«ខ្ញុំនឹងអធិស្ឋានសម្រាប់អ្នក!»
ជាញឹកញាប់ យើងបាននិយាយពាក្យសម្ដីនេះទៅមិត្តភក្ដិរបស់យើង ប៉ុន្តែតើយើងបានធ្វើតាមការនិយាយរបស់យើង ហើយធ្វើការអធិស្ឋានសម្រាប់ពួកគាត់ញឹកញាប់ប៉ុណ្ណា? នៅពេល ខ្ញុំពិចារណាអំពីទំនាក់ទំនងរបស់ខ្ញុំនៅក្នុងក្រុមជំនុំ ខ្ញុំចង់ក្លាយជាបងស្រីម្នាក់នៅក្នុងព្រះគ្រីស្ទ ជាអ្នកដែលមានការប្ដេជ្ញាចិត្តក្នុងការអធិស្ឋាន។ ប្រសិនបើយើងកំណត់អត្ថន័យនៃការបង្កើតសិស្សថាជា «ការមានចេតនាក្នុងការធ្វើល្អខាងឯវិញ្ញាណចំពោះនរណាម្នាក់ ដើម្បីឲ្យអ្នកនោះមានភាពកាន់តែដូចព្រះគ្រីស្ទ» នោះការអធិស្ឋានរបស់យើង ពិតជាមានតួនាទីដ៏សំខាន់នៃការបង្កើតសិស្សតាមរយៈទំនាក់ទំនងរបស់យើង។ ដូច្នេះ ខណៈដែលយើងមានឥទ្ធិពល ហើយនិងបង្កើតសិស្សជាមួយបងប្អូនស្រីៗ យើងគួរតែមានប្រាជ្ញាក្នុងការពិចារណាធ្វើដោយផ្សារភ្ជាប់នឹងការអធិស្ឋាននៅក្នុងការប្រាស្រ័យទាក់ទងប្រចាំថ្ងៃរបស់យើង។
ប្ដេជ្ញាចិត្តក្នុងការអធិស្ឋានសម្រាប់ការបង្កើតសិស្សតាមរយៈទំនាក់ទំនងរបស់លោកអ្នក
តើអ្វីជាការកំណត់ភាពខុសគ្នារវាងទំនាក់ទំនងជាគ្រីស្ទបរិស័ទរបស់លោកអ្នកពីមិត្តភាពដទៃផ្សេងទៀត? ខ្ញុំមានមិត្តភក្តិដែលមិនមែនជាគ្រីស្ទបរិស័ទជាច្រើននាក់ ដែលពួកគាត់កំពុង «គិតដល់ខ្ញុំ» និង «កំពុងផ្ដល់អារម្មណ៍ល្អៗមកកាន់ខ្ញុំ» ប៉ុន្តែអ្វីដែលមានតម្លៃបំផុតក្នុងជីវិតរបស់ខ្ញុំ គឺជាស្ត្រីដែលខ្ញុំបានស្គាល់ ដោយពួកគាត់បានប្ដេជ្ញាចិត្តនឹងអធិស្ឋានសម្រាប់ខ្ញុំ។ នៅក្នុងក្រុមជំនុំ ខ្ញុំចង់ក្លាយជាមិត្តម្នាក់បែបនោះដែរ នៅក្នុងការបង្កើតសិស្សតាមរយៈទំនាក់ទំនងរបស់ខ្ញុំផ្ទាល់។
