តើក្រុមជំនុំអាចដាក់ឈើឆ្កាងបានដែរឬទេ?

តាមពិតទៅ ព្រះជាម្ចាស់ផ្ទាល់បានបញ្ជាឲ្យជនជាតិអ៊ីស្រាអែលឆ្លាក់រូបលម្អទាំងនោះ...

២៥ មីនា ២០១៩អានរយៈពេល ៩ នាទី

មើល១៣២៦ដង

នៅ

ក្នុងវប្បធម៌ខ្មែរ និងតាមពុទ្ធសាសនា ការថ្វាយបង្គំរូបព្រះគឺជាអ្វីដែលកើតមានឡើងជារៀងរាល់ថ្ងៃ។ ដូច្នេះ យើងខ្ញុំយល់អំពីការបារម្ភដែលមនុស្សមួយចំនួនមាន ទាក់ទងទៅនឹងការដាក់ឈើឆ្កាងនៅក្នុងក្រុមជំនុំ ជាពិសេសនៅមុខបន្ទប់ជួបជុំគ្នាថ្វាយបង្គំ ដែលអ្នកចូលរួមអាចមានការយល់ច្រឡំថា គ្រីស្ទបរិស័ទកំពុងថ្វាយបង្គំឈើឆ្កាងដូចជារូបព្រះនៃសាសនាផ្សេងៗ។ យើងខ្ញុំនឹកចាំពីភ្ញៀវម្នាក់ដែលមកចូលរួមក្នុងក្រុមជំនុំយើង ហើយពេលនោះគាត់បានងឿងឆ្ងល់ដោយសួរយើងខ្ញុំថា «តើគ្រីស្ទបរិស័ទកំពុងថ្វាយបង្គំឈើឆ្កាងមែនឬ?»។

បើក្រុមជំនុំមានឈើឆ្កាងនៅក្នុងអគារ ឬក៏ក្នុងបន្ទប់ថ្វាយបង្គំ តើនោះជារឿងខុសឆ្គងមែនឬ?

មនុស្សជាច្រើននឹងលើកឡើងចេញពីក្រឹត្យវិន័យទាំងដប់ប្រការ ហើយនិយាយថា «មើលចុះ! ព្រះគម្ពីរបានប្រាប់យើងថា យើងមិនគួរមានឈើឆ្កាងបានឡើយ»។

ប៉ុន្តែ តាមពិតទៅ ការបកស្រាយរបស់ពួកគេលើក្រឹត្យវិន័យនេះ វាសាមញ្ញពេកហើយ ហើយក៏នាំឲ្យមានការសន្មតដ៏មិនត្រឹមត្រូវទៀតផង។

ជាដំបូង សូមអានកណ្ឌគម្ពីរ និក្ខមនំ ២០:៤ ដើម្បីមើលថា តើមានអ្វីខុសអំពីការយល់ដឹងរបស់អស់អ្នកដែលកាត់ស្រាយថា មិនគួរមានឈើឆ្កាងនោះ។

«កុំឲ្យឆ្លាក់ធ្វើរូបណាសម្រាប់ឯងឲ្យសោះ ក៏កុំឲ្យធ្វើរូបណាឲ្យដូចជាអ្វីនៅស្ថានសួគ៌ខាងលើ ឬនៅផែនដីខាងក្រោម ឬនៅក្នុងទឹកដែលទាបជាងដីផង» (និក្ខមនំ ២០:៤)។

ប្រសិនជាយើងកាត់ស្រាយខគម្ពីរនេះឲ្យមានអត្ថន័យថា យើងមិនអាចមានឈើឆ្កាងនៅក្នុងក្រុមជំនុំបានទេ នោះដាច់ខាត យើងក៏ត្រូវតែទទួលជឿថា កូនៗរបស់យើងក៏មិនអាចមានតុក្កតាបានផងដែរ មានដូចជា៖ កូនឡាន យន្តហោះ ចានឆ្នាំង បាយឡកបាយឡ ឬមើលរឿងតុក្កតា។ល។ ហេតុអ្វី? ព្រោះខគម្ពីរបានចែងថា «កុំឲ្យឆ្លាក់ធ្វើរូបណាសម្រាប់ឯងឲ្យសោះ...»។

