ឥឡូវនេះ លោកអ្នកនៅលីវ ហើយពេលខ្លះ លោកអ្នកប្រាថ្នាចង់បានគូស្រករ។
លោកអ្នកប្រាថ្នាចង់រៀបការ ចង់មានកូន និងមានគ្រួសារ។ លោកអ្នកជឿថា ព្រះជាម្ចាស់បានដាក់បំណងប្រាថ្នានេះនៅក្នុងដួងចិត្តរបស់លោកអ្នក ប៉ុន្តែដោយសារហេតុផលមួយចំនួន វាមិនទាន់កើតឡើងនៅឡើយ។ ដូចជាអ្នកនិពន្ធកណ្ឌគម្ពីរទំនុកតម្កើងម្នាក់ដែរ លោកអ្នកនៅតែទូលសូមថា «ឱព្រះអម្ចាស់អើយ! តើដល់កាលណាទៀត?» (ទំនុកតម្កើង ១៣:១)។
តើលោកអ្នកយល់អំពីអារម្មណ៍នេះដែរឬទេ?
ខ្ញុំដល់វ័យម្ភៃជាងហើយ ហើយខ្ញុំក៏នៅលីវពេញមួយជីវិតដែរ។ ខ្ញុំមិនមានចម្លើយទាំងអស់ចំពោះភាពនៅលីវទេ ប៉ុន្តែខ្ញុំដឹងយ៉ាងប្រាកដអំពីការតស៊ូ និងការលំបាក ព្រមទាំងព្រះពរដែលភាពនៅលីវបាននាំមកដែរ។ ផ្លូវនោះអាចមានការឈឺចាប់ ប៉ុន្តែវាមិនចាំបាច់ថាយើងមិនមានអំណរនោះទេ។
ខ្ញុំប្រាកដថា មនុស្សជាច្រើនក្នុងចំណោមយើងដែលនៅលីវចង់ប្រើប្រាស់ហេតុផលនេះដោយប្រាជ្ញា—ប៉ុន្តែតើដោយរបៀបណា? តើយើងអាចមានអំណរជាមួយភាពនៅលីវ ដោយមិនខ្ជះខ្ជាយពេលនេះបានយ៉ាងដូចម្ដេច?
អស់រយៈពេលជាច្រើនឆ្នាំ ខ្ញុំបានឃើញថា មានចំណុច១១យ៉ាងដែលគ្រីស្ទបរិស័ទនៅលីវគ្រប់គ្នាគួរតែដឹង៖
១. ចូរសម្លឹងមើលទៅឯព្រះយេស៊ូវ។ ការរីកចម្រើនក្នុងភាពនៅលីវកើតឡើងបានដោយការដែលលោកអ្នកត្រូវសម្លឹងមើលទៅកាន់អង្គមួយ ដែលទ្រង់គ្មានបាបទាល់តែសោះ។ ចូរសម្លឹងមើលទៅឯព្រះយេស៊ូវដែលទ្រង់ជាប្រភពនៃអំណរ ក្ដីសង្ឃឹម គោលបំណង និងអត្ថន័យរបស់លោកអ្នក។ មានតែព្រះជាម្ចាស់ប៉ុណ្ណោះដែលអាចប្រទាននូវអ្វីដែលលោកអ្នកចង់បាន និងអ្វីដែលលោកអ្នកពិតជាត្រូវការ។
២. ត្រូវដឹងពីអ្វីដែលជាការថ្វាយបង្គំរូបព្រះនៅក្នុងចិត្តរបស់លោកអ្នក។ ការមានមនុស្សសំខាន់មួយគឺជារឿងល្អ ប៉ុន្តែវាជារឿងមិនល្អនៅពេលដែលលោកអ្នកប្រែក្លាយគាត់ទៅជារូបព្រះ។ ការដែលលោកអ្នកយកអ្វីៗផ្សេងទៀតសំខាន់ជាងព្រះគឺជាការថ្វាយបង្គំរូបព្រះ ហើយខ្ញុំក៏ឃើញគ្រីស្ទបរិស័ទជាច្រើនបានយកមិត្តប្រុស ឬមិត្តស្រីរបស់គាត់សំខាន់ជាងព្រះ នៅពេលពួកគេចាប់ផ្ដើមចែចង់គ្នា។ ចូរពិនិត្យមើលដួងចិត្តរបស់លោកអ្នកឥឡូវនេះ ដើម្បីឲ្យលោកអ្នកអាចជៀសផុតពីគ្រោះថ្នាក់នៅពេលក្រោយ។ តើបំណងប្រាថ្នារបស់លោកអ្នកចង់នៅជាមួយនរណាម្នាក់ជាការដែលមានសុខភាពល្អក្នុងទំនាក់ទំនង ឬជាការថ្វាយបង្គំរូបព្រះ?
