https://youtu.be/sZmwhsw0m6M
សមត្ថភាពដ៏គួរឲ្យចាប់អារម្មណ៍មួយក្នុងចំណោមសមត្ថភាពនានា ដែលយើងមាននៅក្នុងពិភពឌីជីថលនេះ គឺការកំណត់បរិមាណជីវិតរបស់យើងទៅតាមរបៀបថ្មីៗ។ បច្ចុប្បន្ននេះ ពិសេសជាងពេលណាៗទាំងអស់ គឺយើងអាចប្រមូលចំនួនទិន្នន័យដ៏អស្ចារ្យអំពីខ្លួនយើងបាន។ ខ្ញុំមានការចាប់អារម្មណ៍ខ្លាំងទាក់ទងទៅនឹងទិន្នន័យ និងការវាស់ស្ទង់ ដូច្នេះហើយបានជាញឹកញាប់ខ្ញុំងាកទៅប្រើឧបករណ៍មួយចំនួននោះ ដើម្បីស្វែងយល់អំពីជីវិតរបស់ខ្ញុំដោយសង្ឃឹមថា អ្វីដែលខ្ញុំដឹងនឹងជួយឲ្យខ្ញុំរស់នៅកាន់តែប្រសើរឡើងជាងមុន។
ខ្ញុំបានគិតខ្លះៗអំពីផលប៉ះពាល់នៃការកំណត់បរិមាណនៃជីវិតថា តើវាអាចជួយឲ្យខ្ញុំក្លាយជាគ្រីស្ទបរិស័ទដែលញែកជាបរិសុទ្ធបានឬអត់។ ខ្ញុំជឿជាក់ថា ប្រសិនបើយើងប្រើឧបករណ៍ទាំងនោះបានត្រឹមត្រូវ នោះពួកវានឹងផ្តល់នូវអត្ថប្រយោជន៍ជាច្រើន ជាក់ជាមិនខាន។ ថ្ងៃនេះ ខ្ញុំនឹងប្រាប់អ្នកនូវឈ្មោះនៃឧបករណ៍មួយចំនួន ហើយនឹងប្រាប់អំពីរបៀបដែលខ្ញុំប្រើប្រាស់ពួកវា។ តែមុនខ្ញុំរៀបរាប់ ខ្ញុំសូមបញ្ជាក់ឲ្យច្បាស់សិនថា៖ ខ្ញុំមិនប្រើប្រាស់ឧបករណ៍ទាំងអស់នោះជាប្រចាំថ្ងៃនោះទេ។ ភាគច្រើន ខ្ញុំប្រើប្រាស់ពួកវាតែក្នុងរយៈពេលកំណត់ណាមួយដែលខ្ញុំចង់ដឹងនូវព័ត៌មានវិភាគសំខាន់ៗមួយចំនួនក្នុងជីវិតរបស់ខ្ញុំតែប៉ុណ្ណោះ។ ខ្ញុំប្រើប្រាស់ឧបករណ៍ទាំងនោះយ៉ាងយូរពីពីរទៅបីសប្ដាហ៍ ហើយបន្ទាប់ពីពីរទៅបីខែក្រោយទើបខ្ញុំប្រើប្រាស់ពួកវាម្ដងទៀត។ គឺប្រើពួកវាសម្រាប់តែព័ត៌មានវិភាគសង្ខេប ដើម្បីជួយឲ្យខ្ញុំរស់នៅក្នុងជីវិតដែលចេះប្រុងប្រយ័ត្ន និងចេះគ្រប់គ្រងខ្លួនឯងតែប៉ុណ្ណោះ។
ទម្លាប់
