តើអ្វីទៅជាអត្ថន័យបុណ្យណូអែល?

ព្រះឱរសអង្គមួយនោះ គឺជាភស្តុតាងដែលបង្ហាញថា ព្រះជាម្ចាស់ពិតជាបានស្រឡាញ់មនុស្សលោកខ្លាំងដល់ម្ល៉េះ «បានជាទ្រង់ប្រទានព្រះរាជបុត្រាទ្រង់តែ១ ដើម្បីឲ្យអ្នកណាដែលជឿដល់ព្រះរាជបុត្រានោះ មិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ» (យ៉ូហាន ៣:១៦)។

១៣ ធ្នូ ២០២៤អានរយៈពេល ១០ នាទី

មើល២៦៤៨ដង

តើអត្ថន័យបុណ្យណូអែលផ្ដោតរំពឹងទៅលើកាដូ ដើមណូអែល ឬក៏ភ្លើងពណ៌ផ្សេងៗមែនឬ? មិនដូច្នេះទេ! យើងអាចរកអត្ថន័យឃើញនៅក្នុងអំណរនៃការដឹងថា ប្រវត្តិសាស្ត្រដែលធ្វើឲ្យមានការផ្លាស់ប្ដូរទាក់ទងនឹងរឿងដែលព្រះគ្រីស្ទប្រសូតមកជាមនុស្ស គឺជារឿងពិត!

មានបុណ្យណូអែលមួយ ដែលពេលនោះខ្ញុំបានអានកាសែតនិពន្ធដោយអ្នកសារព័ត៌មានដែលគាត់កំពុងតែព្យាយាមស្វែងរកអត្ថន័យនៃបុណ្យណូអែល។ សេចក្តីសន្និដ្ឋានពីការស្វែងរករបស់គាត់ គឺគាត់បានឲ្យពិន្ទុយ៉ាងល្អបំផុតទៅលើចម្លើយរបស់ខ្លួនឯង ដោយបានលើកឡើងថា៖ «អត្ថន័យនៃបុណ្យណូអែលគឺមាននៅក្នុងចិត្តរបស់លោកអ្នក។ វាគឺជាអារម្មណ៍ដ៏កក់ក្ដៅ ជាអារម្មណ៍ដែលជះពន្លឺ ហើយលោកអ្នកក៏មិនអាចប្រើលុយទិញអត្ថន័យនេះបានទេ ហើយក៏មិនអាចយកអត្ថន័យនេះចេញពីបុគ្គលណាម្នាក់បានដែរ»។

នេះឯងជាគំនិតដ៏មានប្រជាប្រិយភាពទាក់ទងទៅនឹងបុណ្យណូអែលគឺថា អត្ថន័យគឺនៅក្នុងយើងផ្ទាល់។ យើងគ្រាន់តែត្រូវទទួលយកវាតែប៉ុណ្ណោះ។ តើអ្នកនោះមានន័យថា យើងគ្រាន់តែទាញយករបស់មកតុបតែង ហើយចាក់បទចម្រៀងដែលទាក់ទងនឹងបុណ្យណូអែលប៉ុណ្ណោះ ហើយរាប់ថានេះជាបុណ្យណូអែលឬ? តើយើងត្រូវតែមានដើមណូអែលឬ? ហើយតើយើងគួរតែមានខ្សែអំពូលភ្លើងភ្លឺភ្លឹបភ្លែតៗមួយខ្សែឬពីរខ្សែឬ? ឬក៏វាទាក់ទងទៅនឹងការដែលត្រូវមានកាដូឲ្យច្រើនជាងមុន? ឬក៏ទាល់តែយើងត្រូវតុបតែងគេហដ្ឋានឲ្យបានស្អាតជាងអ្នកដែលនៅជិតខាងយើងមែនឬ?

ការវិលត្រឡប់ទៅចំណុចដើម

ដូច្នេះខ្ញុំក៏បានសម្រេចចិត្តអានរឿងទាក់ទងនឹងបុណ្យណូអែលនៅក្នុងព្រះគម្ពីរជាថ្មីម្ដងទៀត។ ខ្ញុំចង់សិក្សាពីការឆ្លើយតបរបស់អ្នកគង្វាលដែលគាត់កំពុងតែធ្វើការនៅវេលាយប់នោះ ហើយពួកគាត់ជាមនុស្សដំបូងដែលទទួលបានដំណឹងទាក់ទងនឹងការប្រសូតរបស់ព្រះឱរសយេស៊ូវ។ ព្រះគម្ពីរបានប្រាប់ឲ្យយើងដឹងថា បន្ទាប់ពីពួកគេបានឃើញទ្រង់ នោះពួកគេក៏បានវិលត្រឡប់ទៅកាន់ហ្វូងចៀមរបស់ពួកគេវិញ «ទាំងសរសើរតម្កើងដល់ព្រះ ដោយព្រោះគ្រប់ទាំងការដែលគេបានឮ ហើយឃើញនោះ» (លូកា ២:៨-២០)។

