លុយ និងទ្រព្យសម្បត្តិ

https://www.youtube.com/watch?v=AP9EU6tggqE&t=507s គម្ពីរបានលើកឡើងយ៉ាងក្បោះក្បាយអំពីលុយ និងទ្រព្យសម្បត្តិ។…

១៥ កក្កដា ២០១៩អានរយៈពេល ១២ នាទី

មើល១៤៩៧ដង

https://www.youtube.com/watch?v=AP9EU6tggqE&t=507s

ព្រះ

គម្ពីរបានលើកឡើងយ៉ាងក្បោះក្បាយអំពីលុយ និងទ្រព្យសម្បត្តិ។ មានខគម្ពីរជាច្រើននិយាយអំពីទ្រព្យសម្បត្តិ និងភាពក្រីក្រ។ ចំពោះប្រធានបទមួយចំនួន វាមានភាពងាយស្រួលណាស់ក្នុងការធ្វើឲ្យយើងបែកចេញពីអត្ថន័យដ៏ពេញលេញនៃប្រធានបទនោះ ពីព្រោះព្រះគម្ពីរមានលើកឡើងពីខគម្ពីរដែលទាក់ទងនឹងប្រធានបទនោះតិចតួចពេក។ តើយើងគិតយ៉ាងដូចម្ដេចដែរចំពោះការដេកសំដិលថ្ងៃ ដើម្បីឲ្យស្បែកខ្មៅ? និយាយរួមទៅ យើងមិនសូវមានការណែនាំចំៗច្រើននោះទេ ដូច្នេះយើងក៏មិនអាចទទួលបានច្បាប់ដ៏ជាក់លាក់មួយបានដែរ។

ក៏ប៉ុន្តែ ទាក់ទងជាមួយលុយ និងទ្រព្យសម្បត្តិ យើងមានបញ្ហាមួយដែលផ្ទុយពីចំណុចខាងលើនេះ។ ព្រះគម្ពីរបានលើកឡើងជាច្រើនខអំពីលុយ ហេតុដូច្នេះហើយទើបធ្វើឲ្យយើងមានភាពងាយស្រួលក្នុងការបង្កើតទេវវិទ្យាមិនស្មើគ្នាទាក់ទងនឹងលុយផងដែរ។

ម្យ៉ាងវិញទៀត វាជួយសម្រួលដល់យើងឲ្យងាយស្រួលក្នុងការដឹងថា តើទេវវិទ្យានៃភាពចម្រុងចម្រើនកើតមកពីណា? បើគ្រាន់តែយកសេចក្ដីសន្យាមួយចំនួននៃសេចក្ដីតាំងសញ្ញារបស់លោក ម៉ូសេ ចេញពីបរិបទនៃជាតិសាសន៍របស់ពួកគាត់ ហើយយកសេចក្ដីតាំងសញ្ញាក្នុងកណ្ឌគម្ពីរម៉ាឡាគី ជំពូក៣ អំពីការបើកចំហឃ្លាំងនៃស្ថានសួគ៌ ព្រមទាំងយកចំណុចទាំងពីរនេះមកលាយឡំគ្នានឹងព្រះបន្ទូលរបស់ព្រះយេស៊ូវអំពីការទទួលបាននូវអ្វីៗដែលលោកអ្នកទូលសូមដោយជំនឿ នោះលោកអ្នកនឹងប្រាកដជាអាចបង្កើតឲ្យមានដំណឹងល្អដែលសន្យាពីការមានសុខភាពល្អ និងទ្រព្យសម្បត្តិជាមិនខាន។

មួយវិញទៀតសោត យើងក៏មានភាពងាយស្រួលក្នុងការបង្កើតទេវវិទ្យាយ៉ាងម៉ឺងម៉ាត់ដែលមិនមានភាពស្មើគ្នាផងដែរ។ បើគ្រាន់តែលើកឡើងអំពីការដែលព្រះយេស៊ូវគ្មានកន្លែងណានឹងកើយក្បាលទ្រង់ ហើយបើគ្រាន់តែបើកទៅកាន់រឿងនៃបុរសអ្នកមានម្នាក់ ព្រមទាំងលាយឡំនឹងរឿងនៃបុរសអ្នកមានម្នាក់ទៀតដែលជាមនុស្សលីលា នោះលោកអ្នកនឹងទទួលបានទេវវិទ្យាដែលបង្រៀនថា លុយអាក្រក់ រីឯអស់អ្នកដែលមានលុយក៏អាក្រក់ដែរជាមិនខាន។

