យើងកំពុងតែហៀបឆ្លងឆ្នាំថ្មី—ហើយក្នុងការចូលឆ្នាំថ្មី យើងក៏តែងតែមានការសម្រេចចិត្តថ្មី ហើយភាគច្រើនការសម្រេចចិត្តនោះទាក់ទងទៅនឹងការអានព្រះគម្ពីរទាំងមូលផ្ទាល់ដោយខ្លួនឯង។ ហើយដោយសារយើងដឹងថា នេះជាអ្វីដែលមិត្តអ្នកអានជាច្រើនកំពុងតែគិត ខណៈពេលដែលយើងហៀបនឹងឆ្លងឆ្នាំ យើងក៏ចង់យកឱកាសនេះ ដើម្បីឆ្លើយសំណួរទាក់ទងទៅនឹងការអានព្រះគម្ពីរជាប្រចាំថ្ងៃ។
«ជម្រាបសួរលោកគ្រូ! សំណួររបស់ខ្ញុំគឺទាក់ទងទៅនឹងផែនការនៃការអានព្រះគម្ពីរ។ ខ្ញុំស្គាល់ផែនការខ្លះៗហើយ គឺផែនការឲ្យអានព្រះគម្ពីរពីដើមដល់ចប់ ឬក៏ខ្លះទៀតផ្ដោតទៅលើផែនការនៃការអានព្រះគម្ពីរសញ្ញាចាស់លាយឡំជាមួយនឹងព្រះគម្ពីរសញ្ញាថ្មី ហើយផែនការខ្លះទៀតត្រូវបានរៀបឡើងឲ្យយើងអានតាមដំណាក់កាលនៃដំណើររឿងដែលបានកើតឡើង ហើយក៏នៅមានផែនការផ្សេងទៀតដែលយើងត្រូវចំណាយពេលពីរទៅបីជំពូក ដើម្បីអានព្រះគម្ពីរឲ្យចប់។ សំណួររបស់ខ្ញុំគឺថា៖ ក្នុងនាមជាអ្នកដែលទើបតែចាប់ផ្ដើមអានព្រះគម្ពីរ ដោយមិនធ្លាប់បានអានចប់ពីមុនសោះ តើលោកគ្រូលើកទឹកចិត្តឲ្យខ្ញុំប្រើប្រាស់ផែនការអានមួយណា? សូមលោកគ្រូជួយផ្ដល់យោបល់ខ្លះៗ ឲ្យខ្ញុំគិត ខណៈពេលដែលខ្ញុំចាប់ផ្ដើមអាន»។
មុនខ្ញុំផ្ដល់ជូនផែនការអានជាក់លាក់ណាមួយ—ជាអ្វីដែលខ្ញុំនឹងធ្វើ—សូមអនុញ្ញាតឲ្យខ្ញុំលើកឡើងនូវការសង្កេតមួយចំនួនសិន ដែលខ្ញុំគិតថាទាក់ទងទៅនឹងអ្វីដែលអ្នកសួរកំពុងតែសួរ៖ «សូមលោកគ្រូជួយផ្ដល់យោបល់ខ្លះៗ ឲ្យខ្ញុំគិត ខណៈពេលដែលខ្ញុំចាប់ផ្ដើមអាន»។ គាត់មិនគ្រាន់តែបានស្នើសុំផែនការអាននោះទេ ប៉ុន្តែស្នើសុំយោបល់ខ្លះៗឲ្យគាត់គិត។ ខាងក្រោមនេះគឺជាអ្វីដែលខ្ញុំគិតថា គាត់កំពុងតែចង់បាន ហើយក៏ជាអ្វីដែលខ្ញុំនឹងព្យាយាមលើកឡើងផងដែរ។
ការស្គាល់ខ្លួនឯង
ដោយសារខ្ញុំមិនដឹងយ៉ាងហោចណាស់៥ចំណុចអំពីអ្នកសួរ នេះជាផែនការនៃការអានដែលខ្ញុំនឹងលើកឡើងមកប្រាប់។ បើនិយាយម្យ៉ាងវិញទៀតទៅ ខ្ញុំនឹងលើកឡើងផែនការនេះ ដោយសារខ្ញុំមិនស្គាល់អ្នកសួរ។
តើគាត់ចេះដាក់វិន័យលើខ្លួនឯងខ្លាំងដល់កម្រិតណា? តើគាត់មានពេលប៉ុណ្ណា ដើម្បីអាន? តើគាត់មានជំនាញអ្វីក្នុងការអាន—តើគាត់អានបានលឿនប៉ុណ្ណា ហើយអាចយល់បានប៉ុណ្ណា? តើគាត់ស្គាល់គ្រប់ចំណុចនៃព្រះគម្ពីរដល់កម្រិតណា សូម្បីតែចំណុចដែលគាត់ទំនងជាមិនទាន់បានអាននៅឡើយ? តើគាត់មានកម្រិតចម្ងល់ប៉ុណ្ណា ដែលអាចនឹងបណ្ដាលឲ្យគាត់បង្អង់សិន ហើយព្យាយាមយល់នូវអ្វីដែលគាត់មិនយល់?
ដោយអាស្រ័យលើចម្លើយនៃសំណួរទាំងនោះ ខ្ញុំនឹងចែកចាយផែនការអាន។ ប៉ុន្តែ ខ្ញុំចង់ឲ្យគាត់ និងអ្នកដទៃដឹងថាមនុស្សយើងសុទ្ធតែមានលក្ខណៈខុសៗគ្នា ទាក់ទងទៅនឹងសមត្ថភាពនៃការអាន ការយល់ ល្បឿននៃការអាន ហើយកាលៈទេសៈនៃជីវិតរបស់យើងក៏សុទ្ធតែខុសៗគ្នាផងដែរ។ ផែនការនៃការអានដែលខ្ញុំនឹងចែកចាយទំនងជានឹងមិនសម្រាប់គ្រប់បុគ្គលនោះទេ ប៉ុន្តែខ្ញុំនឹងនៅតែចែកចាយអំពីផែនការនៃការអាននេះផងដែរ។ នេះជាចំណុចដំបូងដែលខ្ញុំចង់លើកឡើង ទាក់ទងទៅនឹងយោបល់ឲ្យគាត់គិត ខណៈពេលដែលគាត់កំពុងតែអាន៖ គឺស្គាល់ខ្លួនឯងសិន។
សូមស្ដាប់ការអធិប្បាយព្រះបន្ទូល
សូមប្រាកដឲ្យច្បាស់ថា លោកអ្នកជាសមាជិកក្នុងក្រុមជំនុំដែលអានព្រះគម្ពីរ សមាជិកក្នុងក្រុមជំនុំដែលអធិប្បាយតាមព្រះគម្ពីរ តាមដែលលោកអ្នកអាចធ្វើបាន។ មានចំណុចជាជំនួយតិចណាស់ដែលយើងអាចទទួលបាន ទាក់ទងទៅនឹងការយល់ព្រះគម្ពីរទាំងមូល ហើយចំណុចនោះគឺថា៖ យើងត្រូវតែចំណាយពេលពីមួយអាទិត្យទៅមួយអាទិត្យ ពីមួយខែទៅមួយខែ ពីមួយឆ្នាំទៅមួយឆ្នាំ មិនថា ១០-២០-៣០ ឆ្នាំក៏ដោយ ក្នុងការទទួលទានពីសេចក្ដីអធិប្បាយនៃព្រះបន្ទូលរបស់ព្រះជាម្ចាស់។
នេះគឺជាចំណុចដែលសំខាន់ណាស់។ ប្រសិនបើគ្រូគង្វាលរបស់លោកអ្នកមិនអធិប្បាយតាមព្រះគម្ពីរ ហើយពន្យល់ថាខគម្ពីរនោះមានន័យយ៉ាងដូចម្ដេច នោះខ្ញុំសូមលើកទឹកចិត្តឲ្យលោកអ្នកប្ដូរព្រះវិហារទៅ ពីព្រោះការចំណាយពេលវេលារាប់ឆ្នាំរបស់លោកអ្នកក្នុងការអង្គុយក្រោមការអធិប្បាយតាមរយៈព្រះបន្ទូលនឹងបំផ្លាស់បំប្រែជីវិតរបស់លោកអ្នកក្នុងលក្ខណៈដ៏អស្ចារ្យ ដែលនឹងនៅមានឥទ្ធិពលជាទៅមុខទៀត។
មានអ្នកមើលខុសត្រូវលើជីវិតលោកអ្នក ចំណាយពេលអធិស្ឋាន និងមានផែនការអាន
សូមធ្វើជាសមាជិកក្នុងក្រុមណាមួយ ជាសមាជិកក្នុងក្រុមតូច ដែលអ្នកនៅក្នុងក្រុមនោះមានការរំពឹងថាបុគ្គលនីមួយៗកំពុងតែអានព្រះគម្ពីររបស់ខ្លួន ហើយនិយាយគ្នាអំពីអ្វីដែលបានអាននៅពេលដែលជួបជុំ។