ក្នុងនាមជាមនុស្ស យើងជាមនុស្សដែលមានទម្លាប់ ហើយគ្រីស្ទបរិស័ទគ្រប់ៗរូបមានទំនួលខុសត្រូវក្នុងការបង្កើតទម្លាប់ និងគំរូល្អៗ។ មានកម្មវិធី (apps) ជាច្រើនដែលអាចឲ្យលោកអ្នកតាមដាននូវទម្លាប់របស់លោកអ្នកបាន ហើយកម្មវិធីដែលខ្ញុំឃើញថា វាមានប្រសិទ្ធភាពបំផុតគឺកម្មវិធី ហាបបិត លីសថ៍ (Habit List)។ កម្មវិធី ហាបបិត លីសថ៍ អាចឲ្យលោកអ្នកដាក់បញ្ចូលនូវបញ្ជីទម្លាប់ដែលលោកអ្នកចង់ឲ្យវាប្រាប់លោកអ្នកបាន។ លោកអ្នកអាចដាក់បញ្ចូលនូវទម្លាប់ប្រចាំថ្ងៃ (ការអានព្រះគម្ពីរ) ទម្លាប់ប្រចាំសប្តាហ៍ (ការធ្វើបច្ចុប្បន្នភាពថវិកាគ្រួសារ) ឬសូម្បីតែទម្លាប់ដែលលោកអ្នកចង់ធ្វើបីដងក្នុងមួយសប្ដាហ៍ ឬក៏ធ្វើវាតែនៅថ្ងៃពុធ និងថ្ងៃសុក្រក៏បានដែរ។ ពេលល្ងាចចប់ម៉ោងការងារ លោកអ្នកអាចបើកមើលកម្មវិធីនេះ ហើយអាចពិនិត្យមើលនូវការងារទាំងឡាយណាដែលអ្នកបានធ្វើហើយរួចរាល់បានទៀតផង។ នេះជាគំនិតដ៏ល្អមួយក្នុងការយកកម្មវិធីនេះ ដើម្បីប្រើប្រាស់សម្រាប់តាមដានថា តើអ្នកពិតជាបានអានព្រះគម្ពីរ និងអធិស្ឋាន ឧស្សាហ៍ប្រជុំគ្នាថ្វាយបង្គំព្រះជាលក្ខណៈគ្រួសារប៉ុន្មានដង ហើយនិងធ្វើលំហាត់ប្រាណញឹកញាប់ប៉ុណ្ណាជាដើមនោះរិតតែប្រសើរ។ល។ កម្មវិធីដែលគួរឲ្យចាប់អារម្មណ៍មួយទៀតគឺ កម្មវិធី រីផតធើ (Reporter) វាជាកម្មវិធីដែលសួរលោកអ្នកនូវសំណួរកំណត់រួចជាស្រេចនៅពេលណាមួយ ដែលលោកអ្នកចង់ឲ្យវាសួរ ឬក៏សំណួរកំណត់រួចជាស្រេចទាក់ទងទៅនឹងរឿងរ៉ាវពីព្រលឹមទល់ព្រលប់ផងដែរ។ ប្រសិនបើលោកអ្នកសិតវាជាមួយនឹងសំណួរត្រឹមត្រូវ នោះលោកអ្នកនឹងដឹងរឿងរ៉ាវដែលគួរឲ្យចាប់អារម្មណ៍ជាច្រើនអំពីខ្លួនឯង (ដូចជា៖ ពេលនេះ តើលោកអ្នកកំពុងតែស្តាប់តន្ត្រីឬ? ពេលនេះ តើលោកអ្នកនៅម្នាក់ឯង ឬនៅជាមួយនរណាគេ? ពេលនេះ តើលោកអ្នកសល់ថាមពលប៉ុន្មាន? តើអ្នកវាយតម្លៃការប្រើប្រាស់ពេលវេលារបស់អ្នកនៅថ្ងៃនេះដោយរបៀបណា?)