ហើយលោកអ្នកក៏ទំនងជាអាចប្រកែកដោយលើកឡើងផងដែរថា ព្រះជាម្ចាស់ស្អប់មនុស្សមានលុយ បើគ្រាន់តែយោងលើរឿងអ្នកមាន និងលោក ឡាសារ។ សូមអានកណ្ឌគម្ពីរយ៉ាកុប។ សូមមើលការរៀបរាប់របស់លោក លូកា ទៅលើសេចក្ដីបង្រៀននៅលើភ្នំ។

សរុបសេចក្ដីទៅ តើយើងគួរគិតយ៉ាងដូចម្ដេចទៅអំពីលុយ និងទ្រព្យសម្បត្តិ? តើយើងគួររក្សាទុកនូវគោលការណ៍ណាខ្លះក្នុងព្រះគម្ពីរ ខណៈពេលដែលយើងឃើញទ្រព្យសម្បត្តិ និងភាពក្រីក្រ និងខណៈពេលដែលយើងកំពុងគ្រប់គ្រងលើទ្រព្យសម្បត្តិ ឬក៏ភាពក្រីក្ររបស់យើង? មានតែពីរបីចំណុចប៉ុណ្ណោះដែលព្រះគម្ពីរបានលើកឡើងយ៉ាងក្បោះក្បាយដែលការនោះគឺជាការដ៏ល្អ ពីព្រោះមានតែពីរបីចំណុចប៉ុណ្ណោះដែលមានភាពស៊ីគ្នាចំពោះមនុស្សគ្រប់ៗរូប នៅគ្រប់ទីកន្លែង ក្នុងការទទួលបាននូវទេវវិទ្យាដ៏ល្អមួយអំពីលុយ។

ចំណុចចាប់ផ្ដើម

កណ្ឌគម្ពីរសុភាសិតគឺជាចំណុចដ៏ល្អមួយក្នុងការចាប់ផ្ដើមបង្កើតនូវទេវវិទ្យាដែលទាក់ទងនឹងការមានទ្រព្យសម្បត្តិសម្ភារៈនិយមដោយយោងតាមព្រះគម្ពីរ។ ជាការចាប់ផ្ដើម មានខគម្ពីរជាច្រើនណាស់ដែលនិយាយលើប្រធានបទនេះ។ ហើយលើសពីនោះទៅទៀត កណ្ឌគម្ពីរនេះក៏មានលើកឡើងអំពីចំណុចខុសៗគ្នាមួយចំនួនទាក់ទងនឹងប្រធានបទនេះផងដែរ។ បើកណ្ឌគម្ពីរលោកុប្បត្ដិគឺជាចំណុចចាប់ផ្ដើមរបស់លោកអ្នក នោះលោកអ្នកនឹងទំនងជាសន្និដ្ឋានថា ព្រះជាម្ចាស់តែងតែធ្វើឲ្យរាស្ត្ររបស់ទ្រង់ចម្រុងចម្រើនជាមិនខាន។ បើកណ្ឌគម្ពីរអេម៉ុសគឺជាចំណុចចាប់ផ្ដើមរបស់លោកអ្នក នោះលោកអ្នកនឹងទំនងជាសន្និដ្ឋានថា អ្នកមានគ្រប់ៗរូបគឺសុទ្ធតែជាអស់អ្នកដែលជិះជាន់អ្នកដទៃជាមិនខាន។ ប៉ុន្តែ ចំពោះកណ្ឌគម្ពីរសុភាសិតវិញ គឺមើលលើទ្រព្យសម្បត្តិ និងភាពក្រីក្រចេញពីពីរ ឬបីទស្សនៈ។ ដោយសារកណ្ឌគម្ពីរនេះគឺជាកណ្ឌសុភាសិតទូទៅ ដូច្នេះយើងមានភាពងាយស្រួលក្នុងការលើកគោលការណ៍ក្នុងសុភាសិតនីមួយៗនោះយកមកអនុវត្តក្នុងសម័យកាលនេះ និងទីកន្លែងខុសៗគ្នាសម្រាប់រាស្ត្ររបស់ព្រះជាម្ចាស់។

កាលពីយប់អាទិត្យមុន យើងខ្ញុំបានអធិប្បាយទៅកាន់ក្រុមជំនុំរបស់យើងខ្ញុំអំពីគោលការណ៍ដប់យ៉ាងចេញពីកណ្ឌគម្ពីរសុភាសិតទាក់ទងនឹងលុយកាក់ និងការមានទ្រព្យសម្បត្តិសម្ភារៈនិយម។ យើងខ្ញុំនឹងមិនលើកឡើងសេចក្ដីអធិប្បាយទាំងមូលនៅក្នុងអត្ថបទមួយនេះទេ ប៉ុន្តែយើងខ្ញុំគិតថាលោកអ្នកនឹងទំនងជាទទួលបានអត្ថប្រយោជន៍ខ្លះៗ បើយើងខ្ញុំគ្រាន់តែលើកឡើងនូវចំណុចគោលៗមួយចំនួន។ ទំនងជាយើងខ្ញុំនឹងលើកឡើងរៀងលម្អិតជាងនេះទៀតនៅពេលក្រោយៗ។

