មូលហេតុ៣យ៉ាងក្នុងការអានព្រះគម្ពីរជាប្រចាំថ្ងៃ

យើងទទួលបានសំណួរជាច្រើនទាក់ទងនឹងការអានព្រះគម្ពីរ។ សម្រាប់ថ្ងៃនេះ សំណួរមានដូចតទៅ៖ «ជម្រាបសួរលោកគ្រូ! ខ្ញុំទទួលបានមេរៀនជាច្រើនណាស់តាមរយៈខាងលោកគ្រូ។ ហើយសំណួររបស់ខ្ញុំថ្ងៃនេះគឺ៖ នៅពេលដែលខ្ញុំអានព្រះគម្ពីរ ខ្ញុំឃើញថា វាពិបាកណាស់ចំពោះខ្ញុំក្នុងការទទួលបានអ្វីដែលអ្នកនិពន្ធចង់ឲ្យខ្ញុំយល់ ចេញពីអ្វីដែលគាត់បានសរសេរ។ ឥឡូវនេះ សម្រាប់ពេលវេលាស្ងៀមស្ងាត់ជាមួយនឹងព្រះជាម្ចាស់ ខ្ញុំកំពុងតែអានកណ្ឌគម្ពីរ លោកុប្បត្ដិ ប៉ុន្តែជាញឹកញាប់ខ្ញុំឃើញថា ខ្ញុំមិនមានចំណាប់អារម្មណ៍លើអ្វីដែលខ្ញុំទើបតែបានអានប៉ុន្មានទេ។ តើអ្វីទៅជាជំនាញមូលដ្ឋានដំបូង ក្នុងការអានព្រះគម្ពីរ ដើម្បីស្វែងរកអត្ថន័យសម្រាប់ជីវិតខ្ញុំ?

៥ ឧសភា ២០២៤អានរយៈពេល ១១ នាទី

មើល១៧៣ដង

មូលហេតុ៣យ៉ាងក្នុងការអានព្រះគម្ពីរជាប្រចាំថ្ងៃ

ជំនាញមូលដ្ឋាន

ខ្ញុំដឹងថា អ្នកសួរកំពុងតែសួរអំពីជំនាញមូលដ្ឋានក្នុងការអានព្រះគម្ពីរ។ ប៉ុន្តែ យោងលើការពណ៌នារបស់គាត់អំពីអ្វីដែលកើតឡើងនៅពេលដែលគាត់អាន ខ្ញុំចង់ឆ្លើយសំណួរនេះក្នុងរបៀបខុសគ្នាបន្តិចអំពីអ្វីដែលគាត់កំពុងតែសួរ ជាជាងគ្រាន់តែឆ្លើយដោយលើកឡើងអំពីជំនាញមូលដ្ឋាន ពីព្រោះខ្ញុំគិតថា នោះមិនមែនជាចំណុចគន្លឹះនៅពេលដែលយើងចំណាយពេលស្ងៀមស្ងាត់ជាមួយនឹងព្រះជាម្ចាស់ ប៉ុន្តែមិនសូវមានចំណាប់អារម្មណ៍។

សូមកុំគិតថា មានតែអ្នកសួរទេដែលពេលខ្លះមិនសូវមានចំណាប់អារម្មណ៍។ ការនេះមិនកើតឡើងសម្រាប់តែអ្នកជឿថ្មីៗនោះទេ សូម្បីតែខ្ញុំដែលជាអ្នកជឿយូរឆ្នាំមកហើយក៏ពេលខ្លះបាត់បង់ចំណាប់អារម្មណ៍ខ្លះៗដែរ។ ខ្ញុំនឹងលើកឡើងចំណុចសំខាន់ៗបីយ៉ាង ដើម្បីបង្កើតជាផលផ្លែក្នុងការដែលយើងជួបជាមួយនឹងព្រះជាម្ចាស់ និងសេចក្ដីពិតដែលទ្រង់សព្វព្រះហឫទ័យឲ្យយើងទទួលបានតាមរយៈព្រះគម្ពីរ។

