តើទំនាក់ទំនងនៃការចែចង់របស់ខ្ញុំ មានលក្ខណៈដូចការថ្វាយបង្គំរូបព្រះមែនឬ?

លោកគ្រូបានផ្ដល់ប្រឹក្សាដល់ស្ត្រីវ័យក្មេងម្នាក់ ដែលខ្លាចថាទំនាក់ទំនងរបស់គាត់ជាមួយនឹងមិត្តប្រុសគាត់ ទំនងជាការថ្វាយបង្គំរូបព្រះក្លែងក្លាយ។

២២ ធ្នូ ២០២៤អានរយៈពេល ១៣ នាទី

មើល១៤៣ដង

តើទំនាក់ទំនងនៃការចែចង់របស់ខ្ញុំ មានលក្ខណៈដូចការថ្វាយបង្គំរូបព្រះមែនឬ?

មានប្អូនស្រីម្នាក់ឈ្មោះ ណូរ៉ា បានផ្ញើសារសួរយើងដូចតទៅ «ជម្រាបសួរលោកគ្រូ ខ្ញុំជាសិស្សថ្មីម្នាក់នៅសាកលវិទ្យាល័យមួយ ហើយខ្ញុំទើបតែចាប់ផ្ដើមមានទំនាក់ទំនងថ្មីៗ។ យើងទាំងពីរនាក់ជាគ្រីស្ទបរិស័ទ ហើយយើងក៏ចង់ដាក់ព្រះអង្គនៅក្នុងចំណុចកណ្ដាលនៃទំនាក់ទំនងរបស់យើងដែរ។ ទោះបីជាយ៉ាងណាក៏ដោយ ខ្ញុំយល់ថា ខ្ញុំធ្វើឲ្យទំនាក់ទំនងខ្ញុំនឹងមិត្តប្រុសរបស់ខ្ញុំ ក្លាយជារូបព្រះសម្រាប់ខ្ញុំ។ ខ្ញុំពឹងផ្អែកលើមិត្តប្រុសរបស់ខ្ញុំសម្រាប់ក្ដីសុខ ហើយខ្ញុំគិតអំពីទំនាក់ទំនងរបស់យើងខ្លាំងជាងទំនាក់ទំនងរបស់ខ្ញុំជាមួយព្រះជាម្ចាស់។ តើខ្ញុំអាចជៀសឆ្ងាយពីការនេះបានដោយរបៀបណា? ហើយតើទំនាក់ទំនងនៃការឲ្យតម្លៃខ្លាំងពេកមានលក្ខណៈដូចម្ដេចសម្រាប់អ្នកដែលទើបតែមានទំនាក់ទំនងថ្មីៗ ដូចជាទំនាក់ទំនងរបស់ខ្ញុំនេះ?»

ល្អណាស់! ដែលពួកគាត់មានសេចក្ដីប្រាថ្នាដូចគ្នា ក្នុងការយកព្រះជាម្ចាស់ធ្វើជាចំណុចស្នូលក្នុងទំនាក់ទំនងរបស់ខ្លួន។ សម្រាប់ខ្ញុំ វាហាក់បីដូចជា ណូរ៉ា មានរូបភាពដ៏សំខាន់មួយនៅក្នុងគំនិតរបស់គាត់រួចទៅហើយដែលថា តើការថ្វាយបង្គំរូបព្រះមានលក្ខណៈដូចម្ដេច ពីព្រោះគាត់គិតថា គាត់កំពុងតែនៅក្នុងទំនាក់ទំនងនោះ ហើយយ៉ាងហោចណាស់ក៏នៅក្នុងកម្រិតណាមួយដែរ។ ខ្ញុំគិតថា គាត់កំពុងតែព្យាយាមយ៉ាងស្មោះត្រង់នៅទីនេះ ប៉ុន្តែដួងចិត្តរបស់គាត់កំពុងតែប្រឆាំងនឹងការនេះ ដែលនោះជាសញ្ញាសម្គាល់ដ៏ល្អមួយ។

