តើការជ្រមុជដោយព្រះវិញ្ញាណបរិសុទ្ធជាអ្វី?

ប្រសិនបើលោកអ្នកជាគ្រីស្ទបរិស័ទ នោះលោកអ្នកមានព្រះវិញ្ញាណបរិសុទ្ធហើយ។ ប៉ុន្តែ តើវាដូចគ្នានឹងការជ្រមុជនៅក្នុងព្រះវិញ្ញាណបរិសុទ្ធទេ? លោកគ្រូ ចន បានពន្យល់អំពីរបៀបខុសៗគ្នា។

២៨ កក្កដា ២០២៤អានរយៈពេល ១៨ នាទី

មើល១៧៩ដង

តើការជ្រមុជដោយព្រះវិញ្ញាណបរិសុទ្ធជាអ្វី?

នេះជាសំណួរមួយដ៏សំខាន់ ដែលយើងទទួលបានតាមទូរស័ព្ទនៅថ្ងៃនេះពីប្រិយមិត្តម្នាក់ពីទីក្រុងភ្នំពេញ។ តើយើងត្រូវយល់យ៉ាងដូចម្ដេចអំពីពិធីបុណ្យជ្រមុជដោយព្រះវិញ្ញាណបរិសុទ្ធ? ឃ្លានេះហាក់បីដូចជាមានន័យខុសៗគ្នានៅក្នុងព្រះគម្ពីរ—ហើយក៏ពិតជាមានអត្ថន័យខុសៗគ្នាចំពោះនិកាយ និងក្រុមជំនុំផ្សេងៗគ្នាដែរ។ នេះគឺជាសំណួររបស់យើងសម្រាប់ថ្ងៃនេះ៖

«ជំរាបសួរ លោកគ្រូ! ខ្ញុំមានការលំបាកក្នុងការយល់ និងការប្រកាន់ខ្ជាប់ទទួលយក "ពិធីជ្រមុជដោយព្រះវិញ្ញាណបរិសុទ្ធ" ជាពិសេសការបើកសម្ដែង នៅពេលនរណាម្នាក់សើច និងរមៀលទៅវិញទៅមកនៅលើឥដ្ឋ ឬក៏ដួលសន្លប់សាមសិបនាទី ឬយូរជាងនេះក៏មាន។ ខ្ញុំធ្លាប់ឃើញក្រុមជំនុំផ្សេងៗធ្វើបែបនេះ ហើយដាក់ការផ្ដោតអារម្មណ៍យ៉ាងខ្លាំងទៅលើបទពិសោធន៍ទាំងនេះ ដែលធ្វើឲ្យខ្ញុំមានអារម្មណ៍ដូចជាមិនសូវស្រួលចិត្តសោះ។ តើលោកគ្រូអាចពន្យល់ពីអ្វីដែលព្រះគម្ពីរសំដៅទៅលើ "ពិធីជ្រមុជដោយព្រះវិញ្ញាណបរិសុទ្ធ" ដូចដែលវាមានការជាប់ទាក់ទងទៅនឹង ១) បទពិសោធន៍នៃសេចក្ដីសង្គ្រោះដំបូងរបស់យើង ហើយបន្ទាប់មក ២) ថាតើវាមែន ឬមិនមែន ក្នុងការដែលយើងរំពឹងទុក ឬស្វែងរក បន្ទាប់ពីការជ្រមុជទឹកជាបន្តបន្ទាប់ដោយព្រះវិញ្ញាណ នៅក្នុងជីវិតរបស់គ្រីស្ទបរិស័ទនៅពេលក្រោយ»?

ការប្រាថ្នាចង់ភ្លក់បទពិសោធន៍ពីព្រះវិញ្ញាណ

បញ្ចទសទិវានិយម គឺត្រូវបានគេកំណត់ថាជាចលនាមួយនៅក្នុងគ្រីស្ទសាសនា ដែលចាត់ទុកថាបុណ្យជ្រមុជដោយព្រះវិញ្ញាណបរិសុទ្ធជាបទពិសោធន៍ទីពីរ ជាធម្មតាបន្ទាប់ពីការប្រែចិត្តជឿ អាចកំណត់ចំណាំដោយការនិយាយភាសាដទៃ។ នោះគឺជាតួយ៉ាងរបស់អត្ថន័យនៃបញ្ចទសទិវានិយម។ នេះគឺជាការសម្រាយន័យខ្លាំងពេកហើយ។

