ភាពបរិសុទ្ធបែបវិជ្ជមាន

តើលោកអ្នកឃើញដែលឬទេ? ការព្យាយាមសង្វាតឲ្យបានបរិសុទ្ធខាងឯផ្លូវភេទមិនមែនគ្រាន់តែជាការគេចចេញពីអ្វីមួយប៉ុណ្ណោះទេ ប៉ុន្តែក៏ជាការសង្វាត និងការមានចិត្តរីករាយទៅហ្នឹងអ្វីផ្សេងទៀត។

២៩ ធ្នូ ២០១៦អានរយៈពេល ១០ នាទី

មើល៩២៤ដង

ក្នុងយុគសម័យដែលយើងកំពុងរស់នៅសព្វថ្ងៃ ដំណើរនៃចំណេះដឹងខាងផ្លូវភេទ និងការផ្សព្វផ្សាយតាមបណ្ដាញផ្សេងៗពីការរួមភេទ គឺមានជាហូរហែ។ លោកអ្នកមិនអាចគេចផុតពីការនេះឡើយ នៅពេលដែលលោកអ្នកចេញពីផ្ទះ ឬនៅពេលដែលលោកអ្នកមើលគ្រឿងអេឡិចត្រូនិច។ ក្នុងនាមជាគ្រីស្ទបរិស័ទ យើងងាយនឹងប្រឈមមុខនឹងការចូលស្ទឹងតាមបត់ ចូលទូកតាមកំពង់ និងចូលស្រុកតាមប្រទេសខ្លាំងណាស់។ យើងប្រឈមមុខនឹងការប្រឡូកចូលទៅក្នុងទម្លាប់ និងវប្បធម៌ដែលប្រែប្រួលទៅតាមសម័យកាលទំនើបនេះណាស់។ ហេតុដូច្នេះហើយបានជាខ្ញុំ និងគ្រីស្ទបរិស័ទផ្សេងទៀតសង្វាតឲ្យបានបរិសុទ្ធខាងឯផ្លូវភេទនៅក្នុងចិត្ត និងក្នុងជីវិតរស់នៅរបស់យើង។ ព្រះជាម្ចាស់បានត្រាស់ហៅយើងឲ្យសង្វាតឲ្យបានបរិសុទ្ធខាងឯផ្លូវភេទ។ សូមអរព្រះគុណដល់ព្រះ ដែលទ្រង់បានបណ្ដាលឲ្យអ្នកនិពន្ធព្រះគម្ពីរ និពន្ធនៅជំនាន់ដែលពោរពេញទៅដោយការខ្វះក្រមសីលធម៌ផ្នែកផ្លូវភេទដែរ ហើយប្រាជ្ញាដែលពួកគាត់បានចែករំលែកដល់យើង គឺអាចឲ្យយើងប្រើក្នុងសម័យណាក៏បាន។ ខគម្ពីរខាងក្រោមនេះជាខដែលមានរៀបរាប់ពីកង្វះនៃក្រមសីលធម៌ ក៏ដូចជាផ្ដល់ប្រាជ្ញាដល់យើងក្នុងការរស់នៅប្រកបដោយក្រមសីលធម៌៖

១ថែស្សាឡូនីច ៤:៣-៤ «ដ្បិតនេះជាបំណងរបស់ព្រះជាម្ចាស់ គឺឲ្យអ្នករាល់គ្នាបានបរិសុទ្ធ ដើម្បីឲ្យអ្នករាល់គ្នាចៀសវាងអំពើអសីលធម៌ខាងផ្លូវភេទ ហើយម្នាក់ៗត្រូវចេះគ្រប់គ្រងរូបកាយរបស់ខ្លួនដោយបរិសុទ្ធ និងសេចក្ដីថ្លៃថ្នូរ» (គគខ)។

១ពេត្រុស ១:១៥ «ប៉ុន្តែ ចូរឲ្យអ្នករាល់គ្នាបានបរិសុទ្ធខាងឯការប្រព្រឹត្តទាំងអស់ ដូចព្រះអង្គដែលបានត្រាស់ហៅអ្នករាល់គ្នា ព្រះអង្គបរិសុទ្ធ» (គគខ)។

