តើលោកអ្នកនឹង «ធ្វើការធំជាង» ព្រះយេស៊ូវមែនឬ?
«ព្រះយេស៊ូវមានបន្ទូលថា “[អ្នក] នឹងធ្វើការដែលខ្ញុំធ្វើដែរ ក៏នឹងធ្វើការធំជាងការទាំងនោះទៅទៀត!”។ “យើងបានទទួលការត្រាស់ហៅ ឲ្យប្រោសមនុស្សស្លាប់រស់ឡើងវិញ ព្យាបាលអ្នកឈឺ ដេញអារក្ស ហើយនាំឲ្យស្ថានសួគ៌ចុះមកផែនដីនេះ! លោកអ្នកអាចធ្វើការនោះបាន! សូមគ្រាន់តែឈានចេញដោយជំនឿ ហើយដើរក្នុងអំណាចដែលព្រះអង្គបានប្រទានមកកាន់លោកអ្នកចុះ”»។ ពាក្យពេចន៍ទាំងនោះគឺជាអ្វីដែលពួកសាវ័កសម័យទំនើប ឬក៏ពួកគ្រូព្យាបាលដោយជំនឿផ្សព្វផ្សាយតាមទូរទស្សន៍លើកឡើង ខណៈពេលដែលពួកគាត់បង្កើតឲ្យមានចលនាក្នុងចំណោមមនុស្សម្នាឲ្យមានភាពរំភើបក្នុងការមានទំនុកចិត្តលើខ្លួនឯង។
ពាក្យសម្ដីគាំទ្របែបនេះនាំឲ្យយើងសួរនូវសំណួរមួយនេះ៖ តើព្រះយេស៊ូវមានន័យយ៉ាងដូចម្ដេចក្នុងខគម្ពីរដូចជាកណ្ឌគម្ពីរ យ៉ូហាន ១៤:១២ និងយ៉ូហាន ៥:២០ នៅពេលដែលព្រះអង្គលើកឡើងអំពី «ធ្វើការធំជាង»? តើយើងចាំបាច់ត្រូវតែប្រោសមនុស្សស្លាប់ឲ្យរស់ឡើងវិញមែនឬ? តើយើងអាច «ធ្វើការធំជាង» ព្រះយេស៊ូវដោយរបៀបណា ប្រសិនបើព្រះអង្គគឺជាព្រះ ហើយយើងមិនមែនជាព្រះផងដូច្នេះ? តើមានអ្វីមិនប្រក្រតីជាមួយនឹងជំនឿរបស់យើងមែនឬ ប្រសិនបើយើងមិនអាចព្យាបាលមនុស្សទាំងអស់នៅក្នុងមន្ទីរពេទ្យ ដោយប្រើប្រាស់អំណាចនៃការព្យាបាលឲ្យជា?
នៅពេលដែលការកាត់ស្រាយលើខគម្ពីរនេះត្រូវបានធ្វើឡើងក្នុងលក្ខណៈបត់បែន នោះវានឹងបញ្ចេញអត្ថន័យថា ដាច់ខាតលោកអ្នកត្រូវតែប្រោសមនុស្សស្លាប់ឲ្យរស់ឡើងវិញ ព្យាបាលអ្នកឈឺ បណ្ដេញអារក្ស ហើយត្រូវឲ្យមនុស្សជាច្រើនដឹងអំពីទីសម្គាល់ និងការអស្ចារ្យរបស់លោកអ្នកដែរ។ មានមនុស្សជាច្រើននាក់មានការភាន់ច្រឡំនៅពេលដែលរឿងទាំងអស់នោះមិនកើតឡើង។ ពិតណាស់ មនុស្សជាច្រើននាក់ដែលប្រកាន់ខ្ជាប់តាមទស្សនៈមួយនេះគឺមិនមែនកំពុងតែសំដៅទៅលើ «ទីសម្គាល់ និងការអស្ចារ្យ» នៃសេចក្ដីសង្គ្រោះទេ នៅពេលដែលពួកគេប្រកាសថាដាច់ខាតលោកអ្នកត្រូវតែ «ធ្វើការធំជាង»។ ជាទូទៅ ពួកគេកំពុងតែសំដៅទៅលើការអស្ចារ្យដែលធ្វើឲ្យមានការរំភើប។