ខ្ញុំទើបតែបានអានចប់សៀវភៅមួយក្បាលរបស់លោក អេលេន ហីតុន អ៊ែនឌឺស៊ុន (Allan Heaton Anderson) ដែលមានចំណងជើងថា «ដល់អវសាននៃភពផែនដី៖ បញ្ចទសទិវានិយម និង ការបំផ្លាស់បំប្រែរបស់គ្រីស្ទសាសនាពិភពលោក» (“To the Ends of the Earth: Pentecostalism and the Transformation of World Christianity”)។ លោកបង្ហាញថា មានការយល់ដឹងចម្រុះកាន់តែច្រើនផ្សេងៗទៀតអំពីព្រះវិញ្ញាណបរិសុទ្ធ និងកិច្ចការរបស់ទ្រង់នៅក្នុងចំណោមបញ្ចទសទិវានិយមសាកល គឺលើសពីយើងគិតទៅទៀត។ អ្វីដែលសាមញ្ញនៅក្នុងចំណោមមែកធាងនៃបញ្ចទសទិវានិយម គឺមិនមែនជាទស្សនៈតែមួយនៃការជ្រមុជក្នុងព្រះវិញ្ញាណទេ ប៉ុន្តែជាការសង្កត់ធ្ងន់លើលក្ខណៈនៃបទពិសោធន៍របស់ព្រះវត្តមាននៃព្រះវិញ្ញាណនៅក្នុងជីវិតនៃអ្នកជឿ។

ខ្ញុំគិតថា ការនេះសង្កត់ធ្ងន់លើលក្ខណៈនៃបទពិសោធន៍របស់ព្រះវិញ្ញាណថាមានភាពជាក់លាក់ ជាមូលហេតុដែលចលនានោះមានកម្លាំងសន្ទុះ និងមានប្រសិទ្ធិភាពជាសាកល។ មនុស្សម្នាគ្រប់ទីកន្លែងកំពុងស្រេកឃ្លានចង់ភ្លក់នូវបទពិសោធន៍ផ្ទាល់ៗ មិនគ្រាន់តែអំពីសេចក្ដីពិតខាងឯគោលលទ្ធិ ឬក៏សេចក្ដីពិតខាងឯប្រវត្តិសាស្ត្រ ដែលត្រូវបានអះអាងជាមួយនឹងគំនិតនោះ។

នោះគឺជារបៀបដែលជាផ្នត់គំនិតនៃការគិតអំពីគ្រីស្ទបរិស័ទនៅលោកខាងលិច។ យើងមានបញ្ជីនៃគោលលទ្ធិនានា យើងមានបញ្ជីនៃអាកប្បកិរិយាទាំងឡាយ។ យើងជឿលើគោលលទ្ធិនានា ហើយយើងសម្ដែងអាកប្បកិរិយាតាមនោះ ហើយយើងសន្និដ្ឋានថាយើងជាកម្មសិទ្ធិរបស់ព្រះជាម្ចាស់ ក៏ដូចជាថាមានអ្វីដែលអធិធម្មជាតិកំពុងតែកើតឡើង ប៉ុន្តែគ្មាននរណាម្នាក់ធ្លាប់បានទទួលបទពិសោធន៍អ្វីនោះទេ។ ហេតុនេះហើយបានជាបញ្ចទសទិវានិយមកំពុងទទួលបានជោគជ័យក្នុងរបៀបដែលការនេះទទួលបាន ពីព្រោះពួកគេនិយាយត្រូវចំពោះការនេះ។ ពួកគេត្រូវក្នុងការនិយាយថា ការមានព្រះវិញ្ញាណបរិសុទ្ធគឺការមានសេចក្ដីពិតដែលបុគ្គលណាម្នាក់អាចទទួលបានបទពិសោធន៍នោះ។

ការប្រើប្រាស់ពីរផ្សេងៗគ្នា

វាជារឿងសំខាន់ដែលយើងបញ្ជាក់ពីអត្ថន័យនៃពាក្យនៅក្នុងព្រះគម្ពីរដូចជា «ពិធីជ្រមុជក្នុង (ឬក៏ដោយ)ព្រះវិញ្ញាណបរិសុទ្ធ» ព្រោះនេះជាពាក្យមួយនៅក្នុងព្រះគម្ពីរ។ វាជាផ្នែកមួយនៃបទពិសោធន៍របស់គ្រីស្ទបរិស័ទ។

អ្វីដែលខ្ញុំនឹងផ្ដល់យោបល់គឺជារបៀបដែលសាវ័ក ប៉ុល បានប្រើប្រាស់ឃ្លាមួយនៅក្នុងកណ្ឌគម្ពីរ ១កូរិនថូស ១២:១៣ និងរបៀបដែលលោក លូកា បានប្រើឃ្លាមួយទៀត (ឬលោក លូកា ដែលបានដកស្រង់ពីព្រះយេស៊ូវ) នៅក្នុងកណ្ឌគម្ពីរ កិច្ចការ ១:៥ គឺថាមិនដូចគ្នាទេ។ នោះគឺជាការសន្មតដំបូងរបស់ខ្ញុំ ដែលការនេះនឹងនាំកុំឲ្យមានការយល់ច្រឡំជាច្រើន ប្រសិនបើមនុស្សជឿលើការនេះ។ ដូច្នេះ លោកអ្នកអាចពិនិត្យមើលដោយខ្លួនឯងបាន។