១កូរិនថូស ៦:១២-២០ «ខ្ញុំមានសិទ្ធិធ្វើអ្វីៗទាំងអស់ ប៉ុន្តែមិនមែនអ្វីៗទាំងអស់សុទ្ធតែមានប្រយោជន៍ទេ ខ្ញុំមានសិទ្ធិធ្វើអ្វីៗទាំងអស់មែន ប៉ុន្តែខ្ញុំមិនឲ្យអ្វីមួយគ្រប់គ្រងលើខ្ញុំបានឡើយ។ អាហារសម្រាប់ក្រពះ ហើយក្រពះក៏សម្រាប់អាហារដែរ ប៉ុន្តែព្រះជាម្ចាស់នឹងបំផ្លាញរបស់ទាំងពីរនេះ រីឯរូបកាយវិញមិនមែនសម្រាប់អំពើអសីលធម៌ខាងផ្លូវភេទទេ គឺសម្រាប់ព្រះអម្ចាស់ ហើយព្រះអម្ចាស់ក៏សម្រាប់រូបកាយដែរ។ ព្រះជាម្ចាស់ដែលបានប្រោសព្រះអម្ចាស់ឲ្យរស់ឡើងវិញនឹងប្រោសយើងឲ្យរស់ឡើងវិញ ដោយសារអំណាចរបស់ព្រះអង្គដែរ តើអ្នករាល់គ្នាមិនដឹងទេឬថា រូបកាយរបស់អ្នករាល់គ្នាជាអវយវៈរបស់ព្រះគ្រីស្ទ? ដូច្នេះ តើគួរឲ្យខ្ញុំយកអវយវៈរបស់ព្រះគ្រីស្ទធ្វើជាអវយវៈរបស់ស្ត្រីពេស្យាបានឬ? ទេ មិនបានជាដាច់ខាត ឬមួយអ្នករាល់គ្នាមិនដឹងថា អ្នកដែលរួមរ័កជាមួយស្ត្រីពេស្យា មានរូបកាយតែមួយជាមួយនាង ដ្បិតមានសេចក្ដីចែងទុកថា៖ «អ្នកទាំងពីរនឹងត្រឡប់ជារូបកាយតែមួយ» រីឯអ្នកដែលរួមរស់ជាមួយព្រះអម្ចាស់ក៏មានវិញ្ញាណតែមួយជាមួយព្រះអង្គដែរ។ ចូររត់គេចចេញពីអំពើអសីលធម៌ខាងផ្លូវភេទ។ បាបទាំងឡាយដែលមនុស្សប្រព្រឹត្ត គឺនៅក្រៅរូបកាយទេ ប៉ុន្តែអ្នកដែលប្រព្រឹត្តអំពើអសីលធម៌ខាងផ្លូវភេទ ធ្វើបាបទាស់នឹងរូបកាយរបស់ខ្លួនហើយ ឬមួយអ្នករាល់គ្នាមិនដឹងថា រូបកាយរបស់អ្នករាល់គ្នាជាព្រះវិហាររបស់ព្រះវិញ្ញាណបរិសុទ្ធដែលនៅក្នុងអ្នករាល់គ្នា គឺជាព្រះវិញ្ញាណដែលអ្នករាល់គ្នាបានទទួលពីព្រះជាម្ចាស់ ដូច្នេះ អ្នករាល់គ្នាមិនមែនជារបស់ខ្លួនឯងទៀតទេ ដ្បិតព្រះអង្គបានបង់ថ្លៃលោះអ្នករាល់គ្នារួចហើយ ដូច្នេះចូរសរសើរតម្កើងព្រះជាម្ចាស់ដោយរូបកាយរបស់អ្នករាល់គ្នាចុះ» (គគខ)។

យ៉ូហាន ៤:១៦-១៨ «ព្រះអង្គមានបន្ទូលទៅនាងថា៖ «ចូរទៅហៅប្តីរបស់អ្នកមកទីនេះ» ស្ត្រីនោះទូលទៅព្រះអង្គវិញថា៖ «ខ្ញុំគ្មានប្តីទេ»។ ព្រះយេស៊ូវមានបន្ទូលថា៖ «អ្នកនិយាយថា គ្មានប្តី នោះត្រូវហើយ ដ្បិតអ្នកមានប្តីប្រាំនាក់មកហើយ រីឯបុរសដែលនៅជាមួយអ្នកសព្វថ្ងៃនេះមិនមែនជាប្តីរបស់អ្នកទេ ដូច្នេះពាក្យដែលអ្នកនិយាយនេះ ពិតប្រាកដហើយ» (គគខ)។

