នៅពេលគ្រីស្ទបរិស័ទមិនព្រមប្រែចិត្តចេញពីអំពើបាបខាងឯផ្លូវភេទ

កណ្ឌគម្ពីរម៉ាថាយជំពូក១៨ ប្រាប់ពីរបៀបនៅក្នុងការដើរតាមជំហានទាំងឡាយនោះ។ ជំហានទាំងបួននៃការដាក់វិន័យបានបង្កើតឡើង ដើម្បីរក្សាក្រុមជំនុំដ៏បរិសុទ្ធ និងគ្មានស្នាមប្រលាក់ ខណៈដែលការទាំងនោះមិនបានប្រែចិត្តត្រឡប់ទៅកាន់ព្រះយេស៊ូវវិញ។

២៥ សីហា ២០២៤អានរយៈពេល ១០ នាទី

មើល១៤១ដង

នៅពេលគ្រីស្ទបរិស័ទមិនព្រមប្រែចិត្តចេញពីអំពើបាបខាងឯផ្លូវភេទ

មានប្អូនស្រីម្នាក់ឈ្មោះ ធីតា បានសរសេរអ៊ីមែលមកកាន់ក្រុមការងារផ្លូវពិត ដើម្បីសួរនូវសំណួរមួយអំពីវិន័យក្នុងក្រុមជំនុំ។ ប្អូនស្រីបានសួរ «ជាប់ទាក់ទងនឹងកណ្ឌគម្ពីរ ម៉ាថាយ ១៨:១៥-២០ នាងខ្ញុំឆ្ងល់ថា ក្នុងនាមខ្ញុំជាគ្រីស្ទបរិស័ទម្នាក់ នាងខ្ញុំត្រូវមានទំនួលខុសត្រូវធ្វើអ្វីខ្លះ ដើម្បីឲ្យស្របទៅតាមព្រះគម្ពីរ នៅពេលមានមិត្តអ្នកជឿម្នាក់កំពុងរស់នៅក្នុងអំពើបាបខាងផ្លូវភេទ ហើយជ្រើសនៅតែបន្តវា បន្ទាប់ពី ពួកគេត្រូវបានហៅមកជួបមុខនិយាយផ្ទាល់ក្នុងរបៀបមួយដែលពេញដោយសេចក្ដីស្រឡាញ់រួចហើយក្ដី»។

ចម្លើយជាក់ស្ដែងវាអាស្រ័យនៅត្រង់ថា ធីតា និងមនុស្សម្នាក់ដែលប្អូនស្រីបារម្ភអំពីនោះ—ប្រហែលមានមិត្តម្នាក់បានរួមដំណេកជាមួយមិត្តប្រុសរបស់នាង។ ខ្ញុំមិនបានដឹងទេ ថាមិត្តរបស់ប្អូនស្រីធីតាកំពុងស្ថិតក្នុងស្ថានភាពបែបណាទេ ប៉ុន្តែនិយាយថា អញ្ចឹងចុះ—ថាតើមនុស្សទាំងពីរនាក់នោះនៅក្នុងក្រុមជំនុំមួយដែលមានសេចក្ដីជំនឿស្មោះត្រង់ស្របទៅតាមបទគម្ពីរទេ។ ដែលជាក្រុមជំនុំដែលទុកព្រះគម្ពីរ ជាស្តង់ដារនៃសេចក្ដីជំនឿ និងការអនុវត្តន៍របស់ពួកគេ។ ហើយប្រសិនបើពួកគេនៅក្នុងក្រុមជំនុំបែបនោះមែន ចម្លើយនោះគឺ ឬគួរតែជា៖ បាទ ការកាត់ចេញពីក្រុមជំនុំគួរតែអាច និងប្រហែលជាគួរតែកើតមានឡើង។