ការថែទាំកាយសម្បទា
ប្រសិនបើមានផ្នែកណាមួយនៃជីវិតគ្រីស្ទបរិស័ទ ដែលមិនសូវបានយកចិត្តទុកដាក់ថែទាំ ខ្ញុំគិតថា វាច្បាស់ជាផ្នែកនៃការថែទាំកាយសម្បទាជាមិនខាន។ យើងយកចិត្តទុកដាក់ចំពោះព្រលឹង និងគំនិតរបស់យើងតែជារឿយៗយើងមិនសូវយកចិត្តទុកដាក់ចំពោះរាងកាយរបស់យើងទេ។ ឧបករណ៍ពាក់សម្រាប់តាមដានកាយសម្បទា គឺជាឧបករណ៍ថ្មីដែលមានគេប្រើប្រាស់ជាច្រើន ដើម្បីវាស់ស្ទង និងជំរុញសកម្មភាពរាងកាយរបស់យើងបាន។ ពួកវាតាមដានទិន្នន័យសំខាន់ៗដូចជាចំនួនជំហានដែលលោកអ្នកដើរក្នុងរយៈពេលមួយថ្ងៃ ហើយពួកវាក៏អាចតាមដានរង្វាស់ ដូចជាចំនួនចលនាអាំងតង់ស៊ីតេខ្ពស់ ដែលលោកអ្នកមានក្នុងរយៈពេលមួយថ្ងៃផងដែរ។ ភាគច្រើន ពួកវាក៏អាចតាមដានទម្លាប់នៃការគេងរបស់លោកអ្នក ដោយគ្រាន់តែពាក់វាពេញមួយយប់ ជាការស្រេច។ លោកអ្នកអាចមិនសូវមាំទាំដូចអ្វីដែលអ្នកធ្លាប់គិត ហើយមើលទៅ ជាគំនិតដ៏ល្អមួយ បើយកឧបករណ៍ទាំងនេះប្រើសម្រាប់តាមដានលំហាត់ប្រាណ និងជំរុញកាយសម្បទារបស់អ្នក (ឧទាហរណ៍៖ ហ្វីតបីត Fitbit ដ្យបូន យូភី២៤ Jawbone UP 24) នោះរិតតែប្រសើរ។ ប្រសិនបើអ្នកមិនចង់ប្រើប្រាស់ឧបករណ៍ណាមួយនោះទេ ក៏នៅមានកម្មវិធីជាច្រើនទៀត ដែលអាចឲ្យអ្នកបញ្ចូលព័ត៌មានលម្អិតនៃលំហាត់ប្រាណ និងសកម្មភាពរបស់អ្នកដោយដៃបានដែរ (ឧទាហរណ៍៖ រ៉ាន់ឃីបភើ RunKeeper)។ ម្យ៉ាងទៀត ទូរស័ព្ទដៃទំនើបៗភាគច្រើនក៏មានមុខងារជាមូលដ្ឋានជាច្រើនសម្រាប់តាមដានជំហានរបស់អ្នកផងដែរ។
របបអាហារ
ខ្ញុំបាននិយាយរួចហើយថា ប្រសិនបើមានផ្នែកណាមួយនៃជីវិតគ្រីស្ទបរិស័ទដែលមិនសូវមានការយកចិត្តទុកដាក់ថែទាំ នោះគឺជាផ្នែកនៃការថែទាំកាយសម្បទានេះហើយ ប៉ុន្តែរបបអាហារក៏ជាផ្នែកមួយ (មានការទាក់ទងគ្នាខ្លាំង) ទីពីរដែរ។ និយាយត្រង់ទៅ ខ្ញុំចាប់អារម្មណ៍តិចតួចណាស់ក្នុងការតាមដានរាល់កាឡូរីដែលខ្ញុំទទួលទាន ប៉ុន្តែខ្ញុំឃើញថា វាមានតម្លៃខ្លាំងណាស់ក្នុងការតាមដានការញ៉ាំអាហាររបស់ខ្ញុំជាបន្ទាន់—ពោលគឺប្រហែលពីរសប្ដាហ៍រៀងរាល់ពីរបីខែម្តង។ ក្នុងរយៈពេលដ៏ខ្លីនេះ ខ្ញុំព្យាយាមស្វែងរកព័ត៌មានអាហារូបត្ថម្ភជាមូលដ្ឋានរាល់អាហារដែលខ្ញុំញ៉ាំ ដោយបញ្ចូលព័ត៌មានទាំងនោះទៅក្នុងកម្មវិធីមួយ។ ការធ្វើបែបនេះផ្តល់ឲ្យខ្ញុំនូវព័ត៌មានវិភាគទម្លាប់នៃការញ៉ាំរបស់ខ្ញុំ ដែលអនុញ្ញាតឲ្យខ្ញុំពិចារណាថា តើខ្ញុំញ៉ាំច្រើនពេក ឬតិចពេក ឬញ៉ាំអាហារខុស។ កម្មវិធី ម៉ាយ ហ្វីតនេស៍ ផល (My Fitness Pal) គឺជាជម្រើសដ៏ល្អមួយ ទោះបីជាលោកអ្នកប្រើប្រាស់ឧបករណ៍ ឬកម្មវិធីណាមួយដែលខ្ញុំបានរាយឈ្មោះត្រង់ចំណុចដែលនិយាយអំពីការថែទាំកាយសម្បទាក៏ដោយ ក៏ពួកវាសុទ្ធតែមានមុខងារនេះផងដែរ។ យូភី ខហ្វី UP Coffee គឺជាជម្រើសដ៏ល្អមួយទៀតសម្រាប់តាមដានជាតិកាហ្វេអ៊ីនរបស់លោកអ្នក និងធានាថា លោកអ្នកត្រូវបានបន្សាបជាតិកាហ្វេអ៊ីនមុនពេលដែលលោកអ្នកចូលគេង។ ប្រសិនបើលោកអ្នកបានប្ដេជ្ញាចិត្តចង់ញ៉ាំទឹកឲ្យបានច្រើន (ចំពោះលោកអ្នកដែលមិនសូវញ៉ាំទឹក) នោះសូមសាកល្បងប្រើប្រាស់កម្មវិធី វ៉តធើឡហ្គ Waterlogged ។
ដំណេក
កម្មវិធីតាមដានការថែទាំកាយសម្បទាជាច្រើន ដែលបានរៀបរាប់ខាងលើ ក៏មានមុខងារតាមដានដំណេកផងដែរ—ពោលគឺផ្អែកទៅលើចលនារបស់លោកអ្នកនៅពេលយប់ ពួកវានឹងប្រាប់នូវការវាស់ស្ទង់ជាមូលដ្ឋាននៃគុណភាពដំណេករបស់លោកអ្នក ក៏ដូចជាពេលវេលាដែលលោកអ្នកចូលគេង ពេលវេលាដែលលោកអ្នកភ្ញាក់ពីគេង និងចំនួនប៉ុន្មានដងដែលអ្នកភ្ញាក់នៅពេលយប់ផងដែរ។ អត្ថប្រយោជន៍បន្ថែមមួយទៀតគឺ ភាគច្រើនពួកវាមានមុខងាររោទិ៍ញ័រសម្រាប់ដាស់អ្នកពីដំណេក ដែលមិនធ្វើឲ្យប្ដីឬក៏ប្រពន្ធរបស់ភ្ញាក់ឡើយ។ មានកម្មវិធីតាមដានដំណេកផ្សេងទៀតដូចជា ស្ល៊ីប សាយខល (Sleep Cycle) ដែលតម្រូវឲ្យលោកអ្នកទុកទូរស័ព្ទដៃរបស់លោកអ្នកនៅលើពូក (រុញវាចូលក្រោមកម្រាលពួក)។ ពួកវានឹងផ្តល់នូវការវាស់ស្ទង់ដ៏ត្រឹមត្រូវគួរឲ្យភ្ញាក់ផ្អើលមួយអំពីដំណេករបស់លោកអ្នក។ ក៏មានសូម្បីតែឧបករណ៍ពិសេស ដែលអ្នកអាចពាក់វានៅពេលយប់ ទុកសម្រាប់តាមដានដំណេក និងប្រើប្រាស់សម្រាប់ជាម៉ោងរោទិ៍ទៀតផង។ ខ្ញុំជាមនុស្សម្នាក់ដែលពិបាកគេង ខ្ញុំបានតាមដានព័ត៌មានទាំងនេះជាញឹកញាប់ ដើម្បីធ្វើយ៉ាងណាឲ្យជួយកំណត់ពីរបៀបដែលខ្ញុំអាចគេងបានកាន់តែច្រើន និងកាន់តែស៊ប់ជាងមុន។
