វាជាការងាយស្រួលទេក្នុងការក្លាយជាអ្នកស្ដាប់សេចក្ដីអធិប្បាយដោយមិនសកម្ម។ កាលខ្ញុំទើបតែជឿលើព្រះយេស៊ូវថ្មីៗ ខ្ញុំចាប់ផ្ដើមស្គាល់ពីអារម្មណ៍មួយនេះក្នុងជីវិតខ្លួនឯងទាក់ទង និងការស្ដាប់។ ដូច្នេះ នៅអាទិត្យមួយខ្ញុំក៏បានយកកូនសៀវភៅមួយក្បាលទៅព្រះវិហារ ហើយចាប់ផ្ដើមបង្កើតការអនុវត្តដ៏សាមញ្ញមួយ ដើម្បីឲ្យខ្ញុំចេះបង្កើតការវែកញែកមុនស្ដាប់សេចក្ដីអធិប្បាយ។ វាសាមញ្ញដល់ថ្នាក់ថា ខ្ញុំសួរតែបីសំណួរប៉ុណ្ណោះ ហើយវាក៏បាននៅជាប់ជាមួយខ្ញុំរហូតដល់ឥឡូវនេះដែរ។ ហើយបន្ទាប់មកទៀត ខ្ញុំក៏ចាប់ផ្ដើមប្រើប្រាស់មធ្យោបាយមួយនេះពេលស្តាប់សេចក្ដីអធិប្បាយតាមបណ្ដាញសង្គម ពេលអានកំណត់ហេតុបណ្ដាញ ពេលអានសៀវភៅ ហើយមិនយូរមិនឆាប់ពេលស្ដាប់បទចម្រៀងគ្រីស្ទបរិស័ទដែរ។
វិធីសាស្ត្រនេះចង្អុលបង្ហាញទៅលើសេចក្ដីពិតមួយដ៏សំខាន់ដែលយើងទាំងអស់គ្នាសុទ្ធតែដឹងហើយ៖ យើងទាំងអស់គ្នាត្រូវការសង្គ្រោះតាមរយៈបុគ្គលណាម្នាក់ ឬក៏អ្វីមួយ។ ប៉ុន្តែ ខណៈពេលដែលយើងស្ដាប់ដោយសកម្ម នោះភ្លាមៗយើងនឹងឃើញថា លោកីយ៍នេះមានដំណឹងល្អខុសៗគ្នាជាច្រើនណាស់ រាល់គ្រូអធិប្បាយ អ្នកនិពន្ធ និងកវីក៏សុទ្ធតែមានសារមួយនៃសេចក្ដីសង្គ្រោះ។ ដាច់ខាត! យើងត្រូវតែពិនិត្យមើលភាពសច្ចនៃដំណឹងល្អដែលពួកគាត់ចែកចាយ ហើយសំណួរទាំងបីខាងក្រោមនេះគឺជាសំណួរដ៏សាមញ្ញក្នុងការប្រើប្រាស់ជាមធ្យោបាយសម្រាប់ខ្ញុំ។
សំណួរបី
មុនខ្ញុំចាប់ផ្ដើមស្ដាប់សេចក្ដីអធិប្បាយណាមួយ ឬក៏បទចម្រៀងណាមួយ ឬក៏បើកអានសៀវភៅគ្រីស្ទបរិស័ទរបស់នរណាម្នាក់ ខ្ញុំតែងតែសួរខ្លួនឯងនូវសំណួរទាំងបីនេះ៖
- តើខ្ញុំទទួលបានសេចក្ដីសង្គ្រោះដោយរបៀបណា?
- តើខ្ញុំទទួលបានសេចក្ដីសង្គ្រោះចេញពីអ្វី?
- តើខ្ញុំទទួលបានសេចក្ដីសង្គ្រោះដើម្បីអ្វី?