ប្រាកដណាស់ ប្អូនស្រីចង់សំដៅទៅលើកណ្ឌគម្ពីរម៉ាថាយជំពូក១៨។ វាប្រហែលជាមានប្រយោជន៍ក្នុងការដើរកាត់ជំហានទាំងនេះ ដើម្បីឲ្យគ្រប់គ្នាយល់អំពីស្ថានភាព ព្រោះវាខ្លីហើយច្បាស់ទៀតផង។ នេះជាអ្វីដែលកើតឡើងនៅក្នុងទំនាក់ទំនងពិតរបស់ក្រុមជំនុំមួយពីមួយពេលទៅមួយពេល។

ជំហានទី១៖ លោកអ្នក និងបងប្អូនរបស់លោកអ្នក

ជំហានទី១៖ «បើបងឬប្អូនធ្វើបាបនឹងអ្នក នោះឲ្យទៅបន្ទោសគាត់ ក្នុងកាលដែលមានតែអ្នកហើយ និងគាត់ បើគាត់ស្តាប់អ្នក នោះអ្នកនឹងបានបងឬប្អូននោះមកវិញ» (ម៉ាថាយ ១៨:១៥)។

ដូច្នេះ ជំហានទី១៖ ចូរលោកអ្នកទៅរកអ្នកដែលប្រព្រឹត្តអំពើបាបនោះ រួចលោកអ្នកចូលទៅឯពួកគេ។ សូមលោកអ្នកកុំទាន់ធ្វើឲ្យបញ្ហានោះបែកធ្លាយជាសាធារណៈសិន។ ចូរលោកអ្នកកុំរហ័សក្នុងការលើកយកអំពើបាបផ្ទាល់ខ្លួនរបស់នរណាម្នាក់មកបង្ហាញជាសាធារណៈនោះឡើយ។ លោកអ្នកក៏មានបញ្ហាផ្ទាល់ខ្លួនរបស់លោកអ្នកដែរ។ «ចូរយកធ្នឹមពីភ្នែករបស់ខ្លួនចេញជាមុនសិន នោះទើបនឹងបានឃើញច្បាស់ អាចនឹងយកកម្ទេចចេញពីភ្នែករបស់បងប្អូនអ្នកបានដែរ» (ម៉ាថាយ ៧:៥)។ តែនៅពេលលោកអ្នកបានធ្វើការវាយតម្លៃខ្លួនឯងដោយត្រឹមត្រូវរួចរាល់ជាស្រេច ព្រមទាំងបន្ទាបខ្លួននៅចំពោះព្រះជាម្ចាស់ និងប្រកាសអំពីការពឹងផ្អែកទៅលើព្រះគុណតែមួយមុខគត់របស់លោកអ្នករួចហើយ បន្ទាប់មក ចូរលោកអ្នកចេញទៅឯគេចុះ។ នេះហើយ គឺជាអ្វីដែលសេចក្ដីស្រឡាញ់គួរធ្វើ។ នេះក្នុងករណីប្អូនស្រីម្នាក់នោះ—ប្រហែលជាមានមិត្តស្រីម្នាក់បានរួមដំណេកជាមួយមិត្តប្រុសរបស់នាង—បន្ទាប់មក ប្អូនស្រីចូលទៅនិយាយជាមួយប្អូនស្រីម្នាក់នោះចុះ។ ប្អូនស្រីអាចនិយាយថា «ការនេះមិនស្របទៅតាមបទគម្ពីរទេ។ វាមិនត្រឹមត្រូវនោះឡើយ។ ព្រះជាម្ចាស់មិនសព្វព្រះទ័យនឹងការនេះទេ»។ ហើយប្អូនស្រីសូមអង្វរគាត់ឲ្យឈប់ប្រព្រឹត្តការនោះចុះ។ ប្អូនស្រីប្រហែលជាអាច ឬប្រហែលជាមិនអាចយកប្ដូរនាងឲ្យឈប់បានទេ។

ជំហានទី២៖ ស្មរបន្ទាល់ពីរ ឬបីនាក់

ជាជំហានបន្ទាប់ នៅក្នុងកណ្ឌគម្ពីរ ម៉ាថាយ ១៨:១៦ បានចែងថា៖ «តែបើគាត់មិនព្រមស្តាប់ទេ នោះត្រូវយកមនុស្សម្នាក់ឬ២នាក់ទៅជាមួយ ដើម្បីនឹងបញ្ជាក់គ្រប់ទាំងពាក្យ ដោយសារស្មរបន្ទាល់២ ឬ៣នាក់»។

