សារៈសំខាន់នៃការអធិប្បាយតាមសេចក្តីបង្រៀនត្រឹមត្រូវ

នៅទីបំផុត ដោយសារកណ្ឌនៃព្រះគម្ពីរត្រូវបានកាត់ស្រាយ ហើយគោលលទ្ធិដ៏មានសិរីល្អដែលមាននៅក្នុងបទគម្ពីរត្រូវបានបង្ហាញឲ្យឃើញជាសាធារណៈ នោះការសម្រេចចិត្តមួយនឹងកើតឡើងដោយជៀសមិនរួច

៧ តុលា ២០២៥អានរយៈពេល ១៩ នាទី

មើល១៤៨ដង

ប៉ុន្មានឆ្នាំមុន ខ្ញុំបានធ្វើការបម្រើក្នុងព្រះវិហារមួយដែលបាន ធ្វើរឿងមួយចំនួនដែលខុសប្លែកបន្តិចបន្តួចពីពេលបច្ចុប្បន្ននេះ។ ពួកយើងបានជួលក្រុមតន្ត្រីដែលមានអ្នកលេងភ្លេងជំនាញៗដែលមិនជឿឲ្យមកលេងភ្លេងរាល់សប្ដាហ៍។ ជាឧទាហរណ៍៖ រឿងដ៏ពិតមួយគឺថា អ្នកលេងហ្គីតារបស់ពួកយើងបានធ្វើដំណើរជុំវិញពិភពលោកជាមួយនឹងក្រុមតន្ត្រីយុវជនដ៏ល្បីមួយ រួចហើយគាត់នឹងមកសម្ដែងនៅព្រះវិហាររបស់យើងរាល់សប្ដាហ៍—នេះគឺជារឿងពិត។

ការអធិប្បាយព្រះបន្ទូលចេះតែបន្ត តែការលាយបញ្ចូលគ្នានៃសេចក្តីពិតតាមប្រធានបទមួយចំនួន មានរឿងរ៉ាវដែលរំជើបរំជួល និងទាក់ទាញអារម្មណ៍ ហើយនិងការបញ្ចប់មួយដែលត្រូវបានរៀបចំឡើង ដើម្បីជំរុញមនុស្សគ្រប់គ្នាឲ្យឆ្លើយតបដោយអារម្មណ៍ទៅនឹងព្រះបន្ទូល។ ពួកយើងធ្លាប់ជាក្រុមជំនុំដែលធម្មតា ក្រុមជំនុំដែលដើរទាន់សម័យកាល ក្រុមជំនុំដែលទាក់ទាញ និងជាក្រុមជំនុំដែលប្រកាសដំណឹងល្អ។ ហើយគ្មានអ្វីដែលចម្លែកទេ ដែលមនុស្សជាច្រើនបានសម្រុកមកឯព្រះវិហាររបស់ពួកយើងនោះ។ ប៉ុន្តែ ពួកគាត់មិនបានមក ដើម្បីទទួលការបង្រៀននោះឡើយទេ—ពួកគេមកដើម្បីរឿងរ៉ាវផ្ទាល់ខ្លួនរបស់ពួកគេ ដើម្បីស្តាប់តន្ត្រី និងរំសាយអារម្មណ៍តែប៉ុណ្ណោះ។ វាក៏មានប្រសិទ្ធិភាពដែរ!

ដោយសាររឿងនេះហើយទើបនៅថ្ងៃអាទិត្យមួយគ្រូគង្វាលរបស់ពួកយើងបានខឹងយ៉ាងខ្លាំង ហើយក្រោកឡើងបណ្ដេញអ្នកលេងភ្លេងស៊ីឈ្នួលទាំងនោះចេញ ហើយប្រាប់ក្រុមជំនុំថា៖ «ប្រសិនបើក្រុមជំនុំណាម្នាក់មានអំណោយទានខាងតន្ត្រី ហើយមិនលេងភ្លេងសម្រាប់ពួកជំនុំដោយឥតគិតថ្លៃទេ នោះក្រុមជំនុំនេះមិនស័ក្តិសមសម្រាប់អ្នកនោះទេ។ លើសពីនេះទៅទៀត គាត់បានចាប់ផ្ដើមអធិប្បាយព្រះបន្ទូលពីមួយខទៅមួយខទៀត តាមកណ្ឌសៀវភៅក្នុងព្រះគម្ពីរ ដើម្បីពង្រឹងក្រុមជំនុំរបស់យើងក្នុងសេចក្តីបង្រៀនត្រឹមត្រូវ ឯបទចម្រៀងវិញ យើងបានផ្លាស់ប្ដូរពីការច្រៀងបទចម្រៀងនៃការពេញនិយមចុងក្រោយពីក្រុមវប្បធម៌នៃព្រះយេស៊ូវ (Jesus Culture) ឬចម្រៀងថ្វាយបង្គំសម័យទំនើប (Hillsong) ទៅជាច្រៀងបទចម្រៀងដែលសម្បូរទៅដោយសេចក្តីពិតខាងឯទេវសាស្ត្រ។ កម្មវិធីថ្វាយបង្គំដែលជំរុញអារម្មណ៍ត្រូវបានជំនួសដោយការអធិប្បាយចំៗនៃព្រះបន្ទូលរបស់ព្រះ។ រំពេចនោះក៏មានការអំពាវនាវឲ្យមានសកម្មភាពផ្អែកតាមព្រះគម្ពីរដោយចេញពីសេចក្ដីស្រឡាញ់...និងការស្តាប់បង្គាប់ចំពោះព្រះគ្រីស្ទ ដែលមិនមែនជាការបង្ខិតបង្ខំខាងអារម្មណ៍ឡើយ។

