តើព្រះយេស៊ូវធ្លាប់ធ្វើដំណើរទៅប្រទេសឥណ្ឌាមែនឬ?

មានគេវាយប្រហារលើកណ្ឌគម្ពីរដំណឹងល្អទាំងបួនអស់ប្រមាណជាង២០០០ឆ្នាំហើយ ដែលតាមពិតទៅ គ្មានសៀវភៅណាផ្សេងទៀតបានទទួលការពិនិត្យពិច័យជាជាងព្រះគម្ពីរនោះទេ ប៉ុន្តែព្រះគម្ពីរនៅតែស្ថិតស្ថេរ ទោះបើមានគេព្យាយាមជាច្រើនលើកច្រើនសារក្នុងការលប់បំបាត់ចោលក៏ដោយ។

១៨ កុម្ភៈ ២០១៩អានរយៈពេល ១៣ នាទី

មើល២១៥៧៤ដង៦មតិ

តើ

ព្រះយេស៊ូវធ្លាប់ធ្វើដំណើរទៅប្រទេសឥណ្ឌាមែនឬ?

ចម្លើយ៖ គ្មានខគម្ពីរយោងណាក្នុងព្រះគម្ពីរលើកឡើងទាក់ទងនឹងគំនិតដែលថា ព្រះយេស៊ូវទៅស្មិងស្មាធិ៍នៅប្រទេសឥណ្ឌាមុនទ្រង់ចាប់ផ្ដើមព័ន្ធកិច្ចរបស់ទ្រង់នៅប្រទេសអ៊ីស្រាអែលទេ។ ហើយក៏គ្មានភស្តុតាងផងដែរ ដែលថាទ្រង់បានចាកចេញពីស្រុកកំណើតរបស់ទ្រង់ក្នុងពេលណាមួយ ដើម្បីទៅប្រទេសឥណ្ឌា។ ចេញពីកណ្ឌដំណឹងល្អទាំងបួន មានតែពីរកណ្ឌទេ ដែលបានលើកឡើងអំពីការប្រសូតរបស់ព្រះយេស៊ូវ (ម៉ាថាយ និងលូកា) ហើយក្នុងនោះមានតែមួយកណ្ឌ (លូកា) ទេ ដែលលើកឡើងអំពីជីវិតរបស់ព្រះយេស៊ូវមុនទ្រង់ចាប់ផ្ដើមព័ន្ធកិច្ចរបស់ទ្រង់អស់រយៈពេលបីឆ្នាំនៅប្រទេសអ៊ីស្រាអែល។ ដូច្នេះ ចាប់ពីកំណើតរបស់ព្រះយេស៊ូវរហូតដល់ទ្រង់មានព្រះជន្ម១២ឆ្នាំ ព្រះគម្ពីរបានប្រាប់យើងតិចតួចណាស់ អំពីអ្វីដែលកើតឡើងក្នុងជីវិតរបស់ទ្រង់។ ហើយចាប់តាំងពីព្រះជន្ម១២ឆ្នាំដល់៣០ឆ្នាំ យើងមិនមានព័ត៌មានអ្វីពីទ្រង់ទេ។ ការនេះបាននាំឲ្យមានមនុស្សជាច្រើនងឿងឆ្ងល់ថា តើព្រះយេស៊ូវបានធ្វើអ្វីខ្លះក្នុងអំឡុងឆ្នាំហ្នឹង។