លោកអ្នកអាចឃើញថា មិនចាំបាច់អីត្រូវប្រញាប់ក្នុងការថ្កោលទោសនោះទេ។ ក៏មិនចាំបាច់ប្រញាប់នាំរឿងនេះទៅប្រាប់ក្រុមជំនុំទាំងមូលនោះដែរ។ យើងរាល់គ្នាត្រូវព្យាយាមរក្សាវាជារឿងតូចឲ្យអស់ពីសមត្ថភាពសិន និងរក្សាជាឯកជនតាមដែលអាចធ្វើបាន កុំទាន់ធ្វើឲ្យមានផលប៉ះពាល់ និងឈឺចាប់ជាសាធារណ:លើសពីការចាំបាច់នោះឡើយ។ ដូច្នេះ ប្អូនស្រីនាំយកមិត្តម្នាក់ ឬពីរនាក់ដែលប្រហែលជាស្គាល់ និងស្រឡាញ់មិត្តរបស់ប្អូនស្រីនោះទៅជាមួយ ហើយនាំគ្នាទៅជួបនឹងនាងចុះ។ នាងប្រហែលមិនអនុញ្ញាតឲ្យប្អូនស្រីធ្វើបែបនេះទេ ប៉ុន្តែប្អូនស្រីសូមព្យាយាម ហើយនិយាយទាំងអស់គ្នាថា «ពួកយើងស្រឡាញ់ប្អូនស្រី។ ពួកយើងបារម្ភពីប្អូនស្រី។ តើពួកយើងអាចអធិស្ឋានឲ្យប្អូនស្រីបានទេ? ពួកយើងចង់ឲ្យប្អូនស្រីបានរួចចេញពីអំពើបាបនេះ ពីព្រោះវានឹងបំផ្លាញប្អូនស្រីជាមិនខាន។ វានឹងបំផ្លាញប្អូនប្រុសនោះផងដែរ។ វានឹងបំផ្លាញទីបន្ទាល់របស់ប្អូនស្រី។ វានឹងបំផ្លាញក្រុមជំនុំធ្ងន់ធ្ងរបំផុត ហើយវានឹងបន្តុះបង្អាប់ដល់សិរីល្អរបស់ព្រះគ្រីស្ទ»។ ប្អូនស្រីត្រូវព្យាយាមប្ដូរចិត្តនាង។

ជំហានទី៣៖ ប្រាប់ក្រុមជំនុំ

ហើយនៅជំហានទី៣៖ «ប្រសិនបើគាត់បដិសេធមិនព្រមស្ដាប់ពួកគេទេ ចូរប្រាប់វាទៅក្រុមជំនុំចុះ» (ម៉ាថាយ ១៨:១៧)។
ត្រង់នេះគឺជាចំណុចដែលត្រូវមានការប្រមូលគ្នាក្នុងក្រុមជំនុំធ្វើការប្រជុំមួយដែលមានការស្ដាប់ព័ត៌មាន និងការសម្រេចលើរឿងនោះដោយត្រឹមត្រូវ។ ទង្វើដំបូងរបស់ក្រុមជំនុំ គឺការនិយាយថា «ពួកយើងចង់ឲ្យប្អូនស្រីត្រឡប់ក្រោយវិញ» ពីព្រោះនេះមិនទាន់ជាការកាត់ការចេញពីក្រុមជំនុំនៅឡើយទេ។ វាជាការអធិស្ឋាន ការឈឺចាប់ និងការប៉ងប្រាថ្នារបស់ក្រុមជំនុំទាំងមូលក្នុងការដែលឲ្យគាត់ប្រែចិត្តចេញពីអំពើបាបនោះ។

