ស្ដារភាពផ្អែមល្ហែម

ចូរញែកពេលទទួលស្គាល់វត្តមានគ្នាទៅវិញទៅមកតាមរយៈការសួរសុខទុក្ខគ្នា ការឱបថើប ឬក៏ការសួរគ្នាអំពីអ្វីៗដែលបានកើតឡើងនៅថ្ងៃនោះ។

១៩ សីហា ២០១៩អានរយៈពេល ១៣ នាទី

មើល១៣៦៩ដង

https://www.youtube.com/watch?v=6IS6hqT-jAM

ភា

ពរវីរវល់ក្នុងជីវិត ព័ន្ធកិច្ច ការងារ និងគ្រួសារតែងតែដាក់សម្ពាធលើភាពផ្អែមល្ហែមនៃជីវិត អាពាហ៍ពិពាហ៍។

ជាជាងការលង់នៅក្នុងកែវភ្នែកដ៏ស្រទន់ ការស្និទ្ធស្នាលដែលមានក្ដីស្រឡាញ់ និងការបង្ហាញសេចក្ដីសប្បុរសតិចតូចពីដៃគូជីវិតរបស់ខ្លួន លោកអ្នកបែរជាចាប់ផ្ដើមចាត់ទុកគាត់គ្រាន់តែជាដៃគូដែលអាចជួយសម្រេចនេះសម្រេចនោះនូវកិច្ចការផ្សេងៗទៅវិញ។ ម្យ៉ាងវិញទៀត លោកអ្នកបែរជាចែកចាយការងារដែលមិនចេះចប់មិនចេះហើយ តើអ្នកណានឹងយកកូនមកពីរៀន? តើអ្នកណានឹងទៅផ្សារទិញម្ហូប? តើអ្នកណានឹងជួយធ្វើកិច្ចការសាលារបស់កូនៗ?។ល។ ហើយពេលយប់មកដល់ លោកអ្នកក៏ទម្រេតខ្លួនចូលគេងយ៉ាងអស់កម្លាំងពីថ្ងៃនោះ ហើយលោកអ្នកក៏ប្ដូរការមានភាពផ្អែមល្ហែមជាមួយនឹងក្ដីសង្ឃឹមថា នឹងបានគេងលក់ស្រួលទៅវិញ។

ដោយគ្មានមន្ទិលសង្ស័យ យើងទាំងអស់គ្នានឹងនិយាយថា យើងស្រឡាញ់ប្រពន្ធ/ប្ដីយើង។ បើនិយាយឲ្យខ្លីទៅ ក្រែងយើងទើបតែជួយបោកខោអាវ ចម្អិនម្ហូប ហើយបង់ថ្លៃនូវអ្វីៗដែលយើងត្រូវចំណាយនោះទេឬអី? ជាទូទៅ យើងអាចបង្ហាញក្ដីស្រឡាញ់ដែលយើងអាចធ្វើទៅបានដោយមានភាពលះបង់ទៅកាន់ដៃគូជីវិតយើងតាមរយៈការដែលយើងបំពេញធុរៈកិច្ចចាំបាច់—ទោះបើអណ្ដាតភ្លើងនៃក្ដីស្រឡាញ់របស់យើងបានរលត់ជិតអស់បាត់ទៅក៏ដោយ។ ទំនងអ្នកខ្លះមានភាពងាយស្រួលណាស់ក្នុងការស្រឡាញ់ដោយមានការលះបង់ជាជាងការបង្ហាញភាពថ្នាក់ថ្នម ជាពិសេសបើក្នុងផ្ទះលោកអ្នកមានពេញទៅដោយកាតព្វកិច្ចដែលលោកអ្នកត្រូវចំណាយកម្លាំងជំនួសការបង្ហាញក្ដីស្រឡាញ់ចំពោះគ្នាទៅវិញទៅមក ឧទាហរណ៍៖ ការមានកូន។

ហេតុអ្វីបានជាសំខាន់ខ្លាំងម៉្លេះក្នុងការបន្តឲ្យមានកំដៅភ្លើងឆេះឆួលក្នុងជីវិតអាពាហ៍ពិពាហ៍របស់លោកអ្នក? តើវាមិនមែនជារឿងធម្មតាទេឬអីក្នុងការដែលយើងដាក់តម្រូវការរបស់កូនៗយើងមុន (និងរាល់គ្រប់អ្វីៗផ្សេងទៀតដែលលោកអ្នកត្រូវធ្វើ) ជាជាងតម្រូវការប្ដី/ប្រពន្ធ?

