រង្វាន់ពីកណ្ឌគម្ពីរយ៉ូប

១. ចូរឲ្យតម្លៃលើទម្រង់នៃអក្សរសាស្ត្រក្នុងកណ្ឌគម្ពីរ ២. កុំអានកណ្ឌគម្ពីរយ៉ូបលឿនពេក ៣. ចូរអានកណ្ឌគម្ពីរយ៉ូបដោយសម្លឹងមើលតួឯកដែលគួរឲ្យចាប់អារម្មណ៍ ៤. ចូលអានពាក្យពេចន៍របស់លោក យ៉ូប ដោយមានការអាណិតអាសូរ ៥. សូមតយុទ្ធផ្ទាល់ខ្លួនលើសំណួរដែលលោក យ៉ូប បានសួរ

៦ មេសា ២០២០អានរយៈពេល ១២ នាទី

មើល៥០៩ដង

យើងជឿជាក់ថា គ្រប់ទាំងបទគម្ពីរគឺជាព្រះទ្រង់បានបញ្ចេញព្រះវិញ្ញាណបណ្ដាលឲ្យតែងទេ ក៏មានប្រយោជន៍សម្រាប់ការបង្រៀន ការរម្លឹកឲ្យដឹងខ្លួន ការកែតម្រង់ និងការបង្ហាត់ខាងឯសេចក្ដីសុចរិត (២ធីម៉ូថេ ៣:១៦-១៧)។ ប៉ុន្តែ កណ្ឌគម្ពីរមួយចំនួនដែលមាននៅក្នុងព្រះគម្ពីរក៏យើងមានការពិបាកយល់ខ្លាំងជាងកណ្ឌគម្ពីរមួយចំនួនផ្សេងទៀតដែរ។

ដើម្បីអានកណ្ឌគម្ពីរយ៉ូបឲ្យបានល្អ ដាច់ខាតលោកអ្នកត្រូវតែត្រៀមខ្លួនជាស្រេច (ដោយក្នុងរបៀបជាច្រើនទៀត) ក្នុងកណ្ឌគម្ពីរយ៉ូបគឺជាកណ្ឌដ៏ពិបាកមួយ។

កណ្ឌគម្ពីរយ៉ូបគឺជាកណ្ឌដ៏ពិបាក

កណ្ឌគម្ពីរយ៉ូបគឺជាកណ្ឌដ៏ពិបាក ពីព្រោះវាបានលើកឡើងអំពីប្រធានបទដ៏ពិបាក—ពោលគឺការរងទុក្ខ។ ហើយលោក យ៉ូប ក៏បានរងទុក្ខយ៉ាងពិបាកជាច្រើនដែរ។ ទ្រព្យសម្បត្តិរបស់គាត់ កូនៗរបស់គាត់ និងសុខភាពរបស់គាត់—ហើយទាំងនេះយើងមិនទាន់បានលើកឡើងអំពីឋានៈរបស់គាត់ក្នុងសង្គមផង—គឺត្រូវបានឆក់ចេញពីគាត់យ៉ាងសាហាវ។ ហើយនេះគឺជាប្រធានបទដែលធ្វើឲ្យមានការឈឺចាប់ គឺមិនមែនសម្រាប់អ្នកដែលមានចិត្តខ្សោយនោះទេ។

កណ្ឌគម្ពីរយ៉ូបគឺជាកណ្ឌដ៏ពិបាក ពីព្រោះវាមិនបានផ្ដល់នូវចម្លើយដ៏ពេញលេញដែលយើងចង់បាននោះឡើយ។ យើងចង់ដឹងថា មូលហេតុអ្វីបានជាមនុស្សល្អ និងមនុស្សដែលកោតខ្លាចព្រះជាម្ចាស់ត្រូវបានរងទុក្ខ ហើយកណ្ឌគម្ពីរនេះមិនបានឆ្លើយនូវសំណួរនេះទាល់តែសោះ។ តាមពិតទៅ តួនាទីរបស់ព្រះជាម្ចាស់ក្នុងមហន្តរាយរបស់លោក យ៉ូប គឺមិនមែនអ្វីលើសជាងការធ្វើឲ្យកាន់តែច្រឡំទៀតដែរ។