សូមអធិស្ឋានឲ្យអស់ពីចិត្តមុនពេលលោកអ្នកនឹងអានព្រះគម្ពីរ ខណៈពេលដែលលោកអ្នកកំពុងអានព្រះគម្ពីរ និងក្រោយពេលដែលលោកអ្នកបានអានព្រះគម្ពីរ។ អធិស្ឋានទូលសូមឲ្យព្រះជាម្ចាស់បើកបង្ហាញនូវអ្វីដែលពិតជាមាននៅក្នុងខគម្ពីរនោះ ហើយឲ្យខគម្ពីរនោះក្លាយជាការពិតនៅក្នុងជីវិតរបស់លោកអ្នក។
សូមរកកន្លែង និងពេលវេលាដែលលោកអ្នកនឹងទៅអានព្រះគម្ពីរជារៀងរាល់ថ្ងៃ។ ប្រសិនបើលោកអ្នកមិនមានពេលវេលា និងទីកន្លែងជាក់លាក់ នោះសាតាំងនឹងប្រាកដជា—អមជាមួយនឹងសាច់ឈាមរបស់លោកអ្នក—រុញពេលអានព្រះគម្ពីររបស់លោកអ្នកចេញពីកាលវិភាគជាមិនខាន។
ការត្រៀមព្រះគម្ពីរទុក
ការអានព្រះគម្ពីរឲ្យចប់ ក្នុងរយៈពេលមួយឆ្នាំ តម្រូវឲ្យលោកអ្នកអាន៤ទៅ៥ជំពូកជារៀងរាល់ថ្ងៃ។ ប្រសិនបើលោកអ្នកគិតថា លោកអ្នកត្រូវតែចងចាំរាល់គ្រប់អ្វីៗដែលលោកអ្នកអាន ខណៈពេលដែលលោកអ្នកកំពុងតែអាន៤ទៅ៥ជំពូកនោះ ការរំពឹងទុកដូចនោះនឹងបំបាក់ចិត្តលោកអ្នក ហើយក៏គ្មានតម្លៃដែរ។
ខ្ញុំចង់លើកទឹកចិត្តលោកអ្នកថា នៅពេលដែលលោកអ្នកគិតថា ខ្លួនបានចងចាំ៩៥%នៃអ្វីដែលខ្លួនទើបតែបានអាន នេះអាចជាការពិតក្នុងពេលវេលាខ្លី។ ទោះជាយ៉ាងណាក៏ដោយក៏ព្រះបន្ទូលរបស់ព្រះជាម្ចាស់កំពុងតែគង់នៅក្នុងចិត្តគំនិតរបស់លោកអ្នក ក្នុងរបៀបដែលលោកអ្នកមិនអាចយល់បាន។
អ្វីដែលយើងហៅថាភាសា កថាខណ្ឌ ពាក្យពេចន៍ ដំណើររឿង ឬក៏ចំណុចដែលយើងបានភ្លេចអាចក្លាយជាកន្លែងផ្ទុកព័ត៌មាន ដែលព្រះវិញ្ញាណបរិសុទ្ធអាចបើកបង្ហាញនូវអ្វីដែលលោកអ្នកមិនទាន់ដឹងថាខ្លួនធ្លាប់ដឹង។ នៅពេលដែលលោកអ្នកបានអានព្រះគម្ពីរចប់ហើយនៅពេលព្រឹក សូមកុំបារម្ភត្រង់ថា លោកអ្នកមិនអាចសូត្រគម្រោងនៃរាល់ដំណើររឿងបានគ្រប់កថាខណ្ឌ ដែលលោកអ្នកទើបតែបានអាននោះឡើយ។ លោកអ្នកមិនអាចធ្វើបែបហ្នឹងបានឡើយ លុះត្រាតែលោកអ្នកជាមនុស្សដែលឆ្លាតវៃខ្លាំងមែនទែន ដែលអាចចងចាំគ្រប់អ្វីៗដែលភ្នែកលោកអ្នកបានមើលឃើញ។
ផ្ទុយទៅវិញ សូមព្យាយាមចងចាំតែមួយឃ្លាដែលច្បាស់លាស់បានហើយ—ឃ្លាដែលបានលើកទឹកចិត្ត ឃ្លាដែលជំរុញចិត្ត ឃ្លាដែលផ្ដល់កម្លាំងចិត្តដល់លោកអ្នក ឬក៏ឃ្លាដែលដឹកនាំជីវិតលោកអ្នក។ សូមសរសេរចុះនៅលើក្រដាសមួយ ហើយដាក់ក្នុងហោប៉ៅ ឬក៏បិតនៅកន្លែងណាមួយដែលលោកអ្នកងាយនឹងឃើញពេញមួយថ្ងៃ។ សូមមើលក្រដាសនោះម្ដងហើយម្ដងទៀតឲ្យពេញមួយថ្ងៃ។ សរុបទៅ ក្នុងមួយឆ្នាំ លោកអ្នកនឹងមានឃ្លាដូចៗនោះនឹងមានចំនួន៣៦៥ឃ្លា ដែលជាឃ្លាអស្ចារ្យ ពេញដោយអំណាច និងជាការប្រមូលទុកនូវសេចក្ដីពិត។