ខ្ញុំអាចពន្យល់ចំណុច៣យ៉ាងនេះដែលខ្ញុំសង្ឃឹមថានឹងក្លាយជាជំនួយដល់អ្នកសួរក្នុងរបៀបបីយ៉ាង។ ពេលខ្លះខ្ញុំហៅវាថា ការជំរុញចិត្ត ជំនាញ និងការបើកសម្ដែង។ ឬក៏ពេលខ្លះទៀតខ្ញុំហៅថា ការចង់ក្លាយជា ការមានសមត្ថភាពធ្វើ និងការយល់ឃើញ។ ឬក៏ពេលខ្លះទៀតខ្ញុំហៅវាថា សេចក្ដីប្រាថ្នាចង់បាន ទង្វើប្រព្រឹត្ត និងរង្វាន់នៃការអានព្រះគម្ពីរ។ ខ្ញុំនឹងបកស្រាយបន្ថែមខ្លះៗដោយសង្ឃឹមថា ព្រះជាម្ចាស់នឹងបង្កើតឲ្យមានការនោះនៅក្នុងជីវិតរបស់យើង។

ការជំរុញចិត្ត

ជាដំបូង ខ្ញុំចង់ពន្យល់លើចំណុចនៃការជំរុញចិត្ត។ ប្រសិនបើយើងបាត់បង់ការជំរុញចិត្ត នោះយើងនឹងលែងអានព្រះគម្ពីរជាមិនខាន។ ហើយប្រសិនបើយើងបានអានព្រះគម្ពីរ នោះយើងនឹងមិនទទួលបានគ្រប់អ្វីៗដែលព្រះជាម្ចាស់មានសម្រាប់យើងតាមរយៈព្រះបន្ទូលទេ។ ម្សិលមិញ ខ្ញុំបានអាននៅក្នុងកណ្ឌគម្ពីរ យ៉ូហានជំពូក១៧ ដែលបានសរសេរចុះអំពីសេចក្ដីអធិស្ឋានរបស់ព្រះយេស៊ូវសម្រាប់ពួកសិស្ស។ ខ្ញុំឃើញចង្កោមចំណុចដ៏មានតម្លៃមួយចំនួន ដែលទាក់ទងផ្ទាល់ទៅនឹងការឮព្រះបន្ទូលរបស់ព្រះយេស៊ូវ ដែលបានជំរុញចិត្តឲ្យខ្ញុំកាន់តែចង់អានព្រះគម្ពីរថែមទៀត។

ព្រះយេស៊ូវបានមានបន្ទូលថា «តែទូលបង្គំថ្លែងសេចក្ដីទាំងនេះ នៅក្នុងលោកីយ៍ ដើម្បីឲ្យគេបានសេចក្ដីអំណររបស់ទូលបង្គំ ឲ្យនៅពោរពេញក្នុងខ្លួនគេ» (យ៉ូហាន ១៧:១៣)។ យើងនឹងមិនទទួលបានអំណរដ៏បរិបូរណ៍ ប្រសិនបើយើងមិនបន្តស្ដាប់នូវអ្វីដែលព្រះយេស៊ូវបានមានបន្ទូល—ដែលនេះសំដៅទៅលើការស្ដាប់ ឬក៏អានព្រះគម្ពីរ។ ហើយខ្ញុំគិតថា គោលការណ៍មួយនេះគឺសម្រាប់ព្រះគម្ពីរទាំងមូល មិនមែនគ្រាន់តែសំដៅទៅលើព្រះបន្ទូលរបស់ព្រះយេស៊ូវនៅក្នុងកណ្ឌដំណឹងល្អប៉ុណ្ណោះនោះទេ។