តាមទស្សនៈគោលជំនឿដើម ព្រះយេស៊ូវបានពេញវ័យឡើងនៅស្រុកណាសារ៉ែតជាមួយនឹងក្រុមគ្រួសាររបស់ទ្រង់រហូតដល់ពេលទ្រង់ចាប់ផ្ដើមព័ន្ធកិច្ច។ ទោះបើព្រះគម្ពីរមិនបានលើកឡើងយ៉ាងចំៗអំពីចំណុចនេះ ក៏ខគម្ពីរមួយចំនួនជាបន្តបន្ទាប់ក្នុងកណ្ឌគម្ពីរលូកាបាននិយាយបង្កប់អំពីចំណុចនេះផងដែរ។ «រួចទ្រង់យាងមកដល់ណាសារ៉ែត ជាស្រុកដែលទ្រង់គង់នៅពីកុមារ ក៏ចូលទៅក្នុងសាលាប្រជុំនៅថ្ងៃឈប់សម្រាក តាមទម្លាប់ទ្រង់ ហើយឈរឡើង ដើម្បីអានមើលគម្ពីរ....គ្រប់គ្នាជាសាក្សីពីទ្រង់ ក៏អស្ចារ្យក្នុងចិត្តពីព្រះបន្ទូលដ៏ផ្អែមពីរោះ ដែលចេញពីព្រះឱស្ឋទ្រង់មក ហើយគេនិយាយថា តើអ្នកនេះមិនមែនជាកូនយ៉ូសែបទេឬអី តែទ្រង់មានបន្ទូលទៅគេថា ពិតប្រាកដជាអ្នករាល់គ្នា នឹងនិយាយពាក្យប្រៀបនេះដាក់ខ្ញុំថា គ្រូពេទ្យអើយ ចូរមើលខ្លួនអ្នកឲ្យជាសិនចុះ ការអ្វីដែលយើងបានឮថា អ្នកធ្វើនៅក្រុងកាពើណិម នោះចូរធ្វើនៅស្រុករបស់ខ្លួននេះដែរ ទ្រង់ក៏មានបន្ទូលទៀតថា ខ្ញុំប្រាប់អ្នករាល់គ្នាជាប្រាកដថា គ្មានហោរាណាដែលគេរាប់អាននៅក្នុងស្រុករបស់ខ្លួននោះទេ» (លូកា ៤:១៦, ២២-២៤)។ សូមកត់សម្គាល់ត្រង់ថា លោកគ្រូពេទ្យ លូកា បានលើកឡើងថា ព្រះយេស៊ូវ «គង់នៅ» ស្រុកណាសារ៉ែត ហើយគាត់ក៏លើកឡើងពីរដងថា ណាសារ៉ែតគឺជាស្រុកដែលព្រះយេស៊ូវបានគង់នៅ។ លើសពីនោះទៅទៀត អស់អ្នកនៅក្នុងសាលាប្រជុំក៏ស្គាល់ព្រះយេស៊ូវ ហើយដឹងផងដែរថា ទ្រង់គឺជាកូនរបស់លោក យ៉ូសែប។ ចំណុចទាំងអស់នេះហើយនាំឲ្យយើងសន្និដ្ឋានថា ព្រះយេស៊ូវបានរស់នៅម្ដុំស្រុកណាសារ៉ែតរហូតដល់ទ្រង់ទទួលពិធីជ្រមុជទឹក។

ទោះបើកំណត់ត្រានេះច្បាស់ប៉ុណ្ណាក៏ដោយ ក៏នៅមានមនុស្សមួយចំនួនចង់បញ្ចូលសាច់រឿងក្នុងចន្លោះជីវិតរបស់ព្រះយេស៊ូវដោយដាក់ដំណើរផ្សងព្រេង និងរឿងអាថ៌កំបាំងយ៉ាងឱឡារិកផងដែរ។ មានរឿងរ៉ាវប្រឌិតបានដំណាលអំពីការដែលព្រះយេស៊ូវនៅវ័យកុមារថា ទ្រង់ជាក្មេងខិលខូចបោកប្រាស់គេ ជាជាងថាជាព្រះរាជបុត្រានៃព្រះជាម្ចាស់។ ហើយអ្នកខ្លះទៀតបានដំណាលថា ទ្រង់បានធ្វើដំណើរទៅប្រទេសឥណ្ឌា ដើម្បីរៀនធម៌អារ្យអាថ៌កំបាំងរបស់សាសនាហិណ្ឌូ ព្រះពុទ្ធសាសនា និងគ្រូៗនៅលោកខាងកើត។ សរុបសេចក្ដីទៅ មិនខ្វះទេមានឯកសារក្លែងបន្លំជាច្រើន ដែលអះអាងថា ពួកគាត់មាន «ភស្តុតាងយ៉ាងជាក់លាក់» អំពីអំឡុងឆ្នាំចន្លោះរបស់ព្រះយេស៊ូវ។ តាមធនធានឯកសារផ្សេងទៀត អ្នកខ្លះបានអះអាងថា ព្រះយេស៊ូវទំនងជាបានចំណាយពេល១៧ឆ្នាំ នៅប្រទេសឥណ្ឌាមុនទ្រង់ចាប់ផ្ដើមព័ន្ធកិច្ចនៅប្រទេសអ៊ីស្រាអែល ហើយតាមធនធានឯកសារផ្សេងទៀតមានអ្នកខ្លះថា បន្ទាប់ពីព្រះយេស៊ូវបានឆ្លងកាត់ការជាប់ឆ្កាងដោយទ្រង់មានដង្ហើមនៅឡើយ ព្រះអង្គក៏បានទៅប្រទេសឥណ្ឌា ហើយក៏បានសុគតនៅអាយុ១២០ឆ្នាំ។ មើលទៅទ្រឹស្ដីទាំងអស់នេះ ហាក់បីដូចជាយកអត្តសញ្ញាណអំពីព្រះយេស៊ូវទៅនឹងសង្ឃម្នាក់នៅតំបន់កាស្មៀរ (Kashmiri) ដែលមានឈ្មោះថា អ៊ីសា យូស អាសាហ្វ (Issa Yuz Asaf [ដែលប្រែថា «យេស៊ូវដែលជាកូនយ៉ូសែប»])។