សំណួរទាំងនេះគឺជាសំណួរដ៏ខ្លីៗ ងាយចាំបាន ហើយក៏មិនចាំបាច់ជាសំណួរដ៏វែងនោះដែរ។ កាលដំបូងខ្ញុំតែងតែសរសេរសំណួរនេះនៅលើក្រដាស ហើយបំពេញចម្លើយដោយសរសេរដៃ ប៉ុន្តែបន្ទាប់មកវាក៏បានក្លាយជាសំណួរដក់ជាប់នៅក្នុងខួរក្បាលខ្ញុំ ដោយសួរជាអចិន្ត្រៃយ៍។
ហើយក្រោយមក ខ្ញុំក៏សង្កេតឃើញផងដែរថា សំណួរដូចនេះក៏ជាសំណួរដ៏មានប្រយោជន៍ដែរ ទាក់ទងទៅនឹងបរិបទផ្សេងៗ។ វាគឺជាសំណួរទាក់ទងនឹងដំណឹងល្អ ហើយក៏ជាប្រយោជន៍សម្រាប់ក្រុមជំនុំដែរ។ ប៉ុន្តែ វាក៏ជាសំណួរដ៏មានប្រយោជន៍ក្នុងការចម្រាញ់ទស្សនវិជ្ជាណាមួយឲ្យយើងឃើញពីចំណុចស្នូលរបស់វា។ វាជួយយើងក្នុងការវែកញែកការផ្សព្វផ្សាយ និងសារសន្យាពីបុគ្គលណាម្នាក់ ដែលមើលទៅហាក់បីដូចជាផ្ដល់ក្ដីសង្ឃឹមដល់យើង។
ចម្លើយដ៏សាមញ្ញបួនយ៉ាង
ដើម្បីជាប្រយោជន៍ក្នុងកំណត់បណ្ដាញសង្គមមួយនេះ ខ្ញុំនឹងផ្ដោតទៅលើតែការស្ដាប់សេចក្ដីអធិប្បាយប៉ុណ្ណោះ។ ចូរសួរសំណួរទាំងបីយ៉ាងនេះ ហើយចម្លើយដែលលោកអ្នកនឹងទទួលបានជាទូទៅនឹងមានលក្ខណៈបួនយ៉ាងដូចខាងក្រោមនេះ៖
១. លោកអ្នកនឹងឮដំណឹងល្អបែបជាការព្យាបាល
- យើងទទួលបានការសង្គ្រោះតាមរយៈការក្លាយជាបុគ្គលដែលការរាប់ និងអះអាងខ្លួនឯងថាជាបុគ្គលដ៏ល្អម្នាក់។
- យើងទទួលបានការសង្គ្រោះចេញពីការចង់បំផ្លាញខ្លួនឯងយ៉ាងអវិជ្ជមានចោល។
- យើងទទួលបានការសង្គ្រោះ ដើម្បីឲ្យខ្លួនមានទំនុកចិត្ត។
២. លោកអ្នកនឹងឮដំណឹងល្អដែលសន្យាភាពចម្រុងចម្រើន
- យើងទទួលបានការសង្គ្រោះតាមរយៈជំនឿដែលបង្កើតឲ្យមានសុខភាពល្អ និងទ្រព្យសម្បត្តិ។
- យើងទទួលបានការសង្គ្រោះចេញពីភាពក្រីក្រ និងទុក្ខលំបាកផ្នែកថវិកា។
- យើងទទួលបានការសង្គ្រោះ ដើម្បីឲ្យអរសប្បាយនឹងការមានថវិកាជាច្រើន។
៣. លោកអ្នកនឹងឮដំណឹងល្អអំពីការបាក់បែក
- យើងទទួលបានការសង្គ្រោះតាមរយៈការបន្លែងខ្លួនឯងចេញពីការចងចាំនៃអំពើបាបចាស់ៗ។
- យើងទទួលបានការសង្គ្រោះចេញពីការមានអារម្មណ៍អាក្រក់អំពីខ្លួនឯង។
- យើងទទួលបានការសង្គ្រោះ ដើម្បីឲ្យរស់នៅយ៉ាងពេញលេញជាថ្មីម្ដងទៀត។
៤. លោកអ្នកនឹងឮដំណឹងល្អដែលទាក់ទាញចំណាប់អារម្មណ៍
- យើងទទួលបានការសង្គ្រោះតាមរយៈការចងចាំជាងមុនអំពីព្រះជាម្ចាស់។
- យើងទទួលបានការសង្គ្រោះចេញពីការមើលរំលងថា ព្រះជាម្ចាស់មានព្រះជន្មគង់នៅ។
- យើងទទួលបានការសង្គ្រោះ ដើម្បីឲ្យរស់នៅដោយមានសតិសម្បជញ្ញៈថែមទៀតអំពីព្រះជាម្ចាស់។
