មូលហេតុដែលអ្នកអាចត្រូវបានល្បួងមិនឲ្យសូវខ្វល់អំពីព្រះវិហាររបស់អ្នក

១៩ កញ្ញា ២០២៣អានរយៈពេល ១០ នាទី

មើល៣៧៩ដង

គ្រូគង្វាលគ្រប់រូបប្រឈមនឹងបញ្ហាដែលសមាជិកលែងមកថ្វាយបង្គំ ឬក៏ត្រូវបានល្បួងឲ្យលែងមកថ្វាយបង្គំជាមួយរាស្ដ្ររបស់ព្រះជាម្ចាស់។ ស្ទើរតែគ្រប់ពេល ព្រះវិហារសុទ្ធតែមានសមាជិកមួយចំនួនស្ថិតក្នុងគ្រោះថ្នាក់នៃការដាច់ឆ្ងាយដូចនេះ ហើយមិនយូរមិនឆាប់ពួកគេនឹងលែងចូលរួមក្នុងជីវិតនៃក្រុមជំនុំជាមិនខាន។ ការធ្វើដូច្នេះគឺជាការមិនស្តាប់បង្គាប់ដោយផ្ទាល់ទៅនឹងកណ្ឌគម្ពីរហេព្រើរ ១០:២៤-២៥ ដែលបានចែងថា៖ «ហើយត្រូវឲ្យយើងពិចារណាមើលគ្នាទៅវិញទៅមកដែរ ដើម្បីនឹងបណ្ដាលឲ្យមានសេចក្តីស្រឡាញ់ ហើយឲ្យប្រព្រឹត្តការល្អផង ឥតលែងប្រជុំគ្នា ដូចជាអ្នកខ្លះធ្លាប់នោះឡើយ ត្រូវឲ្យកំឡាចិត្តគ្នាវិញ ឲ្យកាន់តែខ្លាំងឡើងផង តាមដែលឃើញថាថ្ងៃនោះជិតមកដល់ហើយ»។ ខគម្ពីរនេះមិនត្រឹមតែដាស់តឿនយើងកុំឲ្យធ្វេសប្រហែសចំពោះការប្រកបគ្នានឹងការចូលរួមក្នុងក្រុមជំនុំតាមតំបន់ប៉ុណ្ណោះទេ តែក៏ថែមទាំងប្រាប់អំពីតម្រុយនៃមូលហេតុថាយើងក៏ទំនងធ្វើបែបនោះផងដែរ។

ខាងក្រោមនេះជាមូលហេតុពីរយ៉ាងដែលលោកអ្នកអាចនឹងត្រូវបានល្បួងឲ្យលែងប្រជុំគ្នាជាមួយនឹងរាស្ដ្ររបស់ព្រះជាម្ចាស់។

លោកអ្នកភ្លេចនូវអ្វីដែលលោកអ្នកនាំមក

កណ្ឌគម្ពីរ ហេព្រើរ ១០:២៥ ដាស់តឿនគ្រីស្ទបរិស័ទគ្រប់រួបមិនឲ្យចាកចេញពីការប្រកបគ្នាក្នុងក្រុមជំនុំតាមតំបន់ ហើយខគម្ពីរនេះក៏ប្រាប់ភ្លាមៗអំពីមូលហេតុជាចម្បងផងដែរ។ ក្នុងនាមជាគ្រីស្ទបរិស័ទ យើងទាំងអស់គ្នាទទួលខុសត្រូវស្មើគ្នាក្នុងការបណ្ដាលគ្នាទៅវិញទៅមកឲ្យមានសេចក្ដីស្រឡាញ់ និងប្រព្រឹត្តការល្អ។ ពួកយើងត្រូវតែបណ្ដាលគ្នាទៅវិញទៅមកក្នុងការប្រព្រឹត្តដោយសេចក្ដីស្រឡាញ់ និងបណ្ដាលគ្នាទៅវិញទៅមក ដើម្បីប្រព្រឹត្តការល្អ។ ហើយរឿងដែលងាយយល់គឺថា យើងមិនអាចធ្វើបែបនេះបានទេ ប្រសិនបើយើងមិនទៅជុំគ្នានោះ។