អ្នកនិពន្ធថ្មីៗជាងគេដែលលើកស្ទួយទស្សនៈមួយនេះគឺលោក ហូលហ្គឺ ខៀរស្ទ័ន (Holger Kersten) ក្នុងសៀវភៅរបស់គាត់ដែលមានចំណងជើងជាភាសាអង់គ្លេសថា Jesus Lived in India: His Unknown Life Before and After the Crucifixion (1994) ដែលប្រែថា ព្រះយេស៊ូវបានរស់នៅប្រទេសឥណ្ឌា៖ ជីវិតមិនដឹងអំពីទ្រង់បន្ទាប់ពីជីវិតមុន និងក្រោយការជាប់ឆ្កាង ដែលបោះពុម្ពចេញផ្សាយនៅឆ្នាំ ១៩៩៤។ អ្នកនិពន្ធម្នាក់នេះបានអះអាងថា «ភស្តុតាងដែលថា ព្រះយេស៊ូវពិតជាធ្លាប់រស់នៅប្រទេសឥណ្ឌាគឺគ្មាននរណាម្នាក់អាចតវ៉ានឹងគាត់បានឡើយ»។ លោក ខៀរស្ទ័ន ក៏ជាអ្នកនិពន្ធសៀវភៅក្លែងបន្លំមួយទៀតដែលមានចំណងជើងភាសាអង់គ្លេសថា The Jesus Conspiracy ដែលប្រែថា រឿងអាថ៌កំបាំងសម្ងាត់របស់ព្រះយេស៊ូវ។ ក្នុងសៀវភៅនេះគាត់បានប្រកែកថា ក្រុមជំនុំរ៉ូម៉ាំងកាតូលិកបានបន្លំកាលបរិច្ឆេទកាបូន (carbon dating) ក្រណាត់រុំសពនៅទីក្រុង ទូរីន នៅប្រទេសអ៊ីតាលី (Turin of Italy) ឲ្យធ្លាក់លើសម័យកាលមជ្ឈិម (the Middle Ages)។ លោក ខៀរស្ទ័ន បានប្រកែកថា ក្រណាត់រុំសពនោះតាមពិតគឺជាក្រណាត់ដែលគេប្រើប្រាស់រុំព្រះសពព្រះយេស៊ូវផ្ទាល់ ប៉ុន្តែគាត់បានប្រកែកថែមទៀតថា ក្រោយការជាប់ឆ្កាងព្រះយេស៊ូវនៅរស់នៅឡើយ។ បញ្ហានៃអ្នកដែលបន្លំគឺថា សៀវភៅរបស់ពួកគាត់មានរៀបរាប់អំពីការបន្លំយ៉ាងហូរហែ ប៉ុន្តែមិនសូវមានភស្តុតាងទេ។ ចំពោះអ្នកនិពន្ធដូចជាលោក ខៀរស្ទ័ន ទេវវិទូខាងព្រះគម្ពីរមិនទទួលយកនូវសម្ដីលើកឡើងរបស់គាត់នោះឡើយ។

លោក និខូឡីស៍ ណូតធូវិធ៍ (Nicolas Notovitch) គឺជាអ្នកនិពន្ធម្នាក់មុនលោក ហូលហ្គឺ ខៀរស្ទ័ន។ លោក ណូតធូវិធ៍ គឺជាទាហានពីប្រទេសរុស្ស៊ី ដែលជាអ្នករាយការណ៍សារព័ត៌មានអំពីសង្គ្រាម ហើយគាត់ក៏បានទៅលេងប្រទេសឥណ្ឌា និងប្រទេសទីបេនៅចុងសតវត្សទី១៩។ កាលគាត់នៅទីនោះ លោក ណូតធូវិធ៍ បានឮជីវប្រវត្តិសង្ឃអ៊ីសា «កូនប្រុសដ៏ល្អបំផុតក្នុងចំណោមប្រុសៗទាំងអស់» ។ លោក ណូតធូវិធ៍ បានកត់ត្រាពង្សាវតារជីវប្រវត្តិរបស់សង្ឃអ៊ីសា ដែលគាត់ចាត់ទុកថាជាព្រះយេស៊ូវ។ គាត់បានសរសេរថា សង្ឃអ៊ីសា បានលូតលាស់ខាងឯប្រាជ្ញា និងចំណេះដឹង ខណៈពេលដែលគាត់កំពុងរៀនសូត្រនៅវិទ្យាល័យដ៏បុរាណមួយនៅស្រុក ណាឡាដា (Nalanda) នៅប្រទេសឥណ្ឌា។ ទោះជាយ៉ាងណាក្ដី លោក ជេ. អក់ឃីបោរ ឌឹហ្គ្លឹស (J. Archibald Douglas) បានលើកឡើងពីភស្តុតាងជាក់លាក់ពីមូលហេតុដែលយើងមិនកួរជឿការនិពន្ធរបស់លោក ណូតធូវិធ៍ គឺព្រោះគាត់មិនទាំងធ្លាប់បានទៅទីអាស្រម ហឺមីស (Hemis) ដែលគាត់បានថា ជាកន្លែងដែលគាត់បានឮអំពីសង្ឃអ៊ីសាទេ។