៣. ចូរការពារដួងចិត្តរបស់លោកអ្នក។ ព្រះគម្ពីរបានប្រាប់យើងឲ្យការពារដួងចិត្ត មិនមែនធ្វើតាមដួងចិត្តរបស់យើងនោះទេ។ ចូរការពារដួងចិត្តរបស់លោកអ្នកឲ្យបានគង់វង្សចេញពីការស្រឡាញ់លោកីយ៍ រូបព្រះ និងបំណងប្រាថ្នាដែលចង់បានប្ដី ឬប្រពន្ធខ្លាំងពេក ប៉ុន្តែលោកអ្នកអាចនៅបើកចំហចិត្តចំពោះអស់អ្នកណាដែលព្រះអម្ចាស់មានសម្រាប់ជីវិតរបស់លោកអ្នក សូម្បីតែឥឡូវនេះក៏ដោយ។ ដូច្នេះ សូមការពារដួងចិត្តរបស់លោកអ្នក ប៉ុន្តែសូមកុំបិទភ្នែកឡើយ។
៤. ចូរបង្រៀនខ្លួនឯងឲ្យចេះកោតខ្លាចព្រះ។ ឥឡូវនេះ ការនៅលីវរបស់លោកអ្នកប្រហែលជាពេលវេលាដែលនាំឲ្យលោកអ្នកមានពេលទំនេរច្រើនជាងពេលផ្សេងៗទៀតនៅក្នុងរដូវកាលនៃជីវិតរបស់លោកអ្នក។ សូមកុំខ្ជះខ្ជាយពេលនេះឡើយ។ ផ្ទុយទៅវិញ ចូរប្រើវាដោយប្រាជ្ញាដោយចំណាយពេលដោយចេតនាក្នុងការអានព្រះគម្ពីរ និងអធិស្ឋាន បម្រើនៅក្នុងក្រុមជំនុំ និងសហគមន៍របស់លោកអ្នក រីកចម្រើននៅក្នុងការងាររបស់លោកអ្នក រៀនវិជ្ជាជីវៈថ្មីៗ អានសៀវភៅ ការបង្កើតទំនាក់ទំនងមិត្តភាពដែលមានសុខភាពល្អ ក៏ដូចជាការចេញទៅបម្រើបេសកកម្មក្រៅប្រទេសផងដែរ។ លោកអ្នកនឹងនៅតែអាចធ្វើការទាំងនោះបាន ប្រសិនបើលោកអ្នករៀបការរួចហើយ ប៉ុន្តែលោកអ្នកនឹងមិនអាចមានពេលបត់បែនបានដូចដែលនៅលីវឥឡូវនេះទេ។ ដូច្នេះ ចូរប្រើពេលនេះដោយប្រាជ្ញាចុះ។
៥. ត្រូវដឹងពីភាពរអ៊ូរទាំ។ ការរអ៊ូរទាំមិនមែនសុខៗនឹងនាំឲ្យយើងមានព្រះរាជបុត្រដ៏ស្រស់សង្ហាមួយអង្គ (ឬក្នុងករណីរបស់ខ្ញុំ ព្រះនាង ចាស្មីន) នៅខាងយើងនោះទេ។ បន្ថែមពីនេះទៀត ការរអ៊ូរទាំនឹងនាំយើងទៅរកភាពល្វីងជូរចត់ ដែលនោះមិនមែនជាការដែលគួរឲ្យទាក់ទាញនោះទេ។ ជាជាងរអ៊ូរទាំអំពីការដែលលោកអ្នកនៅលីវ ហើយប្រាថ្នាថាខ្លួនមានគូ ចូរបង្កើតទម្លាប់ ដើម្បីរម្លឹកឡើងវិញអំពីព្រះពររបស់ព្រះអម្ចាស់ដែលទ្រង់បានប្រទានដល់លោកអ្នក ដែលតាមពិតទៅលោកអ្នកមិនសមនឹងទទួលបានអ្វីទេ។
៦. សូមធ្វើបញ្ជីសម្រាប់លោកអ្នកផ្ទាល់ មិនមែនសម្រាប់ប្ដី/ប្រពន្ធទេ។ ជាជាងធ្វើបញ្ជីអំពីអ្វីដែលលោកអ្នកចង់បានពីប្ដី/ប្រពន្ធ ចូរធ្វើបញ្ជីអំពីបុគ្គលដែលលោកអ្នកត្រូវក្លាយជាក្នុងនាមជាប្ដី/ប្រពន្ធវិញ។ និយាយម៉្យាងទៀត សូមកុំផ្ដោតលើការស្វែងរកមនុស្សដែលត្រឹមត្រូវឡើយ៖ តែត្រូវផ្ដោតលើបុគ្គលដែលលោកអ្នកត្រូវក្លាយជាវិញ។ ប្រភេទមនុស្សដែលលោកអ្នកប្រាថ្នាចង់បានពេលលោកអ្នកនៅអាយុ២០ឆ្នាំទំនងជាមិនមែនជាប្រភេទមនុស្សដែលលោកអ្នកត្រូវការមានពេលអាយុខ្ទង់៥០ឆ្នាំនោះទេ។