ព័ត៌មានពីក្រោយកណ្ឌគម្ពីរហេព្រើរដែលជាព្រះគម្ពីរសញ្ញាថ្មីបង្រៀនគឺថា យើងជាគ្រីស្ទបរិស័ទ យើងរួមគ្នាមកជារូបកាយតែមួយ—ពោលគឺជារូបកាយរបស់ព្រះគ្រីស្ទ។ ក្នុងកណ្ឌគម្ពីររ៉ូមជំពូក១២ សាវ័ក ប៉ុល បានមានប្រសាសន៍ថា «ដ្បិតដែលយើងរាល់គ្នាមានអវយវៈជាច្រើន រួមគ្នាជារូបកាយតែមួយ តែអវយវៈទាំងនោះមានការងារផ្សេងៗពីគ្នាជាយ៉ាងណា នោះយើងដែលមានគ្នាច្រើន ក៏ជារូបកាយតែមួយក្នុងព្រះគ្រីស្ទ ហើយជាអវយវៈដល់គ្នានឹងគ្នាបែបយ៉ាងនោះដែរ»។ ក្នុងរបៀបខ្លះៗ ព្រះជាម្ចាស់ប្រដូចគ្រីស្ទបរិស័ទគ្រប់រូបទៅនឹងអវយវៈនៃរូបកាយទាំងមូល—ពោលគឺមានអវយវៈច្រើន ប៉ុន្តែរួមគ្នាជារូបកាយតែមួយវិញ។ ក្នុងរបៀបខ្លះទៀត ព្រះជាម្ចាស់ក៏ប្រដូចក្រុមជំនុំតាមតំបន់ដែលមានច្រើនរួមគ្នាមកជារូបកាយតែមួយផងដែរ។ សាវ័ក ប៉ុល ក៏បានពន្យល់អំពីសាច់ប្រធានបទនេះនៅក្នុងកណ្ឌគម្ពីរ១កូរិនថូស និងក្នុងអត្ថបទខ្លីទាំងពីរនេះ គាត់ក៏បានទាញនូវសេចក្តីសន្និដ្ឋានដូចគ្នាមួយ—គឺថាដូចដែលអវយវៈនៃរូបកាយមានមុខងារសំខាន់ដូចគ្នា នោះគ្រីស្ទបរិស័ទម្នាក់ៗក៏មានអំណោយទានសំខាន់ដូចគ្នាដែរ។ ដូចទៅនឹងអវយវៈនៃរូបកាយដែលធ្វើឲ្យរូបកាយទាំងមូលដំណើរការបានល្អ និងដូចទៅនឹងអំណោយទានរបស់គ្រីស្ទបរិស័ទម្នាក់ៗដែលនាំឲ្យក្រុមជំនុំទាំងមូលដំណើរការបានល្អដែរ។ មិនមានអវយវៈនៃរូបកាយណាមួយមិនសំខាន់ឡើយ ហើយក៏មិនមានគ្រីស្ទបរិស័ទណាម្នាក់ដែលមិនសំខាន់ដែរ។

នៅពេលដែលលោកអ្នកត្រូវបានល្បួងឲ្យផ្តាច់ចេញពីក្រុមជំនុំតាមតំបន់ មិនថាជាអចិន្ត្រៃយ៍ ឬក៏មកថ្វាយបង្គំមិនសូវទៀងទាត់ ឬសូម្បីតែពេលខ្ជិលទៅព្រះវិហារក៏ដោយ ក៏ការនោះបង្ហាញថា លោកអ្នកបានភ្លេចអំពីអ្វីដែលលោកអ្នកនាំមកកាន់ក្រុមជំនុំហើយ។ លោកអ្នកបានធ្វេសប្រហែសក្នុងការយល់ដឹង ឬជឿថាជាអ្នក! (មែនហើយគឺអ្នក!) គឺជាអវយវៈដ៏សំខាន់នៃរូបកាយរបស់ព្រះគ្រីស្ទ។ លោកអ្នកមានអំណោយទានដែលត្រូវនាំយកទៅ ហើយក្រុមជំនុំនឹងពេញលក្ខណៈ ក្នុងតែករណីដែលលោកអ្នកយកអំណោយទានរបស់ខ្លួនទៅ ហើយប្រើប្រាស់វាប៉ុណ្ណោះ។

ព្រះជាម្ចាស់បានបង្កើតលោកអ្នកមកជាអវយវៈនៃរូបកាយ ហើយរូបកាយទាំងមូលក៏ត្រូវការលោកអ្នក ដើម្បីដំណើរការឲ្យបានល្អផងដែរ។ នៅពេលដែលលោកអ្នកធ្វេសប្រហែសក្នុងការមកជួបប្រជុំជាមួយរាស្ដ្រដទៃទៀតរបស់ព្រះជាម្ចាស់ នោះមានន័យថា លោកអ្នកបានបដិសេធមិនប្រើប្រាស់នូវអំណោយទានដែលព្រះអង្គបានប្រទានដល់អ្នកហើយ—ពោលគឺអំណោយទានដែលថ្វាយសិរីល្អដល់ទ្រង់ នៅពេលដែលលោកអ្នកប្រើអំណោយទានទាំងនោះ ទុកជាប្រយោជន៍ដល់អ្នកដទៃ។