ខ្ញុំគិតថា វាអាចនឹងជាជំនួយបន្ថែមទៀតសម្រាប់ខ្ញុំចំពោះ ណូរ៉ា ក្នុងការពណ៌នាអំពីលក្ខណៈវិជ្ជមានមួយបែបទៀតទាក់ទងនិងការថ្វាយបង្គំរូបព្រះនៅក្នុងទំនាក់ទំនងថ្មីៗ ដើម្បីឲ្យនាងបានដឹងថា ការថ្វាយបង្គំរូបព្រះផ្ទុយពីការទាំងនេះ ហើយដើម្បីឲ្យនាងអាចនឹងដាក់កម្លាំងរបស់ខ្លួនមិនច្រើនពេកក្នុងការជៀសវាងលើអ្វីមួយ ដូចជាសង្វាតស្វែងរកអ្វីមួយផ្សេងទៀតឡើយ។ នេះគឺជារបៀបដែលខ្ញុំនឹងលើកឡើង។ សម្រាប់ខ្ញុំ ហាក់បីដូចជាយ៉ាងហោចណាស់ក៏មានបីចំណុចដែល ណូរ៉ា អាចគិតអំពីរបៀបរ៉ូមែនទិចថ្មីរបស់គាត់ទាក់ទងជាមួយនឹងទំនាក់ទំនងរបស់គាត់ជាមួយនឹងព្រះយេស៊ូវ។

ទី១ នាងអាចគិតអំពីវាបែបជាការប្រៀបធៀប។ តើសេចក្ដីស្រឡាញ់របស់នាងចំពោះមិត្តប្រុសមានកម្រិតយ៉ាងដូចម្ដេចទៅនឹងសេចក្ដីស្រឡាញ់របស់នាងសម្រាប់ព្រះគ្រីស្ទ? នាងដូចជាបានគិតក្នុងរបៀបនោះរួចហើយ។ ទី២ នាងអាចគិតអំពីទំនាក់ទំនងរបស់នាងចំពោះបុរសម្នាក់នេះថា ជាការបង្ហាញអំពីទំនាក់ទំនងរបស់នាងជាមួយព្រះយេស៊ូវ។ ហើយទី៣ នាងអាចចាត់ទុកភាពរ៉ូមែនទិកថ្មីរបស់នាង ក្នុងរបៀបមួយដែលផ្ដល់ជាកម្លាំង ឬក៏ស្អាងទំនាក់ទំនងរបស់នាងជាមួយព្រះយេស៊ូវវិញ។ ដូច្នេះ សូមអនុញ្ញាតឲ្យខ្ញុំលើកឡើងនូវចំណុចទាំងបីនោះម្ដងមួយៗ ហើយចង្អុលបង្ហាញទៅកាន់បទគម្ពីរ និងរបៀបដែលនាងអាចគិតអំពីចំណុចទាំងនោះ។

១) ព្រះគម្ពីរមានលើកឡើងអំពីទំនាក់ទំនងរបស់យើងថាជាការល្អ ឬបុគ្គលល្អដែលព្រះជាម្ចាស់បានបង្កើតមកដែលក្នុងរបៀបមួយហាក់បីដូចជារបស់ទាំងនោះមិនអាចប្រៀបធៀបជាមួយព្រះអង្គបានឡើយ។ ប៉ុន្តែ ព្រះគម្ពីរបានលើកឡើងជាការប្រៀបធៀប។ នោះទាក់ទងទៅនឹងតម្លៃដែលគ្មានដែនកំណត់របស់ព្រះយេស៊ូវ ជាតម្លៃដែលការផ្សេងៗ ឬក៏មនុស្សដទៃទៀតប្រៀបដូចជាគ្មានតម្លៃអ្វីទាល់តែសោះ។ ឧទាហរណ៍ អ្នកនិពន្ធកណ្ឌគម្ពីរ ទំនុកតម្កើង ៧៣:២៥-២៦ បានលើកឡើងថា «ឯនៅស្ថានសួគ៌ តើទូលបង្គំមានអ្នកឯណាក្រៅពីទ្រង់ ហើយនៅផែនដីទូលបង្គំប្រាថ្នាចង់បានតែទ្រង់ទេ»។ នាងស្រឡាញ់មិត្តប្រុសរបស់ខ្លួន។ «នៅផែនដីទូលបង្គំប្រាថ្នាចង់បានតែទ្រង់ទេ ឯសាច់ នឹងចិត្តទូលបង្គំ នោះនឹងសាបសូន្យទៅបាន ប៉ុន្តែព្រះទ្រង់ជាទីពឹងនៃចិត្ត ហើយជាចំណែកមរដកនៃទូលបង្គំជាដរាបដែរ»។ ឬក៏នេះជារបៀបដែលសាវ័ក ប៉ុល បានលើកឡើងនៅក្នុងកណ្ឌគម្ពីរ ភីលីព ៣:៨ «ហើយខ្ញុំក៏រាប់គ្រប់ទាំងអស់ទុកដូចជាខាតដែរ»—ក៏មានរួមបញ្ចូលទាំងមិត្តប្រុសដែរ—«ដោយព្រោះសេចក្ដីដែលប្រសើរជាង គឺដោយស្គាល់ព្រះគ្រីស្ទយេស៊ូវ ជាព្រះអម្ចាស់នៃខ្ញុំ» វិញ។