នេះមានន័យថា នៅពេលយើងសួរ «តើឃ្លា "ជ្រមុជក្នុង (ឬជ្រមុជដោយ) ព្រះវិញ្ញាណបរិសុទ្ធ" មានន័យដូចម្ដេច? យើងត្រូវសួរថា «តើលោកអ្នកកំពុងនិយាយអំពីការប្រើប្រាស់ឃ្លារបស់សាវ័ក ប៉ុល ឬការប្រើប្រាស់ឃ្លារបស់លោក លូកា នៅពេលដែលគាត់បានដកស្រង់សម្រង់សម្ដីរបស់ព្រះយេស៊ូវ»? ទាំងពីរមិនផ្ទុយគ្នាទេ។ ខ្ញុំក៏មិនប្រកែកថា វាមានការប្រឆាំងគ្នាដែរ។ ខ្ញុំមានន័យថាពួកគាត់ប្រើពាក្យដដែលៗតាមវិធីផ្សេងៗគ្នា។ ពួកគាត់ប្រើឃ្លាដូចគ្នាតាមរបៀបផ្សេងៗគ្នា។ ខ្ញុំសូមបញ្ជាក់ចំណុចនីមួយ។

ការទទួលព្រះវិញ្ញាណនៅពេលបំផ្លាស់បំប្រែចិត្តជឿ

នៅក្នុងកណ្ឌគម្ពីរ ១កូរិនថូស ១២:១២-១៣ សាវ័ក ប៉ុល បានលើកឡើងថា៖

«ដ្បិតដូចជារូបកាយ១មានអវយវៈជាច្រើន តែអវយវៈទាំងនោះ ទោះមានច្រើនក៏ពិត គង់តែរួមគ្នាមកជារូបតែ១ទេ នោះព្រះគ្រីស្ទក៏ដូច្នោះដែរ ១៣ ដ្បិតយើងទាំងអស់គ្នា ទោះបើជាសាសន៍យូដា ឬសាសន៍ក្រេក បាវបំរើ ឬអ្នកជាក្តី យើងបានទទួលបុណ្យជ្រមុជ ចូលក្នុងរូបកាយតែ១ ដោយសារព្រះវិញ្ញាណតែ១ ហើយគ្រប់គ្នាក៏បានត្រូវផឹកពីព្រះវិញ្ញាណតែ១ដែរ។»

តាមពិតទៅ ខ្ញុំគិតថា ជាក់ស្ដែងគ្រប់គ្នាយល់ស្របតាមការយល់របស់សាវ័ក ប៉ុល នៅចំណុចនេះអំពីពិធីបុណ្យជ្រមុជដោយព្រះវិញ្ញាណថា ជាកិច្ចការដែលព្រះវិញ្ញាណបង្រួបបង្រួមយើងឲ្យទៅព្រះយេស៊ូវគ្រីស្ទ និងរូបកាយរបស់ទ្រង់ដែលជាក្រុមជំនុំ។ ម្យ៉ាងទៀត វាជាការបំផ្លាស់បំប្រែចិត្ត ជាការក្លាយជាគ្រីស្ទបរិស័ទ។ នេះគឺជាអត្ថន័យនៃការក្លាយជាគ្រីស្ទបរិស័ទ៖ ត្រូវបានជំរុញដោយព្រះវិញ្ញាណបរិសុទ្ធក្នុងរបៀបដែលយើងត្រូវបាននាំមកចូលសេចក្តីជំនឿ និងការរួបរួមទៅនឹងព្រះយេស៊ូវ។

ការប្រទានអំណាចដោយព្រះវិញ្ញាណ
ខ្ញុំគិតថា នោះមិនជារបៀបដែលព្រះយេស៊ូវ និងលោក លូកា បានប្រើប្រាស់ឃ្លាដូចគ្នានេះនៅក្នុងកណ្ឌគម្ពីរ កិច្ចការ ១:៤-៥ ទេ។ នេះគឺជាអ្វីដែលព្រះយេស៊ូវបានមានព្រះបន្ទូលពេលលោក លូកា បានដកស្រង់សម្រង់សម្ដីទ្រង់៖

«រួចមក កាលបានប្រជុំទាំងអស់គ្នាហើយ នោះទ្រង់ហាមមិនឲ្យគេចេញពីក្រុងយេរូសាឡឹមឡើយ ដោយព្រះបន្ទូលថា ត្រូវឲ្យនៅចាំសេចក្តីសន្យានៃព្រះវរបិតា "ដែលអ្នករាល់គ្នាបានឮខ្ញុំថ្លែងប្រាប់ហើយ ដ្បិតពិតជាលោកយ៉ូហានបានធ្វើបុណ្យជ្រមុជដោយទឹក ប៉ុន្តែនៅបន្តិចទៀត អ្នករាល់គ្នានឹងទទួលបុណ្យជ្រមុជ ដោយព្រះវិញ្ញាណបរិសុទ្ធវិញ”»។