ក្រោយមកក៏មានអ្នកចាកចេញមួយជាច្រើននាក់។ យើងលែងជាក្រុមជំនុំថ្វាយបង្គំដែលមានមនុស្សច្រើនចូលរួម—ក្រុមជំនុំដែលដាំក្រុមជំនុំ ដែលរីកចម្រើនយ៉ាងរហ័សមួយ ដែលមានវេនថ្វាយបង្គំជាច្រើន និងមានកន្លែងសម្រាប់អ្នកចូលរួមលើសជាង៣០០នាក់—ហើយប្រែទៅជាមានកៅអីដែលគ្មានមនុស្សអង្គុយគ្រប់កន្លែងមួយរំពេច។ បន្តិចម្តងៗ យើងបានឈានហួសពីកន្លែងដែលយើងធ្លាប់នៅ ដូចកាលពីចាប់ផ្ដើមបង្កើតក្រុមជំនុំកាលពីមុន ប៉ុន្តែលើកនេះវាមិនគ្រាន់តែជាចំនួនបរិមាណមនុស្សទេ វាថែមទាំងខាងឯវិញ្ញាណទៀតផង។

គោលលទ្ធិត្រឹមត្រូវ (ផ្សារភ្ជាប់ជាមួយនឹងការអធិស្ឋាន និងភាពអត់ធ្មត់) បានធ្វើឲ្យការបង្រៀននោះមានការលើកឲ្យខ្ពស់ខ្លាំងឡើង។

ពួកយើងត្រូវការគោលលទ្ធិ

មានគ្រូអធិប្បាយល្បីឈ្មោះមួយចំនួនបានស្នើឲ្យពួកយើង «ផ្តាច់ខ្លួន» យើងចេញពីព្រះគម្ពីរសញ្ញាចាស់ ឲ្យចែកចាយជាស៊េរីផ្ដោតលើការកែប្រែអាកប្បកិរិយាពីសៀវភៅនៃការជួយខ្លួនឯងមួយចំនួន ហើយឲ្យក្លាយទៅជាការមានកម្មវិធីថ្វាយបង្គំទាំងមូលដែលប្រើប្រាស់ព្រះគម្ពីរក្នុងការអធិប្បាយ ប៉ុន្តែពោរពេញទៅដោយការកម្សាន្តទៅវិញ។ សព្វថ្ងៃនេះ ក្រុមជំនុំត្រូវការយ៉ាងខ្លាំងនូវប្រភេទនៃការបង្រៀនត្រឹមត្រូវ។

និយាយឲ្យខ្លីទៅ គោលលទ្ធិត្រឹមត្រូវគឺសំខាន់ណាស់។

គ្មានអ្វីដែលអាចបំពេញសេចក្តីត្រូវការដែលមិនចេះស្កប់ស្កល់នៃដួងចិត្តមនុស្សបានទេ។ ក៏គ្មានអ្វីដែលអាចបំបាត់ការស្រេកឃ្លានខាងឯវិញ្ញាណនៃពួកអ្នកជឿដែលត្រូវបានផ្លាស់ប្រែដោយដំណឹងល្អ ហើយក៏គ្មានសេចក្តីពិតណាជាងព្រះរាជបញ្ជានៃបេសកកម្មរបស់ព្រះគ្រីស្ទនៅក្នុងកណ្ឌគម្ពីរម៉ាថាយ ២៨:១៦-២០ នោះដែរ។ ព្រះយេស៊ូវមិនបានមានបន្ទូលថាអ្វីដែលទ្រង់បានបង្រៀនខ្លះ ត្រូវឲ្យពួកសិស្សសម្របតាមរបៀបទំនើបណា...ដែលពួកសិស្សទ្រង់យល់ឃើញថាសមនោះទេ។ ទ្រង់ក៏មិនបានងក់ព្រះសិរយល់ព្រមចំពោះវិធីណាមួយដែលធ្វើឲ្យមនុស្សនៅឈរឯមាត់ទ្វារស្រាប់នោះដែរ។ ទ្រង់បានមានបន្ទូលថា «ចូរបង្កើតសិស្ស» ហើយ «បង្រៀនឲ្យគេកាន់តាមគ្រប់ទាំងសេចក្តី» (ការគូសបញ្ជាក់បន្ថែម) ដែលទ្រង់បានមានបន្ទូលបង្គាប់នៅក្នុងកណ្ឌគម្ពីរ ម៉ាថាយ ២៨:២០។