ឥឡូវនេះ ដោយសារយើងដឹងចេញពីការផ្សេងៗដែលអ្នកនិពន្ធកណ្ឌគម្ពីរទំនុកតម្កើង និងពីសាវ័ក ប៉ុល បានលើកឡើងដែលការល្អដែលព្រះជាម្ចាស់បង្កើតមក ដូចជាប្រជារាស្ត្ររបស់ព្រះជាម្ចាស់ជាដើម យើងឃើញថា ទាំងអ្នកនិពន្ធកណ្ឌគម្ពីរទំនុកតម្កើង និងសាវ័ក ប៉ុល បានលើកឡើងថាពួកគាត់រកបានអំណរដ៏អស្ចារ្យនៅក្នុងកណ្ឌគម្ពីរ ទំនុកតម្កើង ១៦:៣ និងកណ្ឌគម្ពីរ ភីលីព ៤:១ ហើយទាំងអ្នកនិពន្ធកណ្ឌគម្ពីរទំនុកតម្កើង និងសាវ័ក ប៉ុល ក៏និយាយអំពីប្រជារាស្ត្ររបស់ព្រះជាម្ចាស់ថាជាអំណរដ៏អស្ចារ្យដល់ពួកគាត់ដែរ។ ដូច្នេះ ពួកគាត់មិនមែនគ្មានតម្លៃអ្វីសោះនោះទេ។ ពួកគាត់គឺជាអំណរដ៏អស្ចារ្យ។

ហើយយើងក៏បានដឹងចេញពីប្រយោគដែលថា ការបង្កើតរបស់ព្រះជាម្ចាស់គឺមិនបានរាប់ថាជាគ្មានតម្លៃ ឬគ្រាន់តែជាឱកាសក្នុងការថ្វាយបង្គំរូបព្រះនោះទេ ប៉ុន្តែជាការល្បងលនូវភាពស្មោះត្រង់របស់យើង។ ហើយការល្បងលនោះគឺថា៖ តើយើងនៅតែអាចនិយាយជាមួយអ្នកដែលបានសរសេរព្រះគម្ពីរបានដែរឬទេដោយថា ទោះប្រសិនបើខ្ញុំបានបាត់បង់អ្វីៗទាំងអស់ក៏ដោយ ក៏ព្រះជាម្ចាស់នៅតែជាសេចក្ដីអំណរដ៏ល្មមរបស់ខ្ញុំដ៏នៅអស់កល្បជានិច្ចដែរឬទេ? នោះគឺជាគំនិតប្រៀបធៀប។ ដូច្នេះ នាងអាចមើលឃើញទំនាក់ទំនងមួយនេះថាជាការប្រៀបធៀប ហើយនោះគឺជាការមួយដែលនាងមានបញ្ហាជាមួយ។ ដូច្នេះ ប្រហែលជាចំណុចពីរបន្ទាប់នេះនឹងជួយនាងក្នុងការគ្រប់គ្រងចំណុចមួយនោះបានប្រសើរជាងមុន។