យើងខ្ញុំនឹងលើកឡើងនូវចំណុចជាលំដាប់លំដោយនៃភាគរយដែលកណ្ឌគម្ពីរសុភាសិតបានលើកឡើងទាក់ទិននឹងគោលការណ៍ណាមួយ ព្រោះក្នុងរបៀបនោះ យើងនឹងបញ្ចប់ដោយខ្លឹមសារសំខាន់ៗ។

គោលការណ៍ដប់យ៉ាងចេញពីកណ្ឌគម្ពីរសុភាសិតទាក់ទងនឹងលុយកាក់ និងការមានទ្រព្យសម្បត្តិសម្ភារៈនិយម៖
១. អ្នកមានខ្លះមានហួសហេតុពេក ហើយអ្នកក្រខ្លះក្រល្ហេមល្ហាមដុនដាបពេក ដែលចំណុចផ្ទុយគ្នាស្រឡះនេះនឹងនាំឲ្យមានសេចក្ដីល្បួងប្លែកៗចំពោះអស់អ្នកដែលរស់នៅក្នុងស្ថានភាពរៀងៗខ្លួននោះ (សុភាសិត ៣០:៧-៩)។
២. កុំព្យាយាមហ៊ឺហាដូចគ្រួសារណាមួយឡើយ (សុភាសិត ១២:៩; ១៣:៧)។
៣. អ្នកមាន និងអ្នកក្រមានចំណុចដូចៗគ្នាច្រើនជាងពួកគាត់គិតដល់ទៅទៀត (សុភាសិត ២២:២; ២៩:១៣)។
៤. លោកអ្នកមិនអាចឲ្យលើសជាងការដែលព្រះអាចប្រទានឲ្យលោកអ្នកនោះទេ (សុភាសិត ៣:៩-១០; ១១:២៤; ២២:៩)។
៥. ភាពក្រីក្រតោកយ៉ាកគឺមិនមែនជារឿងល្អទេ (សុភាសិត ១០:១៥; ១៤:២០; ១៩:៤)។
៦. លុយមិនអាចផ្ដល់ជួននូវសុវត្ថិភាពដ៏ខ្ពស់បំផុតបានឡើយ (សុភាសិត ១១:៧; ១១:២៨; ១៣:៨)។
៧. ព្រះអម្ចាស់ស្អប់អស់អ្នកណាដែលប្រើប្រាស់មធ្យោបាយអយុត្តិធម៌ ដើម្បីក្លាយជាអ្នកមាន (សុភាសិត ២១:៦; ២២:១៦, ២២-២៣)។
៨. ព្រះអម្ចាស់ស្រឡាញ់អស់អ្នកដែលមានចិត្តសប្បុរសចំពោះអ្នកក្រ (សុភាសិត ១៤:២១, ៣១; ១៩:៧; ២៨:២១)។
៩. ចូរខំធ្វើការ ហើយការសម្រេចចិត្តដែលល្អៗរបស់លោកអ្នកតែងតែនាំឲ្យមានភាពចម្រុងចម្រើនឡើង (សុភាសិត ៦:៦-១១; ១០:៤; ១៣:១១; ១៤:២៤; ២១:១៧, ២០; ២២:៤, ១៣; ២៧:២៣-២៧; ២៨:២០)។
១០. មានលុយមិនមែនមានន័យថា មានអ្វីៗគ្រប់យ៉ាងនោះទេ។ វាមិននាំឲ្យមានភាពស្កប់ស្កល់ឡើយ (សុភាសិត ២៣:៤-៥)។ វាអន់ជាងប្រាជ្ញា (សុភាសិត ៨:១០-១១, ១៨-១៩; ២៤:៣-៤)។ វាអន់ជាងសេចក្ដីសុចរិត (១០:២; ១៣:២៥; ១៦:៨; ១៩:២២; ២០:១៧; ២៨:៦)។ វាអន់ជាងការកោតខ្លាចព្រះអម្ចាស់ (សុភាសិត ១៥:១៦)។ វាអន់ជាងការបន្ទាបខ្លួន (សុភាសិត ១៦:១៩)។ វាអន់ជាងការមានទំនាក់ទំនងល្អៗ (សុភាសិត ១៥:១៧; ១៧:១)។