ការតាំងសេចក្តីសញ្ញាក្រុមជំនុំយើង គឺសមាជិកទាំងអស់នៃក្រុមជំនុំធ្វើការប្ដេជ្ញាចិត្ត ដើម្បី «ដើររួមជាមួយគ្នានៅក្នុងសេចក្តីស្រឡាញ់របស់គ្រីស្ទបរិស័ទ អនុវត្តការមើលថែរក្សាគ្នាដោយសេចក្តីស្រឡាញ់ និងមានការប្រុងប្រយ័ត្នចំពោះគ្នាទៅវិញទៅមក…អធិស្ឋានសម្រាប់គ្នាទៅវិញទៅមក»។ នៅក្នុងព្រះអម្ចាស់ នេះមានន័យថា វាជាកាតព្វកិច្ចរបស់យើងក្នុងការអធិស្ឋានឲ្យគ្នាទៅវិញទៅមក ជាពិសេសត្រូវអធិស្ឋានសម្រាប់អ្នកដែលយើងកំពុងតែបង្រៀន។
ការប្រកបគ្នានៃគ្រីស្ទបរិស័ទ គឺមិនមែនជា «ការដើរលេងជាមួយគ្រីស្ទបរិស័ទដទៃផ្សេង» នោះទេ។ ហើយការបង្កើតសិស្ស ក៏មិនមែនគ្រាន់តែជាការនិយាយ និងការស្តាប់នោះដែរ។ ពេលយើងបង្កើតជាមួយអ្នកដទៃ គឺជាឯកសិទ្ធិក្នុងការជួយអ្នកទាំងនោះឲ្យបានដើរតាមព្រះយេស៊ូវ ហើយឧបករណ៍សំខាន់ពីរក្នុងការបង្កើតសិស្សជាមួយអ្នកដទៃនោះ គឺព្រះបន្ទូល និងការអធិស្ឋាន។ បើសិនគ្មានឧបករណ៍ដ៏មានឥទ្ធិពលទាំងពីរនេះទេ ខ្ញុំគ្រាន់តែជាអ្នកស្តាប់ម្នាក់ប៉ុណ្ណោះ ហើយឥទ្ធិពលខាងឯវិញ្ញាណដែលខ្ញុំមាន គឺនឹងមានតិចតួចបំផុត។ តាមពិតទៅ ខ្ញុំបានចាកចេញពីការជួបជុំជាច្រើន ដោយព្រោះខ្ញុំបានឆ្ងល់ថា តើអ្វីដែលខ្ញុំបាននិយាយនោះ វាមានប្រយោជន៍សម្រាប់អ្នកស្តាប់ទាំងនោះ ឬយ៉ាងណា។ ពេលខ្លះ ពាក្យសម្ដី និងដំបូន្មានរបស់ខ្ញុំមិនមានន័យនោះឡើយ ប៉ុន្តែការចូលទៅកាន់បល្ល័ង្ករបស់ព្រះជាម្ចាស់ជំនួសឲ្យគ្នាទៅវិញទៅមកនឹងទទួលបានជោគជ័យជានិច្ច។
អធិស្ឋានតាមព្រះគម្ពីរ
ការអធិស្ឋានតាមព្រះបន្ទូល គឺជាឧបករណ៍ដ៏មានឥទ្ធិពលក្នុងការប្រយុទ្ធប្រឆាំង ដើម្បីភាពបរិសុទ្ធរបស់យើង។ វាជាអំណោយមួយដែលមានបងប្អូនគ្រីស្ទបរិស័ទមានឆន្ទៈអធិស្ឋានតាមព្រះគម្ពីរជាមួយយើង នៅពេលដួងចិត្តរបស់យើងងាយនឹងវង្វេង ហើយយើងត្រូវបានល្បួងឲ្យធ្វើតាមអារម្មណ៍របស់យើង។ មានពេលជាច្រើនដងដែលខ្ញុំមិនយល់ច្បាស់អំពីរបៀបអធិស្ឋានសម្រាប់អ្នកដទៃ ប៉ុន្តែខ្ញុំពិតជាអរព្រះគុណដល់ព្រះសម្រាប់ព្រះគម្ពីរដែលជាប្រភពគ្រប់គ្រាន់ ដើម្បីជួយខ្ញុំក្នុងការអធិស្ឋាន។ ពេលខ្លះ វិធីល្អបំផុតក្នុងការចាប់ផ្ដើមការអធិស្ឋាន គឺការស្រែកឡើងថា «យើងខ្ញុំក៏មិនដឹងធ្វើដូចម្ដេចដែរ ប៉ុន្តែភ្នែកយើងខ្ញុំទន្ទឹងមើលតែទ្រង់ទេ!» (២របាក្សត្រ ២០:១២)។
