ផ្សាយដំណឹងល្អជាថ្មី

ចូរផ្សាយដំណឹងល្អអំពីព្រះយេស៊ូវ ពីព្រោះព្រះជាម្ចាស់នឹងប្រើប្រាស់ដំណឹងល្អនេះដើម្បីនាំឲ្យមានជីវិតថ្មី។

២៩ មេសា ២០១៩អានរយៈពេល ១២ នាទី

មើល៥៣៦ដង

ការផ្សាយដំណឹងល្អនឹងមានជោគជ័យ ឬក៏បរាជ័យគឺអាស្រ័យទៅលើសេចក្ដីពិតនៃការមានព្រះជន្មរស់ឡើងវិញ។ ប្រសិនបើព្រះយេស៊ូវមិនបានមានព្រះជន្មរស់ពីសុគតឡើងវិញ នោះមានន័យថា យើងគ្មានដំណឹងល្អដើម្បីនឹងចែកចាយនោះឡើយ៖ ១) អំពើបាប និងសេចក្ដីស្លាប់នៅមានអំណាច ២) យើងកំពុងថ្វាយបង្គំព្រះដែលស្លាប់ និងកំពុងតែប្រឈមមុខនឹងភាពពុករលួយ ៣) ហើយគ្រីស្ទបរិស័ទវេទនាលើសជាងមនុស្សទាំងអស់ទៅទៀត ពីព្រោះយើងត្រូវបានគេបោកប្រាស់ ហើយគួរឲ្យអាណិតណាស់។ មួយវិញសោត ប្រសិនបើការមានព្រះជន្មរស់ឡើងវិញគឺជាការពិត នោះគ្រីស្ទបរិស័ទគ្រប់ៗរូបគួរតែជំរុញចិត្តខ្លួនក្នុងការផ្សាយដំណឹងល្អនោះដោយសេរី និងអំណរដ៏ខ្លាំងក្លា។

ក្នុងកណ្ឌគម្ពីរ ១កូរិនថូស ១៥:១២-២០ សាវ័ក ប៉ុល បានវែកញែកថា ចំពោះគ្រីស្ទបរិស័ទ រាល់គ្រប់អ្វីៗទាំងអស់គឺរំពឹងលើសេចក្ដីពិតនៃការមានព្រះជន្មរស់ឡើងវិញ។ ខាងក្រោមនេះគឺជាអត្ថន័យយ៉ាងចំៗទាក់ទងទៅនឹងការផ្សាយដំណឹងល្អ៖

១.ដោយសារការមានព្រះជន្មរស់ឡើងវិញគឺជាការពិត ការប្រកាសដំណឹងល្អនឹងបង្កើតផលផ្លែ និងជំនឿដែលនឹងនាំឲ្យមានជីវិត។

ដោយសារការមានព្រះជន្មរស់ឡើងវិញ មនុស្សស្លាប់នឹងរស់ឡើងវិញតាមរយៈពាក្យពេចន៍។ នេះគឺជាការអស្ចារ្យនៃការប្រកាសដំណឹងល្អ។ ការប្រកាសដំណឹងល្អមិនគ្រាន់តែបង្កើតឲ្យមានផលផ្លែប៉ុណ្ណោះទេ ប៉ុន្តែថែមទាំងបង្កើតឲ្យមានជំនឿដែលនាំឲ្យមានជីវិតអស់កល្បជានិច្ចទៀតផង។ ការផ្សាយដំណឹងល្អគឺមិនមែនជាការឥតប្រយោជន៍ ការគ្មានផលផ្លែ ទទេស្អាត ហើយនិងគ្មានលទ្ធផលឡើយ។ ហេតុអ្វី? ពីព្រោះព្រះយេស៊ូវបានមានព្រះជន្មរស់ឡើងវិញ កំពុងគង់ខាងស្ដាំព្រះហស្តនៃព្រះជាម្ចាស់ ហើយក៏កំពុងត្រាស់ហៅមនុស្សឲ្យមកឯទ្រង់តាមរយៈការធ្វើទីបន្ទាល់ដោយប្រើប្រាស់ពាក្យពេចន៍របស់យើង។

២.ដោយសារការមានព្រះជន្មរស់ឡើងវិញគឺជាការពិត ដូច្នេះយើងអាចធ្វើជាតំណាងរបស់ព្រះជាម្ចាស់បានយ៉ាងត្រឹមត្រូវ។