ពេលវេលា
ការបែងចែកពេលវេលាបានត្រឹមត្រូវ គឺជាធាតុផ្សំដ៏សំខាន់មួយក្នុងការចាត់ចែងពេលវេលាឲ្យបានល្អផងដែរ។ ក្នុងនាមជាគ្រីស្ទបរិស័ទ យើងដឹងថា ព្រះជាម្ចាស់សព្វព្រះហឫទ័យចង់ឃើញការចាត់ចែងពេលវេលាដែលយើងមាន ដោយស្មោះត្រង់ ហើយសព្វថ្ងៃនេះក៏មានកម្មវិធីល្អៗជាច្រើនដែលអាចជួយយើងបានដែរ។ កម្មវិធីខ្លះបញ្ជាដោយដៃ ស្របពេលដែលកម្មវិធីខ្លះទៀតបញ្ជាដោយកម្រិតស្វ័យប្រវត្តិកម្ម។ កម្មវិធីដែលខ្ញុំប្រើប្រាស់ច្រើនបំផុតគឺ ថហ្គល (Toggl)។ ខ្ញុំប្រើកម្មវិធី ថហ្គល ពីរបីសប្ដាហ៍ជាប់គ្នារៀងរាល់ពីរខែម្តង ដើម្បីតាមដានពេលវេលារបស់ខ្ញុំដោយប្រុងប្រយ័ត្ន (ជួនកាលរាល់នាទីភ្ញាក់ពីដំណេក ហើយជួនកាលត្រឹមតែពេលណាដែលទាក់ទងនឹងការងាររបស់ខ្ញុំប៉ុណ្ណោះ)។ ការធ្វើបែបនេះ ជួយខ្ញុំឲ្យដឹងអំពីពេលវេលារបស់ខ្ញុំចំណាយលើរឿងអ្វីខ្លះ ហើយថា តើខ្ញុំកំពុងយកចិត្តទុកដាក់គ្រប់គ្រាន់ចំពោះផ្នែកនីមួយៗនៃទំនួលខុសត្រូវរបស់ខ្ញុំដែរឬទេ។ កម្មវិធីដែលមានប្រយោជន៍មួយទៀតគឺ កម្មវិធីដែលតាមដាននូវវេបសាយដែលលោកអ្នកបានបើកមើលអនឡាញ វានឹងបង្ហាញនូវបញ្ជីគេហទំព័រដែលលោកអ្នកបានចូលមើល និងចំនួនប៉ុន្មានដង ដែលលោកអ្នកបានមើលវានោះ។ ពួកវាក៏បង្ហាញបញ្ជីនៃកម្មវិធីដែលអ្នកបានប្រើប្រាស់ និងរយៈពេលប៉ុន្មានដងដែលលោកអ្នកបានប្រើពួកវានីមួយៗដែរ។ ការពិតអាចធ្វើឲ្យឈឺចាប់។ សាកល្បងប្រើប្រាស់កម្មវិធី រ៉េសស្យូ ថាម (RescueTime) ប្រសិនបើអ្នកត្រូវការជំនួយ។
ហិរញ្ញវត្ថុ
បើយើងមានទំនួលខុសត្រូវក្នុងការថែទាំរាងកាយ ចិត្តគំនិត និងពេលវេលារបស់យើង នោះយើងក៏មានទំនួលខុសត្រូវចំពោះលុយកាក់របស់យើងផងដែរ។ មានកម្មវិធីល្អៗរាប់រយដែលអាចជួយលោកអ្នកក្នុងការតាមដានថា តើលុយរបស់លោកអ្នកបានមកពីណា និងចំណាយទៅលើអ្វីខ្លះ។ កម្មវិធីដែលពេញនិយមបំផុតគឺ មិនថ៍ (Mint) ដែលជាសេវាកម្មប្រតិបត្តិរួមគ្នាដ៏ល្អ និងដោយឥតគិតថ្លៃមួយចេញពីក្រុម អ៊ិនធូអ៊ិត (Intuit)។ ដូចដែលបាននិយាយអញ្ចឹង លោកអ្នកក៏នៅអាចទទួលបានអត្ថប្រយោជន៍ពីអត្ថបទ «លោកអ្នកត្រូវការតាមដានថវិកា» (You Need a Budget) តាមការប៉ាន់ស្មានរបស់ខ្ញុំ វាជាជម្រើសដ៏ ល្អ និងពេញលេញបំផុតមួយ ជាពិសេសប្រសិនបើលោកអ្នកចង់ចាត់ចែងថវិការបស់ខ្លួនដោយប្រុងប្រយ័ត្ននោះ។
យើងទើបតែបានចាប់ផ្តើមប៉ុណ្ណោះ—ពោលគឺយុគសម័យនៃការកំណត់បរិមាណទើបតែចាប់ផ្ដើមទេ។ ខ្ញុំជឿជាក់ថា ភាគច្រើននៃឧបករណ៍ទាំងនេះ នៅពេលដែលយើងប្រើប្រាស់ពួកវាដោយមានប្រាជ្ញា នោះពួកវានឹងផ្តល់អត្ថប្រយោជន៍ដល់យើង ហើយនិងជំរុញចិត្តយើងឲ្យស្តាប់បង្គាប់ព្រះជាម្ចាស់ជាមិនខាន។
ខ្ញុំចង់និយាយអំពីគ្រោះថ្នាក់នៃការប្រើប្រាស់កម្មវិធីទាំងនោះវិញម្តង។ ខ្ញុំគិតថា គ្រោះថ្នាក់ចម្បងត្រង់ថា បើយើងមិនចេះប្រយ័ត្នខ្លួនឯងទេ នោះយូរៗទៅយើងនឹងប្រើប្រាស់ទិន្នន័យទាំងនោះបែបក្រឹត្យវិន័យនិយម ដោយលែងគិតពីព្រះ។ យូរៗទៅ យើងអាចនឹងចាប់ផ្ដើមគិតថា ភាពមាំទាំរបស់យើងនៅចំពោះព្រះជាម្ចាស់គឺពឹងផ្អែកលើការវាស់ស្ទង់ដ៏ត្រឹមត្រូវ។ យូរៗទៅ យើងអាចនឹងបែរជាចាប់ផ្ដើមគិតថា យើងអាចជ្រកក្នុងទម្លាប់របស់យើង ជំនួសឲ្យការជ្រកកោននៅក្នុងអង្គសង្គ្រោះរបស់យើងទៅវិញ។ នេះគឺជាហេតុផលមួយក្នុងហេតុផលនានា ដែលខ្ញុំប្រើប្រាស់កម្មវិធីទាំងនេះយួរៗម្តង ជាជាងប្រើប្រាស់ពួកវាជាប្រចាំ។ ខ្ញុំមិនចង់មានលក្ខណៈដែលត្រូវបានសូនឡើងជារូបឆ្លុះពីកម្មវិធីទាំងនោះទេ ប៉ុន្តែជារូបឆ្លុះពីព្រះគ្រីស្ទយេស៊ូវវិញ។ ខ្ញុំឲ្យតម្លៃឧបករណ៍ទាំងនោះក្នុងពេលណាដែលពួកវានាំខ្ញុំទៅកាន់ឈើឆ្កាងតែប៉ុណ្ណោះ។
តើអ្នកធ្លាប់ប្រើកម្មវិធី ឬឧបករណ៍បែបនេះទេ? តើពួកវាជួយ ឬក៏រារាំងជីវិតជាគ្រីស្ទបរិស័ទ្ធរបស់អ្នក ដោយរបៀបណា?
សមត្ថភាពដ៏គួរឲ្យចាប់អារម្មណ៍មួយក្នុងចំណោមសមត្ថភាពនានា ដែលយើងមាននៅក្នុងពិភពឌីជីថលនេះ គឺការកំណត់បរិមាណជីវិតរបស់យើងទៅតាមរបៀបថ្មីៗ។ បច្ចុប្បន្ននេះ ពិសេសជាងពេលណាៗទាំងអស់ គឺយើងអាចប្រមូលចំនួនទិន្នន័យដ៏អស្ចារ្យអំពីខ្លួនយើងបាន…
មតិយោបល់
Loading…