ជាបន្ទាប់ ព្រះយេស៊ូវក៏បានអធិស្ឋានដូចតទៅ «សូមញែកគេចេញជាបរិសុទ្ធ ដោយសារសេចក្ដីពិតរបស់ទ្រង់ ឯសេចក្ដីពិត គឺជាព្រះបន្ទូលរបស់ទ្រង់» (យ៉ូហាន ១៧:១៧)។ ចំណុចទីពីរដែលយើងនឹងមិនទទួលបាន ប្រសិនបើយើងមិនបន្តទទួលទានលើសេចក្ដីពិតនៃព្រះបន្ទូលគឺ ការញែកជាបរិសុទ្ធ។ ព្រះជាម្ចាស់បានរចនាយើងឡើងក្នុងការធ្វើឲ្យយើងកាន់តែបរិសុទ្ធតាមរយៈសេចក្ដីពិត។ ហើយបន្ទាប់មក ព្រះអង្គក៏បន្តលើកឡើងថា «ព្រះអម្ចាស់អើយ! សេចក្ដីពិត គឺជាព្រះបន្ទូលរបស់ទ្រង់»។

ការជំរុញចិត្តទី៣មាននៅក្នុងកណ្ឌគម្ពីរ យ៉ូហាន ១៧:២០ ដែលព្រះអង្គបានលើកឡើងថា «ទូលបង្គំមិនអធិស្ឋាន ឲ្យអ្នកទាំងនេះតែប៉ុណ្ណោះ គឺឲ្យដល់ទាំងអ្នកណា ដែលនឹងជឿដល់ទូលបង្គំ ដោយសារពាក្យរបស់គេថែមទៀតដែរ»។ ដូច្នេះ តើយើងអាចទទួលជឿបានដោយរបៀបណា? តើយើងអាចនៅបន្តទទួលជឿទៅមុខទៀតបានដោយរបៀបណា? យើងទទួលជឿតាមរយៈព្រះបន្ទូល តាមរយៈការនិពន្ធរបស់ពួកសាវ័ក។ តែយើងអាចរកឃើញការសរសេរនោះនៅឯណា? គឺនៅក្នុងព្រះគម្ពីរ។

ដូច្នេះ ទាំងនេះគឺជាការជំរុញចិត្តដ៏ល្អៗបីយ៉ាងក្នុងការអានព្រះគម្ពីរ។ ប្រសិនបើលោកអ្នកចង់មានជំនឿ ប្រសិនបើលោកអ្នកចង់មានភាពបរិសុទ្ធ ប្រសិនបើលោកអ្នកចង់មានអំណរ ព្រះយេស៊ូវបានមានបន្ទូលថា យើងអាចទទួលបានចំណុចទាំងអស់នោះតាមរយៈការជួបជាមួយព្រះជាម្ចាស់ក្នុងព្រះបន្ទូលរបស់ទ្រង់។ នេះគឺជារបៀបដែលយើងអាចទទួលបានការជំរុញចិត្ត។

យើងចង់បានចំណុចទាំងអស់នោះ ហើយជាលទ្ធផលគឺយើងចង់បានព្រះបន្ទូល។ ដូច្នេះ នេះគឺជាចំណុចដំបូងនៃចំណុចសំខាន់ៗបីយ៉ាងរបស់ខ្ញុំ ដែលខ្ញុំដឹងថាអ្នកសួរបានសួរអំពីចំណុចនេះផង។ ប៉ុន្តែ ខ្ញុំគិតថា នេះពិតជាសំខាន់ណាស់ ត្រង់ថាយើងត្រូវតែដឹងអំពីរបៀបដែលជំរុញចិត្តយើង ពីព្រោះប្រសិនបើយើងមិនសូវមានចំណាប់អារម្មណ៍នៅពេលដែលយើងអានព្រះគម្ពីរ នោះមិនយូរមិនឆាប់យើងនឹងបាត់បង់ការជំរុញចិត្តជាមិនខាន។

ជំនាញ

ខ្ញុំនឹងពន្យល់បន្ថែមតែបន្តិចបន្តួចទេលើចំណុចបន្តបន្ទាប់ពីរទៀត។ ទីមួយ គឺការជំរុញចិត្ត។ ចំណុចទីពីរគឺជាជំនាញ ឬក៏សមត្ថភាពនៃការអាន។ នេះគឺជាយោបល់តែមួយគត់របស់ខ្ញុំ។ នៅក្នុងសៀវភៅរបស់ខ្ញុំដែលមានចំណងជើងជាភាសាអង់គ្លេសថា “Reading the Bible Supernaturally” (ប្រែថា «ការអានព្រះគម្ពីរបែបអធិធម្មជាតិ»)។ សៀវភៅនោះមានលើកឡើងនូវចំណុចអនុវត្តជាច្រើនទៀត ដើម្បីឲ្យលោកអ្នកកាន់តែមានជំនាញក្នុងការទទួលបានអត្ថន័យចេញពីព្រះគម្ពីរ។