ប្រសិនបើព្រះយេស៊ូវមិនបានមានព្រះជន្មរស់ពីសុគតឡើងវិញទេ នោះមានន័យថា គ្រីស្ទបរិស័ទគឺជាអ្នកធ្វើទីបន្ទាល់ដ៏ខុសឆ្គង៖ នោះ «ឈ្មោះថាយើងខ្ញុំជាស្មរបន្ទាល់ក្លែងក្លាយពីព្រះវិញ ដ្បិតយើងខ្ញុំបានធ្វើបន្ទាល់ពីព្រះថា ទ្រង់បានប្រោសឲ្យព្រះគ្រីស្ទរស់ឡើងវិញហើយ តែបើពួកស្លាប់មិនរស់ឡើងវិញមែន នោះប្រាកដជាទ្រង់មិនបានប្រោសឲ្យព្រះគ្រីស្ទរស់ឡើងវិញពិត» (១កូរិនថូស ១៥:១៥)។ ដោយសារការមានព្រះជន្មរស់ឡើងវិញគឺជាការពិត ដូច្នេះយើងអាចប្រកាស និងធ្វើជាតំណាងរបស់ព្រះជាម្ចាស់ទៅកាន់ពិភពលោកនេះដែលកំពុងវង្វេង ហើយស្លាប់។

លោកអ្នកមិនមែនជាអ្នកលក់ដែលពូកែវោហារ ឬក៏ជាអ្នកបោកប្រាស់គេទេ។ លោកអ្នកមានការអនុញ្ញាត និងការបញ្ជូនឲ្យចេញទៅផ្សាយពីព្រះអាទិករនៃចក្រវាល។ លោកអ្នកអាច ហើយក៏គួរនិយាយដោយមានចិត្តម៉ឺងម៉ាត់ ចិត្តស្រឡាញ់ ភាពស្មោះត្រង់ និងការទទូចអង្វរទៅកាន់អស់អ្នកដែលមិនទាន់ជឿឲ្យពួកគាត់ទទួលជឿ។ លោកអ្នកគួរមានការទាក់ទាញចិត្ត និងមានចិត្តអាណិតពេលដែលលោកអ្នកផ្សាយដំណឹងល្អ ប៉ុន្តែស្រាប់តែពេលនោះដែរ លោកអ្នកក៏គួរមានចិត្តស្មោះត្រង់ដ៏ជ្រាលជ្រៅផងដែរ ពីព្រោះព្រះជាម្ចាស់បានបញ្ជូនលោកអ្នកឲ្យមកធ្វើជាទីបន្ទាល់របស់ទ្រង់ចំពោះកូនចៀមដែលបានបាត់បង់។

៣.ដោយសារការមានព្រះជន្មរស់ឡើងវិញគឺជាការពិត នោះអំពើបាបរបស់លោកអ្នកត្រូវបានអត់ទោសហើយ។

ប្រសិនបើការមានព្រះជន្មរស់ឡើងវិញមិនបានកើតឡើងទេ នោះមានន័យថា លោកអ្នកត្រូវបានទទួលការថ្កោលទោសឲ្យធ្លាក់នរកជារៀងរហូត៖ «ហើយបើព្រះគ្រីស្ទមិនបានរស់ឡើងវិញមែន នោះសេចក្ដីជំនឿរបស់អ្នករាល់គ្នាក៏ជាការឥតអំពើ អ្នករាល់គ្នានៅក្នុងអំពើបាបនៅឡើយ» (១កូរិនថូស ១៥:១៧)។ ដោយសារការមានព្រះជន្មរស់ឡើងវិញ អំពើបាបរបស់លោកអ្នកត្រូវបានអត់ទោសនៅឯឈើឆ្កាង។ ត្រូវបានសម្រេច ទទួលការវាយត្រា និងការអះអាង។ គ្មានអ្វីមួយអាចមកបង្វែរនូវអ្វីដែលព្រះគ្រីស្ទបានធ្វើនៅឯឈើឆ្កាងឡើយ។

តើការសន្យាមួយនេះអាចណែនាំយើងពីការផ្សាយដំណឹងល្អជាថ្មីម្ដងទៀតយ៉ាងដូចម្ដេចទៅ? យើងផ្សាយដំណឹងល្អតាមសេរីភាព និងការដឹងគុណ។ លោកអ្នកអាចនឹងប្រកាសអំពីព្រះយេស៊ូវដោយមានអំណរ ពីព្រោះមេរោគដែលនឹងសម្លាប់លោកអ្នក—អំពើបាប—ត្រូវបានទទួលការព្យាបាលយ៉ាងអស់កល្បជានិច្ចហើយ។ លោកអ្នកមានអភ័យឯកសិទ្ធិក្នុងការចែកចាយការព្យាបាលដល់អស់អ្នកដែលនឹងស្ដាប់លោកអ្នក។ គ្មានការស្ដីបន្ទោស និងភាពអាម៉ាស់ទៀតឡើយ។ លោកអ្នកបានទទួលការអត់ទោសហើយ។ ព្រះលោហិតរបស់ព្រះយេស៊ូវមានអំណាចអាចអត់ទោសបាបណាមួយក៏បានដែរ។ ព្រះអង្គបានបង់ថ្លៃលោះអំពើបាបរបស់លោកអ្នកហើយ។

