើយ។

១៥នាទីក្នុងមួយថ្ងៃ

តាមពិតទៅ នោះប្រហែលមិនមែនជាអ្វីដែលលោក រុង ចង់សួរនោះទេ។ អ្វីដែលខ្ញុំគិតថាលោក រុង ចង់សួរគឺថា ប្រសិនបើខ្ញុំមានសៀវភៅដែលល្អអំពីព្រះ និងរបៀបរបស់ព្រះដែលសរសេរឡើងដោយអ្នកនិពន្ធដែលកោតខ្លាចព្រះ ហើយខ្ញុំមានពេលមួយម៉ោង ហើយខ្ញុំត្រូវបែងចែកការអានសៀវភៅនោះចេញពីព្រះគម្ពីរ តើខ្ញុំគួរបែងចែកបែបណា? គាត់សួរថា ប្រសិនបើអ្នកមាន «សៀវភៅពីវិទ្យាស្ថាន» របស់លោកគ្រូ ខិលវិន ឬ «ការស្គាល់ព្រះ» របស់លោកគ្រូ ជេ. អាយ. ផាកកើ ហើយគាត់ចង់អានសៀវភៅទាំងនោះខ្លះ ប៉ុន្តែគាត់ក៏ចង់អានព្រះគម្ពីរដែរ។ ដូច្នេះ តើគាត់នឹងធ្វើឡើងដោយរបៀបណា? នេះជាចម្លើយ៖

សូមចាំថា ខ្ញុំមិនមានសិទ្ធអំណាចពីព្រះគម្ពីរក្នុងការនិយាយអំពីការនេះនោះឡើយ។ ការបែងចែកនេះគឺវាគ្រាន់តែជាអ្វីដែលខ្ញុំនឹងផ្តល់ឲ្យជាយោបល់ប៉ុណ្ណោះ។ ខ្ញុំនឹងរម្លឹកទៅកាន់អ្នកអាន និងអ្នកស្ដាប់របស់យើងទាំងអស់គ្នា អំពីអ្វីមួយដែលខ្ញុំបាននិយាយពីមុនមក គឺតាំងតែពីយូរមកហើយ។

ឧបមាថា លោកអ្នកអានយឺតៗដូចខ្ញុំ គឺខ្ញុំអានប្រហែលជា ២០០ ពាក្យក្នុងមួយនាទី—នេះទំនងជាល្បឿនដែលខ្ញុំកំពុងនិយាយក៏ថាបាន ខ្ញុំមិនដឹងប្រាកដទេ។ ប្រសិនបើលោកអ្នកអាន១៥នាទីក្នុងមួយថ្ងៃ ក្នុងរយៈពេលមួយឆ្នាំ នោះគឺស្មើនឹងការចំណាយពេលអានចំនួន ៥៤៧៥ នាទីក្នុងមួយឆ្នាំ។ បើយើងគុណនឹង ២០០ ពាក្យក្នុងមួយនាទី នោះស្មើនឹង ១០៩៥០០០ ពាក្យ ដែលលោកអ្នកបានអានក្នុងរយៈពេលមួយឆ្នាំ។

ជាមធ្យម សៀវភៅធំៗជាច្រើនគឺមានប្រហែលជា ៣៦០ ពាក្យក្នុងមួយទំព័រ។ ខ្ញុំបានរាប់ជាច្រើនដង។ ដូច្នេះ លោកអ្នកនឹងអានប្រហែលជា ៣០៤១ ទំព័រក្នុងរយៈពេលមួយឆ្នាំ នៃចន្លោះពេល១៥នាទីក្នុងមួយថ្ងៃ។ សៀវភៅធំៗអាចមានជាមធ្យម ចំនួន ២៥០ទំព័រ។ សៀវភៅជាច្រើនមានប្រហែលជា ១៥០ ទំព័រ ប៉ុន្តែ ឧបមាថា សៀវភៅទេវវិទ្យាមួយក្បាលដែលធំ ហើយមានគុណភាពល្អ គឺមានប្រមាណជា ២៥០ ទំព័រ។ ខ្ញុំទើបតែបើកមើលមួយក្បាល ដែលខ្ញុំទទួលបានកាលពីម្សិលមិញ។ វាគឺមានប្រមាណជា ២៥០ ទំព័រ។ នោះគឺ ស្មើនឹងអានសៀវភៅសំខាន់ៗ ១២ ក្បាលក្នុង១៥នាទីមួយថ្ងៃ សម្រាប់អ្នកអានដែលមានល្បឿនមធ្យម។