សុភាសិត ជំពូក៧។ល។

ការសង្វាតឲ្យបានបរិសុទ្ធខាងឯផ្លូវភេទមានពីរចំណុច៖ ការងាកបែរចេញ និងការងាកបែរទៅរក ។ ការបញ្ឈប់ឥរិយាបថណាមួយ និងការចាប់ផ្ដើមឥរិយាបថណាមួយផ្សេងទៀត។ ជារឿយៗ ក្នុងការព្យាយាមសង្វាតឲ្យបានបរិសុទ្ធខាងឯផ្លូវភេទ ខ្ញុំតែងតែមានបទបញ្ជាដោយហាមខ្លួនឯងបែបអវិជ្ជមានថា៖ កុំធ្វើនេះ! កុំមានឥរិយាបថបែបនោះ! កុំបន្តទម្លាប់នេះទៀត! ហើយខ្ញុំគិតថា ពេលខ្លះយើងក៏ជឿដែរថា ប្រសិនបើខ្ញុំគ្រាន់តែបញ្ឈប់ទម្លាប់អាក្រក់នោះ គឺខ្ញុំនឹងមានភាពស្អាតស្អំខាងឯផ្លូវភេទហើយ។ ប៉ុន្តែ ចូរចងចាំថា ភាពបរិសុទ្ធខាងឯផ្លូវភេទក៏ជាបទបញ្ជាបែបវិជ្ជមានផងដែរ។ តាមពិត ខ្ញុំគិតថាវាពិតជាបទបញ្ជាបែបវិជ្ជមានទាំងស្រុង។ ការព្យាយាមសង្វាតឲ្យបានបរិសុទ្ធខាងឯផ្លូវភេទ មិនមែនគ្រាន់តែជាការគេចពីអ្វីដែលអាក្រក់ឡើយ ប៉ុន្តែវាក៏ជាការសង្វាតដេញតាម ហើយទាញយកអំណរចេញពីអ្វីដែលល្អផងដែរ។

ការព្យាយាមសង្វាតឲ្យបានបរិសុទ្ធខាងឯផ្លូវភេទ មិនមែនគ្រាន់តែជាការងាកបែរចេញពីបាបប៉ុណ្ណោះឡើយ ប៉ុន្តែក៏ជាការមានចិត្ដរីករាយក្នុងអំណោយទានរបស់ព្រះជាម្ចាស់ផងដែរ។ គោលបំណងចម្បង គឺមិនមែនការឈប់សង្វាតតាមអ្វីៗដែលអាក្រក់ប៉ុណ្ណោះទេ ប៉ុន្តែក៏ជាការសង្វាតតាមនូវអ្វីដែលល្អ ហើយមានចិត្តរីករាយក្នុងការនោះដែរ។ ការព្យាយាមសង្វាតឲ្យបានបរិសុទ្ធខាងឯផ្លូវភេទ គឺជាការគេចចេញពីអំពើអសីលធម៌ខាងផ្លូវភេទ បោះបង់ចោលរឿងរ៉ាវអាក្រក់ៗ ឈប់មើលរូបអាសអាភាស និងការតាំងសញ្ញាជាមួយភ្នែកខ្លួនឯង។ ទាំងនេះជាចំណុចល្អ ហើយវាជាការចាំបាច់។ ប៉ុន្តែ ចំណុចនៃការព្យាយាមសង្វាតឲ្យបានបរិសុទ្ធខាងឯផ្លូវភេទ មានលើសពីនោះទៅទៀត ពោលគឺវាល្អជាងនោះណាស់។ វាមានលក្ខណៈវិជ្ជមានជាងនោះ។