យើងអាចប្រកែក និងប៉ាន់ស្មានលើហេតុផលដែលមានទ្រឹស្ដីទាក់ទងនឹងព្រះយេស៊ូវច្រើនបាន ប៉ុន្តែ ចំណុចស្នូលដែលយើងគួរនឹកចាំ ទោះបើទ្រឹស្ដីទាំងនោះវាចេញមកពីណាក៏ដោយគឺថា ប្រភពដើមនៃទ្រឹស្ដីរបស់ពួកគាត់ទាំងអស់ចេញមកពីមារសាតាំង ដ្បិតវាជាឪពុកនៃសេចក្ដីកុហក (យ៉ូហាន ៨:៤៤) ។ ដូចដែលវាធ្លាប់កុហកតាំងពីដើមមកម៉្លេះ ហើយវាក៏កំពុងបន្តកុហកដល់ឥឡូវនេះផងដែរ។ កាលព្រះយេស៊ូវទទួលពិធីជ្រមុជទឹក មានសំឡេងប្រកាសចេញពីស្ថានសួគ៌ថា «នេះជាកូនស្ងួនភ្ងារបស់អញ ជាទីពេញចិត្តអញណាស់» (ម៉ាថាយ ៣:១៧)។ ព្រះវរបិតាបានប្រកាសថា ព្រះយេស៊ូវដែលជាអ្នកមកពីស្រុកណាសារ៉ែតគឺជាបុត្រាតែមួយគត់របស់ទ្រង់។ រាល់គ្រប់ទ្រឹស្ដីទាំងនោះគឺសុទ្ធតែជាការដែលពួកគាត់ព្យាយាមបង្វែរយើងចេញពីការប្រកាសរបស់ព្រះជាម្ចាស់ថា ព្រះយេស៊ូវជាព្រះរាជបុត្រារបស់ទ្រង់តែប៉ុណ្ណោះ។ ពួកគាត់ធ្វើបែបនោះតាមរយៈការបន្ទាបបន្ថោក និងការបដិសេធយ៉ាងឱឡារិកថា ព្រះយេស៊ូវគ្រីស្ទមិនមែនជាព្រះទេ។ តាមរយៈការបដិសេធភាពជាព្រះរបស់ព្រះយេស៊ូវ ពួកគាត់បានបន្ទាបព្រះយេស៊ូវមកត្រឹមតែជាគ្រូ ហោរា បណ្ឌិត ឬក៏អ្នកប្រាជ្ញណាម្នាក់ប៉ុណ្ណោះ។ ក្នុងករណីរបស់លោក ខៀរស្ទ័ន គាត់មិនត្រឹមតែបដិសេធចោលនូវភាពជាព្រះ និងការរស់ឡើងវិញរបស់ព្រះគ្រីស្ទទេ ប៉ុន្តែគាត់ថែមទាំងបានអះអាងថា ព្រះយេស៊ូវមិនទាំងបានសុគតនៅលើឈើឆ្កាងផងដែរ។ តាមរយៈការបដិសេធចោលការសុគត និងការរស់ឡើងវិញរបស់ព្រះគ្រីស្ទ លោក ខៀរស្ទ័ន បានវាយប្រហារលើចំណុចស្នូលនៃគោលជំនឿរបស់គ្រីស្ទបរិស័ទ ហើយនោះឯងជាគោលបំណងរបស់គាត់។

ទោះបើមានទ្រឹស្ដីបោកប្រាស់អះអាងមួយចំនួននេះក៏ដោយ ក៏យើងត្រូវតែចងចាំថា កណ្ឌគម្ពីរដំណឹងល្អនៅតែផ្ដល់ដល់យើងនូវការនិពន្ធដ៏ត្រឹមត្រូវបំផុតនៃជីវប្រវត្តិរបស់ព្រះយេស៊ូវ។ ប្រសិនបើព្រះយេស៊ូវបានទៅប្រទេសឥណ្ឌាមុនទ្រង់ចាប់ផ្ដើមព័ន្ធកិច្ចបីឆ្នាំរបស់ទ្រង់ នោះយើងគួររំពឹងថា ក្នុងសេចក្ដីបង្រៀនរបស់ទ្រង់គួរតែមានលក្ខណៈបែបជាស្ទាយឥណ្ឌាយ៉ាងចំៗជាមិនខាន។ ទោះជាយ៉ាងណាក្ដី តើឲ្យយើងយល់បានយ៉ាងដូចម្ដេចទៅទាក់ទងនឹងចំណេះដឹងរបស់ព្រះយេស៊ូវទៅលើគម្ពីរតូរ៉ា (Torah)? ព្រះយេស៊ូវលើកឡើងនូវសម្រង់សម្ដីចេញពីព្រះគម្ពីរសញ្ញាចាស់ក្នុងភាសាហេព្រើរ ក្នុងព័ន្ធកិច្ចរបស់ទ្រង់លើផែនដីនេះ ដល់ថ្នាក់ដែលទ្រង់បានកែតម្រូវ សូម្បីតែពួកសាស្ត្រាចារ្យនៅសម័យកាលទ្រង់ទៀតផង។ មិនគ្រាន់តែប៉ុណ្ណោះ សូម្បីតែលក្ខណៈបែបស្ទាយបង្រៀនរបស់ទ្រង់ក៏ថែមទាំងមានភាពស៊ីគ្នាទៅហ្នឹងរបៀបដែលពួកគ្រូៗសាសន៍យូដាបង្រៀននៅគ្រានោះដែរ។ សាស្ត្រាចារ្យត្រូវតែចំណាយពេលសឹងតែអស់មួយជីវិត ដើម្បីអាចមានចំណេះដឹងដ៏ជ្រៅជ្រះលើក្រឹត្យវិន័យ និងទំនៀមទម្លាប់របស់សាសន៍យូដាបានដូចដែលព្រះយេស៊ូវមាន។ តើយើងគួរជឿថា ព្រះយេស៊ូវបានយកព្រះគម្ពីរសញ្ញាចាស់ទៅជាមួយទ្រង់ទៅប្រទេសឥណ្ឌា ហើយរៀនសូត្រព្រះគម្ពីរក្នុងចន្លោះពេលសម្រាកពីការតាំងសមាធិមែនឬ?

ពិតណាស់! មានមនុស្សមួយចំនួនបានបដិសេធសេចក្ដីពិតនៃភាពត្រឹមត្រូវក្នុងកណ្ឌដំណឹងល្អទាំងបួន។ តើយើងឆ្លើយតបយ៉ាងដូចម្តេចទៅ? លើកលែងតែសាវ័ក យ៉ូហាន គ្រប់សាវ័កទាំងដប់ពីរនាក់ (រួមមានទាំងសាវ័ក ប៉ុល និងសាវ័ក ម៉ាត់ធាស ជំនួសលោក យូដាស) បានស្លាប់ដោយសារជំនឿលើព្រះយេស៊ូវ។ តើឲ្យពួកគាត់ហ៊ានធ្វើបែបនោះដោយព្រោះការកុហកបានយ៉ាងដូចម្ដេចទៅ? លើសពីនោះទៅទៀត តើឲ្យពួកគាត់ធ្វើបែបនោះយ៉ាងដូចម្ដេចទៅ ខណៈពេលដែលពួកគាត់ដឹងថា វាជាសេចក្ដីកុហក? មានគេវាយប្រហារលើកណ្ឌគម្ពីរដំណឹងល្អទាំងបួនអស់ប្រមាណជាង២០០០ឆ្នាំហើយ ដែលតាមពិតទៅ គ្មានសៀវភៅណាផ្សេងទៀតបានទទួលការពិនិត្យពិច័យជាជាងព្រះគម្ពីរនោះទេ ប៉ុន្តែព្រះគម្ពីរនៅតែស្ថិតស្ថេរ ទោះបើមានគេព្យាយាមជាច្រើនលើកច្រើនសារក្នុងការលប់បំបាត់ចោលក៏ដោយ។ ហើយព្រះគម្ពីរនៅបន្តបំផ្លាស់បំប្រែជីវិតមនុស្ស ក៏ដូចជានៅបន្តផ្ដល់ភស្តុតាងលើសេចក្ដីពិតនៃដំណឹងល្អរបស់ព្រះយេស៊ូវគ្រីស្ទ។ «ស្មៅក៏ស្វិតក្រៀម ហើយផ្ការោយរុះចុះ តែព្រះបន្ទូលរបស់ព្រះនៃយើងរាល់គ្នាវិញ នោះស្ថិតស្ថេរនៅជាដរាប» (អេសាយ ៤០:៨)។

និពន្ធដោយ៖ ក្រុម gotquestions.org

បកប្រែដោយ និងកែសម្រួលដោយ៖ លោក ឈាង បូរ៉ា, លោក ទេព រ៉ូ, លោកគ្រូ ជឿ ជីវិចន្ធា និងលោកគ្រូ វ៉ែល ណាថាន

ដកស្រង់ខ្លះៗចេញពី www.gotquestions.org ដោយមានការអនុញ្ញាត។

តើអ្នកគិតយ៉ាងណា?