លោកបានស្រង់សម្រង់សម្ដីរបស់លោក យ៉ូហាន-បាទីស្ទ ពីកណ្ឌគម្ពីរ លូកា ៣:១៦ ដែលសាវ័ក យ៉ូហាន បានលើកឡើងថា «ឯខ្ញុំៗ ធ្វើបុណ្យជ្រមុជឲ្យអ្នករាល់គ្នាដោយទឹកក៏ពិត ប៉ុន្តែមានព្រះ១អង្គមក ដែលមានអំណាចលើសជាងខ្ញុំទៅទៀត ខ្ញុំមិនគួរនឹងស្រាយខ្សែសុព័ណ៌បាទទ្រង់ផង ព្រះអង្គនោះនឹងធ្វើបុណ្យជ្រមុជឲ្យអ្នករាល់គ្នា ដោយព្រះវិញ្ញាណបរិសុទ្ធ ហើយនិងភ្លើងវិញ»។

ខ្ញុំគិតថា ព្រះយេស៊ូវមិនបានមានន័យថា ពួកសាវ័កនឹងប្រែចិត្តពីការមិនជឿទៅជាជឿក្នុងពិធីបុណ្យជ្រមុជទឹកនេះ ដែលពួកគាត់ត្រូវតែចាំនៅក្រុងយេរូសាឡឹមទេ។ ខ្ញុំគិតថា លោក លូកា បានឃើញពួកសាវ័កថាពិតជាពួកអ្នកជឿដែលបានកើតជាថ្មីដ៏ស្មោះត្រង់មែន មុនពេលសេចក្ដីសន្យានៃពិធីជ្រមុជទឹកនេះបានកើតឡើងចំពោះពួកគេ។

លោក លូកា បានបញ្ចប់កណ្ឌគម្ពីរដំណឹងល្អរបស់គាត់ជាមួយនឹងការពិពណ៌នារបស់ពួកសាវ័ក មុនពេលដែលពួកគាត់គួរតែរង់ចាំ ដែលហៅបុណ្យជ្រមុជទឹកដោយព្រះវិញ្ញាណបរិសុទ្ធ។ ដូចមានសេចក្ដីចែងទុកក្នុងកណ្ឌគម្ពីរ លូកា ២៤:៥២-៥៣៖ «គេក៏ក្រាបថ្វាយបង្គំទ្រង់ រួចត្រឡប់ទៅឯក្រុងយេរូសាឡឹមវិញ ដោយអំណរជាខ្លាំង ក៏នៅក្នុងព្រះវិហារជានិច្ច ទាំងសរសើរ ហើយលើកតម្កើងព្រះ»។ នៅត្រង់នេះមានពួកបុរសមួយក្រុមដែលកំពុងថ្វាយបង្គំព្រះយេស៊ូវ។ ពួកគាត់មានសេចក្ដីអំណរជាខ្លាំង។ ពួកគាត់សរសើរតម្កើងព្រះតាមរយៈព្រះយេស៊ូវនៅក្នុងព្រះវិហារ។ ពួកគាត់មិនមែនជាពួកសាវ័កដែលមិនទាន់បានផ្លាស់ប្រែជាថ្មី ដែលកំពុងរង់ចាំនៅក្នុងការកើតជាថ្មី ដោយការយាងមកដល់នៃព្រះវិញ្ញាណបរិសុទ្ធនោះឡើយ។

ការស្នើសុំការជ្រមុជជាថ្មី

តើព្រះយេស៊ូវមានន័យដូចម្ដេចនៅក្នុងកណ្ឌគម្ពីរ កិច្ចការ ១:៥ និងកណ្ឌគម្ពីរ លូកា ជំពូក៣? ខ្ញុំគិតថា នៅពេលទ្រង់មានព្រះបន្ទូលថា អ្នករាល់គ្នានឹងទទួលបុណ្យជ្រមុជដោយព្រះវិញ្ញាណបរិសុទ្ធវិញ នោះទ្រង់មានន័យថា អ្នករាល់គ្នានឹងទទួលបានអំណាចដ៏ចម្លែកអស្ចារ្យសម្រាប់ការតម្កើងព័ន្ធកិច្ចរបស់ព្រះគ្រីស្ទ។ នោះគឺជាអ្វីដែលខ្ញុំគិតថាទ្រង់ចង់សំដៅទៅលើ។ អ្នករាល់គ្នានឹងទទួលបានអំណាចដ៏ចម្លែកអស្ចារ្យសម្រាប់ការតម្កើងព័ន្ធកិច្ចរបស់ព្រះគ្រីស្ទ។