ជំហានទី៤៖ ការកាត់ចេញពីក្រុមជំនុំ

ជំហានចុងក្រោយគឺ៖ «បើគាត់មិនព្រមស្តាប់អ្នកទាំងនោះទេ នោះត្រូវតែប្រាប់ដល់ពួកជំនុំ ហើយបើមិនព្រមស្តាប់ពួកជំនុំទៀត នោះត្រូវតែរាប់គាត់ទុកជាអ្នកក្រៅសាសន៍ ឬជាអ្នកយកពន្ធវិញ» (ម៉ាថាយ ១៨:១៧)។

នោះមានន័យថា ក្រុមជំនុំមានជំហានមួយចំនួនក្នុងការកាត់ការមនុស្សម្នាក់នោះចេញ ដូចជាកាត់ចេញពិធីលាងព្រះអម្ចាស់ និងចេញពីទំនាក់ទំនងធម្មតា ដែលលោកអ្នកធម្មតាមានជាមួយអ្នកជឿម្នាក់ក្នុងការធ្វើការជាមួយគ្នាដូចអស់អ្នកដែលមានការប្ដេជ្ញាចិត្តដូចគ្នាចំពោះព្រះយេស៊ូវ។ ចូរលោកអ្នកកាត់ការពួកគេចេញចុះ។ នោះមានន័យថា មិនមែនលោកអ្នកដាក់បណ្ដាសារពួកគេទេ ប៉ុន្តែលោកអ្នកត្រូវតែដាក់ពួកគេនៅក្នុងចំណុចមួយ ដែលលោកអ្នកកំពុងតែប្រាថ្នាចង់បាន និងអធិស្ឋានសម្រាប់ការប្រែចិត្តរបស់ពួកគេ។

ខ្ញុំធ្លាប់ឃើញការនេះកើតឡើង ហើយវាតែងតែកើតឡើងនៅក្នុងព្រះគម្ពីរជាញឹកញាប់ ដែលការកាត់ចេញពីក្រុមជំនុំប្រភេទនេះ មានការប្រោសលោះទ្វេដង។ វាជាការប្រោសលោះសម្រាប់ក្រុមជំនុំ ដោយសារហេតុនេះ សេចក្ដីពិតនៃដំណឹងល្អ ហើយនឹងអំណាចរបស់វានឹងមិនត្រូវបាត់បង់ ដោយសារពួកមនុស្សមានពុតដែលជាអ្នកជឿ ដែលពួកគេមិនបង្កើតផលផ្លែទាល់តែសោះ។ ហើយវាជាការប្រោសលោះសម្រាប់បុគ្គលម្នាក់ ដែលត្រូវបានកាត់ចេញពីក្រុមជំនុំ ពីព្រោះយើងឃើញនៅក្នុងកណ្ឌគម្ពីរ១កូរិនថូសជំពូក៥ គោលបំណងនៃការនិរទេសបណ្ដោះអាសន្ននេះ គឺដើម្បីសង្គ្រោះ (១កូរិនថូស ៥:៥)។ នោះយើងចង់នាំពួកគេទៅកាន់ការប្រែចិត្ត និងការស្ដារឡើងវិញក្នុងក្រុមជំនុំ។ ហើយដើម្បីបញ្ចប់ការនោះ យើងត្រូវតែនិយាយជាមួយពួកគេ។ យើងចូលទៅជិតពួកគេដូចដែលយើងចូលទៅកាន់អ្នកដែលមិនជឿដោយសេចក្ដីស្រឡាញ់។ យើងរីករាយនឹងលះបង់ជីវិតរបស់យើងឲ្យតែពួកគេបានប្រែចិត្ត។

គ្មានអ្វីអាក្រក់ ឬជាសត្រូវនឹងគ្នាទេ នៅក្នុងរឿងនេះ។ ការនេះត្រូវបានរចនាឡើង ដើម្បីធ្វើគ្រប់កិច្ចការទាំងអស់ដែលក្រុមជំនុំអាចធ្វើបានក្នុងការរក្សាសេចក្ដីពិតរបស់ខ្លួន និងសេចក្ដីទៀងត្រង់ សេចក្ដីបរិសុទ្ធ និងគ្មានស្នាមប្រឡាក់ ហើយដើម្បីស្រឡាញ់អ្នកដទៃ និងនាំពួកគេត្រឡប់ទៅឯព្រះសង្គ្រោះវិញ។