នេះគឺជាចំណុចដែលខ្ញុំចង់លើកឡើងនៅត្រង់នេះ។ មានរឿងអាថ៌កំបាំងកើតឡើងនៅពេលដែលយើងយកប៊ិច ឬក៏ខ្មៅដៃ—មិនមែនក្តារចុច ប៉ុន្តែគឺប៊ិច ឬក៏ខ្មៅដៃ—ហើយថាយើងសរសេរផ្ទាល់នៅលើព្រះគម្ពីរ ឬក៏ថា ប្រសិនបើខនៃព្រះគម្ពីរដែលយើងកំពុងតែអានវែងពេក នោះយើងអាចចម្លងលើសៀវភៅកំណត់ហេតុរបស់យើងមួយផ្សេងទៀត គឺយើងសរសេរសំណួរដែលយើងមាន ឬក៏ការសង្កេតមើលដែលយើងឃើញ អំពីអ្វីដែលយើងកំពុងតែអាននៅក្នុងព្រះគម្ពីរ។

លោកអ្នកទំនងជាកំពុងគិតថា «លោកគ្រូ! បើខ្ញុំធ្វើដូច្នោះ នោះមានន័យថា ខ្ញុំកំពុងតែសរសេរនូវអ្វីដែលខ្ញុំមិនចេះហើយ។ ខ្ញុំកំពុងតែសូមឲ្យលោកគ្រូជួយខ្ញុំឲ្យបានយល់»។ ការឆ្លើយតបរបស់ខ្ញុំគឺថា «ទេ ទេ ទេ នោះមិនមែនជាការពិតទេ។ ទេ! ការសរសេរចុះបែបនោះនឹងមិនគ្រាន់តែកត់ចំណាំនូវអ្វីដែលលោកអ្នកចេះនោះទេ»។ ការចម្លងខគម្ពីរចុះនឹងបណ្ដាលឲ្យលោកអ្នកមានគំនិត ដែលលោកអ្នកមិនធ្លាប់មានពីមុន។ ការសរសេរចុះនូវសំណួរដែលលោកអ្នកមាននឹងបណ្ដាលឲ្យខួរក្បាលរបស់លោកអ្នកមានគំនិតដែលមិនធ្លាប់មានពីមុន។ ដូច្នេះ នេះគឺជាយោបល់មួយរបស់ខ្ញុំសម្រាប់អ្នកសួរ ដើម្បីជួយឲ្យគាត់បង្កើតជំនាញឲ្យបានដំណើរការ។ ហើយខាងក្រោមនេះគឺជាចំណុចចុងក្រោយ។

ការបើកសម្ដែង

ចំណុចទី៣នៃចំណុចដែលសំខាន់គឺការបើកសម្ដែង។ នេះគឺជាអំណោយទាននៃព្រះវិញ្ញាណបរិសុទ្ធ។ ព្រះអង្គបានបណ្ដាលឲ្យព្រះជាម្ចាស់ផ្ទាល់—លក្ខណសម្បត្តិរបស់ទ្រង់ ព្រះហឫទ័យរបស់ទ្រង់ និងរបៀបរបស់ទ្រង់—បញ្ចាំងពន្លឺតាមរយៈព្រះបន្ទូល។ ការអធិស្ឋានគឺជាចំណុចគន្លឹះនៃការទទួលបានការបើកសម្ដែងនេះ។ ខ្ញុំនិយាយដូច្នេះដោយសារនៅក្នុងកណ្ឌគម្ពីរ អេភេសូរ ១:១៨ សាវ័ក ប៉ុល បានអធិស្ឋានដូចនោះ។ គាត់បានអធិស្ឋានទូលសូមឲ្យព្រះជាម្ចាស់បើកភ្នែកនៃដួងចិត្តរបស់គាត់ ឲ្យអាចមើលឃើញបាន។ ដូច្នេះ សូមអធិស្ឋានទូលសូមឲ្យព្រះជាម្ចាស់បើកសម្ដែងមកកាន់លោកអ្នកតាមរយៈព្រះបន្ទូលចុះ។