កណ្ឌគម្ពីរយ៉ូបគឺជាកណ្ឌដ៏ពិបាក ពីព្រោះជំពូកជាច្រើននៃកណ្ឌគម្ពីរនេះគឺជាការរៀបរាប់អំពីសម្រង់សម្ដីរបស់មិត្តភក្ដិលោក យ៉ូប ដែលនៅចុងក្រោយព្រះជាម្ចាស់នឹងប្រកាសថាពាក្យពេចន៍របស់ពួកគាត់គឺសម្ដីខុសឆ្គង។ ដូច្នេះ តើឲ្យយើងដឹងថាយើងគួរជឿទៅលើអ្វី ហើយដោយរបៀបណា? ហើយប្រសិនបើលោកអ្នកព្យាយាមអធិប្បាយចេញពីកណ្ឌគម្ពីរមួយនេះ តើឲ្យលោកអ្នកអាចរចនាសេចក្ដីអធិប្បាយរបស់លោកអ្នកលើយោបល់ដ៏មិនត្រឹមត្រូវរបស់ពួកគាត់ដោយរបៀបណាទៅ?

ចុះចំណែកឯលោក យ៉ូប ផ្ទាល់វិញ? ក្នុងការសន្ទនាដែលហាក់បីដូចជាគ្មានការបញ្ចប់ របៀបនិយាយរបស់លោក យ៉ូប ទៅកាន់ព្រះជាម្ចាស់ហាក់បីដូចជាមានភាពឆេវឆាវជាជាងការអត់ធ្មត់។ គាត់បានឈ្លោះប្រកែកជាមួយនឹងព្រះជាម្ចាស់ ហើយបានរអ៊ូរទាំអំពីកាលៈទេសៈរបស់គាត់។ កណ្ឌគម្ពីរមួយនេះហាក់បីដូចជាទុក្ខសោកដ៏វែងមួយអញ្ចឹង។ ចុះក្រែងគ្រីស្ទបរិស័ទគួរតែមានអំណររាល់វេលាមែនឬ?

កណ្ឌគម្ពីរយ៉ូបគឺជាកណ្ឌដ៏ពិបាក ពីព្រោះ ៩៥% នៃកណ្ឌគម្ពីរនេះគឺជាកំណាព្យ។ អក្សរសិល្ប៍កំណាព្យទាមទារឲ្យមានការយល់ដឹងដ៏ជ្រាលជ្រៅលើការប្រៀបប្រដូច ហើយនិងពាក្យប្រៀបធៀប ក៏ដូចជាអត្ថន័យដែលមានខុសគ្នាតែបន្តិចបន្តួចដែលមានភាពស្រពិចស្រពិល ទាក់ទងនឹងទម្រង់ជាច្រើននៃភាពប្រហាក់ប្រហែលគ្នាក្នុងភាសាហេប្រឺ។ សមត្ថភាពរបស់យើងក្នុងការឲ្យតម្លៃលើលក្ខណៈពិសេសទាំងនេះនឹងកាន់តែពិបាកពេលដែលយើងព្យាយាមឆ្លងគន្លងដ៏ធំនៃប្រពៃណីដែលបំបែកយើងចេញពីអ្នកនិពន្ធកណ្ឌគម្ពីរ។

កណ្ឌគម្ពីរយ៉ូបគឺជាកណ្ឌដ៏ពិបាក ពីព្រោះវាជាកណ្ឌដ៏វែងដែលមាន ៤២ ជំពូក។ ហើយភាគរយជាច្រើននៃជំពូកទាំងនោះគឺជាជំពូកដែលលើកឡើងអំពីចំណុចដដែលៗ ហើយក៏គួរឲ្យបាក់ទឹកចិត្តទៀតផង។ ឧទាហរណ៍៖ លោក យ៉ូប និងមិត្តភក្ដិរបស់គាត់និយាយយ៉ាងហូរហែ ឈ្លោះប្រកែកគ្នាម្ដងហើយម្ដងទៀត ហើយទាំងសងខាងមិនមានការយោគយល់គ្នាទាល់តែសោះ។ គេបានលើកឡើងថា «ឃ្លាសម្គាល់ “ភាពអត់ធ្មត់របស់លោក យ៉ូប” គួរតែប្តូរទៅជា “ភាពអត់ធ្មត់របស់អ្នកអានកណ្ឌគម្ពីរយ៉ូប” វិញ»។ ទំនងជាមានសេចក្ដីពិតក្នុងឃ្លានេះមែន។

របៀបនៃការអានគម្ពីរយ៉ូបដ៏មានអត្ថប្រយោជន៍

ការអានកណ្ឌគម្ពីរយ៉ូបគឺជាការដ៏ពិបាក ប៉ុន្តែភ្លាមៗនោះវាក៏អាចជារង្វាន់ដល់យើងផងដែរ។ នៅខាងក្រោមនេះគឺជាចំណុច ៥ យ៉ាង ដើម្បីជួយលោកអ្នកក្នុងការជីកយកកំណប់នៃទ្រព្យសម្បត្តិនោះបាន៖

១. ចូរឲ្យតម្លៃលើទម្រង់នៃអក្សរសាស្ត្រក្នុងកណ្ឌគម្ពីរ

ការបើក និងការបិទឆាកនៃកណ្ឌគម្ពីរយ៉ូបផ្ដល់ជូននូវគម្រោងនៃសាច់រឿង ប៉ុន្តែចំណុចស្នូលនៃកណ្ឌគម្ពីរនោះគឺជាកំណាព្យចំតែម្ដង។ កណ្ឌគម្ពីរយ៉ូបគឺមិនមែនជាការរៀបរៀងនៃទស្សនវិជ្ជាដែលដាច់តែឯងលើលក្ខណៈនៃការរងទុក្ខនោះទេ តែវាមានលើសជាងបទពិសោធន៍ដ៏ពិតនៃការរងទុក្ខផ្ទាល់នោះទៅទៀត ហើយថាតើវាមានន័យយ៉ាងដូចម្តេចចំពោះបុគ្គលណាម្នាក់ដែលមានទំនាក់ទំនងជាមួយនឹងព្រះជាម្ចាស់។

ចំណុចពិតគឺត្រង់ថា វាត្រូវបាននិពន្ធឡើងជាកំណាព្យជាជាងពាក្យសម្រាយគឺជាការចង្អុលបង្ហាញថាវាគួរប៉ះពាល់ចិត្តរបស់យើងដូចជាវាប៉ះពាល់ខួរក្បាលរបស់យើងផងដែរ។ ទម្រង់កំណាព្យបានឆ្លុះបញ្ចាំងអំពីភាពចលាចលនៃអារម្មណ៍ដែលលោក យ៉ូប បានដកពិសោធន៍ទៅលើបញ្ហាហើយនឹងស្ថានភាពដែលគាត់កំពុងតែជួបប្រទះ។ ហើយដើម្បីឲ្យយើងឲ្យតម្លៃលើសារមួយនេះ ដាច់ខាតអ្នកអានត្រូវតែព្យាយាមជ្រាបចូលទៅក្នុងអារម្មណ៍មួយនោះដែរ។ លោកអ្នកមិនអាចអានកណ្ឌគម្ពីរមួយនេះដោយគ្មានអារម្មណ៍ ហើយរំពឹងថានឹងទទួលបានអ្វីដែលវាមានក្នុងការឲ្យដល់លោកអ្នកនោះឡើយ។

ទោះបើថាវាទំនងជាមិនស្រួលប៉ុណ្ណាក៏ដោយ ក៏ដាច់ខាតលោកអ្នកត្រូវតែអនុញ្ញាតឲ្យខ្លួនឯងទទួលនូវអារម្មណ៍ដែលលោក យ៉ូប បានទទួលដែរ។