សូមចងចាំថា អ្នកគង្វាលចៀមនៅសម័យកាលនោះ មិនសូវជាមានភាពស្លូតបូត ឬមានសម្ដីទន់ភ្លន់ដូចដែលយើងបានឃើញនៅក្នុងរូបកាតណូអែលមួយចំនួននោះទេ។ តែពួកគាត់ក៏ទំនងជាមានភាពមាំមួន រឹងពឹង ដែលនិយាយឲ្យខ្លីទៅ លោកអ្នកមិនគួរបបួលពួកគាត់មកវាយគ្នាឡើយ ព្រោះពួកគាត់ខ្លាំងៗ។ ពេលដែលព្រះគម្ពីរលើកឡើងថា ពួកគាត់បានថ្វាយសិរីល្អ ហើយសរសើរតម្កើងព្រះជាម្ចាស់ ការនោះគឺជាការពណ៌នាដែលស្រដៀងទៅនឹងការប្រកួតកីឡាវគ្គជម្រុះចោលមួយ ហើយនៅពេលដែលក្រុមដែលយើងគាំទ្រទទួលបានជ័យជម្នះ នោះយើងនឹងលោតរាំកញ្ឆេអបអរសាទរយ៉ាងកក្អាកកក្អាយទាំងស្រែកយ៉ាងខ្លាំងៗផង។ ហើយនោះឯងជាប្រភេទនៃការអបអរសាទរតែមួយគត់ដែលពួកអ្នកគង្វាលដឹងទាក់ទងនឹងការសរសើរតម្កើង។ និយាយរួមទៅ ពួកគេមានការរន្ធត់ញាប់ញ័រជាខ្លាំង!

ការប្រសូតរបស់ព្រះគ្រីស្ទបានផ្លាស់ប្ដូររាល់គ្រប់អ្វីៗទាំងអស់។ នោះឯងជាអ្វីដែលពួកអ្នកគង្វាលជាអ្នកដែលធ្វើការយ៉ាងនឿយហត់បានអបអរសាទរយ៉ាងរំភើបញាប់ញ័រក្រៃលែង! ព្រះឱរសអង្គមួយនោះ គឺជាភស្តុតាងដែលបង្ហាញថា ព្រះជាម្ចាស់ពិតជាបានស្រឡាញ់មនុស្សលោកខ្លាំងដល់ម្ល៉េះ «បានជាទ្រង់ប្រទានព្រះរាជបុត្រាទ្រង់តែ១ ដើម្បីឲ្យអ្នកណាដែលជឿដល់ព្រះរាជបុត្រានោះ មិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ» (យ៉ូហាន ៣:១៦)។

អត្ថន័យដ៏ពិតនៃបុណ្យណូអែល

ព្រះឱរសនោះក៏បានធ្វើឲ្យយើងមានចម្ងល់ជាថ្មីម្ដងទៀតថា «តើអ្វីទៅជាអត្ថន័យនៃបុណ្យណូអែល?»។ ខ្ញុំជឿថា អត្ថន័យនៃបុណ្យណូអែលគឺ ការមានអំណរដ៏ជ្រាលជ្រៅដោយសារយើងដឹងយ៉ាងច្បាស់លាស់ថា រឿងនៃព្រះឱរសដែលជាព្រះគ្រីស្ទ គឺជារឿងដ៏ពិត ហើយមានពេញដោយសិរីល្អមែន។ នៅឆ្នាំនេះនឹងមានមនុស្សជាច្រើនប្រារព្ធធ្វើពិធីបុណ្យណូអែល ហើយពេលនោះពួកគាត់នឹងដូរកាដូគ្នាទៅវិញទៅមក ហើយនឹងរីករាយជាខ្លាំង។ ប៉ុន្តែ ពួកគេនឹងមិនដែលយល់ពីភាពស៊ីគ្នារវាងការប្រារព្ធ និងមូលហេតុដែលត្រូវប្រារព្ធពិធីបុណ្យណូអែលនោះឡើយ។ ពួកគាត់ប្រៀបដូចជាមនុស្សដែលទៅចូលរួមពិធីមង្គលការមួយដែលកំពុងតែអរសប្បាយយ៉ាងក្អាកក្អាយ ប៉ុន្តែពួកគាត់ទាំងនោះមិនដែលទាំងស្គាល់កូនក្រមុំ ឬក៏កូនកំលោះសោះឡើយ។