ប៉ុន្តែ យើងទាំងអស់គ្នាដឹងហើយថា ព្រះជាម្ចាស់មិនបានហាមកូនៗជនជាតិអ៊ីស្រាអែល មិនឲ្យមានរបស់លេងបែបដូចនោះទេ ឬក៏ហាមមិនឲ្យពួកគេធ្វើអ្វីមួយពីឈើ ឬក៏ថ្មចេញពីរូបអ្វីមួយ ដើម្បីលម្អក្នុងផ្ទះរបស់ពួកគេឲ្យស្អាតនោះដែរ។ តាមពិតទៅ ព្រះជាម្ចាស់ផ្ទាល់បានបញ្ជាឲ្យជនជាតិអ៊ីស្រាអែលឆ្លាក់រូបលម្អទាំងនោះ «រួចត្រូវយកមាសសុទ្ធធ្វើជាជើងចង្កៀង ឯជើងចង្កៀងនោះត្រូវឆ្លាក់ធ្វើឲ្យមានគល់ ដើម នប់ កន្សោមគ្រាប់ ហើយនិងផ្កាភ្ជាប់ជាមួយគ្នា ត្រូវមានមែក៦បែកចេញមកពីគល់ គឺមែក៣ម្ខាងៗ នៅមែក១ ត្រូវមាននប់៣រាងដូចជាគ្រាប់ចំបក់ មានទាំងកន្សោមគ្រាប់ហើយនិងផ្កាផង ឯមែកទាំង៦ដែលបែកចេញពីគល់ជើងចង្កៀងមក នោះក៏ត្រូវមាននប់៣ រាងដូចជាគ្រាប់ចំបក់ព្រមទាំងកន្សោមគ្រាប់ ហើយនិងផ្កា ដូចគ្នាទាំងអស់ដែរ ឯគល់ជើងចង្កៀងត្រូវមាននប់៤វិញ រាងដូចជាគ្រាប់ចំបក់ព្រមទាំងកន្សោមគ្រាប់ ហើយនិងផ្កាផង» (និក្ខមនំ ២៥:៣១-៣៤)! ដូច្នេះ យើងត្រូវតែទទួលស្គាល់ថា បញ្ញត្តិបញ្ជានេះគឺមិនទាក់ទងនឹងការហាមមិនឲ្យមានរូបឆ្លាក់ និងរបស់លេងនោះទេ។ ប៉ុន្តែ នៅពេលដែលមើលទៅលើបរិបទនៃខគម្ពីរនេះ នោះយើងនឹងឃើញថា ការហាមនេះគឺទាក់ទងទៅនឹងការប្រើប្រាស់រួបឆ្លាក់យ៉ាងចំៗផ្សេងទេតើ ពោលគឺការប្រើប្រាស់រូបឆ្លាក់សម្រាប់ជាព្រះ ដើម្បីថ្វាយបង្គំ៖

«កុំឲ្យមានព្រះឯណាទៀតនៅចំពោះអញឲ្យសោះ។ កុំឲ្យឆ្លាក់ធ្វើរូបណាសម្រាប់ឯងឲ្យសោះ ក៏កុំឲ្យធ្វើរូបណាឲ្យដូចជាអ្វីនៅស្ថានសួគ៌ខាងលើ ឬនៅផែនដីខាងក្រោម ឬនៅក្នុងទឹកដែលទាបជាងដីផង ក៏កុំឲ្យក្រាបសំពះនៅចំពោះរបស់ទាំងនោះ» (និក្ខមនំ ២០:៤-៥ក) ។

ប៉ុន្តែ ទោះជាយ៉ាងណាក្ដី សាសន៍អ៊ីស្រាអែលនៅមានសេរីភាពក្នុងការឆ្លាក់រូបគោ សត្វស្លាប ឬក៏អ្វីណាមួយផ្សេងទៀតដែលពួកគាត់ចង់ធ្វើ តែកុំឲ្យតែពួកគាត់យករូបទាំងនោះទៅថ្វាយបង្គំដូចជាព្រះបានហើយ។ ប្រសិនបើពួកគាត់ធ្វើរូបណាមួយឡើង តែមិនមែនសម្រាប់ថ្វាយបង្គំ នោះក៏មិនមែនជាបញ្ហាអ្វីដែរ។ គ្រីស្ទបរិស័ទក៏មានសេរីភាពក្នុងការមានរូបគំនូរ ឬក៏រូបចម្លាក់ក្នុងផ្ទះ ឬក៏ក្នុងក្រុមជំនុំរបស់ពួកគាត់បាន កុំឲ្យតែពួកគាត់យកវាធ្វើជាលក្ខណៈបែបជាព្រះសម្រាប់ទុកថ្វាយបង្គំបានហើយ។