ការព្យាយាមសង្វាតឲ្យបានបរិសុទ្ធខាងឯផ្លូវភេទ គឺជាការសង្វាតចាប់ចិត្ត គំនិត និងរាងកាយរបស់ប្រពន្ធខ្លួន។ ការព្យាយាមសង្វាតឲ្យបានបរិសុទ្ធខាងឯផ្លូវភេទ គឺជាការមានចិត្តរីករាយក្នុងការរួមភេទជាមួយនឹងប្ដីខ្លួន។ ការព្យាយាមសង្វាតឲ្យបានបរិសុទ្ធខាងឯផ្លូវភេទ គឺជាការចងចាំពីការរួមភេទលើកមុន ហើយជាការទន្ទឹងរង់ចាំនៅពេលអនាគត។ ការព្យាយាមសង្វាតឲ្យបានបរិសុទ្ធខាងឯផ្លូវភេទ គឺជាការអរសប្បាយរវាងប្ដី និងប្រពន្ធ។ ការព្យាយាមសង្វាតឲ្យបានបរិសុទ្ធខាងឯផ្លូវភេទ គឺជាការមើលប្រពន្ធខ្លួនឯងដោយស្រឡាញ់នាង។

ឱប្ដីរាល់គ្នាអើយ! ការដែលលោកឈប់មើលរូបអាសអាភាសមិនមែនជាការព្យាយាមសង្វាតឲ្យបានបរិសុទ្ធខាងឯផ្លូវភេទទេ ប៉ុន្តែនៅពេលដែលអ្នកមានចិត្តរីករាយក្នុងការរួមដំណេកជាមួយនឹងប្រពន្ធខ្លួន ហើយនៅពេលដែលលោកអ្នកប្រព្រឹត្តិចំពោះរូបកាយប្រពន្ធខ្លួនដោយចិត្តបរិសុទ្ធ និងផ្ដល់កិត្តិយសដល់នាង នោះទើបជាការព្យាយាមសង្វាតឲ្យបានបរិសុទ្ធខាងឯផ្លូវភេទ។ ឱប្រពន្ធរាល់គ្នាអើយ! ការដែលនាងគេចចេញពីសេចក្ដីល្បួងខាងឯផ្លូវភេទ ឬការរួមភេទមិនអស់ពីចិត្ត មិនមែនជាការព្យាយាមសង្វាតឲ្យបានបរិសុទ្ធខាងឯផ្លូវភេទទេ ប៉ុន្តែនៅពេលដែលនាងមានការរួមចំណែក ក៏ដូចជាមានចិត្តរីករាយក្នុងការរួមដំណេកជាមួយប្ដីរបស់នាង នោះទើបជាការព្យាយាមសង្វាតឲ្យបានបរិសុទ្ធខាងឯផ្លូវភេទ។

តើលោកអ្នកឃើញដែរឬទេ? ការព្យាយាមសង្វាតឲ្យបានបរិសុទ្ធខាងឯផ្លូវភេទមិនមែនគ្រាន់តែជាការគេចចេញពីអ្វីមួយប៉ុណ្ណោះទេ ប៉ុន្តែក៏ជាការសង្វាត និងការមានចិត្តរីករាយទៅនឹងអ្វីផ្សេងទៀត។ ការព្យាយាមសង្វាតឲ្យបានបរិសុទ្ធខាងឯផ្លូវភេទជាការសម្លាប់ទម្លាប់ចាស់ៗចោល ដើម្បីឲ្យខ្លួនមានសេរីភាពក្នុងការសង្វាតដេញតាមទម្លាប់ដ៏ល្អៗជាងនោះទៅទៀត។ ព្រះជាម្ចាស់សព្វព្រះហឫទ័យក្នុងការរំដោះលោកអ្នកចេញពីអំពើបាប ដើម្បីឲ្យលោកអ្នកមានការរីករាយក្នុងអំណោយទានរបស់ទ្រង់។ ការព្យាយាមសង្វាតឲ្យបានបរិសុទ្ធខាងឯផ្លូវភេទតាមបទបែបរបស់ព្រះជាម្ចាស់ គឺជាការសង្វាតឲ្យបានបរិសុទ្ធបែបវិជ្ជមាន។