ចូរការពារភ្លើងស្នេហ៍

នៅក្នុងកណ្ឌគម្ពីរអេភេសូរជំពូក៥ យើងបានឃើញថា ព្រះជាម្ចាស់បានបង្កើតជីវិតអាពាហ៍ពិពាហ៍ឡើង ដើម្បីបង្ហាញអំពីដំណឹងល្អ។ ជីវិតអាពាហ៍ពិពាហ៍របស់យើងលើផែនដីនេះ គឺជាស្រមោលនៃអាពាហ៍ពិពាហ៍នៅពេលអនាគតដែលនឹងកើតមានឡើង។ ដូចដែលព្រះគ្រីស្ទបានមានអំណរជាមួយនឹងកូនក្រមុំរបស់ទ្រង់ យើងក៏គួរតែមានអំណរក្នុងអំណោយទានរបស់ដៃគូជីវិតយើងផងដែរ។ ដូចដែលក្រុមជំនុំត្រូវចុះចូលនឹងព្រះគ្រីស្ទ នោះប្រពន្ធក៏ត្រូវចុះចូលដោយអំណរនឹងប្ដីរបស់ខ្លួនដែរ។ ហើយព្រះជាម្ចាស់ក៏បានបង្គាប់ឲ្យប្ដីស្រឡាញ់ប្រពន្ធខ្លួនដោយមានការលះបង់ដូចដែលព្រះគ្រីស្ទបានធ្វើចំពោះក្រុមជំនុំ។

ព្រះអង្គសព្វព្រះហឫទ័យឲ្យជីវិតអាពាហ៍ពិពាហ៍បើកបង្ហាញអំពីសេចក្ដីស្រឡាញ់របស់ព្រះគ្រីស្ទសម្រាប់ក្រុមជំនុំ ដោយតាមរយៈការនេះវានឹងថ្វាយសិរីល្អដល់ព្រះជាម្ចាស់ និងបើកបង្ហាញសេចក្ដីពិតអំពីដំណឹងល្អឲ្យលោកីយ៍ដែលកំពុងមើលយើងឃើញ។ តាមរយៈការដែលយើងស្ដាប់បង្គាប់ក្រឹត្យវិន័យរបស់ព្រះជាម្ចាស់ដោយមានអំណរ នោះការដែលយើងធ្វើ «ត្រូវតែ» ស្រឡាញ់ដៃគូជីវិតយើងនឹងមានការហូរហៀរដោយក្ដីស្រឡាញ់ចំពោះអស់អ្នកដែលនៅជុំវិញយើង។ ការដែលយើងវិនិយោគពេលវេលា និងការថែទាំជីវិតអាពាហ៍ពិពាហ៍របស់យើងនឹងបង្កើតឲ្យយើងកាន់តែមានក្ដីស្រឡាញ់សម្រាប់អ្នកដទៃផ្សេងទៀតបាន។ លោកគ្រូ គ្រីស្ទូហ្វើរ អាស៍ (Christopher Ash) បានលើកឡើងយ៉ាងចំៗក្នុងសៀវភៅរបស់គាត់ដែលមានចំណងជើងជាភាសាអង់គ្លេសថា Marriage for God «ចូរការពារភ្លើងនៃដួងចិត្តរបស់លោកអ្នក ដើម្បីឲ្យកំដៅនៃសេចក្ដីស្រឡាញ់របស់លោកអ្នកអាចនឹងសាយភាយទៅដល់អ្នកដទៃបាន»។