នេះហើយគឺជាភាពខុសគ្នារវាងអស់អ្នកដែលស្គាល់អត្ថន័យនៃបុណ្យណូអែលដ៏ពិត និងអ្នកដែលមិនបានស្គាល់អត្ថន័យនៃបុណ្យណូអែលនេះ។ ចំពោះអស់អ្នកណាដែលពិតជាស្គាល់ពីអត្ថន័យនៃបុណ្យណូអែលនេះ ទោះបើគេដកដើមណូអែល ដកភ្លើងពណ៌ ដកកាដូ ដកម្ហូបអាហារ និងដកបទចម្រៀងដែលទាក់ទងនឹងបុណ្យណូអែលចេញក៏ដោយ ក៏ពួកគាត់នឹងនៅតែមានអំណរនោះដដែល។ ពីព្រោះរឿងនៃការដែលព្រះបានយាងមកលើផែនដីក្នុងនាមជាព្រះឱរសជារឿងពិតប្រាកដ ហើយពួកគាត់ក៏បានស្គាល់ពីព្រះគ្រីស្ទផ្ទាល់ដែលទ្រង់បានប្រសូត ហើយផ្ទំនៅក្នុងស្នូកផងដែរ។

តើព្រះឱរសដែលផ្ទំនៅក្នុងស្នូកនោះមានសារៈសំខាន់ខ្លាំងប៉ុណ្ណា?

តើលោកអ្នកស្គាល់ពីសារៈសំខាន់នៃការដែលព្រះឱរសផ្ទំនៅក្នុងស្នូកដែរឬទេ? ពួកទេវតាបានប្រាប់ទៅកាន់ពួកអ្នកគង្វាលថា «...ខ្ញុំមកប្រាប់ដំណឹងល្អដល់អ្នករាល់គ្នា ពីសេចក្ដីអំណរយ៉ាងអស្ចារ្យ ដែលសម្រាប់បណ្ដាជនទាំងអស់គ្នា ដ្បិតនៅថ្ងៃនេះ មានព្រះអង្គសង្គ្រោះ១អង្គ ប្រសូតដល់អ្នករាល់គ្នានៅក្រុងហ្លួងដាវីឌ គឺជាព្រះគ្រីស្ទដ៏ជាព្រះអម្ចាស់» (លូកា ២:១០-១១)។ ព្រះឱរសនោះបានប្រសូតនៅភូមិបេថ្លេហិម ផ្ទំក្នុងស្នូក ទ្រង់ផ្ទាល់គឺជាព្រះ។ ការដែលព្រះរាជបុត្រារបស់ព្រះយាងមកយកកំណើតជាមនុស្ស នោះឯងគឺជាការដ៏អស្ចារ្យ។ ហើយ៣៣ឆ្នាំក្រោយមក ព្រះអង្គបានសុគតជំនួសយើង។ «ពីព្រោះមានព្រះតែ១ ហើយមានអ្នកសង្រួបសង្រួមតែ១ នៅកណ្ដាលព្រះនឹងមនុស្ស គឺជាមនុស្សដ៏ជាព្រះគ្រីស្ទយេស៊ូវនោះ ទ្រង់បានថ្វាយព្រះអង្គទ្រង់ ទុកជាថ្លៃលោះមនុស្សទាំងអស់» (១ធីម៉ូថេ ២:៥-៦)។ ព្រះយេស៊ូវបានយាងមកបង់ថ្លៃលោះនៃអំពើបាបរបស់យើងដែលយើងមិនអាចបង់បាន។