ការរម្លឹកដ៏មានប្រយោជន៍
ខណៈដែលយើងអធិស្ឋានសម្រាប់បងប្អូនស្រីៗនៅក្នុងព្រះគ្រីស្ទ នេះគឺជាការរម្លឹកដ៏មានប្រយោជន៍មួយចំនួន៖
១. សូមអធិស្ឋានអំពីលក្ខណៈរបស់ព្រះ
សូមរម្លឹកគ្នាទៅវិញទៅមកឲ្យបានញឹកញាប់ថា តើព្រះទ្រង់ជានរណា ហើយសរសើរព្រះអម្ចាស់ដែលមានអធិបតេយ្យភាព ទ្រង់មិនប្រែប្រួល ទ្រង់បរិសុទ្ធ និងទ្រង់មានគ្រប់ទាំងចំណេះ។ល។
២. សូមអធិស្ឋានតាមការសន្យានៃដំណឹងល្អ
សូមចងចាំពីអំណោយទាននៃសេចក្តីសង្គ្រោះរបស់ព្រះសម្រាប់យើងតាមរយៈព្រះគ្រីស្ទ។ យើងមានមរតកដែលមិនចេះផុយរលួយ ហើយបានរក្សាទុកនៅឯនគរស្ថានសួគ៌សម្រាប់យើង និងព្រះទ្រង់មិននឹកចាំពីការរំលងរបស់យើងទៀតនោះទេ។ទ្រង់បានប្រទានដល់យើងនូវអ្វីគ្រប់យ៉ាង ដែលជាតម្រូវការសម្រាប់ជីវិត និងការរស់នៅដោយគោរពកោតខ្លាចដល់ព្រះជាម្ចាស់។
៣. ពេលលោកអ្នកអធិស្ឋាន សូមនឹកចាំថា ព្រះទ្រង់បានត្រាស់ហៅយើងឲ្យក្លាយជាមនុស្សបែបម៉េចនៅក្នុង
ព្រះគ្រីស្ទ។
យើងងាយនឹងភ្លេចថា យើងជាកូនដែលបានជ្រើសរើស បានប្រោសលោះ និងបានទទួលការលើកលែងទោស
ពីព្រះអម្ចាស់។
៤. សូមអធិស្ឋានឲ្យបានច្បាស់លាស់តាមបទគម្ពីរសម្រាប់បុគ្គលម្នាក់នោះ
សូមបើកមើលលិបិក្រមនៅក្នុងព្រះគម្ពីរ ហើយអនុញ្ញាតឲ្យព្រះបន្ទូលដ៏មានព្រះជន្មគង់នៅ មានបន្ទូលមកកាន់យើង! សំបុត្រនៅក្នុងព្រះគម្ពីរ គឺជាកន្លែងដ៏ល្អដែលអាចបង្វែរទៅជាសេចក្តីអធិស្ឋានសម្រាប់គ្នាទៅវិញទៅមក។
ការបង្កើតសិស្សជាមួយអ្នកដទៃ ខ្ញុំអាចនឹងប្រាប់អ្នកណាម្នាក់ឲ្យបែរចេញពីអំពើបាបរបស់គាត់ ប៉ុន្តែវាកាន់តែខ្ទេចខ្ទាំ នៅពេលយើងអធិស្ឋានតាមកណ្ឌគម្ពីរ កូឡូស ជំពូក៣ ជាមួយគ្នា។ ខ្ញុំអាចនិយាយពាក្យមួយចំនួន ដើម្បីជាការសម្រាលទុក្ខដល់អ្នកណាម្នាក់ដែលកំពុងជួបការថប់បារម្ភ ប៉ុន្តែនៅក្នុងកណ្ឌគម្ពីរ ១ពេត្រុស ៥:៦-៧ គឺជាសេចក្តីអធិស្ឋានដែលអាចនាំមកនូវការសម្រាលទុក្ខច្រើនជាង ពាក្យសម្ដីដែលខ្ញុំបាននិយាយទៅកាន់គាត់។ នៅពេលមិត្តភក្ដិណាម្នាក់បានសួរយើងថា តើផែនការរបស់ព្រះជាម្ចាស់ល្អសម្រាប់ជីវិតគាត់ទេ នោះយើងអាចបើកទៅកណ្ឌគម្ពីរ រ៉ូម ជំពូក៨ មានពាក្យដែលមិនអាចកាត់ថ្លៃបានទាក់ទងនឹងរឿងនេះ។
នៅពេលដែលយើងអធិស្ឋានតាមសេចក្តីអធិស្ឋាននៃការសរសើរតម្កើង និងការអរព្រះគុណ នោះដូចជាយើងបានស្រែកដង្ហោយរកការផ្គត់ផ្គង់ និងសេចក្តីមេត្តាករុណារបស់ព្រះជាម្ចាស់ ហើយឲ្យទ្រង់បំពេញគ្រប់ទាំងពាក្យសម្ដីនៃការអធិស្ឋានរបស់យើងជាមួយនឹងបទគម្ពីរ ដែលធ្វើឲ្យដួងចិត្តរបស់យើងមានមូលគ្រឹះនៅក្នុងសេចក្តីពិត និងបានជំរុញឲ្យយើងកាន់តែមានជំនឿខ្លាំងឡើងទៅលើព្រះគ្រីស្ទ។
អធិស្ឋានឲ្យមានការរួបរួម និងសេចក្តីស្រឡាញ់
គ្មានអ្វីគួរឲ្យភ្ញាក់ផ្អើលនោះទេ ដែលយើងបានរីកចម្រើននៅក្នុងសេចក្តីស្រឡាញ់ចំពោះអស់អ្នកដែលយើងបានអធិស្ឋានឲ្យ។ យើងអាចរកឃើញខ្លួនយើងកំពុងប្រឈមមុខនឹងការប្រៀបធៀប និងការច្រណែនអ្នកជុំវិញ សូម្បីតែនៅក្នុងសហគមន៍គ្រីស្ទបរិស័ទជិតស្និទ្ធបំផុតរបស់យើងក៏ដោយ។ វាមានភាពងាយស្រួលក្នុងការដើរចូលទៅក្នុងព្រះវិហារ ក្រឡេកមើលស្ត្រីផ្សេង ហើយជឿលើការកុហកដែលយើងបានប្រាប់ខ្លួនយើងថា៖ ពួកគាត់ប្រាកដជាមិនមានបញ្ហាទេ ជីវិតរបស់ពួកគេគ្មានការលំបាក ហើយអាពាហ៍ពិពាហ៍ និងគ្រួសាររបស់ពួកគេក៏មាន
ភាពល្អឥតខ្ចោះ។
ប៉ុន្តែ នៅពេលយើងបង្កើតសិស្ស ហើយទទួលបានការបង្រៀនពីអ្នកដទៃ នោះយើងចងចាំថា មិនមែនមានតែយើងម្នាក់ឯងទេដែលកំពុងមានបញ្ហាជាមួយនឹងការភ័យខ្លាច និងការថប់បារម្ភ ហើយមិនមានការអត់ធ្មត់
នឹងកូនៗ ឬមានការសង្ស័យចំពោះសេចក្ដីល្អរបស់ព្រះជាម្ចាស់នោះឡើយ។
