ការបាត់បង់គុណធម៌នៃការគ្រប់គ្រងខ្លួនឯង

១៩ ធ្នូ ២០២៣អានរយៈពេល ៦ នាទី

មើល២២៦ដង

មានជីវិតពីរប្រភេទខុសពីគ្នាដែលខ្ញុំរស់នៅ។ គឺជីវិតពីរខុសពីគ្នា។ មានជីវិតដែលខ្ញុំស្រឡាញ់ ប៉ុន្តែវាពិតជាពិបាកក្នុងការថែរក្សាណាស់ ហើយមានជីវិតដែលខ្ញុំស្អប់ ហើយជាញឹកញយខ្ញុំត្រូវបានអូសទាញទៅរកជីវិតនោះ។ ជីវិតទីមួយគឺជីវិតដែលមានការលត់ដំ និងការគ្រប់គ្រងលើខ្លួនឯង ខណៈដែលជីវិតទីពីរគឺជីវិតដែលគ្មានសណ្ដាប់ធ្នាប់ និងមិនមានស្ថិរភាព។ ខ្ញុំស្រឡាញ់ជីវិតទីមួយ ប៉ុន្តែជាញឹកញយខ្ញុំតែងតែទោរទន់ទៅរកជីវិតទីពីរ។

ព្រះគម្ពីរបានបញ្ជាក់ពីការចេះគ្រប់គ្រងខ្លួនឯង និងការលត់ដំខ្លួន។ ព្រះគម្ពីរបានប្រាប់យើងយ៉ាងច្បាស់ថា ការគ្រប់គ្រងខ្លួនឯងគឺជាផលផ្លែនៃព្រះវិញ្ញាណ ដែលជារូបភាពនៃព្រះវត្តមានរបស់ព្រះជាម្ចាស់នៅក្នុងជីវិតយើង។ ព្រះគម្ពីរបានបង្គាប់យើងឲ្យលត់ដំ និងបង្វឹកខ្លួនតាមរបៀបរបស់ព្រះ (១ ធីម៉ូថេ ៤ :៧ ) ឲ្យខំប្រឹង ដើម្បីមានទម្លាប់ និងផ្លូវដែលនាំយើងឆ្ពោះទៅរកការមានគំនិតបរិសុទ្ធ បំណងចិត្តបរិសុទ្ធ ហើយនិងជីវិតបរិសុទ្ធ។

ខ្ញុំគិតថា យើងបានបាត់បង់ការគ្រប់គ្រងខ្លួនឯង ពោលគឺការបាត់បង់គុណធម៌ ដែលជាគុណសម្បត្តិដែលយើងងាយស្រួលមើលរំលងមួយ។ ខ្ញុំគិតថា យើងងាយនឹងមានអារម្មណ៍មិនស្រួលជាមួយនឹងគំនិតនៃការគ្រប់គ្រងខ្លួនឯង ពីព្រោះយើងចូលចិត្តផ្ដោតលើព្រះគុណ។ មិនថាជាយ៉ាងមិច យើងបែរជារាប់ព្រះគុណទៅដូចជាសេរីភាពចេញពីការមានរចនាសម្ពន្ធ ជាសេរីភាពចេញពីភាពម៉ឺងម៉ាត់។ យើងសប្បាយជាមួយនឹងសេរីភាពនៃដំណឹងល្អ ដោយមិនបានកត់សម្គាល់ថាដំណឹងល្អមិនបានរំដោះយើងឲ្យមានសេរីភាពចេញពីការគ្រប់គ្រងខ្លួនឯងនោះឡើយ ប៉ុន្តែផ្ទុយទៅវិញឲ្យយើងចេះគ្រប់គ្រងខ្លួនឯង។ ដោយសារយើងលែងរាប់ទម្លាប់ និងផ្លូវនៃការលត់ដំខ្លួនយើង ដើម្បីទទួលបានសេចក្តីសង្គ្រោះទៀត នោះយើងអាចមានសេចក្តីអំណរក្នុងការប្រមូលផ្តុំវា ដើម្បីលត់ដំខ្លួនយើងឆ្ពោះទៅកាន់ការញែកជាបរិសុទ្ធ។