យញ្ញបូជានៅលើឈើឆ្កាងដោយការសុគតរបស់ទ្រង់បានបង់ថ្លៃលោះនូវរាល់អំពើបាបដែលលោកអ្នក ហើយនិងខ្ញុំបានប្រព្រឹត្ត ទាំងនៅអតីតកាល និងនាពេលអនាគតផងដែរ។ «ដ្បិតឯព្រះអង្គដែលមិនបានស្គាល់បាបសោះ នោះព្រះទ្រង់បានធ្វើឲ្យត្រឡប់ជាតួបាប ជំនួសយើងរាល់គ្នាវិញ» (២កូរិនថូស ៥:២១)។ ការដែលព្រះគ្រីស្ទរស់ឡើងវិញបីថ្ងៃក្រោយទ្រង់បានសុគតនោះ (លូកា ២៤) គឺជាអំណះអំណាងថា ព្រះវរបិតាបានទទួលថ្លៃលោះ។ ឥឡូវនេះ «...អ្នកណាដែលជឿដល់ទ្រង់ នោះមិនជាប់មានទោសទេ» (យ៉ូហាន ៣:១៨) ។

តើលោកអ្នកចង់ទទួលបានអត្ថន័យនៃបុណ្យណូអែលតាមរយៈការស្គាល់ព្រះគ្រីស្ទដែរឬទេ? តើលោកអ្នកចង់ទទួលបាននូវការអត់ទោស និងជីវិតអស់កល្បជានិច្ចដែលព្រះយេស៊ូវគ្រីស្ទបានយាងមកលើពិភពលោកនេះ ដើម្បីផ្ដល់ជូនដល់លោកអ្នកដែរឬទេ? លោកអ្នកអាចលើកឡើងពីបំណងប្រាថ្នានៃដួងចិត្តរបស់លោកអ្នកដោយការជឿទុកចិត្តលើទ្រង់នៅឥឡូវនេះ។ បើលោកអ្នកមានបំណងចង់ស្គាល់ព្រះគ្រីស្ទ នោះសូមប្រើលំនាំនៃសេចក្តីអធិស្ឋានដូចខាងក្រោមនេះជាគំរូ៖

ឱ! ព្រះអម្ចាស់យេស៊ូវអើយ! ខ្ញុំចង់ស្គាល់ព្រះអង្គដោយផ្ទាល់។ ខ្ញុំសូមអរព្រះគុណដែលទ្រង់បានសុគតនៅលើឈើឆ្កាងជំនួសបាបរបស់ខ្ញុំ។ ខ្ញុំសូមបើកទ្វារដួងចិត្តរបស់ខ្ញុំទៅចំពោះព្រះអង្គ ហើយសូមអញ្ជើញព្រះអង្គយាងមកគង់នៅក្នុងដួងចិត្តខ្ញុំ ដើម្បីធ្វើជាព្រះសង្គ្រោះរបស់ខ្ញុំ។ ខ្ញុំសូមអរព្រះគុណដែលទ្រង់បានអត់ទោសគ្រប់ទាំងអំពើបាបរបស់ខ្ញុំ ហើយថែមទាំងប្រទានជីវិតដ៏អស់កល្បជានិច្ចឲ្យខ្ញុំទៀតផង។ សូមទ្រង់កែច្នៃខ្ញុំឲ្យបានទៅជាបុគ្គលដែលទ្រង់សព្វព្រះហឫទ័យចុះ។ អាម៉ែន!

និពន្ធដោយ៖ លោកគ្រូ Dan Schaeffer

ដកស្រង់ និងកែសម្រួលដោយ៖ លោក ឈាង បូរ៉ា, លោក ជួប ប៊ុនហាក់, ណាថាន វែល និងលោក ទេព រ៉ូ

ដកស្រង់ខ្លះៗចេញពី What Is the Christmas Spirit? | Crosswayដោយមានការអនុញ្ញាត។

តើអ្នកគិតយ៉ាងណា?

៣ពិន្ទុ

តើលោកអ្នកយល់យ៉ាងណាដែរ?

តើអ្នកដែលមិនបានសង្គ្រោះ នឹងទទួលរងទុក្ខពីការជំនុំជម្រះដ៏អស់កល្បជានិច្ចឬទេ? (២ថែស្សាឡូនីច ១)

២៥១

ក្តៅៗ

កំណត់ហេតុបណ្ដាញ១៦ ធ្នូ ២០២៥

តើអ្នកដែលមិនបានសង្គ្រោះ នឹងទទួលរងទុក្ខពីការជំនុំជម្រះដ៏អស់កល្បជានិច្ចឬទេ? (២ថែស្សាឡូនីច ១)