នៅពេលយើងធ្វើការវិនិយោគក្នុងជីវិតបងប្អូនសមាជិកក្រុមជំនុំ ហើយប្ដេជ្ញាចិត្តក្នុងការអធិស្ឋានសម្រាប់ពួកគាត់ នោះយើងនឹងរីកចម្រើនក្នុងការរួបរួម។ ការអធិស្ឋានបំបែកជញ្ជាំងនៃភាពអសុវត្ថិភាព និងការភ័យខ្លាច ហើយអនុញ្ញាតឲ្យយើងអាចពួតដៃបងប្អូនគ្រីស្ទបរិស័ទផ្សេងទៀត នៅពេលដែលយើងខិតខំរួមជាមួយគ្នា
ដើម្បីដើរតាមព្រះយេស៊ូវ។
កាលពីប៉ុន្មានឆ្នាំមុន មានស្ត្រីម្នាក់ដែលខ្ញុំទើបតែបានជួបគាត់បានចែករំលែកអំពីស្ថានភាពដែលគាត់កំពុងតយុទ្ធក្នុងការទុកចិត្តលើផែនការរបស់ព្រះសម្រាប់គាត់។ ការដែលគាត់មានឆន្ទៈក្នុងការចែករំលែកស្ថានភាពរបស់គាត់ គឺវាបានជួយឲ្យខ្ញុំអាចអធិស្ឋានសម្រាប់គាត់។ ការអធិស្ឋានឲ្យគាត់នេះ ដែលធ្វើឲ្យខ្ញុំមានចិត្តស្រឡាញ់
ចូលចិត្តគាត់ ទោះបីជាខ្ញុំមិនទាន់ស្គាល់គាត់ច្បាស់ក៏ដោយ!
ជាការពិតណាស់ អ្នកដែលលោកអ្នកអធិស្ឋានឲ្យគឺជាអ្នកដែលលោកអ្នកស្រឡាញ់ ហើយវាក៏ជាការពិតផងដែរថា លោកអ្នកក៏នឹងកាន់តែមានសេចក្ដីស្រឡាញ់អស់អ្នកដែលអ្នកអធិស្ឋានឲ្យដែរ។
អធិស្ឋានទោះបីមិនសូវមានភាពអំណោយផលក្ដី
ក្នុងការអធិស្ឋានមិនចាំបាច់ត្រូវការរយៈពេលយូរ ឬត្រូវមានគម្រោងយ៉ាងល្អឥតខ្ចោះនោះទេ។ វាអាចមានសម្លេងរញ៉េរញ៉ៃ និងការរំខាន ដោយមានក្មេងៗនៅជុំវិញ។ ខ្ញុំចងចាំមិនភ្លេចនូវក្នុងជំនួបរបស់ខ្ញុំជាមួយគ្រូផ្ដល់ឱវាទរបស់ខ្ញុំប៉ុន្មានឆ្នាំមុន នៅពេលដែលខ្ញុំមិនទាន់មានកូនម្នាក់សោះ ហើយគាត់មានកូនបីនាក់រួចទៅហើយ។
ខ្ញុំទើបតែបានធ្វើការជាមួយគាត់ ហើយបាននិយាយជាមួយគាត់អំពីរឿងរ៉ាវជីវិត។ ពេលដែលយើងបានចូល
ទៅក្នុងច្រកផ្លូវចូលផ្ទះរបស់គាត់ នោះគាត់បាននិយាយថា «សូមអធិស្ឋាននៅទីនេះ នៅក្នុងរថយន្ត មុនពេលដែលយើងឈានចូលទៅក្នុងភាពវឹកវរទាំងឡាយ»។
នៅពេលយើងចាប់ផ្ដើមអធិស្ឋាន មានបាល់មួយបានលោតមកបុកប៉ះនឹងបង្អួចឡាន។ នាងបានធ្វើការបើករំកិលបង្អួចឡានចុះក្រោម ហើយប្រាប់អ្នកវាយបាល់នោះថា «ខ្ញុំកំពុងតែអធិស្ឋាន ហើយនឹងបញ្ចប់ក្នុងរយៈពេលតែមួយនាទីប៉ុណ្ណោះ»។ បន្ទាប់មក នាងបានបិទបង្អួចឡានវិញ ហើយយើងក៏បានបញ្ចប់ការអធិស្ឋាន។