៤.ដោយសារការមានព្រះជន្មរស់ឡើងវិញគឺជាការពិត រាល់អស់អ្នកណាដែលស្លាប់ក្នុងព្រះគ្រីស្ទនឹងរស់នៅយ៉ាងអស់កល្បជានិច្ច។

សាវ័ក ប៉ុល បានកត់ត្រាចុះក្នុងកណ្ឌគម្ពីរ ១កូរិនថូស ១៥:១៨ «ហើយអស់អ្នកដែលបានដេកលក់ទៅក្នុងព្រះគ្រីស្ទ គេបានត្រូវវិនាសហើយ»។ ប្រសិនបើព្រះគ្រីស្ទមិនបានមានព្រះជន្មរស់ឡើងវិញ នោះគ្មានបុគ្គលណាម្នាក់អាចមានសង្ឃឹមបានឡើយ។ គ្រប់គ្នានឹងស្លាប់ វិនាស ហើយនិងរងទុក្ខយ៉ាងអស់កល្បជានិច្ចដាច់ចេញពីព្រះជាម្ចាស់។ ដោយសារការមានព្រះជន្មរស់ឡើងវិញ ដូច្នេះអស់អ្នកណាដែលស្លាប់ក្នុងព្រះគ្រីស្ទនឹងមានជីវិតយ៉ាងអស់កល្បជានិច្ច។ អស់អ្នកណាដែលទទួលជឿលើ ហើយដើរតាមព្រះគ្រីស្ទ នោះពួកគាត់នឹងនៅជាមួយទ្រង់ជារៀងរហូត។ គ្មានសេចក្ដីស្លាប់ណាដែលអាចនឹងនៅជាយូរអង្វែងនោះឡើយ។ «ឱសេចក្ដីស្លាប់អើយ ទ្រនិចឯងនៅឯណា សេចក្ដីស្លាប់អើយ ជ័យជម្នះរបស់ឯងនៅឯណា» (១កូរិនថូស ១៥:៥៥)។

ដូច្នេះ យើងអាចប្រកាសក្ដីសង្ឃឹមដ៏នៅអស់កល្បជានិច្ចនេះ៖ ចូរទុកចិត្តលើព្រះគ្រីស្ទ ហើយនៅជាមួយនឹងព្រះអង្គយ៉ាងអស់កល្បជានិច្ច។ លោកអ្នកអាចនិយាយយ៉ាងចំៗជាមួយអស់អ្នកដែលកំពុងស្លាប់លើគ្រែគាត់។ លោកអ្នកអាចមានទំនុកចិត្តត្រង់ថា អស់អ្នកដែលលោកអ្នកស្រឡាញ់ដែលបានស្លាប់មិនមានការរងទុក្ខទៀតឡើយ។ អស់អ្នកដែលជាកម្មសិទ្ធិរបស់ព្រះគ្រីស្ទនឹងរស់នៅយ៉ាងអស់កល្បជានិច្ច។