អ្នកភ្លេចនូវអ្វីដែលអ្នកត្រូវការ

ប្រសិនបើវាជាការពិតដែលថា ព្រះជាម្ចាស់បានប្រទានអំណោយទានដល់លោកអ្នក ដើម្បីជាអវយវៈនៃរូបកាយទាំងមូល នោះច្បាស់ណាស់ក៏នឹងមានការបង្កប់អត្ថន័យសំខាន់មួយជាមិនខានដែរ៖ ពោលគឺព្រះជាម្ចាស់ក៏បានប្រទានអំណោយទានដល់ពួកគេផងដែរ។ លោកអ្នកមិនអាចពេញលក្ខណៈបានទេ បើសិនជាគ្មានពួកគាត់ដែរ។ ព្រះជាម្ចាស់មិនបានប្រទានអំណោយទានដល់លោកអ្នកច្រើនហូរហៀរ ក្រៅពីចំណោមមនុស្សដែលព្រះទ្រង់បានប្រទានអំណោយទានឲ្យដែរ ដល់ថ្នាក់ថាលោកអ្នកអាចរីកចម្រើន ហើយនឹងលូតលាស់ដោយមិនមានពួកគាត់ដែរនោះទេ។ លោកអ្នកជាអវយវៈនៃរូបកាយទាំងមូល ប៉ុន្តែត្រឹមតែជាផ្នែកតូច និងទោលមួយប៉ុណ្ណោះ។ លុះត្រាតែលោកអ្នកគិតថា មេដៃរបស់លោកអ្នកអាចដាច់ចេញពីរាងកាយ ហើយអាចរស់នៅដោយខ្លួនឯងបាន លុះត្រាតែលោកអ្នកគិតថា ខ្នែងពោះវៀនរបស់លោកអ្នកអាចដាច់ចេញពីរាងកាយ ហើយលូតលាស់បានដោយខ្លួនឯងបាន នោះចាំលោកអ្នកគិតថា ខ្លួនមិនចាំបាច់ត្រូវការប្រកបគ្នាជាមួយក្រូមជំនុំតាមតំបន់ចុះ។

ក្នុងរបៀបនេះ ការលែងប្រជុំគ្នាជាមួយនឹងរាស្ដ្ររបស់ព្រះជាម្ចាស់ វាគឺជាសញ្ញានៃអំនួតដ៏លើសលប់ និងដ៏ក្អេងក្អាងមួយ។ លោកអ្នកបានចាត់ទុកថា អំណោយទានដែលព្រះបានប្រទានដល់អ្នកដទៃ នោះមិនមានប្រយោជន៍ចំពោះអ្នក ហើយអំណោយទានដែលព្រះបានប្រទានឲ្យលោកអ្នក គឺលោកអ្នកអាចរស់ដោយរីករាយបាន ដោយមិនចាំបាច់មានអ្នកដទៃហើយ។ ការពិតជាក់ស្ដែងគឺថា ព្រះជាម្ចាស់បានបង្កើតយើងមក ដើម្បីឲ្យរីកចម្រើន និងរស់នៅបានតែនៅក្នុងភាពជាសហគមន៍ប៉ុណ្ណោះ។ គ្រីស្ទបរិស័ទណាដែលនៅម្នាក់ឯង គឺជាគ្រីស្ទបរិស័ទដែលស្លាប់។

ព្រះជាម្ចាស់បានបង្កើតលោកអ្នកមកជាផ្នែកមួយនៃរូបកាយ ហើយលោកអ្នកក៏ត្រូវការអវយវៈផ្សេងទៀត ដើម្បីឲ្យរូបកាយទាំងមូលនោះដំណើរការបានល្អ។ នៅពេលដែលលោកអ្នកលែងមកប្រជុំគ្នាជាមួយនឹងរាស្ដ្រដទៃទៀតរបស់ព្រះជាម្ចាស់ នោះមានន័យថា លោកអ្នកបានបដិសេធនូវអំណោយទានដែលទ្រង់បានប្រទានដល់ពួកគេទុកសម្រាប់លោកអ្នកហើយ—ពោលគឺអំណោយទានដែលថ្វាយសិរីល្អដល់ទ្រង់នៅពេលពួកគាត់ប្រើប្រាស់អំណោយទានទាំងនោះ ដើម្បីជាប្រយោជន៍ដល់លោកអ្នក។