របៀបថែរក្សាអ្នកដែលនៅក្បែរខ្លួន

ខាងក្រោមនេះជារបៀបមួយចំនួនដែលលោកអ្នកអាចពង្រឹងនៅផ្នែកទំនាក់ទំនងក្នុងការថែរក្សាអស់អ្នកដែលព្រះជាម្ចាស់បានដាក់ក្បែរខ្លួន—សម្រាប់អំណររបស់យើងផ្ទាល់ សម្រាប់សិរីល្អរបស់ព្រះជាម្ចាស់ និងសម្រាប់អត្ថប្រយោជន៍ទៅកាន់អស់អ្នកដែលនៅជុំវិញយើងផងដែរ។

១.

មើលគ្នាឃើញផង

ទំនងចំណុចនេះនិយាយចំពេកហើយ ប៉ុន្តែបើនិយាយឲ្យខ្លីទៅ យើងពិតជាមានការងាយស្រួលណាស់ក្នុងការនៅបន្តឈ្ងោកមើលទូរស័ព្ទពេលដែលប្ដី/ប្រពន្ធយើងដើរចូលក្នុងផ្ទះ។ ចូរញែកពេលទទួលស្គាល់វត្តមានគ្នាទៅវិញទៅមកតាមរយៈការសួរសុខទុក្ខគ្នា ការឱបថើប ឬក៏ការសួរគ្នាអំពីអ្វីៗដែលបានកើតឡើងនៅថ្ងៃនោះ។ ចូរបញ្ឈប់នូវអ្វីដែលលោកអ្នកកំពុងធ្វើ ដើម្បីបង្ហាញចំណាប់អារម្មណ៍ពិតៗទៅកាន់ដៃគូជីវិតរបស់ខ្លួន (ភីលីព ២:២០)។

២.

បម្រើគ្នាទៅវិញទៅមក

ចូរព្យាយាមស្វែងរករបៀបបម្រើ និងប្រទានពរដល់ដៃគូជីវិតរបស់លោកអ្នកជារៀងរាល់ថ្ងៃ។ ហើយល្អជាងនោះទៅទៀតគឺបើលោកអ្នកសួរគាត់ផ្ទាល់ថា តើខ្ញុំអាចបម្រើអ្នកបានដោយរបៀបណា? ទំនងអាចមានដូចជា៖ បោកខោអាវ រៀបចំកន្លែងឲ្យកូនៗចូលគេងឆាប់ ឬក៏ការចម្អិនម្ហូបដែលគាត់ចូលចិត្ត។ល។ ចូរប្រយ័ត្នដោយកុំឲ្យធ្លាក់ក្នុងអន្លង់នៃអន្ទាក់នៃការមានសេចក្ដីរំពឹងចង់ឲ្យប្ដី/ប្រពន្ធខ្លួនបំពេញតម្រូវការដែលលោកអ្នកចង់បាន។ ការខកចិត្ត និងការអាក់អន់ស្រពន់ចិត្តជាច្រើនកើតមានឡើងតាមរយៈការសម្គាល់ទុកកំហុសគ្នាទៅវិញទៅមក។ ដោយផ្ទុយពីនោះទៅវិញ លោកអ្នកគួរតែមានអំណរក្នុងការស្វែងរកសេចក្ដីអរសប្បាយសម្រាប់ដៃគូជីវិតខ្លួនតាមរយៈការត្រាប់តាមសេចក្ដីបង្គាប់នៅក្នុងកណ្ឌគម្ពីរ ភីលីព ២:៣-៤ នេះចុះ។ ចូរចាត់ទុកដៃគូជីវិតរបស់លោកអ្នកថាគាត់សំខាន់ជាងខ្លួន ហើយលោកអ្នកអាចធ្វើការនោះបានតាមរយៈការផ្ដល់អាទិភាពនៃជម្រើសរបស់គាត់ខ្ពស់ជាងលោកអ្នក ហើយតាមរយៈការត្រាប់តាមដោយការបន្ទាបខ្លួនដូចព្រះគ្រីស្ទដែរ។

៣.