បទពិសោធន៍នោះអាចនឹងកើតឡើងក្នុងលក្ខណៈមិនធម្មតា ជាបទពិសោធន៍មិនស្ទាក់ស្ទើរក្រោយពីការប្រែចិត្តជឿ—មួយថ្ងៃ មួយសប្ដាហ៍ មួយឆ្នាំ ឬមួយនាទី—កើតជាបន្តដោយការចាក់បង្ហូរ ចាក់បំពេញ ឬការជ្រមុជនៃព្រះវិញ្ញាណជាបន្តបន្ទាប់ជានិច្ចជាកាល ពេញមួយជីវិត។ ឬក៏ថា បទពិសោធន៍នេះនឹងកើតមកក្នុងពេលនៃការប្រែចិត្តទទួលជឿ ហើយបទពិសោធន៍នៃការផ្ដល់អំណាចក្នុងព្រះវិញ្ញាណបរិសុទ្ធនឹងកើតមានជាបន្តបន្ទាប់ក៏ថាបាន។ វាអាចកើតឡើងនៅក្នុងរបៀបផ្សេងៗគ្នា ការទទួលការចាក់បំពេញ និងការទទួលបានព្រះពរពេញមួយជីវិត ដែលការនោះមិនអាចទាយដឹងជាមុនបាន ហើយក៏មានលក្ខណៈផ្សេងៗគ្នា។

ខ្ញុំគិតថា វាអាចនឹងជាកំហុសមួយក្នុងការកំណត់ការជ្រមុជក្នុង ដោយ ឬជាមួយព្រះវិញ្ញាណបរិសុទ្ធទៅនឹងព្រឹត្តិការណ៍មួយបន្ទាប់ពីការប្រែចិត្តជឿ។ ទោះបីជាលោកអ្នកអាចមានបទពិសោធន៍នេះក៏ដោយ ក៏នោះមិនមានន័យថា វាជារបៀបធម្មតាដែលយើងគួរយល់អំពីការជ្រមុជទេ។ ខ្ញុំគិតថា ប្រភេទនៃការពេញ និងការផ្ដល់អំណាចដែលយើងទទួលបានក្នុងបទពិសោធន៍ដូចនេះក៏មានតម្រូវការម្ដងហើយម្ដងទៀតដែរនៅក្នុងជីវិតជាគ្រីស្ទបរិស័ទ។ វាមិនមែនជាអ្វីដែលកើតឡើងម្ដងហើយម្ដងទៀតក្នុងលក្ខណៈដូចគ្នាសម្រាប់គ្រប់កាលៈទេសៈនៃជីវិតគ្រីស្ទបរិស័ទនោះទេ។

ខ្ញុំគិតថា វាជារឿងត្រឹមត្រូវក្នុងការចង់ទទួលបានការជ្រមុជជាថ្មី។ នោះគឺជាភាសារបស់ពួកព្យួរីតិន (Puritans)។ នោះគឺជាភាសានៃ លោក ម៉ាទីន ឡយ ចូនស៍ (Martyn Lloyd-Jones)។ នេះគឺជាភាសារបស់ខ្ញុំម្ដងហើយម្ដងទៀត ពេលខ្ញុំនៅលើវេទិកា និងអធិប្បាយ។ ខ្ញុំនិយាយថា «ឱព្រះអម្ចាស់អើយ! ទូលបង្គំត្រូវការជ្រមុជជាថ្មី។ ទូលបង្គំត្រូវការចាក់ប្រេងតាំងជាថ្មី។ ទូលបង្គំត្រូវការការចាក់បំពេញជាថ្មី។ ទូលបង្គំត្រូវការចាក់បង្ហូរនៃព្រះវិញ្ញាណបរិសុទ្ធ»។

ការពោរពេញ និងការផ្ដល់អំណាច
ខ្ញុំគិតថា ភាសាគឺផ្សេងៗពីគ្នានៅក្នុងកណ្ឌគម្ពីរកិច្ចការ សម្រាប់ការទាំងអស់នោះ ដែលមិនបាននៅបន្តទៀតទេ។ លោកអ្នកមានសាវ័ក ប៉ុល នៅស្រុកគីទីម ហើយគាត់រៀបនឹងនិយាយ។ កណ្ឌគម្ពីរបានចែងថា គាត់បានទទួលការចាក់បំពេញដោយព្រះវិញ្ញាណបរិសុទ្ធ បន្ទាប់មកគាត់មានអំណាចដ៏ចម្លែកអស្ចារ្យក្នុងការចាត់ការពួកចេះអាគមអាបធ្មប់នៅលើកោះនោះ (កិច្ចការ ១៣:៨-១២)។ នេះគឺជាប្រភេទនៃរឿងដែលខ្ញុំគិតថា ព្រះយេស៊ូវកំពុងមានបន្ទូល៖ «យើងចង់ឲ្យអ្នករាល់គ្នាស្គាល់បទពិសោធន៍នេះ នៅពេលអ្នករាល់គ្នាចេញទៅផ្សាយដំណឹងល្អទៅកាន់លោកីយ៍»។ សូមឲ្យខ្ញុំបានផ្ដល់នូវចំណុច៤នៃមូលហេតុដែលខ្ញុំគិតថាលោក លូកា និងព្រះយេស៊ូវបានប្រើពាក្យក្នុងរបៀបនោះ។