ការគ្រប់គ្រងខ្លួន និងការលត់ដំខ្លួនឯងគឺជាអំណោយទាន ដែលយើងអាចប្រើប្រាស់ ដើម្បីមិនប្រព្រឹត្តអំពើបាប ហើយធ្វើឲ្យមានភាពបរិសុទ្ធកើតឡើង។ វាគឺជាអំណោយដែលយើងអាចប្រើប្រាស់បាន ដើម្បីបញ្ឈប់ទម្លាប់ចាស់ ហើយលើកស្ទួយទម្លាប់ថ្មីៗដែលប្រសើរជាង។

ខ្ញុំស្រឡាញ់ជីវិតដែលមានការលត់ដំ និងការគ្រប់គ្រងខ្លួនឯង។ ខ្ញុំស្អប់ជីវិតរបស់ខ្ញុំដែលមានការភាន់ច្រឡំ និងការមិនមានស្ថិរភាព។ ប៉ុន្តែ ទោះយ៉ាងណាក៏ដោយក៏ជីវិតនោះតែងតែបោយដៃ តែងតែដង្ហោយហៅ។ នៅវេលាណាដែលខ្ញុំចាប់ផ្ដើមមិនសូវប្រយ័ត្ន នោះខ្ញុំក៏ចាប់ផ្ដើមឈានចេញពីការទប់ទល់ឆ្ពោះទៅកាន់ភាពរញ៉េរញ៉ៃ។ ខ្ញុំធ្លាក់ចេញពីការលត់ដំខ្លួនឯង ហើយឆ្ពោះទៅកាន់ភាពគ្មានសណ្ដាប់ធ្នាប់។

ក្នុងនាមជាគ្រីស្ទបរិស័ទ ខ្ញុំទទួលឥទ្ធិពលទាំងពីជីវិតចាស់ និងជីវិតថ្មី គឺមនុស្សចាស់ដែលខ្ញុំធ្លាប់រស់នៅពីមុន និងមនុស្សថ្មីដែលខ្ញុំកំពុងតែក្លាយទៅជា។ មនុស្សថ្មីស្រឡាញ់ក្នុងការមើលឃើញគ្រប់វិនាទីថាជាអំណោយមកពីព្រះជាម្ចាស់ ដែលត្រូវថែរក្សាឲ្យបានល្អប្រសើរ ខណៈពេលដែលមនុស្សចាស់ចូលចិត្តខ្ជះខ្ជាយពេលវេលា និងខកខានឱកាសពីមួយពេលហើយទៅមួយពេលទៀត។ មនុស្សថ្មីមើលឃើញប្រយោជន៍នៃការរស់នៅក្នុងជីវិតនៃការលត់ដំខ្លួន ខណៈពេលដែលមនុស្សចាស់ទទូចថា វាគឺគ្រាន់តែជាការតូចមួយដែលមិនស័ក្កិសមក្នុងការលះបង់ធ្វើ។ មនុស្សថ្មីមើលឃើញថាផ្លូវ និងទម្លាប់នោះអាចកែប្រែ នឹងស្ដារឡើងវិញបាន ហើយប្រើសម្រាប់ជាការល្អ ខណៈពេលដែលមនុស្សចាស់ស្រែកថា នេះគឺជាចំណុចខ្សោយ គ្រាន់តែជាជន្ទល់សម្រាប់មនុស្សដែលខ្វះការជំរុញដែលប្រសើរជាងនេះ។