២) ណូរ៉ា គួរតែបណ្ដុះទំនាក់ទំនងថ្មីនេះជាមួយបុរសថ្មីនេះ ថាជាការបង្ហាញអំពីទំនាក់ទំនងរបស់នាងជាមួយនឹងព្រះយេស៊ូវ—ជារបៀបនៃការប្រព្រឹត្តចេញ ឬបង្ហាញទំនាក់ទំនងរបស់នាងជាមួយព្រះយេស៊ូវ មិនមែនគ្រាន់តែជាការគម្រាមកំហែងចំពោះទំនាក់ទំនងរបស់នាងជាមួយព្រះយេស៊ូវ ឬក៏ជាការប្រកួតប្រជែងជាមួយទំនាក់ទំនងនេះនោះទេ។ ឧទាហរណ៍៖ នៅក្នុងកណ្ឌគម្ពីរអេភេសូរ ជំពូក៥ បានពណ៌នាអំពីទំនាក់ទំនងអាពាហ៍ពិពាហ៍រវាងបុរស និងស្ត្រីទុកដូចជារឿងល្ខោន ឬក៏ជារូបភាពដែលបង្ហាញអំពីទំនាក់ទំនងរវាងព្រះគ្រីស្ទ និងក្រុមជំនុំអញ្ចឹងដែរ។

ឥឡូវនេះ ការនោះបានផ្លាស់ប្ដូរយ៉ាងខ្លាំងក្នុងរបៀបដែលបុរស និងស្ត្រីគិតអំពីទំនាក់ទំនងរបស់ពួកគេ។ វាមិនមែនគ្រាន់តែជារឿងអំពីពួកគេនោះទេ។ វាជាការបង្ហាញបុរសនោះអំពីទំនាក់ទំនងនៃសេចក្ដីតាំងសញ្ញារបស់ព្រះគ្រីស្ទចំពោះកូនក្រមុំ និងក្រុមជំនុំទ្រង់។ ហេតុដូច្នេះហើយ សេចក្ដីស្រឡាញ់យ៉ាងធំធេងដែលស្ត្រីមានចំពោះបុរស ឬក៏បុរសមានចំពោះស្ត្រីអាច និងគួរតែបញ្ចូលទៅក្នុងបទចម្រៀងនៃសាច់រឿងដ៏អស្ចារ្យមួយ ដើម្បីឲ្យកម្លាំងនៃអារម្មណ៍សម្រាប់បុគ្គលនោះ គឺមិនផ្ទុយគ្នាពីអារម្មណ៍ដែលមានសម្រាប់ព្រះយេស៊ូវឡើយ ប៉ុន្តែជាការបង្ហាញអារម្មណ៍សម្រាប់ព្រះយេស៊ូវវិញ។

ដូច្នេះ នេះគឺជាគោលការណ៍ដែលសាវ័ក ប៉ុល បានកត់ចុះនៅក្នុងកណ្ឌគម្ពីរ កាឡាទី ៥:៦។ គាត់បានលើកឡើងថា «ពីព្រោះក្នុងព្រះគ្រីស្ទយេស៊ូវ ដែលកាត់ស្បែកឬមិនកាត់ នោះមិនជាប្រយោជន៍អ្វីទេ មានប្រយោជន៍តែសេចក្ដីជំនឿ ដែលប្រព្រឹត្តដោយសេចក្ដីស្រឡាញ់ប៉ុណ្ណោះ»។ និយាយម៉្យាងវិញទៀត សេចក្ដីជំនឿមិនកើតមានឡើងដោយឯងៗនៅឯខាងវិញ្ញាណនោះទេ។ សេចក្ដីជំនឿបង្ហាញខ្លួនឯងផ្ទាល់។ សេចក្ដីជំនឿបង្ហាញខ្លួនឯងផ្ទាល់តែម្ដង។ ហើយរបៀបនៃមូលដ្ឋានគ្រឹះដែលជំនឿសបញ្ជាក់ ឬក៏បង្ហាញខ្លួនផ្ទាល់នោះគឺនៅក្នុងផលផ្លែនៃសេចក្ដីស្រឡាញ់ «សេចក្ដីជំនឿ ដែលប្រព្រឹត្តដោយសេចក្ដីស្រឡាញ់ប៉ុណ្ណោះ»។ ដូច្នេះ ណូរ៉ា គួរតែសួរខ្លួនឯងផ្ទាល់ថា៖ «ខណៈពេលដែលខ្ញុំស្រឡាញ់មិត្តប្រុសរបស់ខ្ញុំ តើការនោះគ្រាន់តែកំពុងប្រកួតប្រជែងជាមួយសេចក្ដីជំនឿរបស់ខ្ញុំក្នុងព្រះយេស៊ូវ ឬក៏វាជាការបង្ហាញសេចក្ដីជំនឿរបស់ខ្ញុំនៅក្នុងព្រះយេស៊ូវ?»។