ការឈោងចាប់សេចក្ដីសន្និដ្ឋានដ៏សាមញ្ញ និងការស្វែងរកព្រះគ្រីស្ទ

លោកអ្នកមិនអាចមានការយល់ដឹងតាមបែបព្រះគម្ពីរបានឡើយ លុះត្រាតែលោកអ្នកបានត្រៀមខ្លួនរួចជាស្រេចក្នុងការទទួលយកសេចក្ដីពិតមួយចំនួនដែលមានការប្រតែងប្រតោងគ្នាជាមុនសិន។

លោកអ្នកនឹងទំនងជារកបានលុយជាច្រើន ប្រសិនបើលោកអ្នកខំធ្វើការ ហើយមានប្រាជ្ញាយ៉ាងខ្លាំង ប៉ុន្តែបើលោកអ្នកគិតតែពីធ្វើការរកលុយ នោះមានន័យថា លោកអ្នកជាមនុស្សដ៏ល្ងីល្ងើបំផុតហើយ។
លុយគឺជាព្រះពរពីព្រះជាម្ចាស់ ប៉ុន្តែលោកអ្នកនឹងកាន់តែទទួលបានព្រះពរបន្ថែមទៀត បើលោកអ្នកឲ្យលុយនោះទៅកាន់អ្នកដទៃ។
ព្រះជាម្ចាស់បានប្រទានលុយដល់លោកអ្នក ពីព្រោះព្រះអង្គសប្បុរស ប៉ុន្តែព្រះអង្គមានចិត្តសប្បុរសជាមួយនឹងលោកអ្នក ដើម្បីឲ្យលោកអ្នកចេះមានចិត្តសប្បុរសជាមួយនឹងអ្នកដទៃដែរ។ ហើយបើលោកអ្នកមានចិត្តសប្បុរសជាមួយនឹងអ្នកដទៃ នោះទ្រង់ក៏នឹងកាន់តែមានចិត្តសប្បុរសជាមួយនឹងលោកអ្នកថែមទៀតដែរ។
ការសន្សំលុយគឺជាការមានប្រាជ្ញា ប៉ុន្តែចូរកុំគិតថា លុយនឹងផ្ដល់សន្តិភាពដ៏ពិតដល់លោកអ្នកឡើយ។
មនុស្សជាច្រើនប្រាថ្នាចង់មានទ្រព្យសម្បត្តិជាជាងភាពក្រីក្រ ប៉ុន្តែទ្រព្យសម្បត្តិមិនមែនជាអ្វីដែលល្អពេញលក្ខណៈដូចនឹងសេចក្ដីសុចរិត ការបន្ទាបខ្លួន ប្រាជ្ញា ការមានទំនាក់ទំនងល្អ និងការកោតខ្លាចព្រះអម្ចាស់ឡើយ។

កណ្ឌគម្ពីរ ១កូរិនថូស ១:៣០-៣១ បានប្រាប់យើងថា ព្រះគ្រីស្ទគឺជាប្រាជ្ញា សេចក្ដីសុចរិត ការញែកជាបរិសុទ្ធ និងជាសេចក្ដីសង្គ្រោះសម្រាប់យើងពីព្រះជាម្ចាស់ដូចដែលមានចែងទុកមកដើម្បីឲ្យ «អ្នកណាដែលអួត ត្រូវអួតតែពីព្រះអម្ចាស់ប៉ុណ្ណោះ»។ លុយមិនអាចផ្ដល់ជួនលោកអ្នកនូវអ្វីៗដែលលោកអ្នកត្រូវការខ្លាំងបំផុតបាននោះទេ។ វាមិនអាចធ្វើឲ្យលោកអ្នកបរិសុទ្ធបានឡើយ។ វាមិនអាចធ្វើឲ្យលោកអ្នកសុចរិតទេ។ វាក៏មិនអាចសង្គ្រោះលោកអ្នកចេញពីអំពើបាបបានដែរ។ ទ្រព្យសម្បត្តិគឺជាសញ្ញាមួយនៃព្រះពរ ប៉ុន្តែវាក៏ជាសេចក្ដីល្បួងដ៏ធំធេងមួយសម្រាប់លោកអ្នកដែរ ព្រោះវាល្បួងឲ្យលោកអ្នកអួតពីខ្លួនឯង។ វាសន្យាថានឹងធ្វើជាភាពស័ក្ដិសមដល់លោកអ្នក ហើយនឹងធ្វើឲ្យលោកអ្នកត្រូវការតែខ្លួនឯងប៉ុណ្ណោះ។ វាអញ្ជើញឲ្យលោកអ្នកអួតអំពីអ្វីមួយ ឬក៏បុគ្គលណាម្នាក់ផ្សេងទៀត ក្រៅពីព្រះអម្ចាស់ផ្ទាល់។