២៩ពិន្ទុ

តើលោកអ្នកយល់យ៉ាងណាដែរ?

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

១៥៣២៥

ក្តៅៗពេញនិយម

កំណត់ហេតុបណ្ដាញ៦ មករា ២០២៦

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

វាគ្មានអ្វីគួរឲ្យភ្ញាក់ផ្អើលនោះទេ យើងបានទទួលសំណួរជាច្រើនពីបេសកជននៅតាមតំបន់នានា…

អានបន្ថែម

សំណួរដែលបណ្តាលចិត្ត៖ វិធីសាស្ត្រថ្មី ក្នុងការពិភាក្សានៅក្នុងក្រុមតូច

១១២៨

កំណត់ហេតុបណ្ដាញ១៨ វិច្ឆិកា ២០២៥

សំណួរដែលបណ្តាលចិត្ត៖ វិធីសាស្ត្រថ្មី ក្នុងការពិភាក្សានៅក្នុងក្រុមតូច

ព្រះយេស៊ូវ ពួកសាវ័ក និងពួកសិស្សរបស់ទ្រង់ ពួកគេទាំងអស់បានសួរបណ្តាជននូវសំណួរជាក់លាក់។ ឥឡូវនេះ ប្រហែលជាពួកយើងគួរពិចារណាប្រើសំណួរដូចគ្នាទាំងនេះ សម្រាប់ក្រុមតូចរបស់យើងទាំងអស់។

អានបន្ថែម

តើស្ត្រីនឹងបានសង្គ្រោះក្នុងកាលដែលបង្កើតកូន មានន័យយ៉ាងដូចម្ដេច? (១ធីម៉ូថេ ២)

១១១១

កំណត់ហេតុបណ្ដាញ១១ វិច្ឆិកា ២០២៥

តើស្ត្រីនឹងបានសង្គ្រោះក្នុងកាលដែលបង្កើតកូន មានន័យយ៉ាងដូចម្ដេច? (១ធីម៉ូថេ ២)

ស្ត្រីណាដែលទទួលយកតួនាទីដែលព្រះជាម្ចាស់បានតែងតាំងក្នុងខណៈដែលពួកនាងកំពុងបន្ត «សេចក្ដីជំនឿ សេចក្ដីស្រឡាញ់ នឹងសេចក្ដីបរិសុទ្ធ ទាំងមានគំនិតមារយាទ» ក្នុងគុណធម៌គ្រីស្ទបរិស័ទ នោះនាងនឹងរកឃើញថា ខ្លួននឹងបានសង្គ្រោះនៅថ្ងៃចុងក្រោយ។

អានបន្ថែម

អត្ថបទបន្ថែមពី កំណត់ហេតុបណ្ដាញ

១១១

កំណត់ហេតុបណ្ដាញ៦ កក្កដា ២០២៦

តើខ្ញុំអាចនៅតែមានសេចក្ដីអំណរក្នុងគ្រាដែលមានពេញដោយសេចក្ដីសង្ស័យបានដែរឬទេ?

សូមស្វាគមន៍មកកាន់ថ្ងៃច័ន្ទនេះ ជាថ្ងៃចុងក្រោយនៃខែកក្កដា។ កាលពីថ្ងៃព្រហស្បតិ៍មុន យើងបានរៀនអំពីសេចក្ដីអំណររបស់ព្រះជាម្ចាស់…

អានបន្ថែម

ហេតុអ្វីបានជាព្រះយេស៊ូវទទួលបុណ្យជ្រមុជទឹក?

១៨២៧០

ក្តៅៗពេញនិយម

កំណត់ហេតុបណ្ដាញ១៣ កុម្ភៈ ២០២៦

ហេតុអ្វីបានជាព្រះយេស៊ូវទទួលបុណ្យជ្រមុជទឹក?

Why was Jesus baptized?

អានបន្ថែម

តើគ្រូគង្វាល និងពួកចាស់ទុំមានភាពខុសគ្នាឬ?(១ធីម៉ូថេ ៣)

១០២៦៣

ក្តៅៗ

កំណត់ហេតុបណ្ដាញ៣០ ធ្នូ ២០២៥

តើគ្រូគង្វាល និងពួកចាស់ទុំមានភាពខុសគ្នាឬ?(១ធីម៉ូថេ ៣)

សាវ័ក ប៉ុល និងអ្នកនិពន្ធព្រះគម្ពីរសញ្ញាថ្មីផ្សេងទៀតបានប្រើប្រាស់ពាក្យថា «អ្នកត្រួតត្រា» ជំនួសគ្នាទៅវិញទៅមកជាមួយនឹងពាក្យ «ពួកចាស់ទុំ»។ ឧទាហរណ៍៖ សូមពិចារណានៅក្នុងកណ្ឌគម្ពីរ ទីតុស ១:៥-៧។

