ការយល់អំពីសម័យកាលលោក យ៉ូស្វេ និងពួកចៅហ្វាយអាចជួយឲ្យយើងយល់អំពីការបើកឆាកនៅក្នុងសម័យកាលពួកហោរា។ ឧទាហរណ៍៖ នៅពេលដែលយើងចាប់ផ្ដើមអានកណ្ឌគម្ពីរ អេសាយ ហើយខដំបូងៗបានប្រាប់យើងអំពីព្រឹត្តិការណ៍ដែលបានកើតឡើងក្នុងព័ន្ធកិច្ចរបស់ហោរា អេសាយ ទាក់ទងទៅនឹងការសោយរាជ្យរបស់ស្ដេចនេះស្ដេចនោះ។ល។
ហោរា អេសាយ បានរស់នៅក្នុងអំឡុងពេលនៃអំណាចរបស់ពួកសាសន៍អាសស៊ើរ ប៉ុន្តែក្នុងនាមជាហោរា គាត់ក៏ទាយអំពីអ្វីដែលនឹងកើតឡើងក្រោមការគ្រប់គ្រងរបស់ពួកបាប៊ីឡូនដែរ ដល់ថ្នាក់ថាការទាយរបស់គាត់រាប់បញ្ចូលនូវព្រឹត្តិការណ៍ដែលគ្របដណ្ដប់អស់រយៈពេល១៥០ឆ្នាំអំពីអ្វីដែលនឹងកើតឡើង។ ហើយគាត់ក៏មិនគ្រាន់តែបានឃើញជាមុនអំពីការបំផ្លាញទីក្រុងយេរូសាឡឹម និងមិនគ្រាន់តែអំពីការក្លាយជាឈ្លើយដែរ ប៉ុន្តែក៏ឃើញអំពីការត្រឡប់មកវិញពីភាពជាឈ្លើយ នៅពេលដែលព្រះជាម្ចាស់នាំសេចក្ដីសង្គ្រោះទៅកាន់រាស្ត្ររបស់ទ្រង់។ ហើយនៅក្នុងពេលវេលាយូរទៀតនៅខាងមុខ ហើយជាចុងបញ្ចប់ហោរា អេសាយ បានឃើញផ្ទៃមេឃ និងផែនដីថ្មីដែលនឹងផ្លាស់ប្ដូរការគ្រប់គ្រងអ្វីៗទាំងអស់ទាំងស្រុង។
ដូច្នេះ ក្នុងទំនាយដូចនោះ ឥឡូវនេះហោរា អេសាយ ស្រមើស្រមៃអំពីពេលវេលាដែលបុត្រាមួយអង្គនឹងកើតមកពីខ្សែស្រឡាយរាជវង្សស្ដេច ដាវីឌ៖ «ដ្បិតមានបុត្រ១កើតដល់យើង ព្រះទ្រង់ប្រទានបុត្រា១មកយើងហើយ»។ បុត្រានោះនឹងសោយរាជ្យលើរាជបល្ល័ង្ករបស់ ស្ដេច ដាវីឌ ដែលជាព្រះបិតារបស់ទ្រង់។ ទាក់ទងនឹងការគ្រប់គ្រងរបស់ទ្រង់ នោះនឹងមិនមានទីបញ្ចប់ឡើយ (អេសាយ ៩:៦-៧)។ មានសេចក្ដីសន្យាអំពីរាជវង្សរបស់ស្ដេច ដាវីឌ។ ប៉ុន្តែ ក្នុងពេលតែមួយ ងាររបស់ទ្រង់ក៏មានដូចតទៅ «ព្រះដ៏ជួយគំនិតយ៉ាងអស្ចារ្យ ព្រះដ៏មានព្រះចេស្ដា ព្រះវរបិតាដ៏គង់នៅអស់កល្ប នឹងជាម្ចាស់នៃមេត្រីភាព» (អេសាយ ៩:៦)។ យើងក៏ត្រូវបើកបង្ហាញបន្ថែមទៀតអំពីប្រធានបទនៃរាជវង្សរបស់ស្ដេច ដាវីឌ នៅក្នុងព្រះគម្ពីរសញ្ញាចាស់។
ជាបន្ទាប់ នៅគ្រាដដែលនោះ រាស្ត្ររបស់ព្រះជាម្ចាស់ក៏ក្លាយជាឈ្លើយ ហើយនៅក្នុងឆ្នាំមុនដែលគេនាំពួករាស្ត្រនៃទីក្រុងយេរូសាឡឹមទៅចក្រភពបាប៊ីឡូន នោះហោរា យេរេមា ក៏កំពុងអធិប្បាយនៅទីក្រុងយេរូសាឡឹម ហើយហោរា អេសេគាលក៏កំពុងអធិប្បាយនៅទីក្រុងបាប៊ីឡូន ដោយគេបានចាប់គាត់ទៅជាឈ្លើយនៅវគ្គដំបូង។ ហើយហោរាទាំងពីរនាក់នោះក៏កំពុងតែអធិប្បាយនូវប្រធានបទដូចៗគ្នាដែរ។ ពួកគាត់ទាំងពីរនាក់កំពុងតែលើកឡើងថា៖ ពួកសាសន៍អ៊ីស្រាអែលមិនត្រូវបះបោរទាស់ប្រឆាំងនឹងពួកបាប៊ីឡូនឡើយ។ ប្រសិនបើពួកគេបះបោរ នោះពួកបាប៊ីឡូននឹងបំផ្លាញពួកគេចោលជាមិនខាន។ ប៉ុន្តែ ពួកគេបានបះបោរទាស់ប្រឆាំងនឹងព្រះជាម្ចាស់ ដូច្នេះព្រះអង្គក៏បានបំផ្លាញពួកគេចោលទៅ។ សាររបស់ហោរា យេរេមា និងហោរា អេសេគាល៖ ពួករាស្ត្រអាក្រក់ណាស់ ដល់ថ្នាក់ថាមិនអាចគេចចេញពីការបំផ្លាញចោល និងការក្លាយជាឈ្លើយបានឡើយ ហើយសេចក្ដីសង្ឃឹមចុងក្រោយនៃពេលវេលានៃភាពជាឈ្លើយគឺថា ព្រះជាម្ចាស់ផ្ទាល់នឹងនាំពួកគាត់ត្រឡប់មកវិញ ហើយក៏នឹងប្រទានព្រះប្រោសលោះសម្រាប់ពួកគាត់ដែរ។
ដូច្នេះ នៅពេលដែលពួករាស្ត្រចាប់ផ្ដើមត្រឡប់មកវិញ នោះយើងឃើញថាមានព័ន្ធកិច្ចក្រោយគ្រាពេលភាពជាឈ្លើយរបស់ពួកហោរា ដែលមានដូចជាហោរា ហាកាយ ដែលបានអធិប្បាយដោយប្រាប់ពួករាស្ត្រដែលបានត្រឡប់មកវិញថា ពួកគាត់ត្រូវតែចាប់ផ្ដើមសាងសង់ព្រះវិហារវិញភ្លាម។ នោះគឺជាកន្លែងចម្បងនៃការជួបរវាងព្រះជាម្ចាស់ និងមនុស្សដែលព្រះជាម្ចាស់ផ្ទាល់បានគ្រោងទុក។ ដូច្នេះ គេក៏បានសាងសង់ព្រះវិហារតូចមួយនៅក្នុងទីក្រុងយេរូសាឡឹម ហើយពេលនោះគឺជាពេលដែលយើងឃើញព័ន្ធកិច្ចរបស់ហោរា អែសរ៉ា ហើយមិនយូរប៉ុន្មានក្រោយពេលនោះព័ន្ធកិច្ចរបស់ហោរា នេហេមា ដែលព្រះជាម្ចាស់ផ្ទាល់បាននាំគាត់ឲ្យត្រឡប់មកវិញ ដើម្បីសាងសង់កំផែងនៅជុំវិញទីក្រុង។
ពួកគាត់បានសាងសង់ព្រះវិហារមុនសាងសង់ទីក្រុងយេរូសាឡឹមឡើងវិញ។ នៅគ្រានោះ មិនសូវមានមនុស្សរស់នៅទីនោះទេ។ ពួកគាត់ក្រខ្លាំងមែនទែន ហើយក៏កំពុងរស់នៅដោយដាំដំណាំនៅជុំវិញ។ ប៉ុន្តែ ឥឡូវមានព្រះវិហារ ហើយក៏កំពុងដំណើរការក្នុងលំដាប់តូចតាច មិនសូវមានភាពស្មោះត្រង់ ហើយពេញដោយទុក្ខលំបាក រហូតដល់ពេលហោរា នេហេមា (ដោយទទួលកម្លាំងពីព្រះជាម្ចាស់) បានសាងសង់កំផែងទីក្រុង ទោះបីមានការប្រឆាំងជាច្រើន ហើយគាត់ក៏បានវិនិយោគលើកម្មវិធីប្រមូលមនុស្សម្នាចូលមកនៅក្នុងទីក្រុង និងដើម្បីកសាងទីក្រុងជាថ្មីឡើងវិញ។ ហើយនេះគឺជាពេលដែលយើងឈានដល់ចំណុចចុងក្រោយនៃដំណើររឿងនៃព្រះគម្ពីរសញ្ញាចាស់ ក្រោមព័ន្ធកិច្ចរបស់ ហោរា នេហេមា។
មកដល់ពេលនេះ យើងមានការសរសេរចុះ និងការអធិប្បាយពីព័ន្ធកិច្ចក្រោយពេលភាពជាឈ្លើយរបស់ពួកហោរានៅពេលនោះ—ដែលនេះសំដៅទៅលើការដែលពួកហោរាអធិប្បាយទៅកាន់រាស្ត្ររបស់ព្រះជាម្ចាស់ក្រោយពេលនៃភាពជាឈ្លើយ។ ដូច្នេះ យើងក៏មានពួកហោរាមុនគ្រានៃភាពជាឈ្លើយដែរដូចជាហោរា អេសេគាល និងហោរា អេសាយ ហើយបន្ទាប់មកទៀតហោរាក្រោយពេលនៃភាពជាឈ្លើយដែរ ដូចជាហោរា ដានីយ៉ែល នៅគ្រាឆ្លងសម័យកាល។ ហើយក៏មានហោរាក្រោយពេលនៃភាពជាឈ្លើយដូចជា ហោរា ហាកាយ, ហោរា សាការី និងហោរា ម៉ាឡាគី ជាដើម។
មតិយោបល់
Loading…