៧. សូមកុំដាក់សេចក្ដីសង្ឃឹមចុងក្រោយរបស់លោកអ្នកនៅក្នុងជីវិតអាពាហ៍ពិពាហ៍។ ប្រសិនបើលោកអ្នកមានបំណងប្រាថ្នាយ៉ាងជ្រាលជ្រៅក្នុងការរៀបការ នោះនឹងមានថ្ងៃមួយដែលលោកអ្នកនឹងទំនងជាបានរៀបការ…ឬក៏មិនបានរៀបការក៏អាចថាបាន។ ថ្ងៃដ៏ពិសេសនៅថ្ងៃរៀបការ រាត្រីក្រេបទឹកឃ្មុំ និងគ្រួសារដែលលោកអ្នកចង់បានទៅថ្ងៃខាងមុខសម្រាប់ជីវិតរបស់លោកអ្នកទំនងជាអាចនឹងមកដល់…ឬក៏មិនអាចមកដល់ផងដែរ។ លោកអ្នកមិនដឹងថា ថ្ងៃស្អែកនឹងមានរឿងអ្វីកើតឡើងចំពោះលោកអ្នកទេ ដូច្នេះចូរទុកឲ្យវានៅតែឯងចុះ។ ផ្ទុយពីការដាក់សេចក្ដីសង្ឃឹមចុងក្រោយនៅក្នុងប្ដី/ប្រពន្ធរបស់លោកអ្នក សូមដាក់សេចក្ដីសង្ឃឹមចុងក្រោយរបស់លោកអ្នកនៅក្នុងជីវិតដ៏ល្អឥតខ្ចោះ ការសុគត និងការមានព្រះជន្មរស់ឡើងវិញរបស់ព្រះអង្គសង្គ្រោះរបស់យើងចុះ។
៨. ចូរចាំថា លោកអ្នកនៅក្នុងពេលមួយនេះគឺសម្រាប់ហេតុផលណាមួយ។ ដូចដែលលោក ស៊ី. អេស. លូវីស (C.S. Lewis) បានលើកឡើងពេញដោយប្រាជ្ញាថា «ព្រះជាម្ចាស់មិនអនុញ្ញាតឲ្យនរណាម្នាក់រង់ចាំនោះទេ លុះត្រាតែព្រះអង្គទតឃើញថា វាជាការល្អសម្រាប់ឲ្យពួកគេក្នុងការរង់ចាំ»។ លោកអ្នកមិនបានរង់ចាំដោយចៃដន្យនោះទេ។ ភាពនៅលីវរបស់លោកអ្នកមិនមែនជារបៀបរបស់ព្រះអង្គក្នុងការបង្អត់លោកអ្នកនោះទេ ប៉ុន្តែវាជារបៀបដែលព្រះអង្គផ្លាស់ប្រែលោកអ្នកវិញ។ អ្នកបម្រើដែលរងទុក្ខដែលជាព្រះយេស៊ូវក៏នៅលីវ ហើយព្រះជាម្ចាស់កំពុងប្រើប្រាស់ពេលនេះ ដើម្បីធ្វើឲ្យលោកអ្នកកាន់តែដូចព្រះអង្គថែមទៀត។
៩. កុំបំផ្លើសទំនាក់ទំនងស្នេហារបស់លោកអ្នកខាងឯវិញ្ញាណហួសហេតុពេក។ យើងដែលជាគ្រីស្ទបរិស័ទមានភាពឆ្គាំឆ្គងជាខ្លាំងជាមួយនឹងប្រឹក្សាអំពីការមានទំនាក់ទំនងជាមួយគ្នា។ ប្រសិនបើលោកអ្នកស្វែងរកនរណាម្នាក់ដែលស្រឡាញ់ព្រះយេស៊ូវ និងក្រុមជំនុំរបស់ទ្រង់ ហើយលោកអ្នកចាប់អារម្មណ៍នឹងគាត់—ហើយគាត់ក៏ពិតជាចាប់អារម្មណ៍លោកអ្នកដែរ—ហើយមិត្តភក្ដិ និងគ្រួសាររបស់លោកអ្នកគិតថា ទំនាក់ទំនងនោះជាការល្អ នោះតើលោកអ្នកនៅចាំអីទៀត?