នៅគ្រាដែលវាហាក់ដូចជាពិបាកណាស់ក្នុងការក្លាយជាអវយវៈនៃក្រុមជំនុំតាមតំបន់ ហើយនិងនៅគ្រាដែលការមិនសូវខ្វល់ខ្វាយអំពីក្រុមជំនុំរបស់លោកអ្នកហាក់ដូចជាផុសផុលខ្លាំង នោះលោកអ្នកកំពុងតែភ្លេចអំពីអ្វីដែលលោកអ្នកនាំមក និងអំពីអ្វីដែលលោកអ្នកត្រូវការហើយ។ មែនហើយ! លោកអ្នកក៏បានភ្លេចគិតថា លោកអ្នកត្រូវការការអធិប្បាយពីព្រះបន្ទូលរបស់ព្រះជាម្ចាស់ ការធ្វើពិធីលៀងព្រះអម្ចាស់ ការធ្វើបន្ទាល់ពីពិធីបុណ្យជ្រមុជទឹក និងមធ្យោបាយដ៏សាមញ្ញផ្សេងទៀតនៃព្រះគុណដែលព្រះប្រទានតាមរយៈការប្រជុំគ្នាក្នុងពួកជំនុំ ដែលមកជុំគ្នា។ ប៉ុន្តែ ជាដំបូង លោកអ្នកបានភ្លេចថា ខ្លួនគឺជាអវយវៈនៃរូបកាយតាំងពីដើមមកម្ល៉េះ—ពោលគឺរូបកាយដែលលោកអ្នកត្រូវការពួកគាត់ និងរូបកាយដែលពួកគាត់ត្រូវការលោកអ្នកដែរហើយ។

និពន្ធដោយ៖ Tim Challies
បកប្រែដោយ៖ លោក ថៃ វណ្ណៈ
កែសម្រួលដោយ៖ លោក ខែម បូឡុង, លោក ទេព រ៉ូ, លោក ឯក សត្យា, លោក ហុង សម្ភស, លោក ឯក ធីម៉ូធេ, លោក សឹម រក្សា និងលោក ឈាង បូរ៉ា
ដកស្រង់ខ្លះៗ និងកែសម្រួលចេញពី www.challies.com ដោយមានការអនុញ្ញាត។ Plovpit.com

តើអ្នកគិតយ៉ាងណា?

០ពិន្ទុ

តើលោកអ្នកយល់យ៉ាងណាដែរ?

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

១៥២៨៦

ក្តៅៗពេញនិយម

កំណត់ហេតុបណ្ដាញ៦ មករា ២០២៦

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

វាគ្មានអ្វីគួរឲ្យភ្ញាក់ផ្អើលនោះទេ យើងបានទទួលសំណួរជាច្រើនពីបេសកជននៅតាមតំបន់នានា…

អានបន្ថែម

តើ៧០អាទិត្យ ក្នុងកណ្ឌគម្ពីរដានីយ៉ែលជាអ្វី? (ដានីយ៉ែល ៩)

៣១០៤

កំណត់ហេតុបណ្ដាញ២៥ វិច្ឆិកា ២០២៥

តើ៧០អាទិត្យ ក្នុងកណ្ឌគម្ពីរដានីយ៉ែលជាអ្វី? (ដានីយ៉ែល ៩)

អត្ថន័យសំខាន់នៃការកាត់ស្រាយកណ្ឌគម្ពីរ ដានីយ៉ែល ៩:២៦-២៧ គឺជាការសង្កេតរបស់សាវ័កម៉ាថាយ ត្រង់ដែលព្រះយេស៊ូវកំពុងមានបន្ទូលអំពីការបំផ្លិចបំផ្លាញដែលត្រូវនឹងមកក្រុងយេរូសាឡឹម និងព្រះវិហារបរិសុទ្ធ (ម៉ាថាយ ២៤:១៥)។

អានបន្ថែម

សំណួរដែលបណ្តាលចិត្ត៖ វិធីសាស្ត្រថ្មី ក្នុងការពិភាក្សានៅក្នុងក្រុមតូច

១១២៣

កំណត់ហេតុបណ្ដាញ១៨ វិច្ឆិកា ២០២៥

សំណួរដែលបណ្តាលចិត្ត៖ វិធីសាស្ត្រថ្មី ក្នុងការពិភាក្សានៅក្នុងក្រុមតូច

ព្រះយេស៊ូវ ពួកសាវ័ក និងពួកសិស្សរបស់ទ្រង់ ពួកគេទាំងអស់បានសួរបណ្តាជននូវសំណួរជាក់លាក់។ ឥឡូវនេះ ប្រហែលជាពួកយើងគួរពិចារណាប្រើសំណួរដូចគ្នាទាំងនេះ សម្រាប់ក្រុមតូចរបស់យើងទាំងអស់។