ចូរចេះអរគុណគ្នា

តើពេលណាទៅជាពេលវេលាចុងក្រោយបង្អស់ដែលលោកអ្នកបាននិយាយទៅកាន់ដៃគូជីវិតខ្លួនថា «អរគុណបង/អូន» ព្រោះគាត់បានខំធ្វើការយ៉ាងនឿយហត់? តើប្ដីរបស់អ្នកផ្គត់ផ្គង់គ្រួសារដែរឬទេ? តើប្រពន្ធរបស់អ្នកបានបោះបង់នូវសេចក្ដីប្រាថ្នារបស់នាងចោល ដើម្បីបំពេញតម្រូវការរបស់កូនៗខ្លួនទេ? ជារឿយៗ យើងនឹកគិតអំពីការអរគុណ ប៉ុន្តែយើងមិនបានបង្ហាញគំនិតនោះជាសកម្មភាពសោះ។ សាវ័ក ប៉ុល បានលើកទឹកចិត្តយើងបីដងឲ្យចេះអរគុណនៅក្នុងកណ្ឌគម្ពីរ កូឡូស ៣:១៥-១៧៖

«ចូរឲ្យសេចក្ដីមេត្រីរបស់ព្រះគ្រីស្ទត្រួតត្រានៅក្នុងចិត្ត ដែលទ្រង់បានហៅអ្នករាល់គ្នាមកក្នុងសេចក្ដីនោះឯង ឲ្យមានរូបកាយតែ១ ហើយត្រូវដឹងគុណផង។ ចូរឲ្យព្រះបន្ទូលនៃព្រះគ្រីស្ទ បានសណ្ឋិតនៅក្នុងអ្នករាល់គ្នាជាបរិបូរ ដោយប្រាជ្ញាគ្រប់យ៉ាង ទាំងបង្រៀនហើយទូន្មានគ្នា ដោយនូវទំនុកតម្កើង ទំនុកបរិសុទ្ធ នឹងចម្រៀងខាងឯវិញ្ញាណ ទាំងច្រៀងក្នុងចិត្តថ្វាយព្រះ ដោយព្រះគុណ ហើយក្នុងគ្រប់ការទាំងអស់ ទោះបើការអ្វីដែលអ្នករាល់គ្នានឹងធ្វើ ដោយពាក្យសម្ដី ឬកិរិយាក៏ដោយ ចូរធ្វើទាំងអស់ ដោយព្រះនាមនៃព្រះអម្ចាស់យេស៊ូវ ទាំងអរព្រះគុណដល់ព្រះដ៏ជាព្រះវរបិតា ដោយសារទ្រង់ផង»។

៤.

ញែកពេលវេលាទៅដើរលេងជាមួយគ្នា—ដោយមិនមានការរំខាន

មិនថានេះជាពេលវេលាដែលលោកអ្នកចេញទៅណាតែពីរនាក់តែឯងក្នុងមួយអាទិត្យម្ដង ឬក៏ការដើរហាត់ប្រាណជាមួយគ្នាក៏ដោយ ក៏លោកអ្នកត្រូវការមានពេលវេលាឲ្យជាក់លាក់ក្នុងការចំណាយពេលជាមួយគ្នាតែពីរនាក់ ព្រោះនោះគឺជាចំណុចដ៏សំខាន់បំផុតក្នុងការទាក់ទងជាមួយនឹងដៃគូជីវិតរបស់ខ្លួន។ បើយើងមិនញែកពេលវេលា ដើម្បីចំណាយតែឯងពីរនាក់ នោះអ្វីៗដែលកូនៗយើងត្រូវធ្វើ ឬក៏ការដែលយើងបម្រើក្នុងព័ន្ធកិច្ចនឹងប្រាកដជាយកពេលយើងអស់ជាមិនខាន។