ខណៈពេលដែលរដូវក្តៅកន្លងផុតចូលដល់រដូវភ្លៀង—ខណៈពេលដែលភាពច្របូកច្របល់នៃពេលវ៉ាកងបានឆ្លងចូលទៅក្នុងកាលវិភាគនៃរដូវពេលចូលរៀនវិញ—នេះគឺជាពេលវេលាក្នុងការធ្វើការប្ដេជ្ញាចិត្តជាថ្មីទៅកាន់ជីវិតនៃការគ្រប់គ្រងខ្លួនឯង ជាជីវិតដែលលត់ដំខ្លួន ដើម្បីឆ្ពោះទៅកាន់ជីវិតបរិសុទ្ធ។ វាគឺជាពេលវេលាដែលខ្ញុំត្រូវធ្វើការប្ដេជ្ញាជាថ្មី ដើម្បីឆ្ពោះទៅកាន់ជីវិតល្អបរិសុទ្ធ និងគោលតម្លៃដ៏សាមញ្ញរបស់វា។ គ្មានពេលណាដែលល្អជាងពេលនេះទេ។

និពន្ធដោយ៖ Tim Challies
បកប្រែដោយ៖ លោក វេន ប៉ុក
កែសម្រួលដោយ៖ លោក ខែម បូឡុង, លោក ទេព រ៉ូ, លោក ឯក សត្យា, លោក ឯក ធីម៉ូថេ, លោកស្រី ឡូញ ស្រីរដ្ឋ, លោក សឹម រក្សា និងលោក ឈាង បូរ៉ា
ដកស្រង់ខ្លះៗ និងកែសម្រួលចេញពី www.challies.com ដោយមានការអនុញ្ញាត។ Plovpit.com

តើអ្នកគិតយ៉ាងណា?

១ពិន្ទុ

តើលោកអ្នកយល់យ៉ាងណាដែរ?

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

១៨៣៨៥

ក្តៅៗពេញនិយម

កំណត់ហេតុបណ្ដាញ៦ មករា ២០២៦

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

វាគ្មានអ្វីគួរឲ្យភ្ញាក់ផ្អើលនោះទេ យើងបានទទួលសំណួរជាច្រើនពីបេសកជននៅតាមតំបន់នានា…

អានបន្ថែម

តើ៧០អាទិត្យ ក្នុងកណ្ឌគម្ពីរដានីយ៉ែលជាអ្វី? (ដានីយ៉ែល ៩)

៤១១៩

កំណត់ហេតុបណ្ដាញ២៥ វិច្ឆិកា ២០២៥

តើ៧០អាទិត្យ ក្នុងកណ្ឌគម្ពីរដានីយ៉ែលជាអ្វី? (ដានីយ៉ែល ៩)

អត្ថន័យសំខាន់នៃការកាត់ស្រាយកណ្ឌគម្ពីរ ដានីយ៉ែល ៩:២៦-២៧ គឺជាការសង្កេតរបស់សាវ័កម៉ាថាយ ត្រង់ដែលព្រះយេស៊ូវកំពុងមានបន្ទូលអំពីការបំផ្លិចបំផ្លាញដែលត្រូវនឹងមកក្រុងយេរូសាឡឹម និងព្រះវិហារបរិសុទ្ធ (ម៉ាថាយ ២៤:១៥)។

អានបន្ថែម

សំណួរដែលបណ្តាលចិត្ត៖ វិធីសាស្ត្រថ្មី ក្នុងការពិភាក្សានៅក្នុងក្រុមតូច

១១៣៧

កំណត់ហេតុបណ្ដាញ១៨ វិច្ឆិកា ២០២៥

សំណួរដែលបណ្តាលចិត្ត៖ វិធីសាស្ត្រថ្មី ក្នុងការពិភាក្សានៅក្នុងក្រុមតូច

ព្រះយេស៊ូវ ពួកសាវ័ក និងពួកសិស្សរបស់ទ្រង់ ពួកគេទាំងអស់បានសួរបណ្តាជននូវសំណួរជាក់លាក់។ ឥឡូវនេះ ប្រហែលជាពួកយើងគួរពិចារណាប្រើសំណួរដូចគ្នាទាំងនេះ សម្រាប់ក្រុមតូចរបស់យើងទាំងអស់។

អានបន្ថែម