អាន ដើម្បីអានព្រះគម្ពីរ

ខ្ញុំនឹងផ្តល់ជាយោបល់ទៅកាន់លោក រុង ថាឲ្យគាត់គួរអានព្រះគម្ពីរក្នុងរយៈពេល៤៥នាទី—ដោយយឺតៗ មានការគិតពិចារណា សញ្ជឹងគិត អធិស្ឋាន ការធ្វើបែបនេះនឹងអាចនាំឲ្យគាត់ឲ្យអានព្រះគម្ពីរទាំងមូលចប់ក្នុងរយៈពេលមួយឆ្នាំ—បន្ទាប់មក គាត់អាចចំណាយពេល១៥នាទី ដែលនៅសល់ ដើម្បីអានសៀវភៅដែលល្អៗ ដែលយកព្រះជាគោល និងពោរពេញដោយអត្ថបទព្រះគម្ពីរ ដែលនឹងជួយបម្រើដល់ការអានព្រះគម្ពីររបស់គាត់។ (ខ្ញុំសន្មតថាលោក រុង ក៏នឹងញែកពេលជាច្រើនទៀត ដើម្បីអធិស្ឋានដែរ។)

ប្រហែលជានឹងមាននរណាម្នាក់និយាយថា «តើគាត់អាចផ្តល់យោបល់ឲ្យមានសៀវភៅណាផ្សេងចូលមកឈ្លានពានពេលវេលាមួយម៉ោងដែលគាត់គួរតែចំណាយលើការអានព្រះគម្ពីរបានដោយរបៀបណា?»។ ហើយចម្លើយរបស់ខ្ញុំនោះគឺថា តាមរយៈបទពិសោធន៍របស់ខ្ញុំ ហើយព្រះគម្ពីរផ្ទាល់ក៏បានឆ្លុះបញ្ចាំងមកកាន់ខ្ញុំអំពីការយល់ដឹងរបស់មនុស្សផ្សេងៗទៀត ដែលពួកគាត់បានឃើញនៅក្នុងព្រះគម្ពីរ អាចជាមធ្យោបាយយ៉ាងល្អក្នុងការមើលឃើញបន្ថែមទៀត នៅក្នុងព្រះគម្ពីរ។ ខ្ញុំដឹងថា ចំណុចនេះជាការពិត។ ប្រសិនបើខ្ញុំចំណាយពេល១០នាទី ដើម្បីអានសៀវភៅរបស់លោកគ្រូ ចន អូវិន ឬសៀវភៅរបស់លោកគ្រូ យ៉ូណាថាន់ អែតវ៉ដ នោះខ្ញុំនឹងឃើញកាន់តែច្រើនចំណុចទៀត នៅក្នុងព្រះគម្ពីររបស់ខ្ញុំ។

ខ្ញុំគិតថា ប្រសិនបើលោក រុង ជ្រើសរើសសៀវភៅរបស់គាត់ដោយប្រើប្រាស់ប្រាជ្ញា នោះវានឹងមិនបន្ថយអ្វីដែលគាត់ឃើញមាននៅក្នុងព្រះបន្ទូលរបស់ព្រះ នៅក្នុងពេលមួយម៉ោងនោះរបស់គាត់ឡើយ។ ការមើលតាមរយៈភ្នែករបស់អ្នកដទៃនឹងជួយបង្កើនការយល់ដឹងរបស់លោក រុង អំពីអ្វីដែលអស្ចារ្យបំផុតនៅក្នុងពិភពលោកនេះ នៅពេលគាត់អានព្រះគម្ពីរ។

និពន្ធដោយ៖ John Piper
បកប្រែដោយ៖ លោក វេន ប៉ុក
កែសម្រួលដោយ៖ លោក ខែម បូឡុង, លោក ទេព រ៉ូ, លោក ឯក សត្យា, លោក ឈាង បូរ៉ា, លោក ហុង សម្ភស, លោក សឹម រក្សា និងលោកស្រី ឡូញ ស្រីរដ្ឋ
ដកស្រង់ខ្លះៗ និងកែសម្រួលចេញពី www.desiringgod.org ដោយមានការអនុញ្ញាត។ Plovpit.com

តើអ្នកគិតយ៉ាងណា?

០ពិន្ទុ

តើលោកអ្នកយល់យ៉ាងណាដែរ?

តើខ្ញុំអាចជឿលើព្រះគម្ពីរទាំងមូល ហើយព្រះអង្គនៅមិនបានជ្រើសរើសខ្ញុំដែរឬទេ?

២៩៦

កំណត់ហេតុបណ្ដាញ២៧ មេសា ២០២៥

តើខ្ញុំអាចជឿលើព្រះគម្ពីរទាំងមូល ហើយព្រះអង្គនៅមិនបានជ្រើសរើសខ្ញុំដែរឬទេ?

«ជម្រាបសួរលោកគ្រូ តើអាចទេដែលយើងជឿលើព្រះគម្ពីរទាំងមូលនៅក្នុងខួរក្បាលរបស់យើង និងជឿលើគ្រប់ចំណុចនៃសេចក្ដីពិតខាងឯជំនឿគ្រីស្ទបរិស័…

អានបន្ថែម

តើអ្វីទៅធ្វើឲ្យថ្ងៃដែលព្រះអង្គមានព្រះជន្មរស់ឡើងវិញពិសេសម៉្លេះ?