១០. ស្វែងរកការផ្ដល់យោបល់ឲ្យបានទៀតទាត់។ សូមស្វែងរកការប្រឹក្សាយោបល់ និងប្រាជ្ញាពីគ្រីស្ទបរិស័ទផ្សេងទៀតដែលរៀបការរួចហើយ។ សូមសួរសំណួរពិបាកៗ។ ចូរអនុញ្ញាតឲ្យពួកគាត់និយាយមកកាន់ជីវិតរបស់លោកអ្នក ដើម្បីជួយលោកអ្នកឲ្យរីកចម្រើនក្នុងនាមជាគ្រីស្ទបរិស័ទនៅលីវ និងដូចជាម្នាក់ដែលហៀបនឹងបានរៀបការ។ ចូរសូមឲ្យអ្នកដទៃជួយមើលថែលោកអ្នក និងចង្អុលបង្ហាញពីចំណុចខ្វាក់របស់លោកអ្នកដែលខ្លួនមើលមិនឃើញ។ ត្រូវចេះឲ្យអ្នកផ្សេងអាចបង្ហាត់បង្រៀនលោកអ្នកបាន។ សរុបមក ចូរសូមប្រាជ្ញាពីគ្នីគ្នាគ្រីស្ទបរិស័ទផ្សេងដែលមានប្រាជ្ញាក្នុងការជួយឲ្យលោកអ្នករីកចម្រើនឡើងនៅក្នុងអំឡុងពេលនៅលីវនេះ ហើយជួយយើងឲ្យចេះរៀបចំសម្រាប់ជីវិតអាពាហ៍ពិពាហ៍នៅខាងមុខផងដែរ។
១១. ចូរទុកចិត្តព្រះជាម្ចាស់។ ចំណុចនេះស្ដាប់ទៅហាក់បីដូចជានិយាយដដែលៗ ប៉ុន្តែយើងទាំងអស់គ្នាអាចប្រើប្រាស់ជាការរម្លឹកបានផងដែរ។ ជាញឹកញាប់ យើងតែងតែភ្លេចចំណុចនេះ ដូច្នេះយើងត្រូវការការរម្លឹកជាប្រចាំដូចគ្នា។ មិត្តអ្នកអានអើយ! ព្រះជាម្ចាស់ជ្រាប់យ៉ាងច្បាស់អំពីអ្វីដែលព្រះអង្គកំពុងតែធ្វើ។ តាមពិត បំណងប្រាថ្នារបស់លោកអ្នកសម្រាប់ជីវិតអាពាហ៍ពិពាហ៍មិនមែនជាការបន្ទាប់បន្សំនោះទេ។ តើព្រះមិនបានជ្រាបអំពីអនាគតរបស់លោកអ្នកហើយទេឬអី? តើព្រះអង្គមិនបានធ្វើគ្រប់ការទាំងអស់នៅក្នុងជីវិតរបស់លោកអ្នកសម្រាប់សេចក្ដីល្អដល់លោកអ្នក និងសម្រាប់ជាសិរីល្អដល់ទ្រង់ទេឬអី? តើពេលវេលារបស់ព្រះអង្គមិនល្អឥតខ្ចោះទេឬអី? ចូរទុកចិត្តលើការផ្គត់ផ្គង់របស់ព្រះជាម្ចាស់ ហើយថាបំណងព្រះហឫទ័យរបស់ព្រះអង្គនឹងកើតមានឡើង នៅក្នុងជីវិតរបស់លោកអ្នកជាមិនខាន។
ពេលវេលានៃភាពនៅលីវរបស់លោកអ្នកទំនងជាពេលវេលានៃការរង់ចាំ ប៉ុន្តែលោកអ្នកមិនត្រូវការប្រើពេលនេះជាការឥតប្រយោជន៍នោះទេ។ អ្នកនៅលីវជាច្រើនមានការបាក់ទឹកចិត្ត និងអស់សង្ឃឹម ប៉ុន្តែមិត្តអ្នកអានអើយ វាមិនត្រូវការជាបែបនេះនោះទេ។ មានអំណរជាច្រើន មានកំណប់ទ្រព្យ មានប្រាជ្ញា ការចងចាំល្អៗ និងបទពិសោធន៍ជាច្រើនដែលយើងអាចមានបាននៅពេលនោះ។ ដូច្នេះ សូមកុំឲ្យពេលវេលានេះក្លាយទៅជាឥតប្រយោជន៍ឡើយ ប៉ុន្តែចូរប្រើវាឲ្យបានល្អសម្រាប់អ្វីដែលនឹងមាននៅអស់កល្ប ពីព្រោះដូចដែលលោក ស៊ី. ធី ស្តាដន៍ (C.T. Studd) បានធ្លាប់លើកឡើងថា «ជីវិតដ៏ខ្លីមួយនេះនឹងកន្លងផុតបាត់ទៅ ប៉ុន្តែនូវរាល់អ្វីៗដែលយើងធ្វើសម្រាប់ព្រះគ្រីស្ទនឹងបន្តគង់នៅ»។
មតិយោបល់
Loading…