បើអញ្ចឹងមែន តើព្រះយេស៊ូវកំពុងមានន័យយ៉ាងដូចម្ដេច នៅពេលដែលព្រះអង្គលើកឡើងអំពី «ធ្វើការធំជាង»? សូមអនុញ្ញាតឲ្យយើងខ្ញុំផ្ដល់ជូននូវការពិចារណានូវតក្កបីយ៉ាង ហើយបន្ទាប់មកចម្រាញ់គ្រប់អ្វីៗទាំងអស់ទៅជាចំណុចតែមួយដែលជាចម្លើយយោងតាមព្រះគម្ពីរ ដោយរំពឹងលើពាក្យ «ធំជាង» នៅក្នុងភាសាក្រិក ដែលមានការប្រើប្រាស់ក្នុងព្រះគម្ពីរសញ្ញាថ្មី។
តាមតក្កពាក្យ «ធំជាង» អាចសំដៅទៅលើតំបន់ (ទីតាំង)
ចំណុចនេះមិនចាំបាច់មានការភាន់ច្រឡំនោះទេ។ ព្រះយេស៊ូវបានធ្វើព័ន្ធកិច្ចនៅក្នុងតំបន់ដែលមានទំហំប្រមាណជា ១/៣ នៃផ្ទៃដីប្រទេសកម្ពុជា។ បន្ទាប់ពីព្រះអង្គបានផ្ដល់ភារកិច្ចរបស់ទ្រង់ដោយសារសុគត និងការមានព្រះជន្មរស់ឡើងវិញរបស់ទ្រង់ នោះពួកគេបានចេញទៅធ្វើទីបន្ទាល់អំពីព្រះអង្គនៅឯទីក្រុងយេរូសាឡឹម យូដា សាម៉ារី និងចុងបំផុតនៃផែនដី (កិច្ចការ ១:៨)។ ការ «ធ្វើការធំជាង» សព្វថ្ងៃនេះគឺជាការដែលពួកសិស្សរបស់ព្រះយេស៊ូវផ្សព្វផ្សាយសារនៃដំណឹងល្អទៅកាន់ទីកន្លែងដែលព្រះយេស៊ូវមិនបានទៅដល់ដោយផ្ទាល់។
តាមតក្កពាក្យ «ធំជាង» អាចសំដៅទៅលើអំឡុងពេល (វេលា)
ចាប់ពីពេលដែលព្រះអង្គបានទទួលពិធីជ្រមុជទឹករហូតដល់ទ្រង់សុគត ព្រះយេស៊ូវគង់នៅលើផែនដីនេះក្នុងអំឡុងពេលតែបីឆ្នាំកន្លះ—គឺ១២៦០ថ្ងៃបើនិយាយឲ្យចំទៅ។ តើវាមិនមែនជាការងាយស្រួលក្នុងការឃើញថាការ «ធ្វើការធំជាង» ក៏ប្រាកដណាស់មានរួមទាំងអំឡុងពេលនៃព័ន្ធកិច្ចនៃការប្រកាសដំណឹងល្អសព្វថ្ងៃនេះដែរមែនឬ? យើងបានផ្សព្វផ្សាយដំណឹងល្អ ហើយក៏បានហ្វឹកហ្វឺនក្រុមជំនុំអស់ជាច្រើនសតវត្សរ៍ដែរ ដែលមានរួមទាំងគ្រីស្ទបរិស័ទដែលមិនបម្រើព្រះអង្គពេញពេល ពួកគាត់ក៏បានផ្សាយដំណឹងល្អបានយ៉ាងល្អរហូតដល់ពួកគាត់មានអាយុ៩០ឆ្នាំនៅគ្រប់ទីកន្លែងដែលពួកគាត់ទៅដល់! ទេ! លោកអ្នកនឹងមិនប្រោសមនុស្សដែលពិតជា «ស្លាប់» មែនទែនក្នុងចំណែកជាការធ្វើការធំជាងព្រះយេស៊ូវនោះទេ។ ប៉ុន្តែ មានអ្នកជឿជាច្រើននាក់ដែលមានឱកាសក្នុងការប្រកាសអំពីអំណាចនៃសេចក្ដីសង្គ្រោះអស់រយៈពេលជាច្រើនទសវត្សរ៍ ពោលគឺយូរជាងព្រះអង្គសង្គ្រោះរបស់ពួកគាត់ដែលបានចាត់ឲ្យពួកគាត់ធ្វើទៅទៀត។