មិនថាសារទាំងអស់នេះមានតម្រុយខ្លះៗអំពីដំណឹងល្អ មានសល់ចំណុចខ្លះៗអំពីសេចក្ដីពិត ឬក៏ថាវាជាការបំភ្លៃដែលមិនមែនជាដំណឹងល្អទាល់តែសោះក៏ដោយ ក៏សារទាំងនោះនឹងជ្រាបចូលបែបជាមិនជាក់ស្ដែង ឬក៏ជាក់ស្ដែងក្នុងសៀវភៅ បទចម្រៀង និងសេចក្ដីអធិប្បាយរបស់គ្រីស្ទបរិស័ទបែបជាសារដ៏ពិត ហើយជាទូទៅបែបជាការបង្ហាញដំណឹងល្អយ៉ាងគ្រប់គ្រាន់។ ប៉ុន្តែ វាមិនដូច្នោះទេ។ តាមពិតទៅ គឺវាឆ្ងាយណាស់ពីសេចក្ដីពិត។ ហើយចំណុចនីមួយៗទាំងបួននោះ (ក្នុងរបៀបរបស់វាផ្សេងៗគ្នា) គឺឲ្យអាទិភាពលើព្រះគ្រីស្ទជាទីពីរ ឬក៏គ្រាន់តែជាជម្រើសប៉ុណ្ណោះ។
ចម្លើយពីព្រះគម្ពីរ
ព័ន្ធកិច្ចដ៏ពិតគឺអនុញ្ញាតឲ្យព្រះបន្ទូលឆ្លើយសំណួរទាំងបីនេះម្ដងហើយម្ដងទៀតរហូតទាល់តែសេចក្ដីពិតនៃដំណឹងល្អបានបញ្ជ្រាបចូលទៅក្នុងចិត្តគំនិតរបស់យើងទាំងស្រុងតែម្ដង។
ប្រសិនបើយើងឈូសផ្លូវវាងខ្លះៗនៃដំណឹងល្អតាមព្រះគម្ពីរចោល នោះចម្លើយលើសំណួររបស់យើងនឹងមានយ៉ាងច្បាស់លាស់ដូចតទៅ៖
- យើងទទួលបានការសង្គ្រោះតាមរយៈព្រះគុណដោយជំនឿក្នុងការសុគតរបស់ព្រះយេស៊ូវគ្រីស្ទនៅលើឈើឆ្កាងដែលទទួលយកសេចក្ដីក្រោធរបស់ព្រះជាម្ចាស់ជំនួសយើង។ ហើយយើងក៏ទទួលបានការរាប់ជាសុចរិតក្នុងការមានព្រះជន្មរស់ឡើងវិញរបស់ទ្រង់ ក្នុងនាមទ្រង់ជាអ្នកជំនួសយើង ដែលជាពួកបះបោរប្រព្រឹត្តល្មើសនឹងច្បាប់។
- យើងទទួលបានការសង្គ្រោះចេញពីព្រះដ៏បរិសុទ្ធចេញពីសេចក្ដីក្រោធដ៏សុចរិតរបស់ទ្រង់ដែលត្រូវបានចាក់លើមនុស្សមានបាបគ្រប់ៗគ្នាដ៏នៅអស់កល្បជានិច្ច ដែលបានប្រព្រឹត្តល្មើសនឹងសិរីល្អរបស់ទ្រង់។
- យើងទទួលបានការសង្គ្រោះ ដើម្បីឲ្យមានសន្តិភាពជាមួយនឹងព្រះជាម្ចាស់ ដើម្បីឲ្យរស់នៅដោយបរិសុទ្ធ ដើម្បីឲ្យអាចជួបជុំគ្នាក្នុងចំណោមរាស្ត្ររបស់ព្រះជាម្ចាស់ ដែលរស់នៅ និងស្រឡាញ់ ហើយបើកសម្ដែងអំពីព្រះជាម្ចាស់តាមរយៈការដែលយើងឲ្យតម្លៃទៅលើព្រះគ្រីស្ទ និងមានអំណរក្នុងទ្រង់លើសគ្រប់អ្វីៗទាំងអស់ ដែលមាននៅក្នុងលោកីយ៍នេះ ក៏ដូចជាក្នុងជីវិតបន្ទាប់ពីស្លាប់ផងដែរ។
ដំណឹងល្អគឺប្រកបដោយភាពស្រស់ស្អាតយ៉ាងម៉ត់ចត់ ហើយសក្ដិសមឲ្យយើងសិក្សាយ៉ាងអស់កល្បជានិច្ច និងអបអរសាទរ—ប៉ុន្តែ វាក៏ជាដំណឹងដែលមិនពិបាកយល់ផងដែរ។ បញ្ហាដែលយើងតែងតែប្រឈមមុខគឺត្រង់ថា ដំណឹងល្អមានការផ្លាស់ប្រែ គឺថាដំណឹងល្អបានប្ដូរក្នុងលក្ខណៈដ៏តូចតាចក្នុងភាសាដែលធ្វើឲ្យចម្លើយនឹងសំណួរដ៏សំខាន់ទាំងបីនោះមានការភាន់ច្រឡំ ឬក៏មិនសូវច្បាស់។ វាតម្រូវឲ្យមានការយកចិត្តទុកដាក់ ដើម្បីកុំឲ្យយើងរសាត់ចូលទៅក្នុង «ដំណឹងល្អដែលមានការបត់បែន» ដំណឹងដែលប្រើប្រាស់ពាក្យពេចន៍បែបជាគ្រីស្ទបរិស័ទ ដែលជាក់ស្ដែងកំពុងតែធ្វើឲ្យគោលបំណងផ្ទាល់ខ្លួនកើតឡើង ឬក៏បំពេញតម្រូវការដែលខ្លួនចង់បាន ប៉ុន្តែស្របគ្នានោះដែរបានបរាជ័យក្នុងការពន្យល់អំពីប្រធានបទស្នូលនៃសេចក្ដីក្រោធរបស់ព្រះជាម្ចាស់ ឬក៏អំពីគោលបំណងដ៏សំខាន់របស់ព្រះគ្រីស្ទក្នុងព្រះលោហិតរបស់ទ្រង់ដែលបង្ហូរជំនួសយើង។ បើនិយាយម្យ៉ាងទៀតទៅ ការផ្លាស់ប្ដូរនៃគំនិតរបស់យើងគឺតែងតែទាក់ទងទៅនឹងការ «បានវង្វេងចេញពីចិត្តស្មោះត្រង់ និងចិត្តបរិសុទ្ធចំពោះព្រះគ្រីស្ទ» (២កូរិនថូស ១១:៣)។
ចូរបន្តសួរសំណួរ
គ្រូអធិប្បាយ អ្នកនិពន្ធបទចម្រៀង ឬក៏អ្នកនិពន្ធសៀវភៅត្រូវតែត្រឡប់មកសួរសំណួរដ៏សាមញ្ញទាំងនេះជាញឹកញាប់ ដើម្បីល្បងលព័ន្ធកិច្ចរបស់ពួកគាត់ក្នុងការវាយតម្លៃលើសាររបស់ខ្លួន និងលើក្ដីសង្ឃឹមដែលយើងកំពុងតែណែនាំឲ្យអ្នកដទៃស្គាល់។ ហើយសំខាន់ស្មើគ្នានោះដែរ គឺថាគ្រីស្ទបរិស័ទគ្រប់រូបក៏ត្រូវតែប្រឡប់មកសួរនូវសំណួរទាំងនេះម្ដងហើយម្ដងទៀតរហូតទាល់តែយើងចេះសួរដោយមិនទាំងគិតទៀតផង។
- តើខ្ញុំទទួលបានសេចក្ដីសង្គ្រោះដោយរបៀបណា?
- តើខ្ញុំទទួលបានសេចក្ដីសង្គ្រោះចេញពីអ្វី?
- តើខ្ញុំទទួលបានសេចក្ដីសង្គ្រោះដើម្បីអ្វី?
ត្រង់នេះខ្ញុំមិនមែនណែនាំថា រាល់បទចម្រៀង រាល់សេចក្ដីអធិប្បាយ និងរាល់សៀវភៅគ្រប់ក្បាលគឺនឹងឆ្លើយសំណួរទាំងនេះដោយមានភាពស្មើៗគ្នានោះទេ។ ប៉ុន្តែ សូមយើងយកចិត្តទុកដាក់។ ខណៈពេលដែលលោកអ្នកស្ដាប់ ឬក៏អាន នោះលោកអ្នកនឹងចាប់ផ្ដើមយល់អំពីអ្វីដែលសាវ័ក ប៉ុល បានហៅថាជា «ពាក្យដ៏ត្រឹមត្រូវ» (២ធីម៉ូថេ ១:១៣)។ ដោយសារគ្រប់ទស្សនវិជ្ជាទាំងអស់សុទ្ធតែមានលំនាំបែបនេះ នោះលោកអ្នកនឹងឃើញពីលំនាំក្នុងរូបភាពបែបជាធំ និងក្នុងរូបភាពបែបជាលម្អិត។ ចំពោះគ្រីស្ទបរិស័ទ គឺមានលំនាំដែលមិនរេរាទាក់ទង និងពាក្យដ៏ត្រឹមត្រូវនៃដំណឹងល្អដែលយើងគួរផ្ដោតទៅលើពេលដែលយើងស្ដាប់ ហើយគួរតែកត់សម្គាល់នៅពេលដែលយើងសង្កេតឃើញថាពាក្យទាំងនោះមិនមាននៅក្នុងអ្វីដែលយើងកំពុងតែស្ដាប់។