កណ្ឌគម្ពីរ ២ថែស្សាឡូនីច ១:៨ បានលើកឡើងអំពី «ការសងសឹក» របស់ព្រះជាម្ចាស់។ ពាក្យជាភាសាក្រិក «អេកឌីខេស៊ីស» (ekdikēsis) បង្ហាញអំពីសេចក្ដីយុត្តិធម៌ ឬការផ្ដន្ទាទោស ដោយសំដៅទៅលើសេចក្ដីយុត្តិធម៌នៃការប្រោសលោះរបស់ព្រះជាម្ចាស់ ជំនួសឲ្យអ្នករើសតាំងរបស់ទ្រង់ (លូកា ១៨:៧-៨) ឬសំដៅទៅលើការផ្ដន្ទាទោសដ៏សុចរិតរបស់ទ្រង់ទៅលើអ្នកដែលទាស់ប្រឆាំងនឹងទ្រង់ (លូកា ២១:២២; រ៉ូម ១២:១៩)។

អានបន្ថែម

តើ៧០អាទិត្យ ក្នុងកណ្ឌគម្ពីរដានីយ៉ែលជាអ្វី? (ដានីយ៉ែល ៩)

៣១០៤

កំណត់ហេតុបណ្ដាញ២៥ វិច្ឆិកា ២០២៥

តើ៧០អាទិត្យ ក្នុងកណ្ឌគម្ពីរដានីយ៉ែលជាអ្វី? (ដានីយ៉ែល ៩)

អត្ថន័យសំខាន់នៃការកាត់ស្រាយកណ្ឌគម្ពីរ ដានីយ៉ែល ៩:២៦-២៧ គឺជាការសង្កេតរបស់សាវ័កម៉ាថាយ ត្រង់ដែលព្រះយេស៊ូវកំពុងមានបន្ទូលអំពីការបំផ្លិចបំផ្លាញដែលត្រូវនឹងមកក្រុងយេរូសាឡឹម និងព្រះវិហារបរិសុទ្ធ (ម៉ាថាយ ២៤:១៥)។

អានបន្ថែម

សារៈសំខាន់នៃការអធិប្បាយតាមសេចក្តីបង្រៀនត្រឹមត្រូវ

១៤៦

កំណត់ហេតុបណ្ដាញ៧ តុលា ២០២៥

សារៈសំខាន់នៃការអធិប្បាយតាមសេចក្តីបង្រៀនត្រឹមត្រូវ

នៅទីបំផុត ដោយសារកណ្ឌនៃព្រះគម្ពីរត្រូវបានកាត់ស្រាយ ហើយគោលលទ្ធិដ៏មានសិរីល្អដែលមាននៅក្នុងបទគម្ពីរត្រូវបានបង្ហាញឲ្យឃើញជាសាធារណៈ នោះការសម្រេចចិត្តមួយនឹងកើតឡើងដោយជៀសមិនរួច

អានបន្ថែម

អត្ថបទបន្ថែមពី កំណត់ហេតុបណ្ដាញ

ហេតុអ្វីបានជាព្រះយេស៊ូវទទួលបុណ្យជ្រមុជទឹក?

៥១៨៣

ក្តៅៗពេញនិយម

កំណត់ហេតុបណ្ដាញ១៣ កុម្ភៈ ២០២៦

ហេតុអ្វីបានជាព្រះយេស៊ូវទទួលបុណ្យជ្រមុជទឹក?

Why was Jesus baptized?

អានបន្ថែម

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

១៥២៨៦

ក្តៅៗពេញនិយម

កំណត់ហេតុបណ្ដាញ៦ មករា ២០២៦

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

វាគ្មានអ្វីគួរឲ្យភ្ញាក់ផ្អើលនោះទេ យើងបានទទួលសំណួរជាច្រើនពីបេសកជននៅតាមតំបន់នានា…

អានបន្ថែម

តើគ្រូគង្វាល និងពួកចាស់ទុំមានភាពខុសគ្នាឬ?(១ធីម៉ូថេ ៣)

៨២៤២

ក្តៅៗ

កំណត់ហេតុបណ្ដាញ៣០ ធ្នូ ២០២៥

តើគ្រូគង្វាល និងពួកចាស់ទុំមានភាពខុសគ្នាឬ?(១ធីម៉ូថេ ៣)

សាវ័ក ប៉ុល និងអ្នកនិពន្ធព្រះគម្ពីរសញ្ញាថ្មីផ្សេងទៀតបានប្រើប្រាស់ពាក្យថា «អ្នកត្រួតត្រា» ជំនួសគ្នាទៅវិញទៅមកជាមួយនឹងពាក្យ «ពួកចាស់ទុំ»។ ឧទាហរណ៍៖ សូមពិចារណានៅក្នុងកណ្ឌគម្ពីរ ទីតុស ១:៥-៧។

អានបន្ថែម