អានបន្ថែម

តើការជំនុំជម្រះដោយផ្អែកលើការប្រព្រឹត្តិមានន័យយ៉ាងដូចម្ដេច? (វិវរណៈ ២០ និង ២១)

៨២៣១

ក្តៅៗពេញនិយម

កំណត់ហេតុបណ្ដាញ២៣ ធ្នូ ២០២៥

តើការជំនុំជម្រះដោយផ្អែកលើការប្រព្រឹត្តិមានន័យយ៉ាងដូចម្ដេច? (វិវរណៈ ២០ និង ២១)

ឯអ្នកណាដែលឈ្នះ នោះនឹងបានគ្រងសេចក្ដីទាំងនេះទុកជាមរដក អញនឹងធ្វើជាព្រះដល់អ្នកនោះ ហើយអ្នកនោះនឹងធ្វើជាកូន

អានបន្ថែម

មតិយោបល់

មានមតិយោបល់ដែលបានអនុម័ត 6

Eden thuon២៤ កុម្ភៈ ២០១៩
វាបានផ្តល់ចំណេះដឹង មួយផ្មែកទៀតសម្រាប់ខ្ញុំ សូមព្រះប្រទានពរ
1. plovpit.com២៦ កុម្ភៈ ២០១៩
  អរគុណបង សម្រាប់ការបញ្ចេញនូវមតិយោបល់ សូមព្រះប្រទានពរ!!
KEO PONLEU៩ មករា ២០២០
សូមព្រះប្រទានពរដល់បងបញអូនទាំងអស់គ្នា. អាម៉ែន
ចម្ងល់១៤ មករា ២០២០
++តេីព្រះបង្កេីតមនុស្សឬមនុស្សជាអ្នកបង្កេីតព្រះ? តេីវាដូចជាស៊ុតមាន់និងមេមាន់ដែរទេ? អ្នកខ្លះថាមាន់កេីតមុន ចំណែកផ្សេងទៀតគេថាកស៊ុតកេីតមុន។ ចង់សួរថាបេីគ្មានស៊ុតទេ តេីមាន់កេីតពីណា?ហេីយបេីគ្មានមាន់ទេ តេីស៊ុតកេីតពីណា? ++បេីព្រះបង្កេីតមនុស្សពិតមែន ហេតុអ្វីបានជាមនុស្សខ្លះមានទ្រព្យហូរហៀរ ស្របពេលមនុស្សខ្លះទៀតកំពុងតែរស់នៅយ៉ាងវេទនា? ហេតុអ្វីបានជាព្រះបង្កេីតមនុស្សហេីយ ធ្វេីឱ្យមានភាពអយុត្តិធម៌រវាងគ្នាយ៉ាងនេះ? ++ខ្ញុំបានសិក្សាពីគម្គីប៊ីបខ្លះដែរ ត្រង់ចំណុចខ្លះខ្ញុំក៏យល់ស្របព្រោះជាដំបូន្មានល្អ ត្រង់ចំណុចខ្លះទៀតវាហាក់បីដូចជាហួសពីការពិតខ្លាំងពេក វាប្រៀបបានដូចជារឿងទេវកថាអញ្ចឹង? តេីវាជាការងប់ងល់ខ្លាំងរបស់មនុស្សជំនាន់នោះឬ? ++ចំណុចមួយទៀត ននៅកនុងព្រះគម្ពីបញ្ជាក់ថាព្រះជាអ្នកបង្កេីតរបស់សព្វសារពេី ទ្រង់បង្កេីតផែនដី ព្រះចន្ទ ព្រះអាទិ្យ ផ្កាយ សមុទ្រ ភ្នំ...ក្នុងរយៈពេល៦ថ្ងៃហេីយព្រះបង្កេីតមនុស្សដំបូងគេ "អ័រដាម"ដោយសូន្យរូបរួចហេីយផ្លំខ្យល់ដង្ហេីមឱ្យគាត់ ទេីបគាត់មានជីវិតរស់ ហេីយទ្រង់ក៏បានបង្កេីតនាង អេវ៉ា ម្នាក់ទៀតដែលកេីតចេញពីឆ្អឹងជំនីរបស់អ័រដាម តេីនេះមែនទេដែលជាចំណុចចាប់ផ្ដេីមលេីការមិនឱ្យតម្លៃលេីស្រ្តីតាំងពីសម័យបុរាណ? ដោយហេតុតែការបង្រៀនពីសាសនានេះហេីយ ទេីបធ្វេីឱ្យគេមិន ឱ្យតម្លៃលេីស្រ្តីតាំងពីដេីមមក។ ++អ្នកណាដែលមិនស្របតាមព្រះ សុទ្ធតែជាកូនចៅអារក្សសាតាំងទាំងអស់។ អារក្សសាតាំងព្រះជាអ្នកបង្កេីត ហេតុអ្វេីបានាទ្រង់បង្កេីតឱ្យមានកំហុសបែបនេះ។ បេីព្រះកំចាត់អារក្សសាតាំង តាំងពីដំបូងមកក៏គ្មានរឿងអាក្រក់កេីតឡេីងលេីផែនដីនេះដែរ វាជាកំហុសដ៏ធំមួយហេីយ។