២. កុំអានកណ្ឌគម្ពីរយ៉ូបលឿនពេក

ពិតណាស់ មានមូលហេតុដែលកណ្ឌគម្ពីរយ៉ូបមាន ៤២ ជំពូក។

ភាពចលាចលខាងឯអារម្មណ៍នៃការឈឺចាប់ និងការកាន់ទុក្ខគឺមានរយៈ
ពេលវែង។ គ្មានចម្លើយងាយៗ ហើយក៏គ្មានការដោះស្រាយបន្ទាន់ដែរ។ ការព្យាបាលទាមទារឲ្យមានពេលវេលា។ ហើយការសន្ទនាដ៏ឥតល្ហែរវាងលោក យ៉ូប និងមិត្តភក្ដិរបស់គាត់ ដែលមានទាំងជម្លោះ និងភាពច្របូកច្របល់ គឺជាការត្រាប់តាមនៃបទពិសោធន៍ដែលមានការរងទុក្ខដ៏ពិត។ កណ្ឌគម្ពីរនេះមិនបានផ្ដល់ជូននូវចម្លើយយ៉ាងច្បាស់លាស់លើសំណួររបស់លោក យ៉ូប ដែលនេះជាទូទៅគឺជាអ្វីដែលអ្នករងទុក្ខតែងតែដកពិសោធន៍ជារឿយៗក្នុងភាពឈឺចាប់របស់ខ្លួន។ កណ្ឌគម្ពីរមួយនេះផ្ទាល់គឺបានលើកឡើងបែបជារូបភាពនៃបទពិសោធន៍របស់មនុស្សយើង ក្នុងពិភពលោកដែលបានធ្លាក់នៅក្នុងអំពើបាប ដែលចម្លើយលើសំណួរទាំងនេះតែងតែគេចវេសពីយើង ហើយយើងក៏ទទួលបានការជំរុញដ៏សាមញ្ញឲ្យទុកចិត្តទៅលើព្រះជាម្ចាស់តែមួយ។

កណ្ឌគម្ពីរនេះអញ្ជើញអ្នកអានឲ្យរួមដំណើរដ៏យូរ ហើយក្នុងដំណើរដ៏យូរមួយនេះ ជីវិតយើងនឹងទំនងជាឆ្លងកាត់ភាពអង្រួន ប៉ុន្តែជាលទ្ធផលចុងក្រោយយើងនឹងទទួលបានការបំផ្លាស់បំប្រែជាមិនខាន។

៣. ចូរអានកណ្ឌគម្ពីរយ៉ូបដោយសម្លឹងមើលតួឯកដែលគួរឲ្យចាប់អារម្មណ៍

សូមកត់សម្គាល់អំពីចំណុចខុសៗគ្នាដ៏ស្រពិចស្រពិលក្នុងរបៀបដែលមិត្តភក្ដិទាំងបីនាក់របស់លោក យ៉ូប បានប្រឆាំងទាស់នឹងគាត់ និងអំពីរបៀបនៃការជំទាស់របស់ពួកគេទៅកាន់គាត់បានកាន់តែក្លាយទៅជាការរិះគន់ និងបដិបក្ខ។

សូមគិតអំពីតួនាទីនៃសេចក្ដីអធិប្បាយលើប្រាជ្ញាក្នុងកណ្ឌគម្ពីរយ៉ូបជំពូក២៨ ទាក់ទងនឹងការស៊ីគ្នាក្នុងសាច់រឿងទាំងមូល។ តើនេះអាចជារយៈពេលចន្លោះដែលអ្នករៀបរៀងបានផ្ដល់ឲ្យមុនឈានទៅដល់វគ្គចុងក្រោយមែនឬ? ហើយតើហេតុអ្វីបានជាលោក អេលី‌ហ៊ូវ ដ៏អាថ៌កំបាំងត្រូវបានមានការណែនាំភ្លាមៗក្នុងកណ្ឌគម្ពីរយ៉ូបជំពូក៣២ បន្ទាប់ពីលោក យ៉ូប បានលើកឡើងជាប្រសាសន៍ចុងក្រោយរបស់គាត់? តើអ្នកនិពន្ធបានផ្ដល់តម្រុយអ្វីខ្លះ ទាក់ទងនឹងរបៀបដែលយើងគួរគិតអំពីតួនាទីរបស់លោក អេលី‌ហ៊ូវ ក្នុងកណ្ឌគម្ពីរនេះ?