នៅពេលដែលសាវ័ក ប៉ុល កំពុងផ្តល់ការណែនាំអំពីការធ្វើព័ន្ធកិច្ចដល់អ្នកបម្រើដែលមានវ័យក្មេងរបស់គាត់ម្នាក់ក្នុងសេចក្ដីជំនឿគឺលោក ធីម៉ូថេ ដោយគាត់បានសង្កត់ធ្ងន់ទៅលើសេចក្តីបង្រៀនដែលត្រឹមត្រូវ! មានតែគំរូនេះមួយគត់ គ្មានសំណួរថាតើអ្នកបម្រើដ៏ល្អនៃដំណឹងល្អគឺត្រូវធ្វើយ៉ាងមិចនោះទេ។ យើងត្រូវតែត្រូវបានចិញ្ចឹមបីបាច់ដោយ—ហើយយើងត្រូវចិញ្ចឹមបីបាច់អ្នកដទៃ—ដោយព្រះបន្ទូលនៃសេចក្ដីជំនឿ និងសេចក្តីបង្រៀនដ៏ល្អ (១ធីម៉ូថេទី ៤:៦) ។

តើអ្វីទៅជាមូលដ្ឋានពិតប្រាកដនៃ «គោលលទ្ធិត្រឹមត្រូវ»?

គោលលទ្ធិត្រឹមត្រូវក្នុងជំនឿគ្រីស្ទបរិស័ទ គឺជាការបង្រៀនតាមព្រះគម្ពីរយ៉ាងត្រឹមត្រូវ។ «គោលលទ្ធិ» ត្រូវបានកំណត់ជាសេចក្តីជំនឿស្នូល ដែលត្រូវបានប្រកាន់យកដោយមនុស្សមួយក្រុម។ ពាក្យថា «ត្រឹមត្រូវ» បញ្ជាក់ថាមានអ្វីម្យ៉ាងដែលអាចជឿទុកចិត្តបាន។ ដូច្នេះ នៅពេលដែលក្រុមជំនុំណាមួយចំណាយពេលច្រើន ដើម្បីធ្វើឲ្យអ្នកចូលរួមកម្សាន្តសប្បាយ ហើយបែរជាផ្តល់នូវការអធិប្បាយសើរៗ ក្រុមជំនុំនោះមិនបានបំពេញនូវអ្វីដែលក្រុមជំនុំគួរធ្វើ និងមិនសមជាក្រុមជំនុំនោះទេ។ យើងត្រូវតែអធិប្បាយ និងបង្រៀនសេចក្តីជំនឿស្នូលនៃជំនឿគ្រីស្ទបរិស័ទ ដោយផ្អែកលើអ្វីដែលព្រះគម្ពីរបានបង្រៀន ទោះបីជាពិភពលោកដែលនៅជុំវិញយើងកំពុងផ្លាស់ប្ដូរយ៉ាងណាក៏ដោយ។ ប្រៀបដូចជាមិត្តសម្លាញ់ដែលអាចជឿទុកចិត្តបានម្នាក់ ដែលគាត់នឹងប្រាប់លោកអ្នកនូវអ្វីដែលលោកអ្នកត្រូវស្តាប់ មិនមែននូវអ្វីដែលលោកអ្នកចង់ឮនោះទេ ក្នុងនាមជាក្រុមជំនុំដែលអាចជឿទុកចិត្តបាន (ជាពិសេសគ្រូអធិប្បាយ) គួរតែផ្តល់ឲ្យលោកអ្នកនូវសេចក្តីពិត ហើយគ្មានអ្វីផ្សេងក្រៅពីសេចក្តីពិតឡើយ។

ហេតុអ្វីត្រូវអធិប្បាយគោលលទ្ធិត្រឹមត្រូវ

ការបង្រៀនភាគច្រើនកំពុងស្ថិតក្នុងបញ្ហា ប៉ុន្តែមានរឿងរ៉ាវដ៏អស្ចារ្យជាច្រើននៅខាងមុខ ប្រសិនបើក្រុមជំនុំមួយឈប់លេងសើច ហើយយកព្រះគម្ពីរជាគោលនៅលើអាសនា និងក្នុងគ្រប់ផ្នែកជីវិតក្រុមជំនុំ។ ប្រាកដណាស់ មនុស្សមួយចំនួនប្រហែលជាមិនចូលចិត្តនោះទេ ប៉ុន្តែព្រះបន្ទូលរបស់ព្រះជាម្ចាស់សន្យាថាព្រះពរនឹងលើសពីការទាស់ប្រឆាំងត្រឡប់មកវិញ។