អានបន្ថែម

អត្ថបទបន្ថែមពី កំណត់ហេតុបណ្ដាញ

ហេតុអ្វីបានជាព្រះយេស៊ូវទទួលបុណ្យជ្រមុជទឹក?

៥១៨៤

ក្តៅៗពេញនិយម

កំណត់ហេតុបណ្ដាញ១៣ កុម្ភៈ ២០២៦

ហេតុអ្វីបានជាព្រះយេស៊ូវទទួលបុណ្យជ្រមុជទឹក?

Why was Jesus baptized?

អានបន្ថែម

តើគ្រូគង្វាល និងពួកចាស់ទុំមានភាពខុសគ្នាឬ?(១ធីម៉ូថេ ៣)

៨២៤២

ក្តៅៗ

កំណត់ហេតុបណ្ដាញ៣០ ធ្នូ ២០២៥

តើគ្រូគង្វាល និងពួកចាស់ទុំមានភាពខុសគ្នាឬ?(១ធីម៉ូថេ ៣)

សាវ័ក ប៉ុល និងអ្នកនិពន្ធព្រះគម្ពីរសញ្ញាថ្មីផ្សេងទៀតបានប្រើប្រាស់ពាក្យថា «អ្នកត្រួតត្រា» ជំនួសគ្នាទៅវិញទៅមកជាមួយនឹងពាក្យ «ពួកចាស់ទុំ»។ ឧទាហរណ៍៖ សូមពិចារណានៅក្នុងកណ្ឌគម្ពីរ ទីតុស ១:៥-៧។

អានបន្ថែម

តើការជំនុំជម្រះដោយផ្អែកលើការប្រព្រឹត្តិមានន័យយ៉ាងដូចម្ដេច? (វិវរណៈ ២០ និង ២១)

៨២២០

ក្តៅៗពេញនិយម

កំណត់ហេតុបណ្ដាញ២៣ ធ្នូ ២០២៥

តើការជំនុំជម្រះដោយផ្អែកលើការប្រព្រឹត្តិមានន័យយ៉ាងដូចម្ដេច? (វិវរណៈ ២០ និង ២១)

ឯអ្នកណាដែលឈ្នះ នោះនឹងបានគ្រងសេចក្ដីទាំងនេះទុកជាមរដក អញនឹងធ្វើជាព្រះដល់អ្នកនោះ ហើយអ្នកនោះនឹងធ្វើជាកូន

អានបន្ថែម

តើអ្នកដែលមិនបានសង្គ្រោះ នឹងទទួលរងទុក្ខពីការជំនុំជម្រះដ៏អស់កល្បជានិច្ចឬទេ? (២ថែស្សាឡូនីច ១)

២៥២

ក្តៅៗ

កំណត់ហេតុបណ្ដាញ១៦ ធ្នូ ២០២៥

តើអ្នកដែលមិនបានសង្គ្រោះ នឹងទទួលរងទុក្ខពីការជំនុំជម្រះដ៏អស់កល្បជានិច្ចឬទេ? (២ថែស្សាឡូនីច ១)

កណ្ឌគម្ពីរ ២ថែស្សាឡូនីច ១:៨ បានលើកឡើងអំពី «ការសងសឹក» របស់ព្រះជាម្ចាស់។ ពាក្យជាភាសាក្រិក «អេកឌីខេស៊ីស» (ekdikēsis) បង្ហាញអំពីសេចក្ដីយុត្តិធម៌ ឬការផ្ដន្ទាទោស ដោយសំដៅទៅលើសេចក្ដីយុត្តិធម៌នៃការប្រោសលោះរបស់ព្រះជាម្ចាស់ ជំនួសឲ្យអ្នករើសតាំងរបស់ទ្រង់ (លូកា ១៨:៧-៨) ឬសំដៅទៅលើការផ្ដន្ទាទោសដ៏សុចរិតរបស់ទ្រង់ទៅលើអ្នកដែលទាស់ប្រឆាំងនឹងទ្រង់ (លូកា ២១:២២; រ៉ូម ១២:១៩)។

អានបន្ថែម