៥.ដោយសារការមានព្រះជន្មរស់ឡើងវិញគឺជាការពិត យើងអាចរស់នៅក្នុងជីវិតដែលគួរឲ្យចង់បាន។

ប្រសិនបើការមានព្រះជន្មរស់ឡើងវិញមិនបានកើតឡើងទេ នោះមានន័យថា ជីវិតគ្រីស្ទបរិស័ទគឺជាជីវិតដែលគួរឲ្យពេញទៅដោយទុក្ខព្រួយ និងក្ដីអាណិត៖ «បើសិនជាយើងមានទីសង្ឃឹមក្នុងព្រះគ្រីស្ទ នៅតែក្នុងជីវិតនេះប៉ុណ្ណោះ នោះយើងវេទនា លើសជាងមនុស្សទាំងអស់ទៅទៀត» (១កូរិនថូស ១៥:១៩)។ ដោយសារការមានព្រះជន្មរស់ឡើងវិញ គ្រីស្ទបរិស័ទអាចរស់នៅក្នុងជីវិតដែលគួរឲ្យចង់បាន។ ការស្គាល់ព្រះយេស៊ូវគ្រីស្ទ—ក្នុងការសុគត និងការមានព្រះជន្មរស់ឡើងវិញ—គឺជាការប្រសើរលើសអ្វីៗទាំងអស់នៅក្នុងចក្រវាលនេះ។ ត្រូវហើយ សូម្បីតែក្នុងការរងទុក្ខ។ ត្រូវហើយ ទោះបើគេប្រហារជីវិតយើងដោយកាត់ក្បាលក៏ដោយ ឬក៏ជិះជាន់យើង ឬក៏ចាត់ទុកយើងជាអ្នកតូចតាច។ ត្រូវហើយ ទោះបើគេរាប់យើងថាជាមនុស្សដែលមិនចេះគិតឲ្យទូលាយ ចំឡែក ឬក៏ជាអ្នកកាន់សាសនាដ៏ខុសគេក៏ដោយ។ យើងអាចលើកឡើងដូចសាវ័ក ប៉ុល «ហើយខ្ញុំក៏រាប់គ្រប់ទាំងអស់ទុកដូចជាខាតដែរ ដោយព្រោះសេចក្ដីដែលប្រសើរជាង គឺដោយស្គាល់ព្រះគ្រីស្ទយេស៊ូវ ជាព្រះអម្ចាស់នៃខ្ញុំ» (ភីលីព ៣:៨)។ យើងអាចច្រៀងឲ្យអស់ពីចិត្ត «ខ្ញុំបានសម្រេចចិត្តដើរតាមព្រះយេស៊ូវ»។

លោកអ្នកអាចមានទំនុកចិត្តយ៉ាងម៉ឺងម៉ាត់ត្រង់ថា ពាក្យពេចន៍ដែលលោកអ្នកនិយាយនឹងផ្ដល់ជីវិតយ៉ាងពេញបរិបូរណ៍ ហើយនៅអស់កល្បជានិច្ច។ លោកអ្នកមានចម្លើយដែលសមហេតុសមផលលើសគេទាំងអស់លើសំណួរអំពីជីវិត។ ឥឡូវនេះ លោកអ្នកអាចមានអំណរក្នុងក្ដីសង្ឃឹមដ៏នៅអស់កល្បជានិច្ចដែលព្រះជាម្ចាស់បានញែកទុកសម្រាប់លោកអ្នក។ លោកអ្នកអាចសន្យាថា ជីវិតដ៏ខ្លីនេះទំនងជាមិនស្រួលទេ—លោកអ្នកទំនងត្រូវលះបង់ជាច្រើន ហើយក៏ទំនងជាត្រូវរងទុក្ខ—ប៉ុន្តែ ព្រះគ្រីស្ទផ្ដល់ក្ដីសង្ឃឹមដ៏រស់ កេរ្តិ៍មរតកនៅអនាគត ក្ដីអំណរដែលពាក្យពេចន៍មិនអាចពណ៌នាបាន ហើយជាចុងក្រោយគឺក្ដីសង្គ្រោះសម្រាប់ព្រលឹងលោកអ្នក (១ពេត្រូស ១:៣-៩)។ ទាំងអស់គឺស័ក្ដិសមណាស់។

ហេតុដូច្នេះ ខណៈពេលដែលថ្ងៃបុណ្យព្រះអង្គមានព្រះជន្មរស់ឡើងវិញបានមកដល់ ចូរពិចារណាលើកណ្ឌគម្ពីរ ១កូរិនថូស ១៥:៥៨ «បានជាបងប្អូនស្ងួនភ្ងាអើយ ចូរកាន់យ៉ាងខ្ជាប់ខ្ជួន ដោយឥតរង្គើ ទាំងធ្វើការព្រះអម្ចាស់ ឲ្យបរិបូរជាដរាបចុះ ដោយដឹងថា ការដែលអ្នករាល់គ្នាខំប្រឹងធ្វើក្នុងព្រះអម្ចាស់ នោះមិនមែនឥតប្រយោជន៍ទេ»។ សេចក្ដីអធិស្ឋានរបស់លោកអ្នកសម្រាប់អស់អ្នកបាត់បង ការសន្ទនាដែលលោកអ្នកមានដោយចេតនាអំពីប្រធានបទខាងឯព្រលឹងវិញ្ញាណ និងការដែលលោកអ្នកព្យាយាមបង្កើតទំនាក់ទំនងដោយក្ដីស្រឡាញ់ជាមួយនឹងអស់អ្នកដែលមិនស្គាល់ព្រះយេស៊ូវ ទាំងអស់នោះគឺមិនមែនឥតប្រយោជន៍ឡើយ។ ចូរនៅឲ្យខ្ជាប់ខ្ជួន។ គ្មានអ្វីដែលយើងធ្វើសម្រាប់ព្រះអង្គគឺជាការឥតប្រយោជន៍ឡើយ។ ដូច្នេះ ចូរបន្តក្នុងការផ្សាយដំណឹងល្អ។