កណ្ឌគម្ពីរនេះគឺជាស្នាដៃសិល្បៈដ៏ឆ្នើម។ សូមអនុញ្ញាតឲ្យការរៀបរៀងផ្ដល់ជូននូវសាររបស់វា។

៤. ចូលអានពាក្យពេចន៍របស់លោក យ៉ូប ដោយមានការអាណិតអាសូរ

ការឆ្លើយតបដំបូងដែលមានការគោរពជ្រាលជ្រៅលើព្រះរបស់លោក យ៉ូប ទាក់ទងនឹងការរងទុក្ខរបស់គាត់គឺសុទ្ធតែជាពាក្យពេចន៍ដែលយើងសរសើរ (យ៉ូប ១:២១; ២:១០)។ ប៉ុន្តែ បន្ទាប់មកការបាត់បង់របស់គាត់ក៏បានជ្រាបចូល ហើយពាក្យពេចន៍នៃការសោកស្ដាយរបស់គាត់ និងការរអ៊ូរទាំរបស់គាត់ក៏បានហូរចូលយ៉ាងរហ័សដូចជាចរន្តទឹកអញ្ចឹង។ ពន្លឺភ្លឹបភ្លែតដំបូងដែលលោក យ៉ូប មានបទពិសោធន៍លើបានរលត់បាត់ទៅ ហើយភាពងងឹតស្លបក៏បានគ្របបាំងលើ—ពោលគឺភាពងងឹតនាពេលរាត្រីនៃព្រលឹងវិញ្ញាណ។

ការប្រកាសដ៏ឱឡារិករបស់លោក យ៉ូប គឺមិនមែនជាការឆ្លុះបញ្ចាំងដ៏ស្ងប់ស្ងាត់នៃទស្សនវិជ្ជារបស់គាត់ទេ តែវាជាបន្ទុះដ៏ក្ដៅគគុករបស់បុគ្គលម្នាក់ដែលកំពុងតែជាប់ក្នុងទន្លេនៃភាពឈឺចាប់ និងការរងទុក្ខដ៏សែនវេទនា។ សូមចងចាំថា ទោះបីលោក យ៉ូប មានប្រសាសន៍យ៉ាងខ្លាំងៗ ក៏គាត់កំពុងតែបន្តស្វែងរកព្រះជាម្ចាស់ដែរ។ លើសជាងអ្វីៗទាំងអស់ គាត់ចង់ប្រឈមមុខទៅនឹងព្រះជាម្ចាស់។ គាត់បារម្ភលើផ្នែកទំនាក់ទំនងជាងលើការរកបានចម្លើយ។

ហើយនៅចុងក្រោយនោះ ព្រះជាម្ចាស់ក៏បានសរសើរលោក យ៉ូប។ គាត់បានស៊ូទ្រាំក្នុងជំនឿរបស់គាត់ (យ៉ាកុប ៥:១១)។

៥. សូមតយុទ្ធផ្ទាល់ខ្លួនលើសំណួរដែលលោក យ៉ូប បានសួរ

តើលោកអ្នកថ្វាយបង្គំព្រះជាម្ចាស់គ្រាន់តែ ដើម្បីទទួលបានអត្ថប្រយោជន៍ ឬក៏ថាលោកអ្នករាប់ព្រះជាម្ចាស់ថាស័ក្តិសមក្នុងការទទួលការថ្វាយបង្គំ គឺដោយសារលក្ខណសម្បត្តិរបស់ទ្រង់ផ្ទាល់?

សូមអនុញ្ញាតឲ្យការបើកសម្ដែងរបស់ព្រះជាម្ចាស់ក្នុងជំពូកចុងក្រោយធ្វើឲ្យលោកអ្នកផ្ដោតលើសំណួរចម្បងនៃកណ្ឌគម្ពីរ៖ តើខ្ញុំអាចទុកចិត្តលើប្រាជ្ញារបស់ព្រះជាម្ចាស់ក្នុងការធ្វើឲ្យផែនដីរបស់ទ្រង់ដំណើរការល្អខ្លាំងជាងរបស់ខ្ញុំដែរឬទេ?