ដូច្នេះ ចម្លើយរបស់ខ្ញុំសម្រាប់ប្អូនស្រីគឺ៖ បាទ មានការកាត់ការចេញពីក្រុមជំនុំ ហើយនៅក្នុងកណ្ឌគម្ពីរម៉ាថាយជំពូក១៨ ប្រាប់ពីរបៀបនៅក្នុងការដើរតាមជំហានទាំងឡាយនោះ។

ជំហានទាំងបួននៃការដាក់វិន័យបានបង្កើតឡើង ដើម្បីរក្សាក្រុមជំនុំដ៏បរិសុទ្ធ និងគ្មានស្នាមប្រលាក់ ខណៈដែលការទាំងនោះមិនបានប្រែចិត្តត្រឡប់ទៅកាន់ព្រះយេស៊ូវវិញ។

និពន្ធដោយ៖ John Piper
បកប្រែដោយ៖ កញ្ញា គឹម បូព្រឹក
កែសម្រួលដោយ៖ លោក ខែម បូឡុង, លោក ទេព រ៉ូ, លោក ឯក សត្យា, លោក ឯក ធីម៉ូថេ, លោក សឹម រក្សា និងលោកឈាង បូរ៉ា
ដកស្រង់ខ្លះៗ និងកែសម្រួលចេញពី www.desiringgod.org ដោយមានការអនុញ្ញាត។

តើអ្នកគិតយ៉ាងណា?

០ពិន្ទុ

តើលោកអ្នកយល់យ៉ាងណាដែរ?

៤៥៦

កំណត់ហេតុបណ្ដាញ៦ កក្កដា ២០២៦

តើខ្ញុំអាចនៅតែមានសេចក្ដីអំណរក្នុងគ្រាដែលមានពេញដោយសេចក្ដីសង្ស័យបានដែរឬទេ?

សូមស្វាគមន៍មកកាន់ថ្ងៃច័ន្ទនេះ ជាថ្ងៃចុងក្រោយនៃខែកក្កដា។ កាលពីថ្ងៃព្រហស្បតិ៍មុន យើងបានរៀនអំពីសេចក្ដីអំណររបស់ព្រះជាម្ចាស់…

អានបន្ថែម

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

១៨៣៨៥

ក្តៅៗពេញនិយម

កំណត់ហេតុបណ្ដាញ៦ មករា ២០២៦

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

វាគ្មានអ្វីគួរឲ្យភ្ញាក់ផ្អើលនោះទេ យើងបានទទួលសំណួរជាច្រើនពីបេសកជននៅតាមតំបន់នានា…

អានបន្ថែម

តើ៧០អាទិត្យ ក្នុងកណ្ឌគម្ពីរដានីយ៉ែលជាអ្វី? (ដានីយ៉ែល ៩)

៤១១៩

កំណត់ហេតុបណ្ដាញ២៥ វិច្ឆិកា ២០២៥

តើ៧០អាទិត្យ ក្នុងកណ្ឌគម្ពីរដានីយ៉ែលជាអ្វី? (ដានីយ៉ែល ៩)

អត្ថន័យសំខាន់នៃការកាត់ស្រាយកណ្ឌគម្ពីរ ដានីយ៉ែល ៩:២៦-២៧ គឺជាការសង្កេតរបស់សាវ័កម៉ាថាយ ត្រង់ដែលព្រះយេស៊ូវកំពុងមានបន្ទូលអំពីការបំផ្លិចបំផ្លាញដែលត្រូវនឹងមកក្រុងយេរូសាឡឹម និងព្រះវិហារបរិសុទ្ធ (ម៉ាថាយ ២៤:១៥)។

អានបន្ថែម