ចំណុចទីមួយ៖ លោក លូកា បានពិពណ៌នាការជ្រមុជដំបូងនៃព្រះវិញ្ញាណថា ជាការចាក់បំពេញ។ គាត់បានប្រើពាក្យការពេញជាភាសានិយាយនៅក្នុងកណ្ឌគម្ពីរ កិច្ចការ ២:៤។ គាត់បានលើកឡើងថា «ត្រូវឲ្យនៅចាំសេចក្ដីសន្យា [ការជ្រមុជនោះ]»(កិច្ចការ ១:៤-៥) ហើយបន្ទាប់មក ពេលគាត់បានពណ៌នាអំពីការនេះនៅក្នុងជំពូកទី២ ខ៤ នោះគាត់បានលើកឡើងថា «នឹងទទួលបុណ្យជ្រមុជ [ពេញ] ដោយព្រះវិញ្ញាណបរិសុទ្ធវិញ»។ សម្រាប់គាត់ នេះគឺជាសេចក្ដីពិតផ្ទួនៗគ្នា៖ ការពេញលេញ និងការជ្រមុជ។ ជាបន្តបន្ទាប់មកទៀតនៅពាសពេញកណ្ឌគម្ពីរកិច្ចការពាក្យ «ពេញដោយព្រះវិញ្ញាណបរិសុទ្ធ» គឺជាអ្វីដែលបានកើតឡើងម្ដងទៀតនៅក្នុងជីវិតរបស់អ្នកជឿ មិនគ្រាន់តែកើតឡើងតែម្ដងនោះទេ។

ចំណុចទីពីរ៖ លោក លូកា បានលើកឡើងថា ការជ្រមុជដោយព្រះវិញ្ញាណគឺជាការសម្រេចនៃសេចក្ដីសន្យាពីកណ្ឌគម្ពីរ យ៉ូអែលជំពូកទី២ («ត្រូវឲ្យនៅចាំសេចក្ដីសន្យា»)។ បន្ទាប់មក សេចក្ដីសន្យានៅក្នុងកណ្ឌគម្ពីរ យ៉ូអែល ក៏បានទទួលការបំពេញ និងពន្យល់នៅក្នុងកណ្ឌគម្ពីរ កិច្ចការ ២:១៦។ សេចក្ដីសន្យានៅក្នុងកណ្ឌគម្ពីរយ៉ូអែលជំពូកទី២គឺមិនមែនជាសេចក្ដីសន្យានៃការតាំងសញ្ញាថ្មីនៃការកើតជាថ្មីទេ។ តែគឺជាការតាំងសញ្ញានៃសេចក្ដីសន្យានៃអំណាចពួកហោរា៖ អ្នករាល់គ្នានឹងនិយាយដោយអំណាចចម្លែកអស្ចារ្យ។

ចំណុចទីបី៖ លោក លូកា បានពណ៌នាអំពីការជ្រមុជដោយព្រះវិញ្ញាណថាជាការទទួលបានអំណាចសម្រាប់ការធ្វើជាទីបន្ទាល់ (កិច្ចការ ១:៨)។ គាត់បានលើកឡើងថា «កាលណាព្រះវិញ្ញាណបរិសុទ្ធបានមកសណ្ឋិតលើអ្នករាល់គ្នា នោះអ្នករាល់គ្នានឹងបានព្រះចេស្ដា ហើយនិងធ្វើជាទីបន្ទាល់ពីខ្ញុំ រហូតដល់ចុងផែនដីបំផុតផង»។ នោះគឺជាការពណ៌នាភ្លាមៗចំពោះអ្វីដែលនឹងកើតឡើង ប្រសិនបើអ្នករាល់គ្នារង់ចាំការជ្រមុជនោះ។ ដូច្នេះ វាគឺជាការប្រទានអំណាចសម្រាប់ប្រសិទ្ធភាពនៃការលើកតម្កើងព្រះគ្រីស្ទជាសកល។

ទីបួន៖ ចំណុចចុងក្រោយលោក លូកា បានលើកឡើងថា ការជ្រមុជក្នុងព្រះវិញ្ញាណគឺជាការគ្របដណ្ដប់ដោយព្រះចេស្ដាពីស្ថានលើ ដើម្បីឲ្យព្រះរាជសាររបស់ព្រះគ្រីស្ទអាចចេញទៅយ៉ាងមានប្រសិទ្ធិភាពទូទាំងពិភពលោក។ នោះគឺជាភាសានៅក្នុងកណ្ឌគម្ពីរ លូកា ២៤:៤៩ ដែលនៅត្រង់នោះគាត់ប្រាប់ពួកគេ «ចូរអ្នករាល់គ្នានៅតែក្នុងក្រុងយេរូសាឡឹម ដរាបដល់ព្រះចេស្ដាពីស្ថានលើ បានមកគ្របដណ្ដប់លើអ្នករាល់គ្នា»។