លើសពីនេះទៅទៀត ចំពោះអស់អ្នកដែលភ័ន្តច្រឡំដោយគិតថា ក្រុមជំនុំមិនគួរមានឈើឆ្កាងលើជញ្ជាំងព្រះវិហារ ឬក៏កន្លែងថ្វាយបង្គំ ពួកគេក៏មានការយល់ច្រឡំផងដែរត្រង់ថា ពួកគេបានយកក្រឹត្យវិន័យរបស់លោក ម៉ូសេ មកដាក់លើក្រុមជំនុំសញ្ញាថ្មីបែបយ៉ាងខុសឆ្គង។ ពីព្រោះទោះបើក្រឹត្យវិន័យរបស់លោក ម៉ូសេ បានហាមមិនឲ្យមានរួបឆ្លាក់ ឬក៏រូបចម្លងណាមួយក៏ដោយ ក៏យើងដែលជាគ្រីស្ទបរិស័ទមិនស្ថិតក្រោមក្រឹត្យវិន័យទៀតឡើយ ដ្បិតយើងមិននៅក្រោមក្រឹត្យវិន័យរបស់លោក ម៉ូសេ ទៀតទេ ប៉ុន្តែផ្ទុយទៅវិញយើងមានសេរីភាពក្នុងព្រះគ្រីស្ទ ដូចដែលសាវ័ក ប៉ុល បានសរសេរនៅក្នុងកណ្ឌគម្ពីរកាឡាទីដូចតទៅ៖

«បានជាក្រឹត្យវិន័យធ្វើជាអ្នកដឹកនាំយើងរាល់គ្នាទៅដល់ព្រះគ្រីស្ទ ដើម្បីឲ្យយើងបានរាប់ជាសុចរិត ដោយអាងជំនឿតែលុះកាលជំនឿបានមកដល់ នោះយើងមិនមែននៅក្រោមអំណាច របស់អ្នកដឹកនាំនោះទៀតទេ» (កាឡាទី ៣:២៣-២៥)។

«អ្នករាល់គ្នាណាដែលពឹងដល់ក្រឹត្យវិន័យ ឲ្យបានរាប់ជាសុចរិត នោះត្រូវកាត់ចេញពីព្រះគ្រីស្ទ អ្នកបានធ្លាក់ចេញពីព្រះគុណហើយ» (កាឡាទី ៥:៤)។

«បើព្រះវិញ្ញាណទ្រង់នាំអ្នករាល់គ្នាវិញ នោះអ្នករាល់គ្នាមិននៅក្រោមបន្ទុកក្រឹត្យវិន័យទៀតទេ» (កាឡាទី ៥:១៨)។

នេះមិនមែនមានន័យថា គ្រីស្ទបរិស័ទមានសេរីភាពក្នុងការឆ្លាក់រូបព្រះ ហើយថ្វាយបង្គំពួកវានោះឡើយ។ យើងមិនត្រូវធ្វើដូច្នោះទេ! សូមអានបន្ថែមនៅក្នុងកណ្ឌគម្ពីរ ១យ៉ូហាន ៥:២១។ ប៉ុន្តែ ខគម្ពីរនោះមានន័យថា យើងត្រូវតែមានការប្រុងប្រយ័ត្នក្នុងការលើកខគម្ពីរណាមួយក្នុងក្រឹត្យវិន័យលោក ម៉ូសេ យកមកឲ្យក្រុមជំនុំអនុវត្ត ពីព្រោះក្រុមជំនុំមិនស្ថិតក្រោមក្រឹត្យវិន័យទៀតឡើយ។