1. plovpit.com១៤ មករា ២០២០
  សួរស្ដីបងប្រុស ឬបងស្រី! ជាការល្អដែលបងបានដឹងរឿង ហើយស្គាល់ព្រះគម្ពីរខ្លះៗ(តែមិនមែនទាំងអស់) ហើយខ្ញុំគិតថាបងមិនមែនជាអ្នកជឿព្រះយេស៊ូវនោះទេ ដោយស្ដាប់មើលទៅបងគ្រាន់តែ សិក្សាពីជំនឿព្រះយេស៊ូវ ហើយយកមកវាយប្រហារលើគ្រីស្ទបរិស័ទប៉ុណ្ណោះ។ តើបងស្គាល់ព្រះគម្ពីរប៉ុណ្ណា? តើបងបានចូលរៀនថ្នាក់ហ្វឹកហ្វើនដែរឬទេ ឬគ្រាន់តែអានព្រះគម្ពីរដោយខ្លួនឯង ហើយឃើញចំណុចនេះ ចំនុចនោះ ហើយចេះតែសន្មតបែបនេះ បែបនោះ រួចបង្កើតជាគំនិតអវិជ្ជមាន ហើយលើកយល់ខគម្ពីរនេះដោយខុសបរិបទ។ ចំនុចគោលគឺថា ហេតុអ្វីបានជាបងត្រូវជឿព្រះយេស៊ូវ? តើមានប្រយោជន៍ទេ ពេលខ្ញុំជឿព្រះយេស៊ូវ? តើព្រះយេស៊ូវជានរណា? តើព្រះយេស៊ូវអាចជួយខ្ញុំបានទេ ដែលខ្ញុំជាមនុស្សបាប? តើអ្វីទៅជាគោលបំណងធំរបស់បងក្នុងគំនិត ដែលត្រូវសិក្សាពីព្រះយេស៊ូវ? តើបងសម្រេចចិត្តទទួលជឿព្រះយេស៊ូវហើយឬនៅ? ប្រសិនបើបងពិតជាចង់ដឹង ចង់ស្គាល់ បងគួរតែទៅចូលរួមក្រុមជំនុំ ឬព្រះវិហារ។ តែអ្វីដែលសំខាន់បងត្រូវយល់ឲ្យច្បាស់ថា តើបងចង់ស្វែងយល់អំពីព្រះយេស៊ូវដើម្បីអ្វី? ឬគ្រាន់តែវាយប្រហោរលើគ្រីស្ទបរិស័ទ? ប្រសិនបើមានគំនិតអវិជ្ជមានទៅហើយ ទោះបើពន្យល់យ៉ាងណាក៏មិនអាចដែរ។ ទាក់ទងនឹងអារក្សសាតាំង បងអះអាងថា បងធ្លាប់អានព្រះគម្ពីរខ្លះដែរ ហេតុអ្វីគ្រាន់តែរឿងអារក្សសាតាំង និងដើមកំណើតនៃមនុស្សជាតិ អំពើបាបដើមដំបូង បងហាក់បីដូចជាមិនដឹងអញ្ចឹង? បងវាយប្រហារបែបនេះ ដោយសារតែព្រះគម្ពីរផ្ទាល់ប្រឆាំងនឹងគំនិតរបស់បង ឬក៏ទស្សនៈរបស់បង បើកបង្ហាញអំពីអំពើបាបរបស់បង។ល។ ខ្ញុំមិនអាចឆ្លើយឆ្លងបានទេ ប្រសិនបើមានទស្សនៈគ្រាន់តែចង់វាយប្រហារ (ដោយបងមិនមែនជាមិនជឿ) វាពិតជាពិតបាកក្នុងការនិយាយប្រាប់បង ដោយសារតែបងមិនមែនជាអ្នកជឿព្រះយេស៊ូវ។ នេះជាlink ដែលបងអាចមើលមេរៀនដែលទាក់ទងនឹងដើមកំនើតអារក្ស៖ http://plovpit.com/where-did-satan-came-from/ ផ្លូវពីរ http://plovpit.com/jesus/ សូមព្រះប្រទានពរ!
2. plovpit.com១៤ មករា ២០២០
  ប្រសិនបើបងជាអ្នកជឿមែន វេបសាយនេះ នឹងជួយជាចម្លើយយ៉ាងខ្លាំងសម្រាប់បង ដែលឆ្ងល់ https://www.gotquestions.org/