ក្នុងជីវិតអាពាហ៍ពិពាហ៍របស់ប្ដីយើងខ្ញុំ និងយើងខ្ញុំផ្ទាល់ យើងតែងតែទៅដើរហាត់ប្រាណជាមួយគ្នា ហើយការធ្វើបែបនោះបានជួយឲ្យយើងមានពេលនិយាយគ្នា និងគិតគូរអំពីដំណើរជីវិតយើង។ ឥឡូវយើងបានវិវឌ្ឍន៍ពីការរុញកូនៗក្នុងរទេះទៅជិះកង់ជាមួយគ្នារហូតដល់អាចទុកពួកគាត់ចោលនៅផ្ទះបានពេលយើងចេញក្រៅ។ ការដែលយើងចេញពីផ្ទះទៅដើរកំសាន្តតែពីរនាក់មួយដងក្នុងមួយខែបាននាំឲ្យយើងមានសេរីភាពក្នុងការមិនបង្ហើយកិច្ចការផ្ទះ ឬក៏ធុរៈដែលតែងតែមករំខានទំនាក់ទំនងរបស់ពួកយើង។

៥.

ចូរញែកពេលសម្រាកជាមួយគ្នា

គ្មានអ្វីធ្វើឲ្យយើងខ្ញុំមានអារម្មណ៍ស្រស់ស្រាយរាល់អាទិត្យក្រៅពីការញែកពេលយ៉ាងជាក់លាក់ក្នុងការសម្រាកជាមួយគ្នាឡើយ។ ការដែលយើងថែរក្សាការពារថ្ងៃនោះពីជាការព្យាយាមសម្រេចធុរៈដែលមិនចេះអស់ ហើយបែរទៅធ្វើនូវអ្វីដែលយើងខ្ញុំចូលចិត្តធ្វើជាមួយនឹងប្ដីឬប្រពន្ធរបស់យើងខ្ញុំ ហើយអ្វីទាំងអស់នោះបាននាំមកនូវភាពស្រស់ស្រាយដល់ព្រលឹង និងជីវិតអាពាហ៍ពិពាហ៍របស់យើងដែលត្រូវការ។ ផែនដីនេះនឹងនៅតែបន្តវិលទៅមុខទៀត ទោះបើយើងមិនឆ្លើយអ៊ីមែល ឬក៏បោកខោអាវក៏ដោយ។

ហើយចូររក្សាកម្លាំងខ្លះសម្រាប់គ្នាទៅវិញទៅមក។ យើងខ្ញុំធ្លាប់ឮគេនិយាយថា ការរួម ឬក៏មិនរួមដំណេកជាមួយគ្នា គឺជារបៀបវាស់វែងជីវិតអាពាហ៍ពិពាហ៍របស់លោកអ្នកជាមួយគ្នាដែរ។ បើលោកអ្នកតែងតែអស់កម្លាំង ឬក៏រវល់ពេក ដោយគ្មានពេលស្និទ្ធស្នាលនឹងគ្នា ទំនងនោះគឺជាការឆ្លុះបញ្ចាំងអំពីភាពរអាក់រអួលក្នុងជីវិតអាពាហ៍ពិពាហ៍របស់លោកអ្នកហើយ។