ពេលខ្លះ ការដាក់ឈើឆ្កាងនៅលើជញ្ជាំង ឬក៏នៅមុខព្រះវិហារអាចទំនងល្បួងឲ្យបុគ្គលណាម្នាក់ចង់ថ្វាយបង្គំវាដូចជារូបព្រះ ក្នុងករណីដូចនេះ វាជាការល្អបើយើងដកវាចេញ។ ប៉ុន្តែ កុំច្រឡំដោយគិតថា វាជារូបព្រះ ឬក៏ជាចំណុចសំខាន់មួយនៃផ្នែកថ្វាយបង្គំព្រះតាមរយៈឈើឆ្កាងនោះឡើយ។ ក្នុងសង្គមគ្រីស្ទបរិស័ទយើង ជាធម្មតា ឈើឆ្កាងគឺជាសញ្ញាតំណាងមួយសម្រាប់រម្លឹកយើងអំពីអ្វីដែលព្រះយេស៊ូវបានសម្រេចនៅលើឈើឆ្កាង និងជាក្ដីសង្គ្រោះដែលព្រះអង្គនាំមកតាមរយៈជំនឿ។ សញ្ញាឈើឆ្កាងក៏ជាអ្វីមួយដែលញែកយើងចេញពីសាសនាផ្សេងៗទៀតនៅលើលោកីយ៍នេះ ហើយក៏ជាសញ្ញាដែលយើងអាចមើលឃើញទាក់ទងនឹងជំនឿរបស់យើងក្នុងព្រះគ្រីស្ទដែរ។ ប៉ុន្តែ ព្រះគម្ពីរក៏មិនដែលបានបញ្ជាឲ្យក្រុមជំនុំមាន ឬក៏មិនមានឈើឆ្កាងដូចនោះផងដែរ។

ដូច្នេះសរុបសេចក្ដីទៅ ក្រុមជំនុំមានសេរីភាពក្នុងការដាក់ឈើឆ្កាង ឬក៏មិនដាក់ឈើឆ្កាងក្នុងក្រុមជំនុំក៏បានដែរ។

និពន្ធដោយ៖ លោកគ្រូ វ៉ែល ណាថាន

កែសម្រួលដោយ៖ លោក ឈាង បូរ៉ា, លោក ទេព រ៉ូ, លោក ខែម បូឡុង, លោកម៉េង មនោ និងលោកស្រី ឡូញ ណារ៉ុង

តើអ្នកគិតយ៉ាងណា?

១០ពិន្ទុ

តើលោកអ្នកយល់យ៉ាងណាដែរ?

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

១៥២៩៦

ក្តៅៗពេញនិយម

កំណត់ហេតុបណ្ដាញ៦ មករា ២០២៦

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

វាគ្មានអ្វីគួរឲ្យភ្ញាក់ផ្អើលនោះទេ យើងបានទទួលសំណួរជាច្រើនពីបេសកជននៅតាមតំបន់នានា…

អានបន្ថែម

សំណួរដែលបណ្តាលចិត្ត៖ វិធីសាស្ត្រថ្មី ក្នុងការពិភាក្សានៅក្នុងក្រុមតូច

១១២៥

កំណត់ហេតុបណ្ដាញ១៨ វិច្ឆិកា ២០២៥

សំណួរដែលបណ្តាលចិត្ត៖ វិធីសាស្ត្រថ្មី ក្នុងការពិភាក្សានៅក្នុងក្រុមតូច

ព្រះយេស៊ូវ ពួកសាវ័ក និងពួកសិស្សរបស់ទ្រង់ ពួកគេទាំងអស់បានសួរបណ្តាជននូវសំណួរជាក់លាក់។ ឥឡូវនេះ ប្រហែលជាពួកយើងគួរពិចារណាប្រើសំណួរដូចគ្នាទាំងនេះ សម្រាប់ក្រុមតូចរបស់យើងទាំងអស់។

អានបន្ថែម

តើស្ត្រីនឹងបានសង្គ្រោះក្នុងកាលដែលបង្កើតកូន មានន័យយ៉ាងដូចម្ដេច? (១ធីម៉ូថេ ២)

១១០៦

កំណត់ហេតុបណ្ដាញ១១ វិច្ឆិកា ២០២៥

តើស្ត្រីនឹងបានសង្គ្រោះក្នុងកាលដែលបង្កើតកូន មានន័យយ៉ាងដូចម្ដេច? (១ធីម៉ូថេ ២)

ស្ត្រីណាដែលទទួលយកតួនាទីដែលព្រះជាម្ចាស់បានតែងតាំងក្នុងខណៈដែលពួកនាងកំពុងបន្ត «សេចក្ដីជំនឿ សេចក្ដីស្រឡាញ់ នឹងសេចក្ដីបរិសុទ្ធ ទាំងមានគំនិតមារយាទ» ក្នុងគុណធម៌គ្រីស្ទបរិស័ទ នោះនាងនឹងរកឃើញថា ខ្លួននឹងបានសង្គ្រោះនៅថ្ងៃចុងក្រោយ។

អានបន្ថែម

អត្ថបទបន្ថែមពី កំណត់ហេតុបណ្ដាញ

ហេតុអ្វីបានជាព្រះយេស៊ូវទទួលបុណ្យជ្រមុជទឹក?