មិនថាសម្រាប់អ្នកដែលកំពុងតែសួរសំណួរនេះ ឬក៏អ្នកណាម្នាក់ទៀតក៏ដោយនៅជុំវិញពិភពលោក សេចក្ដីអធិស្ឋានរបស់ខ្ញុំគឺដូចតទៅ៖ «សូមព្រះជាម្ចាស់ប្រទានឲ្យយើងមានការជំរុញចិត្តខ្លាំង កាន់តែមានជំនាញ និងការបំភ្លឺ ដោយមានការបំផ្លាស់បំប្រែតាមរយៈការបើកសម្ដែងក្នុងការអានព្រះគម្ពីររបស់យើង»។

និពន្ធដោយ៖ លោកគ្រូ John Piper
បកប្រែដោយ៖ លោកគ្រូ ឈាង បូរ៉ា
កែសម្រួលដោយ៖ លោក ទេព រ៉ូ, លោក ខែម បូឡុង, លោក ឯក សត្យា, លោក ជួប ប៊ុនហាក់, លោក សឹម រក្សា និងលោក ឯក ធីម៉ូថេ
ដកស្រង់ខ្លះៗ និងកែសម្រួលចេញពី www.desiringgod.org ដោយមានការអនុញ្ញាត។ Plovpit.com

តើអ្នកគិតយ៉ាងណា?

០ពិន្ទុ

តើលោកអ្នកយល់យ៉ាងណាដែរ?

៤៥៦

កំណត់ហេតុបណ្ដាញ៦ កក្កដា ២០២៦

តើខ្ញុំអាចនៅតែមានសេចក្ដីអំណរក្នុងគ្រាដែលមានពេញដោយសេចក្ដីសង្ស័យបានដែរឬទេ?

សូមស្វាគមន៍មកកាន់ថ្ងៃច័ន្ទនេះ ជាថ្ងៃចុងក្រោយនៃខែកក្កដា។ កាលពីថ្ងៃព្រហស្បតិ៍មុន យើងបានរៀនអំពីសេចក្ដីអំណររបស់ព្រះជាម្ចាស់…

អានបន្ថែម

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

១៨៣៨៥

ក្តៅៗពេញនិយម

កំណត់ហេតុបណ្ដាញ៦ មករា ២០២៦

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

វាគ្មានអ្វីគួរឲ្យភ្ញាក់ផ្អើលនោះទេ យើងបានទទួលសំណួរជាច្រើនពីបេសកជននៅតាមតំបន់នានា…

អានបន្ថែម

តើ៧០អាទិត្យ ក្នុងកណ្ឌគម្ពីរដានីយ៉ែលជាអ្វី? (ដានីយ៉ែល ៩)

៤១១៩

កំណត់ហេតុបណ្ដាញ២៥ វិច្ឆិកា ២០២៥

តើ៧០អាទិត្យ ក្នុងកណ្ឌគម្ពីរដានីយ៉ែលជាអ្វី? (ដានីយ៉ែល ៩)

អត្ថន័យសំខាន់នៃការកាត់ស្រាយកណ្ឌគម្ពីរ ដានីយ៉ែល ៩:២៦-២៧ គឺជាការសង្កេតរបស់សាវ័កម៉ាថាយ ត្រង់ដែលព្រះយេស៊ូវកំពុងមានបន្ទូលអំពីការបំផ្លិចបំផ្លាញដែលត្រូវនឹងមកក្រុងយេរូសាឡឹម និងព្រះវិហារបរិសុទ្ធ (ម៉ាថាយ ២៤:១៥)។

អានបន្ថែម