តាមតក្កពាក្យ «ធំជាង» អាចសំដៅទៅលើការសង្ខេប (ការឈោងចាប់)
បើនិយាយតាមតក្ក ប្រសិនបើលោកអ្នកបានប្រកាសដំណឹងល្អក្នុងទីកន្លែងច្រើនជាងព្រះយេស៊ូវ ក្នុងកំឡុងពេលច្រើនជាងព្រះយេស៊ូវ នោះលោកអ្នកផ្ទាល់ក៏បានឈោងចាប់មនុស្សច្រើនជាងព្រះយេស៊ូវផងដែរ។ ពិតណាស់! ព្រះអង្គនៅគ្រប់ទីកន្លែង ហើយក៏មានសកម្មភាពក្នុងការសង្គ្រោះមនុស្ស ប៉ុន្តែលោកអ្នកក៏បានយល់ហើយដែរ។ សព្វថ្ងៃនេះ យើងមានសមត្ថភាពក្នុងការមានអំណរដោយមានឱកាសក្នុងការប្រកាសដំណឹងល្អទៅកាន់មនុស្សរាប់រយ រាប់លាន—រាប់ពាន់លាននាក់។ ឥឡូវ សូមគុណការនោះជាមួយនឹងការខិតខំជាទ្វេដងនៃការព្យាយាមបង្កើតសិស្សជាមួយនឹងអស់អ្នកដែលនៅជុំវិញលោកអ្នកដោយប្រើប្រាស់បច្ចេកវិទ្យាដូចជាកំណត់ហេតុបណ្ដាញ YouTube ទូរទស្សន៍ វិទ្យុ និងបណ្ដាញសង្គមក្នុងការផ្សាយដំណឹងល្អ។ សព្វថ្ងៃនេះ លោកអ្នក ហើយនិងយើងខ្ញុំអាចឈោងចាប់បានចំនួនតួលេខមនុស្សជាច្រើននាក់ជាងព្រះយេស៊ូវបានធ្វើនៅក្នុងសម័យកាលរបស់ទ្រង់។
ចម្លើយពីព្រះគម្ពីរ
តក្កបានជួយស្វែងរកសេចក្ដីពិត និងផ្នត់គំនិត ប៉ុន្តែពាក្យក្នុងភាសាក្រិកដែលមានប្រើប្រាស់សម្រាប់ «ធំជាង» ក្នុងកណ្ឌគម្ពីរ យ៉ូហាន ១៤:១២ និងយ៉ូហាន ៥:២០ គឺជាអ្វីដែលផ្ដល់ជូននូវចម្លើយចុងក្រោយដែលយោងតាមព្រះគម្ពីរ។
ពាក្យ «មីហ្ស៊ូណា» (“meizona” «ធំជាង») គឺជាពាក្យដែលមានប្រើប្រាស់នៅក្នុងកណ្ឌគម្ពីរ យ៉ូហាន ៥:២០ និង ១៤:១២។ វាគឺជាទម្រង់មួយនៃពាក្យ មេហ្គេស៍ (“megas” ដែលសំដៅទៅលើ «ភាពធំដុំក្នុងចំនួន»)។ ប៉ុន្តែពាក្យ «មីហ្ស៊ូណា» គឺត្រូវបានប្រើប្រាស់ឡើង ដើម្បីផ្ដោតទៅលើគុណភាព។ សាវ័ក យ៉ូហាន កំពុងតែលើកឡើងថាការ «ធ្វើការធំជាង» ដែលសម្រេចឡើងតាមរយៈពួកសិស្សរបស់ព្រះយេស៊ូវគឺមិនមែនគ្រាន់តែសំដៅទៅលើចំនួនប៉ុណ្ណោះទេ ប៉ុន្តែក៏សំដៅទៅលើគុណភាពផងដែរ។ បើនិយាយម្យ៉ាងវិញទៀតទៅ គេនឹងសម្គាល់លើពួកសិស្សរបស់ព្រះយេស៊ូវតាមរយៈកិច្ចការដែលល្អប្រសើរយ៉ាងខ្លាំងជាងកាលពេលដែលព្រះយេស៊ូវបានគង់លើផែនដីនេះ។ ហេតុអ្វីបានជានេះជាគន្លឹះចម្បងមួយក្នុងការយល់អំពីអ្វីដែលព្រះអង្គចង់មានអត្ថន័យក្នុងប្រយោគរបស់ទ្រង់? ពីព្រោះយើងដឹងហើយថា មិនមានបុគ្គលណាផ្សេងទៀតអាចធ្វើនូវការអស្ចារ្យដ៏ប្រសើរខ្លាំងជាអ្វីដែលព្រះយេស៊ូវបានធ្វើនោះទេ។ ព្រះអង្គបានធ្វើនូវការអស្ចារ្យដែលមិនមានបុគ្គលណាអាចធ្វើស្រដៀងនឹងទ្រង់សព្វថ្ងៃនេះបានទេ ដែលនេះមានរួមទាំងការផ្លាស់ប្រែទឹកឲ្យទៅជាស្រា (យ៉ូហាន ២:៧-១១) ដើរលើទឹក (យ៉ូហាន ៦:១៩) បានប្រោសមនុស្សស្លាប់ឲ្យរស់ឡើងវិញជាច្រើននាក់ ដែលមានរួមទាំងលោក ឡាសារ ដែលបានស្លាប់អស់រយៈពេលបីថ្ងៃហើយដែរ (យ៉ូហាន ១១:៤៣-៤៤) ហើយក៏កុំភ្លេចអំពីចំណុចដែលថា ព្រះអង្គក៏បានមានព្រះជន្មរស់ពីការសុគតឡើងវិញផងដែរ (ម៉ាថាយ ២៨:៦)។ លើសពីនោះទៅទៀត មិនដែលធ្លាប់មានបុគ្គល (ហើយក៏នឹងមិនដែលមានបុគ្គលណា) អាចធ្វើការអស្ចារ្យដោយផ្ដល់ជូននូវការធួននឹងបាបដែរ!
ដូច្នេះតើយើងអាចធ្វើនូវអ្វីដែល «ធំជាង» ព្រះយេស៊ូវបាន?
ចម្លើយ៖ តាមរយៈការប្រកាសអំពីព័ន្ធកិច្ចដែលទ្រង់បានសម្រេច នោះមានន័យថា យើងកំពុងតែធ្វើការធំជាងហើយ!
ប្រសិនបើការ «ធ្វើការធំជាង» សំដៅទៅលើគុណភាព (ហើយវាក៏ពិតជាដូច្នេះមែនដែរ) នោះយើងអាចយល់បានយ៉ាងច្បាស់ដែរថា យើងកំពុងតែធ្វើការធំជាងព្រះយេស៊ូវហើយ ដោយសារយើងប្រកាសអំពីសាររបស់ទ្រង់ដោយពឹងផ្អែកលើព័ន្ធកិច្ចដែលទ្រង់បានសម្រេចឡើង។ នៅពេលដែលព្រះយេស៊ូវលើកប្រយោគនោះឡើង នោះឈើឆ្កាងមិនទាន់បានមានការបំពេញនៅឡើងទេ ប៉ុន្តែព្រះអង្គកំពុងតែទៅឯព្រះវរបិតា ហើយជាលទ្ធផលក៏បាននាំមកនូវយុគសម័យថ្មី ដែលអ្នកដើរតាមទ្រង់នឹងប្រកាសអំពីសារនៃដំណឹងល្អរបស់ទ្រង់ ហើយមនុស្សនឹងទទួលបានការសង្គ្រោះ!