១២២១៦

ក្តៅៗពេញនិយម

កំណត់ហេតុបណ្ដាញ១៣ កុម្ភៈ ២០២៦

ហេតុអ្វីបានជាព្រះយេស៊ូវទទួលបុណ្យជ្រមុជទឹក?

Why was Jesus baptized?

អានបន្ថែម

តើគ្រូគង្វាល និងពួកចាស់ទុំមានភាពខុសគ្នាឬ?(១ធីម៉ូថេ ៣)

៩២៥០

ក្តៅៗ

កំណត់ហេតុបណ្ដាញ៣០ ធ្នូ ២០២៥

តើគ្រូគង្វាល និងពួកចាស់ទុំមានភាពខុសគ្នាឬ?(១ធីម៉ូថេ ៣)

សាវ័ក ប៉ុល និងអ្នកនិពន្ធព្រះគម្ពីរសញ្ញាថ្មីផ្សេងទៀតបានប្រើប្រាស់ពាក្យថា «អ្នកត្រួតត្រា» ជំនួសគ្នាទៅវិញទៅមកជាមួយនឹងពាក្យ «ពួកចាស់ទុំ»។ ឧទាហរណ៍៖ សូមពិចារណានៅក្នុងកណ្ឌគម្ពីរ ទីតុស ១:៥-៧។

អានបន្ថែម

តើការជំនុំជម្រះដោយផ្អែកលើការប្រព្រឹត្តិមានន័យយ៉ាងដូចម្ដេច? (វិវរណៈ ២០ និង ២១)

៨២២៦

ក្តៅៗពេញនិយម

កំណត់ហេតុបណ្ដាញ២៣ ធ្នូ ២០២៥

តើការជំនុំជម្រះដោយផ្អែកលើការប្រព្រឹត្តិមានន័យយ៉ាងដូចម្ដេច? (វិវរណៈ ២០ និង ២១)

ឯអ្នកណាដែលឈ្នះ នោះនឹងបានគ្រងសេចក្ដីទាំងនេះទុកជាមរដក អញនឹងធ្វើជាព្រះដល់អ្នកនោះ ហើយអ្នកនោះនឹងធ្វើជាកូន

អានបន្ថែម

តើអ្នកដែលមិនបានសង្គ្រោះ នឹងទទួលរងទុក្ខពីការជំនុំជម្រះដ៏អស់កល្បជានិច្ចឬទេ? (២ថែស្សាឡូនីច ១)

២៥៦

ក្តៅៗ

កំណត់ហេតុបណ្ដាញ១៦ ធ្នូ ២០២៥

តើអ្នកដែលមិនបានសង្គ្រោះ នឹងទទួលរងទុក្ខពីការជំនុំជម្រះដ៏អស់កល្បជានិច្ចឬទេ? (២ថែស្សាឡូនីច ១)

កណ្ឌគម្ពីរ ២ថែស្សាឡូនីច ១:៨ បានលើកឡើងអំពី «ការសងសឹក» របស់ព្រះជាម្ចាស់។ ពាក្យជាភាសាក្រិក «អេកឌីខេស៊ីស» (ekdikēsis) បង្ហាញអំពីសេចក្ដីយុត្តិធម៌ ឬការផ្ដន្ទាទោស ដោយសំដៅទៅលើសេចក្ដីយុត្តិធម៌នៃការប្រោសលោះរបស់ព្រះជាម្ចាស់ ជំនួសឲ្យអ្នករើសតាំងរបស់ទ្រង់ (លូកា ១៨:៧-៨) ឬសំដៅទៅលើការផ្ដន្ទាទោសដ៏សុចរិតរបស់ទ្រង់ទៅលើអ្នកដែលទាស់ប្រឆាំងនឹងទ្រង់ (លូកា ២១:២២; រ៉ូម ១២:១៩)។

អានបន្ថែម