សរុបសេចក្ដីទៅ លុយគឺជាបញ្ហានៃជំនឿ។ គឺជាការទទួលជឿថា ការធ្វើអ្វីមួយតាមរបៀបព្រះជាម្ចាស់គឺជាផ្លូវដ៏ល្អបំផុតរបស់លោកអ្នក។ ចូរទទួលជឿថា បើលោកអ្នកហ៊ានឲ្យលុយរបស់លោកអ្នក នោះព្រះអង្គក៏នឹងឲ្យលុយនោះមកកាន់លោកអ្នកវិញដែរ។ ចូរទទួលជឿថា លុយក៏អាចជារបស់ល្អដែរ។ ប៉ុន្តែ ចូរកុំជឿឲ្យសោះថា មានវាគឺគ្រប់គ្រាន់ហើយ។ លុយគឺជាអំណោយទានពីព្រះជាម្ចាស់ ប៉ុន្តែអំណោយទានដែលលោកអ្នកពិតជាត្រូវការខ្លាំងជាងគេបំផុតនោះ គឺមានតែនៅក្នុងព្រះជាម្ចាស់មួយអង្គគត់។

និពន្ធដោយ៖ លោកគ្រូ Kevin DeYoung
បកប្រែដោយ និងកែសម្រួលដោយ៖ លោក ឈាង បូរ៉ា, លោក ទេព រ៉ូ, ខែម បូឡុង និងកញ្ញា លី វួចឡេង
ដកស្រង់ខ្លះៗចេញពី www.thegospelcoalition.org ដោយមានការអនុញ្ញាត។

តើអ្នកគិតយ៉ាងណា?

៦ពិន្ទុ

តើលោកអ្នកយល់យ៉ាងណាដែរ?

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

១៨៣៨៥

ក្តៅៗពេញនិយម

កំណត់ហេតុបណ្ដាញ៦ មករា ២០២៦

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

វាគ្មានអ្វីគួរឲ្យភ្ញាក់ផ្អើលនោះទេ យើងបានទទួលសំណួរជាច្រើនពីបេសកជននៅតាមតំបន់នានា…

អានបន្ថែម

សំណួរដែលបណ្តាលចិត្ត៖ វិធីសាស្ត្រថ្មី ក្នុងការពិភាក្សានៅក្នុងក្រុមតូច

១១៣៧

កំណត់ហេតុបណ្ដាញ១៨ វិច្ឆិកា ២០២៥

សំណួរដែលបណ្តាលចិត្ត៖ វិធីសាស្ត្រថ្មី ក្នុងការពិភាក្សានៅក្នុងក្រុមតូច

ព្រះយេស៊ូវ ពួកសាវ័ក និងពួកសិស្សរបស់ទ្រង់ ពួកគេទាំងអស់បានសួរបណ្តាជននូវសំណួរជាក់លាក់។ ឥឡូវនេះ ប្រហែលជាពួកយើងគួរពិចារណាប្រើសំណួរដូចគ្នាទាំងនេះ សម្រាប់ក្រុមតូចរបស់យើងទាំងអស់។

អានបន្ថែម

តើស្ត្រីនឹងបានសង្គ្រោះក្នុងកាលដែលបង្កើតកូន មានន័យយ៉ាងដូចម្ដេច? (១ធីម៉ូថេ ២)

១១២០

កំណត់ហេតុបណ្ដាញ១១ វិច្ឆិកា ២០២៥

តើស្ត្រីនឹងបានសង្គ្រោះក្នុងកាលដែលបង្កើតកូន មានន័យយ៉ាងដូចម្ដេច? (១ធីម៉ូថេ ២)

ស្ត្រីណាដែលទទួលយកតួនាទីដែលព្រះជាម្ចាស់បានតែងតាំងក្នុងខណៈដែលពួកនាងកំពុងបន្ត «សេចក្ដីជំនឿ សេចក្ដីស្រឡាញ់ នឹងសេចក្ដីបរិសុទ្ធ ទាំងមានគំនិតមារយាទ» ក្នុងគុណធម៌គ្រីស្ទបរិស័ទ នោះនាងនឹងរកឃើញថា ខ្លួននឹងបានសង្គ្រោះនៅថ្ងៃចុងក្រោយ។

អានបន្ថែម