៣) ដែលជាចំណុចចុងក្រោយ និងជារបៀបក្នុងការពិនិត្យមើលទំនាក់ទំនងរបស់នាងជាមួយនឹងបុរសនោះគឺ៖ តើទំនាក់ទំនងមួយនេះកំពុងតែផ្ដល់ជាកម្លាំង និងស្អាងសេចក្ដីជំនឿរបស់នាង និងបុរសនោះដែរឬទេ? ជាទូទៅ នៅពេលដែលព្រះគម្ពីរបានរៀបរាប់អំពីទំនាក់ទំនង គឺព្រះគម្ពីរប្រើប្រាស់គោលការណ៍មួយនេះ៖ «ត្រូវឲ្យធ្វើការទាំងអស់ សម្រាប់នឹងស្អាងចិត្តឡើង» (១កូរិនថូស ១៤:២៦)។ នោះគឺជាអត្ថន័យក្នុងការមានទំនាក់ទំនង។ ចូរឲ្យអ្វីៗគ្រប់យ៉ាងសម្រាប់ជាការស្អាងចិត្តគ្នាឡើងចុះ។ ឧទាហរណ៍៖ នៅក្នុងកណ្ឌគម្ពីរ ហេព្រើរ ៣:១៣ មានចែងថា «តែចូរកំឡាចិត្តគ្នាទៅវិញទៅមកជារាល់ថ្ងៃវិញ ក្នុងកាលដែលនៅតែហៅថា "ថ្ងៃនេះ" នៅឡើយ ក្រែងអ្នករាល់គ្នាណាមួយមានចិត្តរឹងរូស ដោយសេចក្ដីបញ្ឆោតរបស់អំពើបាប»។ ដូច្នេះ គោលបំណងនៃទំនាក់ទំនងគឺថា វានឹងបំពេញសេចក្ដីជំនឿ និងបំពេញភាពបរិសុទ្ធ—បំពេញក្នុងការយកឈ្នះលើអំពើបាប។

សំណួរសម្រាប់ ណូរ៉ា គឺថា៖ តើទំនាក់ទំនងថ្មីនេះដំណើរការទៅមុខដែរឬទេ? តើវាមានឥទ្ធិពលក្នុងការស្អាងចិត្តខ្ញុំ និងបុរសនោះនៅក្នុងសេចក្ដីជំនឿរបស់ខ្លួនដែរឬទេ? តើពួកយើងបានទុកចិត្តព្រះជាម្ចាស់ជាងមុនដែរឬទេ? តើពួកយើងបានស្រឡាញ់ព្រះជាម្ចាស់ជាងមុនដែរឬទេ? តើជីវិតរបស់ពួកយើងត្រូវបានកត់សម្គាល់ក្នុងការប្រាថ្នាចង់បានភាពបរិសុទ្ធកាន់តែច្រើនឡើង ដោយសារតែអ្វីដែលយើងកំពុងតែស្វែងរកក្នុងគ្នាទៅវិញទៅមកដែរឬទេ? តើវាជាការជួយធ្វើឲ្យសេចក្ដីស្រឡាញ់របស់យើងសម្រាប់ព្រះគ្រីស្ទកាន់តែខ្លាំងជាងមុន ឬក៏ធ្វើឲ្យយើងកាន់តែខ្សោយជាងមុន?

ដូច្នេះ នេះគឺជាសេចក្ដីសង្ខេប។ ប្អូន ណូរ៉ា អើយ! ចូរដេញតាមទំនាក់ទំនងនៅក្នុងរបៀបបីនេះ៖ ទី១ ចូរដេញតាមវាថាជាការដែលល្អ ដែលនោះជាការប្រៀបធៀបទៅកាន់ការដ៏គ្មានដែនកំណត់គឺជាភាពគ្មានអ្វីៗទាំងអស់។ ទី២ ចូរដេញតាមវាទុកជាការបង្ហាញសេចក្ដីជំនឿរបស់ប្អូននៅក្នុងព្រះយេស៊ូវ មិនមែនជាការប្រកួតប្រជែងជាមួយសេចក្ដីជំនឿរបស់ប្អូននៅក្នុងព្រះយេស៊ូវនោះទេ។ ចូរស្វែងរករបៀបក្នុងការបង្ហាញសេចក្ដីជំនឿរបស់ប្អូននៅក្នុងទំនាក់ទំនងមួយនេះ។ ទី៣ ចូរដេញតាមវានៅក្នុងអត្ថន័យមួយដែលធ្វើឲ្យយើងចម្រើនកម្លាំង និងស្អាងចិត្តគ្នានៅក្នុងសេចក្ដីជំនឿរបស់ប្អូន និងជំនឿរបស់គាត់ មិនមែនធ្វើឲ្យកាន់តែខ្សោយនោះទេ។ ហើយប្រសិនបើប្អូនដឹងអំពីចំណុចទាំងបីនេះហើយ ខ្ញុំគិតថាព្រះអម្ចាស់កំពុងតែរក្សាប្អូនចេញពីការមានទំនាក់ទំនងក្នុងលក្ខណៈជាការថ្វាយបង្គំរូបព្រះចេញហើយ។