ចុះភាសាដទៃវិញ?
ការយល់ដឹងរបស់ខ្ញុំអំពីពិធីបុណ្យជ្រមុជដោយព្រះវិញ្ញាណបរិសុទ្ធគឺថាសាវ័ក ប៉ុល ប្រើប្រាស់ឃ្លានេះក្នុងទម្រង់មួយ ដើម្បីសំដៅទៅលើអ្វីដែលកើតឡើងនៅពេលកើតជាថ្មី។ លោក លូកា បានប្រើប្រាស់ទម្រង់មួយនៃឃ្លានេះនៅពេលគាត់ដកស្រង់ព្រះបន្ទូលរបស់ព្រះយេស៊ូវសម្រាប់ការប្រទានអំណាចដោយព្រះវិញ្ញាណ។

ដើម្បីឆ្លើយសំណួរអំពីអំណោយទានប្លែកៗ វាអាច ឬមិនអាចមានរួមបញ្ចូលសញ្ញាផ្សេងៗ ដូចជាភាសាដទៃ ឬការបង្ហាញមិនធម្មតាផ្សេងទៀត។ ខ្ញុំគិតថា គ្រីស្ទបរិស័ទគ្រប់រូបគួរតែស្វែងរកពិធីបុណ្យជ្រមុជថ្មីៗក្នុងន័យនេះម្តងហើយម្តងទៀត ដើម្បីឲ្យព័ន្ធកិច្ចប្រកបដោយប្រសិទ្ធភាព។

ប្រសិនបើលោកអ្នកជាគ្រីស្ទបរិស័ទម្នាក់ នោះលោកអ្នកមានព្រះវិញ្ញាណបរិសុទ្ធហើយ។ ប៉ុន្តែ តើវាដូចគ្នានឹងការជ្រមុជនៅក្នុងព្រះវិញ្ញាណបរិសុទ្ធទេ? លោកគ្រូ ចន បានពន្យល់អំពីរបៀបខុសៗគ្នា។

និពន្ធដោយ៖ John Piper
បកប្រែដោយ៖ កញ្ញា គឹម បូព្រឹក
កែសម្រួលដោយ៖ លោក ខែម បូឡុង, លោក ទេព រ៉ូ, លោក ឯក សត្យា, លោក ឯក ធីម៉ូថេ, លោក សឹម រក្សា, លោក ឈាង បូរ៉ា និងលោកស្រី ឡូញ ស្រីរដ្ឋ
ដកស្រង់ខ្លះៗ និងកែសម្រួលចេញពី www.desiringgod.org ដោយមានការអនុញ្ញាត។

តើអ្នកគិតយ៉ាងណា?

០ពិន្ទុ

តើលោកអ្នកយល់យ៉ាងណាដែរ?

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

១៥២៨៦

ក្តៅៗពេញនិយម

កំណត់ហេតុបណ្ដាញ៦ មករា ២០២៦

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

វាគ្មានអ្វីគួរឲ្យភ្ញាក់ផ្អើលនោះទេ យើងបានទទួលសំណួរជាច្រើនពីបេសកជននៅតាមតំបន់នានា…

អានបន្ថែម

តើ៧០អាទិត្យ ក្នុងកណ្ឌគម្ពីរដានីយ៉ែលជាអ្វី? (ដានីយ៉ែល ៩)

៣១០៤

កំណត់ហេតុបណ្ដាញ២៥ វិច្ឆិកា ២០២៥

តើ៧០អាទិត្យ ក្នុងកណ្ឌគម្ពីរដានីយ៉ែលជាអ្វី? (ដានីយ៉ែល ៩)

អត្ថន័យសំខាន់នៃការកាត់ស្រាយកណ្ឌគម្ពីរ ដានីយ៉ែល ៩:២៦-២៧ គឺជាការសង្កេតរបស់សាវ័កម៉ាថាយ ត្រង់ដែលព្រះយេស៊ូវកំពុងមានបន្ទូលអំពីការបំផ្លិចបំផ្លាញដែលត្រូវនឹងមកក្រុងយេរូសាឡឹម និងព្រះវិហារបរិសុទ្ធ (ម៉ាថាយ ២៤:១៥)។