ចូរអនុញ្ញាតឲ្យសេចក្ដីពិតនៃការមានព្រះជន្មរស់ឡើងវិញ ណែនាំជាថ្មី ជំរុញ ហើយលើកទឹកចិត្តភាពឆេះឆួល និងក្ដីស្រឡាញ់របស់លោកអ្នកក្នុងការផ្សាយដំណឹងល្អ។ បើព្រះជាម្ចាស់សព្វព្រះហឫទ័យ សូមឲ្យព្រះអង្គប្រទានអំណរដល់លោកអ្នកក្នុងការណែនាំនរណាម្នាក់ឲ្យស្គាល់ព្រះយេស៊ូវជាលើកដំបូងនៅថ្ងៃបុណ្យព្រះអង្គមានព្រះជន្មរស់ឡើងវិញនេះ។

និពន្ធដោយ៖ លោកគ្រូ Steven Lee
បកប្រែដោយ និងកែសម្រួលដោយ៖ លោក ឈាង បូរ៉ា, លោក ទេព រ៉ូ និងលោកស្រី ឡូញ ស្រីរ៉ុង
ដកស្រង់ខ្លះៗចេញពី www.thegospelcoalition.org ដោយមានការអនុញ្ញាត។ Plovpit.com

តើអ្នកគិតយ៉ាងណា?

៣ពិន្ទុ

តើលោកអ្នកយល់យ៉ាងណាដែរ?

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

១៨៣៧៧

ក្តៅៗពេញនិយម

កំណត់ហេតុបណ្ដាញ៦ មករា ២០២៦

ហេតុអ្វីបានជាស្ត្រីមានចិត្តឆេះឆួលក្នុងព័ន្ធកិច្ច?

វាគ្មានអ្វីគួរឲ្យភ្ញាក់ផ្អើលនោះទេ យើងបានទទួលសំណួរជាច្រើនពីបេសកជននៅតាមតំបន់នានា…

អានបន្ថែម

តើ៧០អាទិត្យ ក្នុងកណ្ឌគម្ពីរដានីយ៉ែលជាអ្វី? (ដានីយ៉ែល ៩)

៤១១៩

កំណត់ហេតុបណ្ដាញ២៥ វិច្ឆិកា ២០២៥

តើ៧០អាទិត្យ ក្នុងកណ្ឌគម្ពីរដានីយ៉ែលជាអ្វី? (ដានីយ៉ែល ៩)

អត្ថន័យសំខាន់នៃការកាត់ស្រាយកណ្ឌគម្ពីរ ដានីយ៉ែល ៩:២៦-២៧ គឺជាការសង្កេតរបស់សាវ័កម៉ាថាយ ត្រង់ដែលព្រះយេស៊ូវកំពុងមានបន្ទូលអំពីការបំផ្លិចបំផ្លាញដែលត្រូវនឹងមកក្រុងយេរូសាឡឹម និងព្រះវិហារបរិសុទ្ធ (ម៉ាថាយ ២៤:១៥)។

អានបន្ថែម

សំណួរដែលបណ្តាលចិត្ត៖ វិធីសាស្ត្រថ្មី ក្នុងការពិភាក្សានៅក្នុងក្រុមតូច

១១៣៧

កំណត់ហេតុបណ្ដាញ១៨ វិច្ឆិកា ២០២៥

សំណួរដែលបណ្តាលចិត្ត៖ វិធីសាស្ត្រថ្មី ក្នុងការពិភាក្សានៅក្នុងក្រុមតូច

ព្រះយេស៊ូវ ពួកសាវ័ក និងពួកសិស្សរបស់ទ្រង់ ពួកគេទាំងអស់បានសួរបណ្តាជននូវសំណួរជាក់លាក់។ ឥឡូវនេះ ប្រហែលជាពួកយើងគួរពិចារណាប្រើសំណួរដូចគ្នាទាំងនេះ សម្រាប់ក្រុមតូចរបស់យើងទាំងអស់។

អានបន្ថែម