ការជ្រើសរើសផែនការអាន
ខាងក្រោមនេះគឺជាផែនការអានព្រះគម្ពីរដែលខ្ញុំចង់លើកទឹកចិត្តឲ្យលោកអ្នកប្រើប្រាស់។ ខ្ញុំនឹងលើកទឹកចិត្តឲ្យអ្នកសួរប្រើប្រាស់ផែនការដែលខ្ញុំប្រើប្រាស់ដែរ។ មូលហេតុគឺដោយសារខ្ញុំស្រឡាញ់ផែនការនៃការអាននេះណាស់។ ខ្ញុំគិតថា វាមានតម្លៃ។ ប៉ុន្តែ ខ្ញុំក៏យល់ផងដែរថា នៅមានផែនការអានព្រះគម្ពីរជាច្រើនទៀត ដែលលោកអ្នកក៏អាចជ្រើសរើសប្រើប្រាស់អានតាមបានផងដែរ។
ឈ្មោះនៃផែនការនេះគឺ «ផែនការអានព្រះគម្ពីរ» ហើយខ្ញុំដឹងហើយថា ឈ្មោះរបស់វាក៏មិនសូវជាឈ្មោះដែលគួរឲ្យចាប់អារម្មណ៍ប៉ុន្មានផងដែរ។ សូមចូលទៅកាន់គេហទំព័រ ផ្លូវពិត ហើយទាញយកដោយឥតក៏ថ្លៃនូវផែនការនៃការអានមួយនេះ។ ផែនការអាននេះមានពីរចំណុចដែលខ្ញុំពេញចិត្តយ៉ាងខ្លាំង។
ទី១ លោកអ្នកនឹងចាប់ផ្ដើមអានពីព្រះគម្ពីរសញ្ញាថ្មី ដែលការធ្វើបែបនេះនឹងជួយឲ្យលោកអ្នកយល់អំពីការបំពេញទំនាយនៅក្នុងព្រះគម្ពីរសញ្ញាថ្មី ដែលព្រះគម្ពីរសញ្ញាចាស់បានលើកឡើង។
ទី២ ជារៀងរាល់អាទិត្យ ផែនការនេះនឹងនាំឲ្យលោកអ្នកអានដោយមានការលាយឡំគ្នាជាមួយនឹងព្រះគម្ពីរសញ្ញាចាស់ និងព្រះគម្ពីរសញ្ញាថ្មី។ នេះមានន័យថា ប្រសិនបើលោកអ្នកមិនយល់ចំណុចណាមួយ នោះលោកអ្នកក៏នៅអាចយល់នូវចំណុចមួយផ្សេងទៀតបានដែរ។
ចំណុចមួយទៀតដែលខ្ញុំចូលចិត្តអំពីផែនការនេះគឺថា លោកអ្នកមិនចាំបាច់ត្រូវបញ្ចប់ការអានព្រះគម្ពីរទាំងមូលក្នុងរយៈពេលមួយឆ្នាំនោះទេ ដូចជាផែនការមួយចំនួនតម្រូវឲ្យលោកអ្នកធ្វើឡើយ។ ផ្ទុយទៅវិញ គម្រោងនៃការអានព្រះគម្ពីរមួយនេះមានរយៈពេល៣ឆ្នាំ៣ខែ។ ខ្ញុំគិតថា តាមរយៈផែនការមួយនេះ នោះលោកអ្នកអាចមានទំនុកចិត្តថាខ្លួននឹងអាចអានព្រះគម្ពីរឲ្យចប់ទាំងមូលបាន ពីព្រោះជារៀងរាល់ថ្ងៃលោកអ្នកគ្រាន់តែអានមួយជំពូកប៉ុណ្ណោះ។ ហើយសម្រាប់ជំពូកវែងៗដូចជាកណ្ឌគម្ពីរ ទំនុកតម្កើង ជំពូក១១៩ យើងក៏បានកាត់វាឲ្យខ្លីដែរ ដើម្បីឲ្យលោកអ្នកងាយអានចប់។