អានបន្ថែម

សំណួរដែលបណ្តាលចិត្ត៖ វិធីសាស្ត្រថ្មី ក្នុងការពិភាក្សានៅក្នុងក្រុមតូច

១១២៣

កំណត់ហេតុបណ្ដាញ១៨ វិច្ឆិកា ២០២៥

សំណួរដែលបណ្តាលចិត្ត៖ វិធីសាស្ត្រថ្មី ក្នុងការពិភាក្សានៅក្នុងក្រុមតូច

ព្រះយេស៊ូវ ពួកសាវ័ក និងពួកសិស្សរបស់ទ្រង់ ពួកគេទាំងអស់បានសួរបណ្តាជននូវសំណួរជាក់លាក់។ ឥឡូវនេះ ប្រហែលជាពួកយើងគួរពិចារណាប្រើសំណួរដូចគ្នាទាំងនេះ សម្រាប់ក្រុមតូចរបស់យើងទាំងអស់។

អានបន្ថែម

អត្ថបទបន្ថែមពី កំណត់ហេតុបណ្ដាញ

ហេតុអ្វីបានជាព្រះយេស៊ូវទទួលបុណ្យជ្រមុជទឹក?

៥១៨៤

ក្តៅៗពេញនិយម

កំណត់ហេតុបណ្ដាញ១៣ កុម្ភៈ ២០២៦

ហេតុអ្វីបានជាព្រះយេស៊ូវទទួលបុណ្យជ្រមុជទឹក?

Why was Jesus baptized?

អានបន្ថែម

តើគ្រូគង្វាល និងពួកចាស់ទុំមានភាពខុសគ្នាឬ?(១ធីម៉ូថេ ៣)

៨២៤២

ក្តៅៗ

កំណត់ហេតុបណ្ដាញ៣០ ធ្នូ ២០២៥

តើគ្រូគង្វាល និងពួកចាស់ទុំមានភាពខុសគ្នាឬ?(១ធីម៉ូថេ ៣)

សាវ័ក ប៉ុល និងអ្នកនិពន្ធព្រះគម្ពីរសញ្ញាថ្មីផ្សេងទៀតបានប្រើប្រាស់ពាក្យថា «អ្នកត្រួតត្រា» ជំនួសគ្នាទៅវិញទៅមកជាមួយនឹងពាក្យ «ពួកចាស់ទុំ»។ ឧទាហរណ៍៖ សូមពិចារណានៅក្នុងកណ្ឌគម្ពីរ ទីតុស ១:៥-៧។

អានបន្ថែម

តើការជំនុំជម្រះដោយផ្អែកលើការប្រព្រឹត្តិមានន័យយ៉ាងដូចម្ដេច? (វិវរណៈ ២០ និង ២១)

៨២២០

ក្តៅៗពេញនិយម

កំណត់ហេតុបណ្ដាញ២៣ ធ្នូ ២០២៥

តើការជំនុំជម្រះដោយផ្អែកលើការប្រព្រឹត្តិមានន័យយ៉ាងដូចម្ដេច? (វិវរណៈ ២០ និង ២១)

ឯអ្នកណាដែលឈ្នះ នោះនឹងបានគ្រងសេចក្ដីទាំងនេះទុកជាមរដក អញនឹងធ្វើជាព្រះដល់អ្នកនោះ ហើយអ្នកនោះនឹងធ្វើជាកូន

អានបន្ថែម

តើអ្នកដែលមិនបានសង្គ្រោះ នឹងទទួលរងទុក្ខពីការជំនុំជម្រះដ៏អស់កល្បជានិច្ចឬទេ? (២ថែស្សាឡូនីច ១)

២៥២

ក្តៅៗ

កំណត់ហេតុបណ្ដាញ១៦ ធ្នូ ២០២៥

តើអ្នកដែលមិនបានសង្គ្រោះ នឹងទទួលរងទុក្ខពីការជំនុំជម្រះដ៏អស់កល្បជានិច្ចឬទេ? (២ថែស្សាឡូនីច ១)

កណ្ឌគម្ពីរ ២ថែស្សាឡូនីច ១:៨ បានលើកឡើងអំពី «ការសងសឹក» របស់ព្រះជាម្ចាស់។ ពាក្យជាភាសាក្រិក «អេកឌីខេស៊ីស» (ekdikēsis) បង្ហាញអំពីសេចក្ដីយុត្តិធម៌ ឬការផ្ដន្ទាទោស ដោយសំដៅទៅលើសេចក្ដីយុត្តិធម៌នៃការប្រោសលោះរបស់ព្រះជាម្ចាស់ ជំនួសឲ្យអ្នករើសតាំងរបស់ទ្រង់ (លូកា ១៨:៧-៨) ឬសំដៅទៅលើការផ្ដន្ទាទោសដ៏សុចរិតរបស់ទ្រង់ទៅលើអ្នកដែលទាស់ប្រឆាំងនឹងទ្រង់ (លូកា ២១:២២; រ៉ូម ១២:១៩)។

អានបន្ថែម

មតិយោបល់

មានមតិយោបល់ដែលបានអនុម័ត 0