ខាងក្រោមនេះគឺជាហេតុផលសាមញ្ញៗប្រាំយ៉ាងដែលការបង្រៀនគោលលទ្ធិត្រឹមត្រូវគឺសំខាន់ណាស់៖

១. វាកាតព្វកិច្ចរបស់គ្រូគង្វាល និងចាស់ទុំដែលស្មោះត្រង់

តើលោកអ្នកស្គាល់គ្រូគង្វាល និងចាស់ទុំដែលមិនចង់ស្មោះត្រង់ក្នុងព័ន្ធកិច្ចចំពោះព្រះគ្រីស្ទទេ? ភាគច្រើនពួកគេមិនស្មោះត្រង់ទេ។ មែនហើយ គ្រូគង្វាល និងចាស់ទុំដែលទទួលបានការត្រាស់ហៅឲ្យមកធ្វើជាអ្នកដឹកនាំតាមបែបបម្រើនៅក្នុងក្រុមជំនុំនឹងបរាជ័យក្នុងតួនាទីរបស់ខ្លួន ប្រសិនបើគោលលទ្ធិត្រឹមត្រូវមិនមែនជាការផ្ដោតសំខាន់នៃព័ន្ធកិច្ចបម្រើ និងការបង្រៀនរបស់ពួកគាត់នោះ។ មិនអាចមានការកំណត់ការពណ៌នាការងាររបស់គ្រូគង្វាលបាននោះទេ ក្រៅពីព្រះគម្ពីរ។ ព្រះជាម្ចាស់បាន ហើយក៏នៅបន្តដោយរំពឹងថា យើងដែលជាអ្នកនាំសាររបស់ទ្រង់នឹងបំពេញគោលបំណងរបស់ទ្រង់ដែលមានចែងនៅក្នុងបទគម្ពីរ។ អ្នកសំណប់របស់ព្រះត្រូវតែស្មោះត្រង់។ ព្រះគម្ពីរសញ្ញាថ្មីបានរៀបរាប់នូវតួនាទីរបស់អ្នកត្រួតត្រាលើក្រុមជំនុំក្នុងលក្ខណៈផ្សេងៗគ្នា (កិច្ចការ ២០:១៧-៣៨; ១ធីម៉ូថេ ៤:៦, ១១-១៣, ១៦; ២ធីម៉ូថេ ៣:១០, ១៤-១៧; ២ធីម៉ូថេ ៤:១-៥)។ ព្រះជាម្ចាស់បានមានបន្ទូលបង្គាប់ថា ដាច់ខាត រាស្ដ្ររបស់ទ្រង់ត្រូវតែទទួលយកអាហារខាងឯវិញ្ញាណតាមរយៈសេចក្តីបង្រៀនត្រឹមត្រូវ។ គ្រូគង្វាល និង ពួកចាស់ទុំ អាចទទួលបានអំណោយទានតាមវិធីជាច្រើន ដោយគ្រាន់តែស្មោះត្រង់ចំពោះសេចក្តីបង្រៀនគោលលទ្ធិត្រឹមត្រូវក្នុងគ្រប់កិច្ចការទាំងអស់ប៉ុណ្ណោះ។

២. វាសង្គ្រោះអ្នកដែលបាត់បង់

ការរីកចម្រើននៃក្រុមជំនុំពី «ការផ្ទេរ» ដែលមិនសប្បាយចិត្ត គឺមានចំនួនតិចតួចណាស់ ជាពិសេសនៅសហរដ្ឋអាមេរិក ជាកន្លែងដែលយើងចាត់ទុកព្រះវិហាររបស់យើងដូចជាភោជនីយដ្ឋាន ហើយអតិថិជនតែងតែត្រូវជានិច្ច។ ប៉ុន្តែ គោលដៅពិតប្រាកដនៅពេលដែលយើងនិយាយអំពីការអធិប្បាយគោលលទ្ធិត្រឹមត្រូវគឺជាការប្រែចិត្តពិតប្រាកដដែលកើតឡើងនៅពេលដែលមនុស្សបាត់បង់ត្រឡប់មកមានជំនឿតាមរយៈការស្តាប់ព្រះបន្ទូលរបស់ព្រះ (រ៉ូម ១០:១៧)។ ជាការពិតណាស់ មនុស្សដែលបានប្ដូរពីក្រុមជំនុំដែលមានគ្រោះថ្នាក់ខាងឯគោលលទ្ធិមកកាន់ក្រុមជំនុំដែលអធិប្បាយគោលលទ្ធិត្រឹមត្រូវ គឺពិតជាអស្ចារ្យណាស់ ប៉ុន្តែវាអាចមានការជជែកវែកញែកទៅលើរឿងតិចតួចដែលផ្អែមល្ហែមជាងការឃើញអ្នកជឿថ្មីមកទល់មុខជាមួយនឹងអំណាចដ៏គួរឲ្យស្ញប់ស្ញែងនៃព្រះបន្ទូលដ៏រស់ តាមរយៈការអធិប្បាយដ៏ស្មោះត្រង់! ពីនិស្ស័យចាស់ដែលមានពេញដោយអំពើបាបទៅជាការបង្កើតថ្មីក្នុងព្រះគ្រីស្ទ គោលលទ្ធិត្រឹមត្រូវបានសម្អាតដួងចិត្ត និងគំនិតរបស់ចៀមដែលវង្វេង ដោយបង្កើតព្រលឹងពួកគាត់ជាថ្មីឡើងវិញ និងរក្សាសេចក្ដីជំនឿរបស់ពួកគាត់ (១ធីម៉ូថេ ៤:១៦)។