កុំមើលអត់ឃើញដៃគូជីវិតរបស់ខ្លួន

ជាទូទៅ ភាពមមាញឹកនៃជីវិតប្រចាំថ្ងៃ និងការដែលយើងមានសេចក្ដីប្រាថ្នាដ៏អាត្មានិយមនឹងធ្វើឲ្យយើងខ្វាក់ក្នុងការមើលឃើញនូវអំណោយទានដែលដៃគូជីវិតរបស់យើងដែលគាត់មាន។ ចូរគិតសិន ហើយនឹកចាំអំពីចំណុចរបស់គាត់ដែលបានធ្វើឲ្យលោកអ្នកមានការទាក់ទាញទៅកាន់គាត់នាគ្រាដំបូងកាលទើបតែលង់ស្នេហ៍។ សូមព្យាយាមសម្រេចចិត្តក្នុងការបង្អន់សិន ហើយស្វែងរករបៀបដែលលោកអ្នកអាចបន្ថែមនូវភាពផ្អែមល្ហែមក្នុងជីវិតអាពាហ៍ពិពាហ៍របស់ខ្លួន។ ចូរអធិស្ឋានទូលសូមឲ្យព្រះជាម្ចាស់ជួយលោកអ្នកក្នុងការបន្ថែមនូវសេចក្តីស្រឡាញ់ចំពោះគ្នាទៅវិញទៅមក ដើម្បីឲ្យការនោះអាចនឹងសាយភាយទៅកាន់អ្នកដទៃសម្រាប់ប្រយោជន៍របស់ពួកគាត់ និងសម្រាប់សិរីល្អរបស់ព្រះជាម្ចាស់ចុះ។

និពន្ធដោយ៖ លោកស្រី Stacey Reaoch

បកប្រែដោយ និងកែសម្រួលដោយ៖ លោក ឈាង បូរ៉ា, លោក ទេព រ៉ូ , លោក ខែម បូឡុង និងលោកស្រី ឡូញ ស្រីរដ្ធ

ដកស្រង់ខ្លះៗចេញពី www.desiringgod.org ដោយមានការអនុញ្ញាត។

តើអ្នកគិតយ៉ាងណា?

៣ពិន្ទុ

តើលោកអ្នកយល់យ៉ាងណាដែរ?

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

១៨៣៧២

ក្តៅៗពេញនិយម

កំណត់ហេតុបណ្ដាញ៦ មករា ២០២៦

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

វាគ្មានអ្វីគួរឲ្យភ្ញាក់ផ្អើលនោះទេ យើងបានទទួលសំណួរជាច្រើនពីបេសកជននៅតាមតំបន់នានា…

អានបន្ថែម

សំណួរដែលបណ្តាលចិត្ត៖ វិធីសាស្ត្រថ្មី ក្នុងការពិភាក្សានៅក្នុងក្រុមតូច

១១៣៦

កំណត់ហេតុបណ្ដាញ១៨ វិច្ឆិកា ២០២៥

សំណួរដែលបណ្តាលចិត្ត៖ វិធីសាស្ត្រថ្មី ក្នុងការពិភាក្សានៅក្នុងក្រុមតូច

ព្រះយេស៊ូវ ពួកសាវ័ក និងពួកសិស្សរបស់ទ្រង់ ពួកគេទាំងអស់បានសួរបណ្តាជននូវសំណួរជាក់លាក់។ ឥឡូវនេះ ប្រហែលជាពួកយើងគួរពិចារណាប្រើសំណួរដូចគ្នាទាំងនេះ សម្រាប់ក្រុមតូចរបស់យើងទាំងអស់។

អានបន្ថែម

តើស្ត្រីនឹងបានសង្គ្រោះក្នុងកាលដែលបង្កើតកូន មានន័យយ៉ាងដូចម្ដេច? (១ធីម៉ូថេ ២)

១១២០

កំណត់ហេតុបណ្ដាញ១១ វិច្ឆិកា ២០២៥

តើស្ត្រីនឹងបានសង្គ្រោះក្នុងកាលដែលបង្កើតកូន មានន័យយ៉ាងដូចម្ដេច? (១ធីម៉ូថេ ២)

ស្ត្រីណាដែលទទួលយកតួនាទីដែលព្រះជាម្ចាស់បានតែងតាំងក្នុងខណៈដែលពួកនាងកំពុងបន្ត «សេចក្ដីជំនឿ សេចក្ដីស្រឡាញ់ នឹងសេចក្ដីបរិសុទ្ធ ទាំងមានគំនិតមារយាទ» ក្នុងគុណធម៌គ្រីស្ទបរិស័ទ នោះនាងនឹងរកឃើញថា ខ្លួននឹងបានសង្គ្រោះនៅថ្ងៃចុងក្រោយ។

អានបន្ថែម