ទីសម្គាល់ និងការអស្ចារ្យនឹងមិនសង្គ្រោះនរណាម្នាក់ទេ តែសារនៃដំណឹងល្អទេតើ! នៅពេលដែលព្រះយេស៊ូវបានព្យាបាលបុរសម្នាក់នៅឯស្រះបេថែសដា ហើយបានលើកឡើងអំពីការ «ធ្វើការធំជាង» (យ៉ូហាន ៥:២០) គឺព្រះអង្គបានលើកប្រយោគនោះឡើងក្នុងបរិបទនៃការសង្គ្រោះ នោះព្រះអង្គបានលើកឡើងបន្ថែមទៀតថា «ដ្បិតដែលព្រះវរបិតាទ្រង់ប្រោសមនុស្សស្លាប់ ឲ្យមានជីវិតរស់ឡើងវិញយ៉ាងណា នោះព្រះរាជបុត្រានឹងប្រោសដល់អ្នកណា ដែលទ្រង់សព្វព្រះហឫទ័យក៏យ៉ាងដូច្នោះដែរ» (៥:២១)។ ចំណុចស្នូលរបស់ព្រះអង្គគឺថា ការប្រទានជីវិតអស់កល្បជានិច្ចល្អប្រសើរជាងការប្រទានការព្យាបាលបណ្ដោះអាសន្ន។ នេះគឺជាអ្វីដែលអ្នកជឿកំពុងតែធ្វើរាល់ពេលដែលពួកគាត់ប្រកាសអំពីព័ន្ធកិច្ចដែលព្រះគ្រីស្ទបានសម្រេច ការនាំព្រលឹងទៅកាន់ការសង្គ្រោះតាមរយៈអំណាចរបស់ព្រះជាម្ចាស់។
លោកគ្រូ គេរិឌ អិល. បូ័រឆិធ (Gerald L. Borchert) បានពន្យល់យ៉ាងត្រឹមត្រូវថា៖
«ហេតុដូច្នេះ ដាច់ខាត! អត្ថន័យនៃប្រយោគនេះត្រូវតែកើតចេញពីបរិបទនៃការពិភាក្សា ទាក់ទងនឹងចំណុចពិតដែលព្រះយេស៊ូវកំពុងតែមានបន្ទូលអំពីការយាងទៅឯព្រះវរបិតាវិញ និយាយឲ្យចំទៅ គឺការសុគត និងការមានព្រះជន្មរស់ឡើងវិញរបស់ទ្រង់។ ប្រសិនបើការនោះគឺជាករណីមែន នោះមូលដ្ឋានគ្រឹះនៃការ “ធ្វើការធំជាង” គឺកំពុងតែសំដៅទៅលើការពង្រីកបេសកកម្មរបស់ព្រះយេស៊ូវ ដោយពឹងផ្អែកលើការទទួលសិរីល្អរបស់ទ្រង់ (សូមមើលបន្ថែមក្នុង ១៧:១-២)។ ការយាងទៅរបស់ព្រះយេស៊ូវគឺជាលទ្ធផលនៃព័ន្ធកិច្ចនៃការដែល “កូនចៀមនៃព្រះ” កំពុងតែ “ដោះបាបមនុស្សលោក” (១:២៩) ឬក៏ជាចំណុចពិតដែលថាព្រះអង្គគឺ “ជាព្រះដ៏ជួយសង្គ្រោះមនុស្សលោក” (៤:៤២)។ ដោយហេតុនេះ យើងត្រូវតែយល់ថា ការសុគត ហើយបន្ទាប់មកការមានព្រះជន្មរស់ឡើងវិញរបស់ទ្រង់ គឺជាការប្រមូលផ្ដុំមនុស្សទាំងអស់មកកាន់ទ្រង់ផ្ទាល់ (១២:៣២)។ ប៉ុន្តែ ជាយុទ្ធសាស្ត្រ ការនេះក៏ត្រូវតម្រូវឲ្យអស់អ្នកដែលទទួលជឿមានចំណែកដែរ ពីព្រោះភារកិច្ចរបស់ពួកគាត់គឺឲ្យផ្សព្វផ្សាយទៅកាន់ពិភពលោកអំពីការអត់ទោសនៃអំពើបាប (២០:២៣)។ ហេតុដូច្នេះ ព័ន្ធកិច្ចនៃការដែលមានមូលដ្ឋានលើការដែលព្រះយេស៊ូវ “ទៅឯព្រះវរបិតា” (១៤:១២) អាចមានអត្ថន័យតែជាមួយបេសកកម្មនៃក្រុមជំនុំបន្ទាប់ពីការដែលព្រះអង្គមានព្រះជន្មរស់ឡើងវិញ។»2