៣. វាផ្តល់អំណាចដល់ពួកអ្នកដែលបានសង្គ្រោះហើយ

គោលលទ្ធិត្រឹមត្រូវជួយជំរុញឲ្យរាស្ត្ររបស់ព្រះជាម្ចាស់ទៅកាន់ការរីកចម្រើនខាងឯវិញ្ញាណ ដោយសារតែពួកគាត់កំពុងតែកសាងជីវិតរបស់ពួកគាត់នៅលើមូលដ្ឋានគ្រឹះនៃថ្មដានៃព្រះបន្ទូលរបស់ទ្រង់ ដែលបានបង្រៀនយ៉ាងត្រឹមត្រូវ និងអាចយកទៅអនុវត្តជាក់ស្ដែងបានយ៉ាងល្អ។ ពួកគាត់ត្រូវបានកៀរគរ និងទទួលបានការបង្រៀនហ្វឹកហ្វឺន ដើម្បីឲ្យរស់នៅពេញវ័យក្នុងសេចក្ដីជំនឿរបស់ពួកគាត់ និងដើម្បីការពារពួកគាត់ពីការបង្រៀនខុសឆ្គង (អេភេសូរ ៤:១១-១៤)។ ការមានគោលលទ្ធិត្រឹមត្រូវផ្តល់អំណាចដល់គ្រីស្ទបរិស័ទឲ្យរស់នៅក្នុងជីវិតដែលជះឥទ្ធិពលខ្លាំងដោយសារពួកគាត់រស់នៅដោយមានទំនាក់ទំនងត្រឹមត្រូវជាមួយនឹងព្រះជាម្ចាស់ ជាមួយអ្នកជឿដទៃទៀត និងពិភពលោកទាំងមូល។ ទំនាក់ទំនងត្រឹមត្រូវជាមួយព្រះជាម្ចាស់មានន័យថា ជាការយល់ឃើញត្រឹមត្រូវមួយនៃដំណឹងល្អ និងលក្ខណសម្បត្តិរបស់ទ្រង់ ដូចជាភាពបរិសុទ្ធ និងភាពមានគ្រប់ព្រះចេស្ដាជាដើម។ ទំនាក់ទំនងត្រឹមត្រូវជាមួយនឹងបងប្អូនរួមជំនឿមានន័យថា ការបម្រើគ្នាទៅវិញទៅមក (កាឡាទី ៥:១៣) ការស្រឡាញ់គ្នាទៅវិញទៅមក (រ៉ូម ១៣:៨) ការអត់ទោសឲ្យគ្នាទៅវិញទៅមក (អេភេសូរ ៤:៣២) កំឡាចិត្តគ្នាទៅវិញទៅមក (ហេព្រើរ ៣:១៣) និងជំរុញគ្នាទៅវិញទៅមកក្នុងការប្រព្រឹត្តការល្អ (ហេព្រើរ ១០:២៤)។ ទំនាក់ទំនងត្រឹមត្រូវជាមួយមនុស្សក្នុងលោកីយ៍នេះ មានន័យថាគឺជាការផ្សាយដំណឹងល្អដល់ពួកគាត់ (រ៉ូម ១:១៦) ធ្វើបន្ទាល់ពីជំនឿរបស់លោកអ្នក (កូឡូស ៤:៥) និងមិនដែលចរចាជាមួយនឹងសេចក្តីពិតនោះឡើយ (១កូរិនថូស ១៦:១៣)។ វាជារឿងអស្ចារ្យដែលមិនគួរឲ្យជឿនូវអ្វីដែលអាចកើតឡើងនៅពេលដែលគ្រីស្ទបរិស័ទត្រូវបានបង្រៀនពីគោលលទ្ធិត្រឹមត្រូវ ហើយរស់នៅក្នុងជីវិតរបស់ពួកគេ ដើម្បីថ្វាយសិរីល្អដល់ព្រះជាម្ចាស់នោះ។