ចូរស្រឡាញ់ការវែកញែក
អ្វីដែលខ្ញុំចង់លើកទឹកចិត្តគឺថាឲ្យយើងចេះវែកញែក។ ជំនាញនៃការវែកញែកគឺជាការរៀនចេះបដិសេធនូវអ្វីដែលមិនត្រឹមត្រូវ ឬក៏នឹងនរ ប៉ុន្តែសំខាន់ជាងនោះទៅទៀតគឺឲ្យយើងចង់ចេះឱបក្រសោបនូវអ្វីដែលមានតម្លៃ (កិច្ចការ ១៧:១១; រ៉ូម ១២:៩; ១ថែស្សាឡូនីច ៥:២១)។ ការវែកញែកដំណឹងល្អជួយឲ្យយើងស្គាល់ពីចំណុចខុសគ្នា ដើម្បីឲ្យយើងរក្សាទុកនូវសេចក្ដីពិតដ៏ត្រឹមត្រូវ ហើយនិងដើម្បីឲ្យយើងពិតជាអាចឱបក្រសោបសេចក្ដីពិតនោះបាន ក៏ដូចជាមានការអបអរសាទរជាមួយនឹងវាផងដែរ។
ជាលទ្ធផល នេះមានន័យថា យើងត្រូវតែឲ្យតម្លៃលើបុរស និងស្ត្រីដែលឆ្លើយសំណួរដំបូងបានយ៉ាងច្បាស់លាស់ ពីព្រោះតាមរយៈការនោះ វានឹងជួយឲ្យយើងកាន់តែងាយយល់លើសំណួរនានាទៀតផង។
ប្រសិនបើលោកអ្នកចំណាយពេលយ៉ាងយូរក្នុងការឆ្លើយសំណួរទាំងបីនេះ នោះលោកអ្នកនឹងប្រាកដជាឃើញលំនាំរបស់វាជាមិនខាន។ ការចេះវែកញែកបែបនេះនឹងជួយលោកអ្នកពេលដែលលោកអ្នកប្រឈមមុខក្នុងការចម្រាញ់ការស្ដាប់សេចក្ដីអធិប្បាយ ការអានកំណត់ហេតុបណ្ដាញ ការស្ដាប់បទចម្រៀង ឬក៏ការអានសៀវភៅជាដើម។
ខ្ញុំជឿជាក់ថា ក្រុមជំនុំនឹងកាន់តែមានសុខភាពល្អ និងចេះមានអំណរលើសដើម ខណៈពេលដែលក្រុមជំនុំកាន់តែមានជំនាញក្នុងការវែកញែក កាន់តែយល់លើដំណឹងល្អ និងកាន់តែមានជំនាញក្នុងការដឹងថា តើយើងគួរស្រឡាញ់អ្វីទៅ។ ការវែកញែកកំពុងតែស្រែកហៅមកកាន់យើង។ តាមរយៈការសួរសំណួរទាំងបីនេះ យើងកំពុងតែណែនាំឲ្យគេស្គាល់ឡើងវិញពីសារៈសំខាន់នៃចម្លើយ។ ប៉ុន្តែ នេះមិនមែនមានន័យថា យើងគ្រាន់តែស្ដាប់ ដើម្បីឲ្យទទួលបានចម្លើយត្រឹមត្រូវនោះទេ ពិតណាស់យើងចង់បានចម្លើយដែលត្រឹមត្រូវ ដើម្បីឲ្យយើងអាចស្វែងរកបានសារជាថ្មីម្ដងទៀតក្នុងការលង់ស្នេហ៍លើភាពអស្ចារ្យរបស់ព្រះយេស៊ូវគ្រីស្ទ។
ហើយនេះគឺជារបៀបដែលវានឹងកើតឡើងបាន។ សំណួរបីដ៏ធំ (គឺសំណួរបីដ៏ធំជាងគេបំផុត) ដែលយើងអាចសួរមកកាន់ខ្លួនឯងនៅក្នុងជីវិតនេះ ដើម្បីជាការរម្លឹកយើងអំពីសេចក្ដីពិតដ៏មានតម្លៃនៃដំណឹងល្អរបស់ព្រះយេស៊ូវគ្រីស្ទ។ ចូរសាកល្បងវាទៅ។ នៅពេលលោកអ្នកស្ដាប់សេចក្ដីអធិប្បាយពេលក្រោយ ចូរសួរសំណួរដ៏សាមញ្ញទាំងបីនេះ ហើយស្ដាប់—ដោយយកចិត្តទុកដាក់—រកចម្លើយដ៏មានតម្លៃដែលយើងស្គាល់ដែលជួយទ្រទ្រង់អំណរប្រចាំថ្ងៃរបស់យើងក្នុងព្រះគ្រីស្ទ។
មតិយោបល់
Loading…