លោកគ្រូ ឌី. អ៊េ. ខ័រសិន (D.A. Carson) និងសាស្ត្រាចារ្យព្រះគម្ពីរជាច្រើននាក់ទៀតដែលមានទេវវិទ្យាខុសៗគ្នាក៏បានឯកភាពដោយលើកឡើងថា៖
«“ទីសម្គាល់” និងការ “ធ្វើការ” ដែលព្រះយេស៊ូវបានធ្វើក្នុងអំឡុងពេលនៃព័ន្ធកិច្ចរបស់ទ្រង់មិនអាចសម្រេចឡើងបានយ៉ាងពេញទីដោយពិតប្រាកដលុះត្រាតែបន្ទាប់ពីព្រះយេស៊ូវបានមានព្រះជន្មរស់ឡើងវិញពីការសុគត់ ហើយទទួលសិរីល្អ។ មានតែក្នុងចំណុចនេះនោះទេដែលយើងអាចឃើញអំពីសណ្ឋានពិតរបស់វាបាន។ ផ្ទុយពីនោះ ព័ន្ធកិច្ចដែលអ្នកជឿទទួលបានក្នុងការធ្វើតាមរយៈអំណាចនៃព្រះវិញ្ញាណបរិសុទ្ធនៃគ្រាចុងក្រោយ បន្ទាប់ពីព្រះយេស៊ូវទទួលសិរីល្អ និងមានមូលដ្ឋានលើរចនាសម្ព័ន្ធនៃការសុគត និងជ័យជម្នះរបស់ព្រះយេស៊ូវ ដែលភ្លាមៗនោះនឹងកាន់តែបើកសម្ដែងយ៉ាងពិតអំពីព្រះរាជបុត្រា។ ដូច្នេះ ការធ្វើការធំជាងគឺមានការពាក់ព័ន្ធតែជាមួយនឹងចំណុចពិតៗនៃការសង្គ្រោះក្នុងប្រវត្តិសាស្ត្រតែប៉ុណ្ណោះ។»3
ទាក់ទងនឹងការធ្វើការធំជាងព្រះគ្រីស្ទ នោះលោកអ្នកមិនចាំបាច់រត់ចុះរត់ឡើងដោយព្យាយាមប្រោសមនុស្សស្លាប់ឲ្យរស់ឡើងវិញ ស្រែកថា «ភ្លើង [នៃព្រះវិញ្ញាណ!]» នៅលើឆាក ការផ្ដួលមនុស្ស ឬក៏ប្រកាសដាក់ជំងឺមហារីកថាឲ្យ «ចេញក្នុងព្រះនាមព្រះយេស៊ូវ!» នោះទេ។ ទាំងនោះមិនធំជាងនោះឡើយ។
ទាក់ទងនឹងការធ្វើការធំជាងព្រះគ្រីស្ទ នោះចាំបាច់លោកអ្នកត្រូវតែប្រកាសអំពីព្រះគ្រីស្ទ។ ប្រកាសអំពីព័ន្ធកិច្ចដែលទ្រង់បានសម្រេចបន្ទាប់ពីឈើឆ្កាង។ ប្រកាសអំពីការផ្គត់ផ្គង់របស់ទ្រង់នៃជីវិតអស់កល្បជានិច្ច។ ប្រកាសឲ្យនគររបស់ទ្រង់ដែលមកដល់ ហើយបានសម្រេចឡើង។ បន្ទាប់មក សូមមើលការអស្ចារ្យនៃសេចក្ដីសង្គ្រោះដែលកើតឡើងចំពោះអស់អ្នកដែលនឹងមានការបំផ្លាស់បំប្រែតាមរយៈអំណាចនៃដំណឹងល្អចុះ។
នេះគឺជាការធ្វើការដ៏អស្ចារ្យបំផុតជាង។
មតិយោបល់
Loading…