៤. វាបន្សុទ្ធក្រុមជំនុំ

ការអធិប្បាយគោលលទ្ធិត្រឹមត្រូវមានសារៈសំខាន់ណាស់ ពីព្រោះវាមិនត្រឹមតែបង្កើតអ្នកជឿដែលរឹងមាំប៉ុណ្ណោះទេ វាថែមទាំងបន្សុទ្ធក្រុមជំនុំពីក្រុមក្លែងក្លាយថែមទៀតផង។ ការនេះអាចមិនទំនងជាយុទ្ធសាស្ត្រ «ទន់ភ្លន់» ប៉ុន្តែសូមពិចារណាមួយភ្លែតនូវអ្វីដែលព្រះយេស៊ូវបានធ្វើ ដើម្បីកាត់បន្ថយចំនួនអ្នកដែលដើរតាមទ្រង់សើរៗ ដោយគ្រាន់តែបំពេញព្រះទ័យទ្រង់តែប៉ុណ្ណោះ។ លោក លូកាកត់ត្រាអំពីសេចក្តីពិតដ៏តឹងរ៉ឹងបំផុតមួយដែលព្រះយេស៊ូវបានចែកចាយក្នុងចំណោមសេចក្តីបង្រៀននានារបស់ទ្រង់ នៅពេលដែលហ្វូងមនុស្សមកឯទ្រង់កាន់តែច្រើនឡើងៗ (លូកា ១៤:២៥-៣៥)។ កំពុងតែព្រះយេស៊ូវប្រទានអាហារដោយឥតគិតថ្លៃ ធ្វើការអស្ចារ្យ និងផ្តល់គតិបណ្ឌិតសុខៗ ភ្លាមនោះទ្រង់បានបង្រៀនគោលលទ្ធិស៊ីជម្រៅ និងសេចក្តីពិតដ៏រឹងមាំដែលវាបំបែកពួកអ្នកដែលដើរតាមទ្រង់ពិតប្រាកដចេញពីពួកអ្នកដែលដើរតាមទ្រង់ក្លែងក្លាយ។ ពួកអ្នកដែលផ្លាស់ប្រែពិតប្រាកដស្រឡាញ់ព្រះបន្ទូលរបស់ទ្រង់ រីឯពួកអ្នកដែលផ្លាស់ប្រែក្លែងក្លាយវិញនឹងបដិសេធវា។ នៅទីបំផុត ដោយសារកណ្ឌនៃព្រះគម្ពីរត្រូវបានកាត់ស្រាយ ហើយគោលលទ្ធិដ៏មានសិរីល្អដែលមាននៅក្នុងបទគម្ពីរត្រូវបានបង្ហាញឲ្យឃើញជាសាធារណៈ នោះការសម្រេចចិត្តមួយនឹងកើតឡើងដោយជៀសមិនរួច...ដោយអ្នកដែលបានស្តាប់ឮសេចក្តីពិត។ ដួងចិត្តពួកគេបើមិនងាកទៅរកព្រះបន្ទូលទេ នោះគេសើចនឹងចំអក ហើយបែរចេញតែប៉ុណ្ណឹង។ នេះជាផ្នែកមួយដ៏សំខាន់នៃកាតព្វកិច្ចរបស់គ្រូគង្វាលក្នុងការចែកចាយព្រះបន្ទូល។ ការធ្វើដូច្នេះគាត់កំពុងចូលរួមក្នុងការកសាងក្រុមជំនុំរបស់ព្រះគ្រីស្ទ ដែលរួមបញ្ចូលទាំងការបន្សុទ្ធក្រុមជំនុំពីពួកក្លែងបន្លំ។

៥. វាជះឥទ្ធិពលនាពេលអនាគត

ឥឡូវនេះ មុននឹងលោកអ្នកគិតថា «ការអធិប្បាយគោលលទ្ធិត្រឹមត្រូវ» ជាវេទិកាសិក្សាដ៏គួរឲ្យធុញទ្រាន់មួយនៅក្នុងក្រុមជំនុំរៀងរាល់សប្ដាហ៍ សូមរម្លឹកខ្លួនលោកអ្នកអំពីអ្វីដែលជាលទ្ធផលចុងក្រោយនៃគោលលទ្ធិត្រឹមត្រូវនេះសិន៖ ការបង្រៀនតាមបែបព្រះគម្ពីរដែលអាចទុកចិត្តបាន និងគ្មានកំហុស។ ការអធិប្បាយគោលលទ្ធិត្រឹមត្រូវអាចមើលទៅហាក់ដូចជាមិនសូវចាប់អារម្មណ៍ ហើយធម្មតាៗចំពោះមនុស្សមួយចំនួន ប៉ុន្តែវាសំខាន់ណាស់! ប្រសិនបើអ្នកដឹកនាំក្រុមជំនុំសម័យព្រះគម្ពីរសញ្ញាថ្មីមានឆន្ទៈប្រថុយជីវិតរបស់ពួកគាត់ចំពោះរឿងហ្នឹងទៅហើយ ចុះហេតុអ្វីបានជាយើងមិនគួរចាត់ទុកវាអាទិភាព សម្រាប់យើងក្នុងពេលបច្ចុប្បន្ននេះ? ឥទ្ធិពលនេះគឺជាឥទ្ធិពលមួយដែលមានកម្រិតខ្ពស់ និងមានអំណាចខ្លាំង។ នៅពេលដែលក្រុមជំនុំដំបូងបានបង្រៀនគោលលទ្ធិត្រឹមត្រូវ វាបានបង្ហាញឲ្យឃើញគ្រប់របៀបដែលត្រឹមត្រូវ (កិច្ចការ ២:៤០-៤១)។ ប្រសិនបើអ្នកជឿជំនាន់មុនអធិប្បាយគោលលទ្ធិត្រឹមត្រូវ ហើយឈរលើសេចក្តីពិត នោះពួកគាត់នឹងធ្វើជាគំរូនៃភាពស្មោះត្រង់សម្រាប់អ្នកជំនាន់ក្រោយជាមិនខាន។ និយាយម្យ៉ាងទៀតបានថា អ្នកជំនាន់មុននឹងបង្កើតសិស្សជំនាន់ក្រោយដែលចេះបង្កើតសិស្សបន្តទៀត ដោយឈរលើមូលដ្ឋានគ្រឹះនៃការបង្កើតសិស្ស ដែលពួកគាត់ត្រូវការ ដើម្បីថ្វាយសិរីល្អដល់ព្រះជាម្ចាស់។