៣១៨៨

កំណត់ហេតុបណ្ដាញ១៩ មេសា ២០២៥

តើអ្វីទៅធ្វើឲ្យថ្ងៃដែលព្រះអង្គមានព្រះជន្មរស់ឡើងវិញពិសេសម៉្លេះ?

ប្រសិនបើព្រះជាម្ចាស់មិនបានប្រោសព្រះគ្រីស្ទឲ្យបានមានព្រះជន្មរស់ឡើងវិញ នោះដំណឹងល្អរបស់យើងគឺជាការឥតអំពើ ជំនឿរបស់យើងគឺជាការឥតអំពើ ដែលនេះមានន័យថា យើងកំពុងតែប្រកាសដំណឹងក្លែងក្លាយ។ បើដូច្នោះមែន នោះយើងគួរតែស៊ីផឹក ហើយអរសប្បាយចុះ ដ្បិតថ្ងៃស្អែកយើងនឹងស្លាប់។

អានបន្ថែម

អត្ថបទលេខ១៥–តើស្ត្រីអាចធ្វើជាគ្រូគង្វាលបានទេ ប្រសិនបើពួកគេទទួលបានការអប់រំដូចពេលបច្ចុប្បន្ននេះ?

២១០៤

កំណត់ហេតុបណ្ដាញ២៨ មករា ២០២៥

អត្ថបទលេខ១៥–តើស្ត្រីអាចធ្វើជាគ្រូគង្វាលបានទេ ប្រសិនបើពួកគេទទួលបានការអប់រំដូចពេលបច្ចុប្បន្ននេះ?

មូលហេតុ គឺមិនមែនជាការខ្វះការអប់រំនោះទេ ប៉ុន្តែជាសេចក្ដីបង្គាប់នៃការបង្កើតរបស់ព្រះជាម្ចាស់។

អានបន្ថែម

អត្ថបទបន្ថែមពី កំណត់ហេតុបណ្ដាញ

ហេតុអ្វីបានជាព្រះយេស៊ូវទទួលបុណ្យជ្រមុជទឹក?

៥១៨៣

ក្តៅៗពេញនិយម

កំណត់ហេតុបណ្ដាញ១៣ កុម្ភៈ ២០២៦

ហេតុអ្វីបានជាព្រះយេស៊ូវទទួលបុណ្យជ្រមុជទឹក?

Why was Jesus baptized?

អានបន្ថែម

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

១៥២៨៦

ក្តៅៗពេញនិយម

កំណត់ហេតុបណ្ដាញ៦ មករា ២០២៦

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

វាគ្មានអ្វីគួរឲ្យភ្ញាក់ផ្អើលនោះទេ យើងបានទទួលសំណួរជាច្រើនពីបេសកជននៅតាមតំបន់នានា…

អានបន្ថែម

តើគ្រូគង្វាល និងពួកចាស់ទុំមានភាពខុសគ្នាឬ?(១ធីម៉ូថេ ៣)

៨២៤២

ក្តៅៗ

កំណត់ហេតុបណ្ដាញ៣០ ធ្នូ ២០២៥

តើគ្រូគង្វាល និងពួកចាស់ទុំមានភាពខុសគ្នាឬ?(១ធីម៉ូថេ ៣)

សាវ័ក ប៉ុល និងអ្នកនិពន្ធព្រះគម្ពីរសញ្ញាថ្មីផ្សេងទៀតបានប្រើប្រាស់ពាក្យថា «អ្នកត្រួតត្រា» ជំនួសគ្នាទៅវិញទៅមកជាមួយនឹងពាក្យ «ពួកចាស់ទុំ»។ ឧទាហរណ៍៖ សូមពិចារណានៅក្នុងកណ្ឌគម្ពីរ ទីតុស ១:៥-៧។

អានបន្ថែម

តើការជំនុំជម្រះដោយផ្អែកលើការប្រព្រឹត្តិមានន័យយ៉ាងដូចម្ដេច? (វិវរណៈ ២០ និង ២១)

៨២១៨

ក្តៅៗពេញនិយម

កំណត់ហេតុបណ្ដាញ២៣ ធ្នូ ២០២៥

តើការជំនុំជម្រះដោយផ្អែកលើការប្រព្រឹត្តិមានន័យយ៉ាងដូចម្ដេច? (វិវរណៈ ២០ និង ២១)

ឯអ្នកណាដែលឈ្នះ នោះនឹងបានគ្រងសេចក្ដីទាំងនេះទុកជាមរដក អញនឹងធ្វើជាព្រះដល់អ្នកនោះ ហើយអ្នកនោះនឹងធ្វើជាកូន

អានបន្ថែម

មតិយោបល់

មានមតិយោបល់ដែលបានអនុម័ត 0