ការមានផែនការឲ្យអានតែមួយជំពូកក្នុងមួយថ្ងៃ គឺដើម្បីកុំឲ្យលោកអ្នកខកចិត្ត ឬក៏អន់ចិត្តជាមួយនឹងខ្លួន ដោយសារមិនបានបំពេញការផែនការអាន ដូចជាមានការអាន៤ទៅ៥ជំពូក ក្នុងមួយថ្ងៃដើម្បីឲ្យចប់ព្រះគម្ពីរទាំងមូលក្នុងមួយឆ្នាំ។
ម្សិលមិញនេះ ខ្ញុំបានអានកណ្ឌគម្ពីរ ទំនុកតម្កើង ជំពូក១ ខ២ «អ្នកនោះត្រេកអរតែនឹងក្រឹត្យវិន័យរបស់ព្រះយេហូវ៉ាវិញ ក៏រំពឹងគិតក្នុងក្រិត្យវិន័យទ្រង់ទាំងយប់ទាំងថ្ងៃដែរ»។ ខគម្ពីរនេះបានរម្លឹកឲ្យខ្ញុំស្រឡាញ់ក្រឹត្យវិន័យរបស់ព្រះ។ ពីមុនៗ ខ្ញុំធ្លាប់គិតថា ក្រឹត្យវិន័យគឺជាអ្វីដែលអវិជ្ជមាន ពីព្រោះជាច្បាប់ដែលយើងត្រូវត្រាប់តាម។ ប៉ុន្តែ ប្រសិនបើយើងគិតទៅ ក្រឹត្យវិន័យរបស់ព្រះជាម្ចាស់គឺជាអ្វីដែលល្អសម្រាប់យើងទេ។ ឧទាហរណ៍៖ នៅក្នុងកណ្ឌគម្ពីរ រ៉ូម ៣:២០ បានប្រាប់យើងថា ក្រឹត្យវិន័យគឺ «គ្រាន់តែសម្ដែងឲ្យស្គាល់អំពើបាបប៉ុណ្ណោះ» ដែលនេះមានន័យថា យើងត្រូវការព្រះសង្គ្រោះ ពីព្រោះយើងជាមនុស្សមានបាប។ ទោះបីខ្ញុំមិនចាំខនានាក៏ដោយក៏ខ្ញុំដឹងថា ខ្ញុំត្រូវតែត្រេកអរតែនឹងក្រឹត្យវិន័យរបស់ព្រះយេហូវ៉ាប៉ុណ្ណោះ។
ខ្ញុំស្រឡាញ់ព្រះគម្ពីរណាស់ ហើយខ្ញុំក៏ចូលចិត្តលើកទឹកចិត្តឲ្យអ្នកដទៃអានព្រះគម្ពីរទាំងមូលផងដែរ ជាពិសេសក្នុងរបៀបដែលងាយនឹងអាចបញ្ចប់បាន។ ប្រសិនបើយើងមិនអានព្រះគម្ពីរទាំងមូលទេ នោះយើងអាចនឹងមើលរំលងចំណុចគន្លឹះមួយចំនួននៃលក្ខណសម្បត្តិរបស់ព្រះជាម្ចាស់ជាមិនខាន។
សរុបសេចក្ដីទៅ មិនថាលោកអ្នកជ្រើសរើសប្រើប្រាស់ផែនការអានព្រះគម្ពីរមួយណាក៏ដោយក៏ខ្ញុំសប្បាយចិត្តណាស់ដែលលោកអ្នកចង់អានព្រះគម្ពីរ។ ខ្ញុំអធិស្ឋានទូលសូមឲ្យព្រះជាម្ចាស់ជួយលោកអ្នកមានកម្លាំង និងភាពអត់ធ្មត់ក្នុងការអានព្រះគម្ពីរ។
ខណៈពេលដែលលោកអ្នកចាប់ផ្ដើមអានព្រះគម្ពីរនៅឆ្នាំថ្មីនេះ សូមប្រាកដថាឲ្យស្គាល់ខ្លួនឯង ស្គាល់ទំនោររបស់ខ្លួន ប៉ុន្តែលើសពីនោះទៅទៀត ត្រូវស្គាល់ថាលោកអ្នកត្រូវការព្រះបន្ទូលរបស់ព្រះជាម្ចាស់ខ្លាំងណាស់។
មតិយោបល់
Loading…