ការអធិប្បាយតាមគោលលទ្ធិត្រឹមត្រូវគឺមានសារៈសំខាន់ទាំងពេលបច្ចុប្បន្ន និងជារៀងរហូតដែរ។

និពន្ធដោយ៖ Costi Hinn
បកប្រែដោយ៖ លោក ថៃ វណ្ណៈ
ជំនួយការបកប្រែ៖ លោក ង៉ែត វិទូ និងលោក ឈាង បូរ៉ា
កែសម្រួលដោយ៖ លោក ខែម បូឡុង, លោក ស៊ូ ទិត្យ, លោក ទេព រ៉ូ, លោក ឯក សត្យា, លោក ហុង សម្ភស, លោក សឹម រក្សា,និងលោកស្រី ឡូញ ស្រីរដ្ឋ
ដកស្រង់ខ្លះៗ និងកែសម្រួលចេញពី forthegospel.org ដោយមានការអនុញ្ញាត។

ចំណាំ៖ យើងបានទទួលការអនុញ្ញាតឲ្យកែសម្រួលលើឯកសារដើមរបស់អ្នកនិពន្ធ។

អំពីអ្នកនិពន្ធ៖ លោកគ្រូ Costi W. Hinn ជាគ្រូគង្វាលរៀមច្បងនៅព្រះវិហារ Mission Bible នៅ Orange County រដ្ឋកាលីហ្វញ៉ា។ គាត់មានការឆេះឆួលក្នុងការពង្រឹង និងបង្ហាត់ឲ្យគ្រីស្ទបរិស័ទរស់នៅដោយមានភាពក្លាហានសម្រាប់ព្រះយេស៊ូវគ្រីស្ទ។ ទាក់ទងនឹងប្រវត្តិ និងជំនាញរបស់គាត់ គាត់បង្រៀនមនុស្សម្នានៅជុំវិញពិភពលោកនេះអំពីរបៀបនៃការដោះស្រាយដំណឹងល្អដែលសន្យាភាពចម្រុងចម្រើន។ គាត់មានចំណែកក្នុងការចូលរួមនិពន្ធសៀវភៅ Defining Deception ជាមួយនឹងអ្នកនិពន្ធម្នាក់ទៀត ហើយគាត់ក៏បាននិពន្ធសៀវភៅ God, Greed, and the (Prosperity) Gospel (Zondervan, ខែសីហា ឆ្នាំ២០១៩)។ ប៉ុស្តិ៍ទូរទស្សន៍ CNN បានចាក់ផ្សាយអំពីការងាររបស់គាត់ ទស្សនាវដ្ដី Christianity Today និងកន្លែងបោះពុម្ពផ្សេងៗទៀតក៏បានចាក់ផ្សាយអំពីការងាររបស់គាត់ផងដែរ។ លោកគ្រូ Costi បានបញ្ចប់ការសិក្សារបស់គាត់នៅឯមហាវិទ្យាល័យ Dallas Baptist ហើយឥឡូវនេះកំពុងរៀនបន្តយកបណ្ឌិតពីរទៀតនៅឯសាលាព្រះគម្ពីរ Midwestern Baptist Theological។ សព្វថ្ងៃនេះ គាត់ស្នាក់នៅ Irvine រដ្ឋកាលីហ្វញ៉ា ជាមួយនឹងប្រពន្ធ និងកូន៣នាក់របស់គាត់។

តើអ្នកគិតយ៉ាងណា?

០ពិន្ទុ

តើលោកអ្នកយល់យ៉ាងណាដែរ?