និពន្ធដោយ៖ លោកគ្រូ John Piper
បកប្រែដោយ៖ លោក ខែម បូឡុង
កែសម្រួលដោយ៖ លោក ទេព រ៉ូ, លោកស្រី ឡូញ ស្រីរដ្ឋ, លោក ឈាង បូរ៉ា និងលោក សឹម រក្សា
ដកស្រង់ខ្លះៗ និងកែសម្រួលចេញពី www.desiringgod.org ដោយមានការអនុញ្ញាត។

តើអ្នកគិតយ៉ាងណា?

០ពិន្ទុ

តើលោកអ្នកយល់យ៉ាងណាដែរ?

៤៥៦

កំណត់ហេតុបណ្ដាញ៦ កក្កដា ២០២៦

តើខ្ញុំអាចនៅតែមានសេចក្ដីអំណរក្នុងគ្រាដែលមានពេញដោយសេចក្ដីសង្ស័យបានដែរឬទេ?

សូមស្វាគមន៍មកកាន់ថ្ងៃច័ន្ទនេះ ជាថ្ងៃចុងក្រោយនៃខែកក្កដា។ កាលពីថ្ងៃព្រហស្បតិ៍មុន យើងបានរៀនអំពីសេចក្ដីអំណររបស់ព្រះជាម្ចាស់…

អានបន្ថែម

តើខ្ញុំអាចជឿលើព្រះគម្ពីរទាំងមូល ហើយព្រះអង្គនៅមិនបានជ្រើសរើសខ្ញុំដែរឬទេ?

៤១១១

កំណត់ហេតុបណ្ដាញ២៧ មេសា ២០២៥

តើខ្ញុំអាចជឿលើព្រះគម្ពីរទាំងមូល ហើយព្រះអង្គនៅមិនបានជ្រើសរើសខ្ញុំដែរឬទេ?

«ជម្រាបសួរលោកគ្រូ តើអាចទេដែលយើងជឿលើព្រះគម្ពីរទាំងមូលនៅក្នុងខួរក្បាលរបស់យើង និងជឿលើគ្រប់ចំណុចនៃសេចក្ដីពិតខាងឯជំនឿគ្រីស្ទបរិស័…

អានបន្ថែម

តើអ្វីទៅធ្វើឲ្យថ្ងៃដែលព្រះអង្គមានព្រះជន្មរស់ឡើងវិញពិសេសម៉្លេះ?

៤១៩៧

កំណត់ហេតុបណ្ដាញ១៩ មេសា ២០២៥

តើអ្វីទៅធ្វើឲ្យថ្ងៃដែលព្រះអង្គមានព្រះជន្មរស់ឡើងវិញពិសេសម៉្លេះ?

ប្រសិនបើព្រះជាម្ចាស់មិនបានប្រោសព្រះគ្រីស្ទឲ្យបានមានព្រះជន្មរស់ឡើងវិញ នោះដំណឹងល្អរបស់យើងគឺជាការឥតអំពើ ជំនឿរបស់យើងគឺជាការឥតអំពើ ដែលនេះមានន័យថា យើងកំពុងតែប្រកាសដំណឹងក្លែងក្លាយ។ បើដូច្នោះមែន នោះយើងគួរតែស៊ីផឹក ហើយអរសប្បាយចុះ ដ្បិតថ្ងៃស្អែកយើងនឹងស្លាប់។

អានបន្ថែម