គំរូរបស់នាងបាននៅដក់ជាប់ជាមួយខ្ញុំ។ ជាញឹកញយ ខ្ញុំបានគិតខុសថា ការបង្កើតសិស្សត្រូវធ្វើឡើងជាមួយនឹងការបើកព្រះគម្ពីរឡើង ហើយត្រូវមានពេលស្ងៀមស្ងាត់ច្រើនក្នុងការអធិស្ឋាន។ ប៉ុន្តែ នេះមិនមែនជារបៀបនៃការរស់នៅសម្រាប់មនុស្សជាច្រើនអ្នកនោះទេ។
ទាំងនេះជាការណែនាំជាការអនុវត្តន៍ជាក់ស្ដែងមួយចំនួនក្នុងការអធិស្ឋានទាក់ទងនឹងការបង្កើតសិស្សតាមរយៈទំនាក់ទំនងលោកអ្នក៖
- អធិស្ឋានពេលកំពុងតែដើរ
- អធិស្ឋាននៅក្នុងឡាន បន្ទាប់ពីទទួលទានអាហារថ្ងៃត្រង់ ឬហូបកាហ្វេរួច
- អធិស្ឋានតាមទូរស័ព្ទជាមួយអ្នកដទៃ នៅពេលកំពុងបើកឡានទៅផ្ទះ
- ត្រូវប្រាកដដោយសួរថា តើមានអ្វីដែលលោកអ្នកអាចអធិស្ឋានឲ្យគេពេញមួយសប្ដាហ៍
- ត្រូវមានការបើកចំហសមល្មមក្នុងការសុំឲ្យអ្នកដទៃអធិស្ឋានឲ្យ
- ផ្ញើសារទៅកាន់មិត្តភក្ដិណាម្នាក់ ដើម្បីប្រាប់គាត់ឲ្យដឹងថា លោកអ្នកកំពុងអធិស្ឋានឲ្យគាត់
គ្រាន់តែអធិស្ឋាន!
ជាញឹកញាប់ ពេលខ្ញុំបែកគ្នាពីការជួបជាមួយបងប្អូនស្រីៗក្នុងព្រះគ្រីស្ទ ខ្ញុំតែងតែប្រាថ្នាថាបានអធិស្ឋានជាមួយគាត់ ឬអធិស្ឋានសម្រាប់ពួកគាត់។ ការអធិស្ឋានមិនមែនតែងតែងាយស្រួល ហើយវាមិនមែនតែងតែងាយស្រួលក្នុងការធ្វើ ឬអនុវត្តជាក់ស្ដែងនោះដែរ។ ទោះបីជាយ៉ាងណា ការអធិស្ឋានតែងតែល្អ ហើយយើងតែងទទួលបានព្រះពរតាមរយៈការអធិស្ឋានដែរ។
ដូច្នេះ នៅពេលយើងជួបជុំគ្នាក្នុងនាមជាស្ត្រី—យើងចែករំលែកអំពីជីវិតអាពាហ៍ពិពាហ៍ តួនាទីជាឪពុកម្តាយ និងបញ្ហាខាងឯវិញ្ញាណរបស់យើង—សូមប្ដេជ្ញាចិត្តអធិស្ឋានឲ្យគ្នាទៅវិញទៅមក។ សូមទុកពេលវេលាផ្ទាល់ខ្លួនរបស់យើងជាមួយគ្នាដោយជឿជាក់ថា យើងមានចេតនាក្នុងការល្អខាងឯវិញ្ញាណចំពោះគ្នាទៅវិញទៅមក។
មតិយោបល់
Loading…