តើ៧០អាទិត្យ ក្នុងកណ្ឌគម្ពីរដានីយ៉ែលជាអ្វី? (ដានីយ៉ែល ៩)

៤១០៩

កំណត់ហេតុបណ្ដាញ២៥ វិច្ឆិកា ២០២៥

តើ៧០អាទិត្យ ក្នុងកណ្ឌគម្ពីរដានីយ៉ែលជាអ្វី? (ដានីយ៉ែល ៩)

អត្ថន័យសំខាន់នៃការកាត់ស្រាយកណ្ឌគម្ពីរ ដានីយ៉ែល ៩:២៦-២៧ គឺជាការសង្កេតរបស់សាវ័កម៉ាថាយ ត្រង់ដែលព្រះយេស៊ូវកំពុងមានបន្ទូលអំពីការបំផ្លិចបំផ្លាញដែលត្រូវនឹងមកក្រុងយេរូសាឡឹម និងព្រះវិហារបរិសុទ្ធ (ម៉ាថាយ ២៤:១៥)។

អានបន្ថែម

១៣៩

កំណត់ហេតុបណ្ដាញ២៧ សីហា ២០២៥

ប្រកាសអំពីព្រះយេស៊ូវនៅលើកាប៉ាល់ទីតានិច

បើសិនជាអ្នកកំពុងតែស្ថិតនៅក្នុងគ្រោះមហន្តរាយ តើអ្នកមានចិត្តចង់ផ្សាយដំណឹងល្អ ដល់មនុស្សនៅជុំវិញអ្នកទេ?

អានបន្ថែម

ហេតុផល៤យ៉ាង ដែលលោកអ្នកគួរអធិប្បាយតាមរយៈកណ្ឌគម្ពីរ អេសាយ

១១៣៧

កំណត់ហេតុបណ្ដាញ១២ ឧសភា ២០២៥

ហេតុផល៤យ៉ាង ដែលលោកអ្នកគួរអធិប្បាយតាមរយៈកណ្ឌគម្ពីរ អេសាយ

អធិប្បាយកណ្ឌគម្ពីរអេសាយ ដើម្បីឲ្យឃើញអំពីសិរីល្អនៃសេចក្តីសង្គ្រោះរបស់ព្រះជាម្ចាស់ដែលមានព្រះជន្មរស់ ដែលមានការឆ្លុះបញ្ចាំងលើព្រះភក្ត្ររបស់ព្រះយេស៊ូវគ្រីស្ទ។

អានបន្ថែម

អត្ថបទបន្ថែមពី កំណត់ហេតុបណ្ដាញ

១៩

កំណត់ហេតុបណ្ដាញ៦ កក្កដា ២០២៦

តើខ្ញុំអាចនៅតែមានសេចក្ដីអំណរក្នុងគ្រាដែលមានពេញដោយសេចក្ដីសង្ស័យបានដែរឬទេ?

សូមស្វាគមន៍មកកាន់ថ្ងៃច័ន្ទនេះ ជាថ្ងៃចុងក្រោយនៃខែកក្កដា។ កាលពីថ្ងៃព្រហស្បតិ៍មុន យើងបានរៀនអំពីសេចក្ដីអំណររបស់ព្រះជាម្ចាស់…

អានបន្ថែម

ហេតុអ្វីបានជាព្រះយេស៊ូវទទួលបុណ្យជ្រមុជទឹក?

១៨២៦៩

ក្តៅៗពេញនិយម

កំណត់ហេតុបណ្ដាញ១៣ កុម្ភៈ ២០២៦

ហេតុអ្វីបានជាព្រះយេស៊ូវទទួលបុណ្យជ្រមុជទឹក?

Why was Jesus baptized?

អានបន្ថែម

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

១៥៣២១

ក្តៅៗពេញនិយម

កំណត់ហេតុបណ្ដាញ៦ មករា ២០២៦

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

វាគ្មានអ្វីគួរឲ្យភ្ញាក់ផ្អើលនោះទេ យើងបានទទួលសំណួរជាច្រើនពីបេសកជននៅតាមតំបន់នានា…

អានបន្ថែម

តើគ្រូគង្វាល និងពួកចាស់ទុំមានភាពខុសគ្នាឬ?(១ធីម៉ូថេ ៣)

១០២៦១

ក្តៅៗ

កំណត់ហេតុបណ្ដាញ៣០ ធ្នូ ២០២៥

តើគ្រូគង្វាល និងពួកចាស់ទុំមានភាពខុសគ្នាឬ?(១ធីម៉ូថេ ៣)

សាវ័ក ប៉ុល និងអ្នកនិពន្ធព្រះគម្ពីរសញ្ញាថ្មីផ្សេងទៀតបានប្រើប្រាស់ពាក្យថា «អ្នកត្រួតត្រា» ជំនួសគ្នាទៅវិញទៅមកជាមួយនឹងពាក្យ «ពួកចាស់ទុំ»។ ឧទាហរណ៍៖ សូមពិចារណានៅក្នុងកណ្ឌគម្ពីរ ទីតុស ១:៥-៧។

អានបន្ថែម