មិនទាន់មានការដោះស្រាយ ប៉ុន្តែមានការធានាទុក

ប្រាកដណាស់! ការអានកណ្ឌគម្ពីរយ៉ូបទំនងជានឹងនាំឲ្យលោកអ្នកមិនមានដំណោះស្រាយ។

ប៉ុន្តែ វាក៏អាចនាំឲ្យលោកអ្នកសម្លឹងមើលទៅឯសិរីល្អរបស់ព្រះជាម្ចាស់ ខណៈពេលដែលលោកអ្នកប្រឈមមុខនឹងជីវិតដ៏អាថ៌កំបាំងមួយនៅលើពិភពលោកនេះ បង្រៀនឲ្យលោកអ្នកចេះមានការអាណិតអាសូរចំពោះអស់អ្នកដែលកំពុងរងទុក្ខ ហើយឲ្យលោកអ្នកចេះត្រៀមខ្លួនក្នុងការប្រឈមមុខនឹងរឿងវិប្បដិសារីដោយជំនឿ។

និពន្ធដោយ៖ លោកគ្រូ Bill Kynes
បកប្រែដោយ៖ លោកគ្រូ ឈាង បូរ៉ា
កែសម្រួលដោយ៖ លោក ទេព រ៉ូ, លោក ខែម បូឡុង និងលោកស្រី ឡូញ ស្រីរដ្ឋ
ដកស្រង់ខ្លះៗចេញពី www.thegospelcoalition.org ដោយមានការអនុញ្ញាត។

តើអ្នកគិតយ៉ាងណា?

០ពិន្ទុ

តើលោកអ្នកយល់យ៉ាងណាដែរ?

តើខ្ញុំអាចជឿលើព្រះគម្ពីរទាំងមូល ហើយព្រះអង្គនៅមិនបានជ្រើសរើសខ្ញុំដែរឬទេ?

៤១១១

កំណត់ហេតុបណ្ដាញ២៧ មេសា ២០២៥

តើខ្ញុំអាចជឿលើព្រះគម្ពីរទាំងមូល ហើយព្រះអង្គនៅមិនបានជ្រើសរើសខ្ញុំដែរឬទេ?

«ជម្រាបសួរលោកគ្រូ តើអាចទេដែលយើងជឿលើព្រះគម្ពីរទាំងមូលនៅក្នុងខួរក្បាលរបស់យើង និងជឿលើគ្រប់ចំណុចនៃសេចក្ដីពិតខាងឯជំនឿគ្រីស្ទបរិស័…

អានបន្ថែម

តើអ្វីទៅជាគោលដៅប្រចាំថ្ងៃនៃការចិញ្ចឹមកូន?

៥៨៣

កំណត់ហេតុបណ្ដាញ២០ មេសា ២០២៥

តើអ្វីទៅជាគោលដៅប្រចាំថ្ងៃនៃការចិញ្ចឹមកូន?

ក្នុងនាមជាឪពុកម្ដាយ យើងគិតអំពីការចិញ្ចឹមបីបាច់កូនៗហាក់បីដូចជាការគូរគំនូរ។ ពីមួយថ្ងៃទៅមួយថ្ងៃ យើងបន្តផាត់ពណ៌។ យើងសង្ឃឹមថា…

អានបន្ថែម

តើអ្វីទៅធ្វើឲ្យថ្ងៃដែលព្រះអង្គមានព្រះជន្មរស់ឡើងវិញពិសេសម៉្លេះ?

៤១៩៧

កំណត់ហេតុបណ្ដាញ១៩ មេសា ២០២៥

តើអ្វីទៅធ្វើឲ្យថ្ងៃដែលព្រះអង្គមានព្រះជន្មរស់ឡើងវិញពិសេសម៉្លេះ?

ប្រសិនបើព្រះជាម្ចាស់មិនបានប្រោសព្រះគ្រីស្ទឲ្យបានមានព្រះជន្មរស់ឡើងវិញ នោះដំណឹងល្អរបស់យើងគឺជាការឥតអំពើ ជំនឿរបស់យើងគឺជាការឥតអំពើ ដែលនេះមានន័យថា យើងកំពុងតែប្រកាសដំណឹងក្លែងក្លាយ។ បើដូច្នោះមែន នោះយើងគួរតែស៊ីផឹក ហើយអរសប្បាយចុះ ដ្បិតថ្ងៃស្អែកយើងនឹងស្លាប់។

អានបន្ថែម