បណ្ដាំសម្រាប់អ្នកនៅលីវ៖ ពេលនេះ ព្រះជាម្ចាស់ក៏នៅមានព្រះហឫទ័យឲ្យអ្នកព្យាយាមសង្វាតឲ្យបានបរិសុទ្ធខាងឯផ្លូវភេទដែរ ទោះបើអ្នកមិនទាន់អាចមានភាពអរសប្បាយក្នុងការរួមភេទនៅឡើយក៏ដោយ។ បទបញ្ជាឲ្យចៀសចេញពីអំពើអសីលធម៌ខាងផ្លូវភេទ គឺជាការផ្ដល់ឲ្យលោកអ្នកមានសេរីភាព និងមានអំណរក្នុងការស្ដាប់បង្គាប់ព្រះជាម្ចាស់ ព្រមទាំងការទទួលព្រះពរតាមរយៈការស្ដាប់បង្គាប់នោះ។ ព្រះយេស៊ូវបានដកពិសោធន៍ក្នុងសេរីភាពនេះ ដោយទ្រង់បានមានព្រះជន្មគង់នៅយ៉ាងល្អឥតខ្ចោះ ទោះបើទ្រង់មិនមានការរួមភេទក៏ដោយ។

ចំណាំ៖ យើងបានទទួលការអនុញ្ញាតឲ្យកែសម្រួលលើឯកសារដើមរបស់អ្នកនិពន្ធ។

និពន្ធដោយ៖ លោកគ្រូ Tim Challies

បកប្រែដោយ និងកែសម្រួលដោយ៖ លោក ឈាង បូរ៉ា, លោក ជួប ប៊ុនហាក់ និងលោក អ៊ុន ជ័យរិទ្ធ

ដកស្រង់ខ្លះៗចេញពី www.challies.com ដោយមានការអនុញ្ញាត។

តើអ្នកគិតយ៉ាងណា?

១ពិន្ទុ

តើលោកអ្នកយល់យ៉ាងណាដែរ?

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

១៨៣៧៧

ក្តៅៗពេញនិយម

កំណត់ហេតុបណ្ដាញ៦ មករា ២០២៦

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

វាគ្មានអ្វីគួរឲ្យភ្ញាក់ផ្អើលនោះទេ យើងបានទទួលសំណួរជាច្រើនពីបេសកជននៅតាមតំបន់នានា…

អានបន្ថែម

តើ៧០អាទិត្យ ក្នុងកណ្ឌគម្ពីរដានីយ៉ែលជាអ្វី? (ដានីយ៉ែល ៩)

៤១១៩

កំណត់ហេតុបណ្ដាញ២៥ វិច្ឆិកា ២០២៥

តើ៧០អាទិត្យ ក្នុងកណ្ឌគម្ពីរដានីយ៉ែលជាអ្វី? (ដានីយ៉ែល ៩)

អត្ថន័យសំខាន់នៃការកាត់ស្រាយកណ្ឌគម្ពីរ ដានីយ៉ែល ៩:២៦-២៧ គឺជាការសង្កេតរបស់សាវ័កម៉ាថាយ ត្រង់ដែលព្រះយេស៊ូវកំពុងមានបន្ទូលអំពីការបំផ្លិចបំផ្លាញដែលត្រូវនឹងមកក្រុងយេរូសាឡឹម និងព្រះវិហារបរិសុទ្ធ (ម៉ាថាយ ២៤:១៥)។

អានបន្ថែម

សំណួរដែលបណ្តាលចិត្ត៖ វិធីសាស្ត្រថ្មី ក្នុងការពិភាក្សានៅក្នុងក្រុមតូច

១១៣៧

កំណត់ហេតុបណ្ដាញ១៨ វិច្ឆិកា ២០២៥

សំណួរដែលបណ្តាលចិត្ត៖ វិធីសាស្ត្រថ្មី ក្នុងការពិភាក្សានៅក្នុងក្រុមតូច

ព្រះយេស៊ូវ ពួកសាវ័ក និងពួកសិស្សរបស់ទ្រង់ ពួកគេទាំងអស់បានសួរបណ្តាជននូវសំណួរជាក់លាក់។ ឥឡូវនេះ ប្រហែលជាពួកយើងគួរពិចារណាប្រើសំណួរដូចគ្នាទាំងនេះ សម្រាប់ក្រុមតូចរបស់យើងទាំងអស់។

អានបន្ថែម